« ថ្ងៃទី ២៦ ខែ កុម្ភៈ–ថ្ងៃទី ៣ ខែ មីនា ៖ ‹ គេនឹងហៅព្រះនាមទ្រង់ថា … ម្ចាស់នៃមេត្រីភាព › ។ នីហ្វៃទី២ ១១–១៩ » ចូរមកតាមខ្ញុំ—សម្រាប់គេហដ្ឋាន និងសាសនាចក្រ ៖ ព្រះគម្ពីរមរមន ឆ្នាំ ២០២៤ ( ឆ្នាំ ២០២៤ )
« ថ្ងៃទី ២៦ ខែ កុម្ភៈ–ថ្ងៃទី ៣ ខែ មីនា ។ នីហ្វៃទី២ ១១–១៩ » ចូរមកតាមខ្ញុំ—សម្រាប់គេហដ្ឋាន និងសាសនាចក្រ ៖ ឆ្នាំ ២០២៤ ( ឆ្នាំ ២០២៤ )
ថ្ងៃទី ២៦ ខែ កុម្ភៈ–ថ្ងៃទី ៣ ខែ មីនា ៖ « គេនឹងហៅព្រះនាមទ្រង់ថា … ម្ចាស់នៃមេត្រីភាព »
នីហ្វៃទី២ ១១–១៩
ការឆ្លាក់នៅលើផ្ទាំងដែកមិនស្រួលនោះទេ ហើយទំហំនៅលើផ្ទាំងតូចៗរបស់នីហ្វៃមានកំណត់ ។ ដូច្នេះ ហេតុអ្វីបានជានីហ្វៃខំប្រឹងប្រែងចម្លងសំណេរជាច្រើនរបស់ព្យាការីអេសាយទៅក្នុងកំណត់ត្រារបស់លោក ? លោកបានធ្វើវា ដោយសារតែលោកចង់ឲ្យយើងជឿលើព្រះយេស៊ូវគ្រីស្ទ ។ លោកបានសរសេរថា « ព្រលឹងខ្ញុំត្រេកអរក្នុងការបញ្ជាក់ដល់ប្រជាជនខ្ញុំនូវការពិតអំពីការយាងមកនៃព្រះគ្រីស្ទ » ( នីហ្វៃទី២ ១១:៤ ) ។ នីហ្វៃបានមើលឃើញអ្វីដែលអាចនឹងកើតឡើងចំពោះប្រជាជនរបស់លោកនៅជំនាន់ខាងមុខ ។ លោកបានមើលឃើញថា ទោះជាមានពរជ័យដ៏មហិមាក្តី ក៏ពួកគេមានភាពឆ្មើងឆ្មៃ ឈ្លោះប្រកែកគ្នា និងគិតតែរឿងខាងលោកិយដែរ ( សូមមើល នីហ្វៃទី១ ១២; ១៥:៤–៦ ) ។ លោកក៏បានមើលឃើញនូវបញ្ហាស្រដៀងគ្នានៅសម័យរបស់យើងផងដែរ ( សូមមើល នីហ្វៃទី១ ១៤ ) ។ សំណេររបស់អេសាយបានព្រមានប្រឆាំងទៅនឹងអំពើអាក្រក់បែបនេះ ។ ប៉ុន្តែវាក៏បានផ្តល់ក្តីសង្ឃឹមសម្រាប់អនាគតដ៏រុងរឿងមួយផងដែរ—ជាទីបញ្ចប់នៃអំពើទុច្ចរិត ការប្រមូលផ្ដុំនៃអ្នកស្មោះត្រង់ និង « ពន្លឺយ៉ាងធំ » ចំពោះអស់អ្នកដែល « ដើរក្នុងសេចក្តីងងឹត » ( នីហ្វៃទី២ ១៩:២ ) ។ អ្វីៗទាំងអស់នេះអាចកើតឡើងបាន ដោយសារ « បុត្រាមួយ [ បាន ] កើត » និងជាអង្គដែលបញ្ឈប់រាល់ជម្លោះទាំងអស់—ជា « ម្ចាស់នៃមេត្រីភាព » ( នីហ្វៃទី២ ១៩:៦ ) ។
គំនិតសម្រាប់ការរៀនសូត្រនៅឯគេហដ្ឋាន និងសាសនាចក្រ
តើខ្ញុំអាចយល់កាន់តែច្បាស់អំពីការបង្រៀនរបស់អេសាយតាមរបៀបណា ?
នីហ្វៃទទួលស្គាល់ថា « ពាក្យពេចន៍មួយចំនួនរបស់លោកអេសាយមិនច្បាស់ » ( នីហ្វៃទី២ ២៥:៤ ) ។ ប៉ុន្តែលោកក៏បានផ្ដល់គំនិតដើម្បីជួយយើងឲ្យរកឃើញអត្ថន័យនៅក្នុងសំណេររបស់អេសាយផងដែរ ៖
-
« ប្រៀបពាក្យទាំងឡាយរបស់លោក » ទៅនឹងខ្លួនរបស់បងប្អូន ( នីហ្វៃទី២ ១១:២ ) ។ ការបង្រៀនរបស់អេសាយជាច្រើនអាចមានអត្ថន័យ និងការអនុវត្តជាច្រើន ។ ឧទាហរណ៍ នៅពេលបងប្អូនអានអំពីទីលំនៅនៅក្នុង នីហ្វៃទី២ ១៤:៥–៦ សូមពិចារណារបៀបដែលខគម្ពីរទាំងនេះអនុវត្តនៅក្នុងគេហដ្ឋានរបស់បងប្អូន ។ សូមសួរខ្លួនឯងថា « តើព្រះវរបិតាសួគ៌ចង់ឲ្យខ្ញុំរៀនពីអ្វី ? »
-
រកមើលទីសម្គាល់ពីព្រះយេស៊ូវគ្រីស្ទ ( សូមមើល នីហ្វៃទី២ ១១:៤ ) ។ ការបង្រៀនជាច្រើនរបស់អេសាយអំពីព្រះអង្គសង្គ្រោះត្រូវបានបង្ហាញតាមរយៈនិមិត្តរូប ។ ឧទាហរណ៍ តើព្រះអង្គសង្រ្គោះត្រូវបានតំណាងឲ្យតាមរបៀបណានៅក្នុង នីហ្វៃទី២ ១៩:២ ? តើទីសម្គាល់នេះបង្រៀនបងប្អូនអ្វីខ្លះអំពីទ្រង់ ?
-
ខិតខំដើម្បីបាន « ពោរពេញទៅដោយវិញ្ញាណនៃការព្យាករ » ( នីហ្វៃទី២ ២៥:៤ ) ។ នៅពេលបងប្អូនសិក្សា សូមអធិស្ឋានទូលសូមការណែនាំខាងវិញ្ញាណ ។ បងប្អូនអាចពុំយល់រឿងគ្រប់យ៉ាងក្នុងពេលតែម្ដងនោះទេ ប៉ុន្តែព្រះវិញ្ញាណអាចជួយបងប្អូនឲ្យរៀនអំពីអ្វីដែលបងប្អូនចាំបាច់ត្រូវដឹង ។
បងប្អូនអាចរកឃើញថា វាមានប្រយោជន៍ដើម្បីយោងទៅ ជំនួយការសិក្សា នៅក្នុងព្រះគម្ពីរទាំងឡាយ ដោយបូករួមទាំងលេខយោង ចំណងជើងជំពូក និង សេចក្ដីណែនាំដល់បទគម្ពីរទាំងឡាយ ។ សៀវភៅសិក្សាព្រះគម្ពីរមរមន និងព្រះគម្ពីរសញ្ញាចាស់នៃថ្នាក់វិទ្យាស្ថានមានព័ត៌មានបន្ថែម ដែលអាចជួយបងប្អូនឲ្យរៀនអំពីបរិបទប្រវត្តិសាស្រ្តនៃការបង្រៀនរបស់អេសាយ ។
អេសាយបានថ្លែងបន្ទាល់អំពីព្រះយេស៊ូវគ្រីស្ទ ។
ដោយសារអេសាយបានប្រើភាសានិមិត្តរូប វាអាចងាយមើលរំលងសាក្សីដ៏មានអានុភាពរបស់លោកអំពីព្រះយេស៊ូវគ្រីស្ទ ។ សូមរកមើលព្រះអង្គសង្រ្គោះនៅក្នុង នីហ្វៃទី២ ១៣:១៣; ១៤:៤–៦; ១៥:១–៧; ១៦:១–៧; ១៧:១៤; ១៨:១៤–១៥; ២២:២ ។ តើខគម្ពីរទាំងនេះបង្រៀនយើងអ្វីខ្លះអំពីទ្រង់ ?
ការព្យាករនៅក្នុង នីហ្វៃទី២ ១៩:៦ មានសរសេរព្រះបរមងាររបស់ព្រះយេស៊ូវគ្រីស្ទជាច្រើន ។ តើទ្រង់បានបំពេញតួនាទីទាំងនេះក្នុងជីវិតរបស់បងប្អូនដោយរបៀបណា ?
សូមមើលផងដែរ អូលីសេស សូរ៉េស « ព្រះយេស៊ូវគ្រីស្ទ ៖ អង្គមើលថែនៃព្រលឹងរបស់យើង » លីអាហូណា ខែ ឧសភា ឆ្នាំ ២០២១ ទំព័រ ៨២–៨៤ ។
ពួកឆ្មើងឆ្មៃ និងពួកលោកិយនឹងត្រូវបន្ទាបចុះ ។
នីហ្វៃបានមើលឃើញជាមុនថា ភាពឆ្មើងឆ្មៃនឹងបណ្ដាលឲ្យប្រជាជនរបស់លោកធ្លាក់ចុះ ( សូមមើល នីហ្វៃទី១ ១២:១៩ ) ។ ដូច្នេះ វាពុំគួរឲ្យភ្ញាក់ផ្អើលនោះទេ ដែលនីហ្វៃនឹងចែកចាយជាមួយនឹងប្រជាជនរបស់លោកនូវការព្រមានដដែលៗរបស់អេសាយទាស់នឹងភាពឆ្មើងឆ្មៃនោះ ។ នៅក្នុង ជំពូកទី ១២ និង ១៣ សូមស្វែងរកពាក្យដែលអេសាយបានប្រើដើម្បីពិពណ៌នាអំពីភាពឆ្មើងឆ្មៃ ដូចជា តណ្ហា និង ឫកខ្ពស់ ។ នៅក្នុង នីហ្វៃទី២ ១៥:១–២៤ សូមរកមើលភាសានិមិត្តរូបដែលពិពណ៌នាអំពីលទ្ធផលនៃភាពឆ្មើងឆ្មៃ ។ បន្ទាប់មក បងប្អូនអាចព្យាយាមសង្ខេបអ្វីដែលបងប្អូនបានអានជាពាក្យសម្តីរបស់បងប្អូនផ្ទាល់ ។ សូមគិតអំពីរបៀបដែលបងប្អូននឹងជ្រើសរើសដើម្បីបន្ទាបខ្លួន ។
សូមមើលផងដែរ « Chapter 18: Beware of Pride » Teachings of Presidents of the Church: Ezra Taft Benson ( ឆ្នាំ ២០១៤ ) ទំព័រ ២២៩–៤០ ។
ព្រះវិហារបរិសុទ្ធគឺជាដំណាក់របស់ព្រះអម្ចាស់ ។
អេសាយបានហៅព្រះវិហារបរិសុទ្ធថា « ភ្នំជាទីសាងព្រះវិហារនៃព្រះអម្ចាស់ » ( នីហ្វៃទី២ ១២:២ ) ។ ហេតុអ្វីភ្នំគឺជាទីសម្គាល់ដ៏ល្អមួយសម្រាប់ព្រះវិហារបរិសុទ្ធ ?
តើបងប្អូននឹងពន្យល់នរណាម្នាក់ថា ហេតុអ្វីបានជាយើងត្រូវការព្រះវិហារបរិសុទ្ធដោយរបៀបណា ? បងប្អូនអាចស្វែងរកចម្លើយដែលអាចមាននៅក្នុង នីហ្វៃទី២ ១២:២–៣ និងសារលិខិតរបស់ប្រធាន រ័សុល អិម ណិលសុន « The Temple and Your Spiritual Foundation » ( Liahona ខែ វិច្ឆិកា ឆ្នាំ ២០២១ ទំព័រ៩៣–៩៦ ) ។ ដោយផ្អែកលើអ្វីដែលបងប្អូនបានអាន តើព្រះអម្ចាស់ចង់ឲ្យបងប្អូនរៀន និងមានបទពិសោធន៍អ្វីខ្លះនៅក្នុងដំណាក់ដ៏បរិសុទ្ធរបស់ទ្រង់ ? តើបងប្អូនមានបទពិសោធន៍អ្វីខ្លះនៅទីនោះ ?
បងប្អូនអាចស្វែងរកសំណួរសម្ភាសន៍ទទួលប័ណ្ណចូលព្រះវិហារបរិសុទ្ធនៅលើ ទំព័រ ៣៦–៣៧ នៃ ដើម្បីកម្លាំងនៃយុវជន ៖ សេចក្តីណែនាំដើម្បីធ្វើការជ្រើសរើស ។ សូមពិចារណាអានសំណួរនីមួយៗ ហើយសួរខ្លួនឯងថា តើសំណួរនេះបង្រៀនខ្ញុំអ្វីខ្លះអំពីមាគ៌ារបស់ព្រះអម្ចាស់ ? តើវាជួយខ្ញុំ « តាមផ្លូវទ្រង់ » ដោយរបៀបណា ?
សូមមើលផងដែរ Gospel Topics « Temples » នៅលើបណ្ណាល័យដំណឹងល្អ; « នៅលើកំពូលភ្នំខ្ពស់ » ទំនុកតម្កើង ល.រ. ៥ ។
ព្រះយេស៊ូវគ្រីស្ទនឹងប្រោសលោះរាស្រ្តរបស់ទ្រង់ ។
ទោះជាលោកបានសង្កេតឃើញអំពើទុច្ចរិតយ៉ាងណាក៏ដោយ ក៏អេសាយបានឃើញសេចក្តីសង្ឃឹមសម្រាប់ពេលអនាគតដែរ ។ សូមពិចារណាសិក្សាវគ្គបទគម្ពីរនីមួយៗខាងក្រោម ។ សូមសរសេរសេចក្តីពិតមួយ ឬច្រើនដែលវគ្គបទគម្ពីរនីមួយៗបង្រៀនអំពីសម័យរបស់យើង ៖ នីហ្វៃទី២ ១២:១–៥; ១៤:២–៦; ១៥:២០–២៦; ១៩:២–៨ ។ ហេតុអ្វីបានជាបងប្អូនមានអារម្មណ៍ថា វាសំខាន់ដែលយើងត្រូវយល់ពីវគ្គបទគម្ពីរទាំងនេះ ?
ដើម្បីទទួលបានគំនិតបន្ថែម សូមមើលទស្សនាវដ្តី លីអាហូណា និង ដើម្បីកម្លាំងនៃយុវជន ប្រចាំខែនេះ ។
រកមើលលំនាំនានា ។ នៅក្នុងព្រះគម្ពីរ យើងអាចស្វែងរកលំនាំនានាដែលបង្ហាញយើងអំពីរបៀបដែលព្រះអម្ចាស់ធ្វើកិច្ចការទាំងឡាយ ។ នៅក្នុង នីហ្វៃទី២ ១១–១៩ បងប្អូនអាចនឹងស្វែងរកគំរូដែលបង្ហាញពីរបៀបដែលព្រះអម្ចាស់ព្រមានពីអំពើបាប និងអភ័យទោសដល់មនុស្សដែលប្រែចិត្ត ។
គំនិតសម្រាប់បង្រៀនកុមារ
ព្រះវិហារបរិសុទ្ធគឺជាដំណាក់របស់ព្រះអម្ចាស់ ។
-
អេសាយបានពិពណ៌នាពីព្រះវិហារបរិសុទ្ធថាជា « ភ្នំជាទីសាងព្រះវិហារនៃព្រះអម្ចាស់ » ។ កូនៗរបស់បងប្អូនប្រហែលជារីករាយក្នុងការសម្តែងជាឡើងភ្នំ នៅពេលបងប្អូនអាន នីហ្វៃទី២ ១២:២–៣ ។ សូមជួយពួកគេឲ្យស្វែងរកឃ្លានៅក្នុងខគម្ពីរទាំងនេះ ដែលពិពណ៌នាអំពីមូលហេតុដែលយើងមានព្រះវិហារបរិសុទ្ធ ។
-
ដើម្បីបង្ហាញពីឃ្លា « យើងនឹងដើរតាមផ្លូវទាំងឡាយរបស់ទ្រង់ » មកពី នីហ្វៃទី២ ១២:៣ បងប្អូនអាចធ្វើផ្លូវនៅលើឥដ្ឋ ដែលនាំទៅកាន់រូបភាពព្រះវិហារបរិសុទ្ធមួយ ។ នៅពេលកូនៗរបស់បងប្អូនដើរលើផ្លូវ នោះពួកគេអាចរាប់ឈ្មោះកិច្ចការដែលពួកគេអាចធ្វើបាន ដើម្បីដើរនៅលើផ្លូវរបស់ព្រះអម្ចាស់ ។
-
ប្រហែលជាកូនៗរបស់បងប្អូនអាចគូររូបរបស់ពួកគេកំពុងទៅព្រះវិហារបរិសុទ្ធ ។ ពួកគេក៏អាចច្រៀង ឬស្ដាប់បទចម្រៀងអំពីព្រះវិហារបរិសុទ្ធ ដូចជាបទ « ខ្ញុំចូលចិត្តមើលព្រះវិហារបរិសុទ្ធ » ( សៀវភៅចម្រៀងកុមារ ទំព័រ ៩៩ ) បានផងដែរ ។ សូមជួយពួកគេឲ្យស្វែងរកឃ្លានៅក្នុងបទចម្រៀងនេះ ដែលបង្រៀនអំពីព្រះវិហារបរិសុទ្ធ និងអ្វីដែលយើងធ្វើនៅទីនោះ ។
នីហ្វៃទី២ ១១:៤–៧; ១៧:១៤; ១៩:៦
ព្រះយេស៊ូវគ្រីស្ទគឺជាព្រះអង្គសង្រ្គោះរបស់ខ្ញុំ ។
-
មានព្រះនាមជាច្រើនសម្រាប់ព្រះយេស៊ូវគ្រីស្ទនៅក្នុង នីហ្វៃទី២ ១១:៤–៧; ១៧:១៤; ១៩:៦ ។ សូមជួយកូនៗរបស់បងប្អូនស្វែងរកវា ហើយនិយាយអំពីអត្ថន័យរបស់វា ។ ឧទាហរណ៍ « ព្រះគ្រីស្ទ » មានន័យថា « ចាក់ប្រេងតាំង » និង « អេម៉ាញូអែល » មានន័យថា « ព្រះអង្គទ្រង់គង់នៅជាមួយនឹងយើងខ្ញុំ » ។ តើព្រះនាមទាំងនេះបង្រៀនយើងអ្វីខ្លះអំពីព្រះយេស៊ូវគ្រីស្ទ ?
-
សូមបង្ហាញផ្នែកខ្លះៗនៃវីដេអូ « The Christ Child » ( បណ្ណាល័យដំណឹងល្អ ) ដែលបង្ហាញពីមនុស្សខុសៗគ្នា ដែលបានឃើញព្រះយេស៊ូវជាលើកដំបូង ។ សូមផ្អាកវីដេអូនៅក្នុងទិដ្ឋភាពទាំងនេះ ហើយសួរកូនៗរបស់បងប្អូនថា តើមនុស្សទាំងនេះអាចមានអារម្មណ៍យ៉ាងណា ។ តើយើងនឹងមានអារម្មណ៍យ៉ាងណា ប្រសិនបើយើងនៅទីនោះ ? តើយើងនឹងមានអារម្មណ៍យ៉ាងណា នៅពេលយើងឃើញទ្រង់ម្តងទៀត ?
សាតាំងព្យាយាមបំភាន់ខ្ញុំអំពីអំពើល្អ និងអំពើអាក្រក់ ។
-
សូមបង្ហាញកូនៗរបស់បងប្អូននូវអ្វីដែលចត់ ឬជូរៗ ដូចជាចំណិតក្រូចឆ្មា នៅខាងក្នុងកញ្ចប់ស្ករគ្រាប់ ។ សូមអានជាមួយគ្នាក្នុង នីហ្វៃទី២ ១៥:២០ ។ តើសាតាំងព្យាយាមធ្វើឲ្យអ្វីដែលអាក្រក់មើលទៅថាល្អដោយរបៀបណា ? បងប្អូនក៏អាចបង្ហាញ ៩០ វិនាទីដំបូងនៃវីដេអូ « You Will Be Freed » ( បណ្ណាល័យដំណឹងល្អ ) ផងដែរ ។ ហេតុអ្វីអ្នកនេសាទត្រីក្លែងបន្លំផ្លែសន្ទូចរបស់គាត់ ? ហេតុអ្វីសាតាំងក្លែងបន្លំអំពើបាប ? តើព្រះយេស៊ូវគ្រីស្ទជួយយើងឲ្យចៀសវាងពីការបោកបញ្ឆោតរបស់សាតាំងដោយរបៀបណា ?
2:58អ្នកនឹងមានសេរីភាព
តាមរយៈដង្វាយធួនរបស់ព្រះយេស៊ូវគ្រីស្ទ មនុស្សទាំងអស់អាចត្រូវបានផ្លាស់ប្ដូរ លាងសម្អាត ហើយមានសេរីភាពពីការញៀន ។
ដើម្បីទទួលបានគំនិតបន្ថែម សូមមើលទស្សនាវដ្តី ប្រិយមិត្ត ប្រចាំខែនេះ ។
ព្រះវិហារបរិសុទ្ធទីក្រុងប៉ាណាម៉ា ប្រទេសប៉ាណាម៉ា ។ « ព្រះវិហារនៃព្រះអម្ចាស់នឹងបានតាំងឡើងខ្ពស់លើសអស់ទាំងភ្នំធំៗ … ហើយអស់ទាំងសាសន៍នឹងចូលហូរហែទៅក្នុងទីនោះ » ( នីហ្វៃទី២ ១២:២ ) ។