Հունվարի 1-7-ը. Եվս մեկ վկայություն Հիսուս Քրիստոսի մասին

Մորմոնի Գրքի ներածական էջեր

Նախքան 1 Նեփի գլուխ 1-ի ընթերցումը դուք կնկատեք, որ Մորմոնի Գիրքը սովորական գիրք չէ։ Նրա ներածական էջերը նկարագրում են մի պատմություն, որը նման չէ որևէ այլ պատմության, և ներառում է՝ հրեշտակների այցելությունները, դարեր շարունակ բլրի լանջում թաղված հնագույն հիշատակարանը և մի երիտասարդի, որը թարգմանում է այդ հիշատակարանը Աստծո զորությամբ: Մորմոնի Գիրքը պարզապես հնագույն ամերիկյան քաղաքակրթությունների պատմություն չէ: Այն ձգտում է համոզել բոլորին «որ Հիսուսը Քրիստոսն է» (Մորմոնի Գրքի տիտղոսաթերթ), և Աստված Ինքն է ղեկավարել, թե ինչպես այն գրվի, պահպանվի և մատչելի դարձվի մեզ համար: Այս տարի, երբ կարդաք Մորմոնի Գիրքը, աղոթեք դրա մասին և կիրառեք դրա ուսմունքները, դուք ձեր կյանք կհրավիրեք Փրկչի զորությունը: Եվ նրա ազդեցությամբ ոգեշնչված՝ դուք գուցե կասեք այն, ինչ Երեք վկաներն ասացին իրենց վկայության մեջ. «Եվ [իմ] աչքում այս ամենը սքանչելի է»:

Գաղափարներ տանը և եկեղեցում սովորելու համար

Մորմոնի Գրքի տիտղոսաթերթը

Մորմոնի Գրքի ուսումնասիրությունը կարող է ամրացնել իմ հավատքն առ Հիսուս Քրիստոս

Մորմոնի Գրքի տիտղոսաթերթը ավելին է, քան պարզապես վերնագիր։ Ի թիվս այլ բաների՝ այն թվարկում է այս սրբազան հիշատակարանի մի քանի նպատակներ: Փնտրեք այդ նպատակները տիտղոսաթերթում: Նմանատիպ հարցերը կարող են օգնել ձեզ, երբ խորհեք. Ինչո՞ւ մենք ունենք Մորմոնի Գիրքը: Ինչո՞վ է Մորմոնի Գիրքը տարբերվում մյուս գրքերից։

Այժմ գուցե ճիշտ ժամանակն է՝ Մորմոնի Գրքի այս տարվա անհատական կամ ընտանեկան ընթերցանության ծրագիր կազմելու համար: Ե՞րբ և որտե՞ղ եք ընթերցելու այն: Ինչպե՞ս եք հրավիրելու Հոգուն ձեր ուսումնասիրության ընթացքում։ Կա՞ որևէ առանձնահատուկ բան, որը դուք կփնտրեք ուսումնասիրելիս: Օրինակ՝ կարող եք փնտրել հատվածներ, որոնք կիրականացնեն այն նպատակները, որոնք դուք գտաք տիտղոսաթերթում: Կարող եք հատվածների մի ցուցակ պահել, որոնք կառուցում են ձեր հավատքն առ Հիսուս Քրիստոս:

Տես նաև՝ 2 Նեփի 25.26, Մոսիա 3.5–8, Ալմա 5.48, 7.10–13, Հելաման 5.12, 3 Նեփի 9.13–18, 11.6–14, Մորոնի 10.32–33:

Մարգարեական խոստում Նախագահ Ռասսել Մ․ Նելսոնն ասել է. «Ես խոստանում եմ, որ մինչ դուք խորհում եք ձեր ուսումնասիրած նյութի շուրջ [Մորմոնի Գրքում], երկնքի պատուհանները կբացվեն, և դուք կստանաք ձեր հարցերի պատասխանները և ուղղորդում՝ ձեր կյանքի համար» («Մորմոնի Գիրքը․ Ինչպիսի՞ն կլիներ ձեր կյանքն առանց նրա», Լիահոնա, նոյեմբեր 2017, 62–63)։

Մորմոնի Գրքի նախաբանը, «Երեք վկաների վկայությունը», «Ութ վկաների վկայությունը»։

Ես կարող եմ լինել Մորմոնի Գրքի վկա

Սուրբ Հոգին կարող է վկայել ձեզ, որ Մորմոնի Գիրքը ճշմարիտ է, եթե նույնիսկ դուք չեք տեսել ոսկե թիթեղները, ինչպես Երեք Վկաները և Ութ Վկաները: Նրանց խոսքերը կարդալիս մտածեք այն մասին, թե ինչպես են նրանց վկայությունները զորացնում ձեր խոսքերը:

Ի՞նչն է ոգեշնչում ձեզ այն եղանակի մեջ, որով այս վկաները կիսվել են Մորմոնի Գրքի մասին իրենց վկայությամբ: Խորհեք, թե ինչպես կարող եք կիսվել Մորմոնի Գրքի մասին ձեր վկայությամբ, հատկապես` Հիսուս Քրիստոսի մասին նրա վկայությամբ: Օրինակ՝ պատկերացրեք, որ խոսում եք մի ընկերոջ հետ, որը նախկինում երբեք չի լսել Մորմոնի Գրքի մասին: Ի՞նչ կպատմեիք նրան Գրքի մասին: Ինչպե՞ս կոգեշնչեիք ձեր ընկերոջը կարդալ այն: Վերանայեք Մորմոնի Գրքի նախաբանը: Այնտեղ կարող եք գտնել մանրամասներ, որոնք օգտակար կլինեն կիսվելու ձեր ընկերոջ հետ: Հետևյալ տեսանյութերը ձեզ նույնպես գաղափարներ կտան:

• «Մորմոնի Գրքի նախաբանը»

• «Ի՞նչ է Մորմոնի Գիրքը: 60 վայրկյան տևողությամբ ակնարկ»

  Ի՞նչ է Մորմոնի Գիրքը:

• «Մի պատմություն Մորմոնի Գրքից»

Ցուցակ կազմեք և ընդգրկեք Մորմոնի Գրքի մասին այն ամենը, ինչով կկամենայիք կիսվել որևէ ընկերոջ հետ: Փորձեք կիսվել Մորմոնի Գրքով` օգտագործելով Մորմոնի Գրքի հավելվածը:

Տես նաև Ռոնալդ Ս. Ռասբանդ, «Այս օրը», Լիահոնա, նոյ. 2022, 25–28, Ավետարանական թեմաներ, «Մորմոնի Գիրքը», Ավետարանի գրադարան, «An Angel from on High», Hymns, no. 13:

Երեք վկաները վկայել են Մորմոնի Գրքի մասին։

«Մարգարե Ջոզեֆ Սմիթի վկայությունը»

Մորմոնի Գրքի ի հայտ գալը հրաշք էր

Եթե ինչ-որ մեկը ձեզ հարցներ, թե որտեղից է ի հայտ եկել Մորմոնի Գիրքը, ի՞նչ կասեիք: Ինչպե՞ս կնկարագրեիք Աստծո մասնակցությունը Մորմոնի Գիրքը մեզ տալու գործում։ Երբ կարդաք Ջոզեֆ Սմիթի վկայությունը, ուշադրություն դարձրեք, թե նա ինչպես է նկարագրում դա: Հիմնվելով ձեր կարդացածի վրա, ձեր կարծիքով, Տերն ինչպե՞ս է վերաբերվում Մորմոնի Գրքի կարևորությանը:

Տես նաև Ուլիսես Սոարեսի «Մորմոնի Գրքի ի հայտ գալը», Լիահոնա, մայիս 2020, 32–35, Սրբեր, հ. 1, Ճշմարտության դրոշը, 21–30, Gospel Topics Essays, «Book of Mormon Translation», Gospel Library:

Լրացուցիչ գաղափարների համար, տես այս ամսվա Լիահոնա և Երիտասարդներին զորացնելու համար ամսագրերի թողարկումները:

Գաղափարներ երեխաներին ուսուցանելու համար

Մորմոնի Գրքի տիտղոսաթերթը

Մորմոնի Գրքի ընթերցանությունն օգնում է ինձ հավատք ունենալ Հիսուս Քրիստոսի հանդեպ

• Թող երեխաները նայեն և ձեռքում պահեն Մորմոնի Գրքի մի օրինակ: Օգնեք նրանց մատնացույց անել` Եվս մեկ վկայություն Հիսուս Քրիստոսի մասին ենթավերնագիրը: Կարող եք օգնել նրանց տիտղոսաթերթի վրա գտնել նաև «Հիսուսը Քրիստոսն է՝ Հավերժական Աստվածը, որն իրեն հայտնում է բոլոր ազգերին» արտահայտությունը: Օգնեք նրանց հասկանալ, որ սա նշանակում է, որ Մորմոնի Գիրքն ուսուցանում է մեզ Հիսուս Քրիստոսի մասին: Համառոտ պատմեք երեխաներին, թե Մորմոնի Գիրքն ինչպես է ամրացրել ձեր հավատքը Հիսուս Քրիստոսի հանդեպ: Կարող եք նաև հարցնել նրանց Մորմոնի Գրքի իրենց սիրելի պատմությունների մասին: Երգելով «Book of Mormon Stories» (Children’s Songbook, 118–19) երգը՝ նրանք կհիշեն այդ պատմություններից մի քանիսը:

Մորմոնի գրքի նախաբանը

Մորմոնի Գիրքը մեր կրոնի պորտաքարն է

• Այս շաբաթվա գործնական աշխատանքի էջը և ներքևի պատկերը կարող են օգնել ձեր երեխաներին հասկանալ Ջոզեֆ Սմիթի այս խոսքերը Մորմոնի Գրքի նախաբանում. «Մորմոնի Գիրքը մեր կրոնի պորտաքարն [է]»: Կազմակերպեք մի զվարճալի միջոցառում. կառուցեք կամ նկարեք մի կամար, որի վերնամասում կա պորտաքար: Ի՞նչ կարող է պատահել, եթե հեռացվի պորտաքարը։ Ի՞նչ կպատահեր, եթե մենք չունենայինք Մորմոնի Գիրքը։ Դուք կարող եք միասին կարդալ նախաբանի վերջին պարբերությունը, պարզելով, թե ուրիշ ինչ ենք սովորում, երբ ընդունում ենք Մորմոնի Գրքի ճշմարտությունը: Ինչպե՞ս կարող ենք Մորմոնի Գիրքը դարձնել Հիսուս Քրիստոսի հանդեպ մեր հավատքի պորտաքարը:

Մորմոնի Գիրքը մեր կրոնի պորտաքարն է:

«Երեք վկաների վկայությունը», «Ութ վկաների վկայությունը»

Ես կարող եմ լինել Մորմոնի Գրքի վկա

• Որպեսզի օգնեք ձեր երեխաներին հասկանալ, թե ինչ է նշանակում լինել վկա, դուք կարող եք նկարագրել նրանց մի բան, որը դուք տեսել եք, իսկ նրանք՝ ոչ: Ապա թույլ տվեք նրանց նույնը անել ձեզ համար: Սա կարող է հանգեցնել զրույցի 11 մարդկանց մասին, ովքեր տեսան ոսկե թիթեղները, որոնցից թարգմանվեց Մորմոնի Գիրքը: Երբ միասին կարդաք վկայությունները, կարող եք խոսել այն մասին, թե ինչու այդ վկաները կամեցան, որ այլ մարդիկ իմանան իրենց վկայությունների մասին: Ո՞ւմ կկամենայինք պատմել Մորմոնի Գրքի մասին:

«Մարգարե Ջոզեֆ Սմիթի վկայությունը»

Մորմոնի Գիրքը մեզ տրվել է Աստծո զորությամբ

• Որպեսզի օգնեք երեխաներին սովորել, թե Աստված ինչպես տվեց մեզ Մորմոնի Գիրքը, կարող եք նրանց համար կարդալ հատվածներ «Մարգարե Ջոզեֆ Սմիթի վկայությունից»: Կարող եք նաև օգտագործել «Գլուխ 1. Ինչպես ձեռք բերեցինք Մորմոնի Գիրքը» ( Մորմոնի Գրքի պատմությունները գրքի 2-4-ում): Գուցե ձեր երեխաները բավականություն ստանան նաև մի քանի անգամ դերախաղով վերարտադրելով այս պատմությունը:

Լրացուցիչ գաղափարների համար տես այս ամսվա Ընկեր ամսագրի թողարկումը:

Մորոնին հանձնում է ոսկե թիթեղները, Գերի Լ. Կապ