« ថ្ងៃទី ២២–២៨ ខែ មេសា ៖ ‹ ពោរពេញទៅដោយសេចក្ដីស្រឡាញ់ចំពោះព្រះ និងចំពោះមនុស្សទាំងអស់ › ។ ម៉ូសាយ ១–៣ » ចូរមកតាមខ្ញុំ—សម្រាប់គេហដ្ឋាន និងសាសនាចក្រ ៖ ឆ្នាំ ២០២៤ ( ឆ្នាំ ២០២៤ )
« ថ្ងៃទី ២២–២៨ ខែ មេសា ។ ម៉ូសាយ ១–៣ » ចូរមកតាមខ្ញុំ—សម្រាប់គេហដ្ឋាន និងសាសនាចក្រ ៖ ឆ្នាំ ២០២៤ ( ឆ្នាំ ២០២៤ )
Receiving the Teachings of King Benjamin [ ការទទួលយកការបង្រៀនរបស់ស្តេចបេនយ៉ាមីន ] ដោយ ម៉ារីអា អាឡិចហានដ្រា ហ្គីល
ថ្ងៃទី ២២–២៨ ខែ មេសា ៖ « ពោរពេញទៅដោយសេចក្ដីស្រឡាញ់ចំពោះព្រះ និងចំពោះមនុស្សទាំងអស់ »
ម៉ូសាយ ១–៣
នៅពេលបងប្អូនឮពាក្យ ស្ដេច បងប្អូនអាចគិតអំពីមកុដ បាវបម្រើ និងបល្ល័ង្ក ។ នៅក្នុង ម៉ូសាយ ១–៣ បងប្អូននឹងអានអំពីស្តេចមួយអង្គផ្សេងទៀត ។ ជាជាងការរស់នៅដោយសារការធ្វើការរបស់ប្រជាជន ស្ដេចបេនយ៉ាមីន « បានធ្វើការដោយដៃរបស់ [ ទ្រង់ ] » ( ម៉ូសាយ ២:១៤ ) ។ ជំនួសឲ្យអ្នកដទៃបម្រើដល់ទ្រង់ នោះទ្រង់បានបម្រើដល់រាស្ត្ររបស់ទ្រង់ « អស់ពីសមត្ថភាព អស់ពីគំនិត និងអស់ពីកម្លាំងដែលព្រះអម្ចាស់ [ បាន ] ប្រទានមកឲ្យ [ ទ្រង់ ] » ( ម៉ូសាយ ២:១១ ) ។ ស្ដេចអង្គនេះពុំចង់ឲ្យរាស្ត្ររបស់ទ្រង់ថ្វាយបង្គំទ្រង់ទេ តែទ្រង់បានបង្រៀនពួកគេឲ្យថ្វាយបង្គំស្តេចសួគ៌ារបស់ពួកគេដែលជាព្រះយេស៊ូវគ្រីស្ទវិញ ។ ស្តេចបេនយ៉ាមីនយល់ថាគឺ « ព្រះអម្ចាស់ដ៏មានគ្រប់ព្រះចេស្ដា ទ្រង់សោយរាជ្យ » ( ម៉ូសាយ ៣:៥ ) ដែលបាន « យាងចុះមកពីស្ថានសួគ៌ » ហើយ « យាងចុះមកក្នុងចំណោមរាស្ត្រ … ដើម្បីឲ្យមានសេចក្ដីសង្គ្រោះដល់កូនចៅមនុស្ស ស្របតាមសេចក្ដីជំនឿជឿដល់ព្រះនាមទ្រង់ » ( ម៉ូសាយ ៣:៥, ៩ ) ។
គំនិតសម្រាប់ការរៀនសូត្រនៅឯគេហដ្ឋាន និងសាសនាចក្រ
« ត្រូវពិចារណាមើល [ ព្រះគម្ពីរ ] ដោយព្យាយាម » ។
នៅក្នុងខគម្ពីរទាំងនេះ សូមកត់សម្គាល់ពីរបៀបដែលកំណត់ត្រាដ៏ពិសិដ្ឋនេះបានផ្ដល់ពរដល់ប្រជារាស្រ្តរបស់ស្តេចបេនយ៉ាមីន ។ តើជីវិតរបស់បងប្អូនបានប្រសើរឡើងដោយរបៀបណា ដោយសារបងប្អូនមានគម្ពីរទាំងនោះ ?
នៅពេលខ្ញុំបម្រើអ្នកដទៃ ខ្ញុំក៏កំពុងបម្រើដល់ព្រះផងដែរ ។
តើបងប្អូនគិតថា ស្ដេចបេនយ៉ាមីននឹងមានបន្ទូលអ្វីខ្លះ ប្រសិនបើបងប្អូនសួរដល់ទ្រង់ថា ហេតុអ្វីទ្រង់បម្រើ « អស់ពីសមត្ថភាព អស់ពីចិត្ត និងអស់ពីកម្លាំងរបស់ទ្រង់ » ? ( ម៉ូសាយ ២:១១ ) ។ សូមគិតអំពីរឿងនេះ នៅពេលបងប្អូនអាន ម៉ូសាយ ២:១០–២៦ ។ តើស្តេចបេនយ៉ាមីនបង្រៀនអ្វីខ្លះ ដែលបំផុសគំនិតបងប្អូនឲ្យបម្រើអ្នកដទៃតាមរបៀបដែលមានន័យជាងនេះ ? ឧទាហរណ៍ តើវាមានន័យយ៉ាងណាចំពោះបងប្អូនដែលត្រូវដឹងថា នៅពេលបងប្អូនបម្រើដល់អ្នកដទៃ នោះបងប្អូនក៏កំពុងបម្រើដល់ព្រះផងដែរ ? ( សូមមើល ម៉ូសាយ ២:១៧ ) ។ សូមស្វែងរកការបំផុសគំនិតអំពីរបៀបដែលបងប្អូនអាចបម្រើនរណាម្នាក់នៅក្នុងសប្តាហ៍នេះ ។
សូម្បីតែពេលយើងដឹងថា យើងគួរបម្រើអ្នកដទៃក៏ដោយ ក៏ពេលខ្លះយើងប្រឈមមុខនឹងបញ្ហានានាផងដែរ ។ របៀបមួយទៀតដើម្បីសិក្សា ម៉ូសាយ ២:១០–២៦ គឺត្រូវបង្កើតបញ្ជីនៃសេចក្តីពិតដែលស្តេចបេនយ៉ាមីនបានបង្រៀន ដែលអាចជួយបងប្អូនឲ្យយកឈ្នះលើឧបសគ្គនានាដែលអាចរារាំងបងប្អូនពីការបម្រើ ។ តើបទពិសោធន៍អ្វីខ្លះដែលបង្ហាញបងប្អូនថា អ្វីដែលស្ដេចបេនយ៉ាមីនបានបង្រៀនគឺជាការពិត ?
ប្រធាន ចយ ឌី ចូនស៍ បានចែករំលែកបទពិសោធន៍ដ៏មានឥទ្ធិពលមួយ ដែលបានផ្លាស់ប្តូររបៀបដែលគាត់គិតអំពីការបម្រើអ្នកដទៃ ។ សូមអានអំពីបទពិសោធន៍នេះនៅក្នុង « For Him » ( Ensign ឬ Liahona ខែ វិច្ឆិកា ឆ្នាំ ២០១៨ ទំព័រ ៥០–៥២ ) ហើយគិតអំពីឱកាសបម្រើអ្នកដទៃដែលបងប្អូនមាន ។ បងប្អូនអាចសរសេរបញ្ជីមួយចំនួន ហើយជញ្ជឹងគិតពីរបៀបដែលសារលិខិតរបស់ប្រធាន ចូនស៍ រួមជាមួយនឹង ម៉ូសាយ ២:១៧ អាចមានឥទ្ធិពលទៅលើរបៀបដែលបងប្អូនមានឱកាសទាំងនេះ ។ ទំនុកតម្កើងដូចជាបទ « អ្នកធ្វើដំណើរដ៏ក្រតោកយ៉ាក » ( ទំនុកតម្កើង ១៧ ) ឬវីដេអូដូចជា « The Old Shoemaker » ( បណ្ណាល័យដំណឹងល្អ ) អាចជួយបងប្អូនឲ្យគិតពីការយល់ដឹងបន្ថែមទៀតបាន ។
សូមមើលផងដែរ ម៉ាថាយ ២៥:៤០; « Faith Murray’s Story: Overcoming Adversity through Service » និង « King Benjamin Teaches about Serving God » ( វីដេអូ ) នៅលើបណ្ណាល័យដំណឹងល្អ; គេហទំព័រ JustServe.org; Gospel Topics « Service » នៅលើបណ្ណាល័យដំណឹងល្អ ។
ស្តេចបេនយ៉ាមីនបង្រៀនអំពីការបម្រើព្រះ ម៉ូសាយ ២: ៩ - ១១, ១៤, ១៧
ស្តេចបេនយ៉ាមីនបង្រៀនប្រជាជននៅសារ៉ាហិមឡាថា ស្តេចដែលល្អនឹងបម្រើមនុស្សដទៃ ហើយធ្វើការជាមួយពួកគេ ។ ទ្រង់បង្រៀនថានៅពេលយើងបម្រើមនុស្សដទៃ គឺយើងកំពុងបម្រើដល់ព្រះ ។
នៅពេលខ្ញុំបម្រើអ្នកដទៃ ខ្ញុំក៏កំពុងបម្រើដល់ព្រះផងដែរ ។
សុភមង្គលកើតចេញពីការគោរពតាមព្រះបញ្ញត្តិរបស់ព្រះ ។
តើបងប្អូននឹងពិពណ៌នាអំពីសុភមង្គលដែលបានមកពីការស្តាប់បង្គាប់ព្រះដោយរបៀបណា ? តើមានឃ្លាណាមួយនៅក្នុង ម៉ូសាយ ២:៣៨–៤១ ដែលនឹងជួយបងប្អូនឲ្យពន្យល់ពីមូលហេតុ ដែលបងប្អូនកាន់តាមព្រះបញ្ញត្តិរបស់ទ្រង់ ?
ខ្ញុំអាចក្លាយទៅជាពួកបរិសុទ្ធបានតាមរយៈដង្វាយធួននៃព្រះយេស៊ូវគ្រីស្ទ ។
ដូចជាពួកព្យាការីទាំងអស់ដែរ ស្ដេចបេនយ៉ាមីនបានថ្លែងទីបន្ទាល់អំពីព្រះយេស៊ូវគ្រីស្ទ ដូច្នេះរាស្ត្ររបស់ទ្រង់ « នឹងបានទទួលការផ្ដាច់បាបរបស់ខ្លួន ហើយនឹងបានអររីករាយដោយអំណរដ៏អតិបរមា » ( ម៉ូសាយ ៣:១៣ ) ។ ទាំងនេះគឺជាសំណួរមួយចំនួនដើម្បីពិចារណា នៅពេលបងប្អូនអានទីបន្ទាល់របស់ស្ដេចបេនយ៉ាមីនអំពីព្រះអង្គសង្គ្រោះនៅក្នុង ម៉ូសាយ ៣:១–២០ ៖
-
តើខ្ញុំរៀនអ្វីខ្លះនៅក្នុងខគម្ពីរទាំងនេះអំពីព្រះអង្គសង្គ្រោះ និងបេសកកម្មរបស់ទ្រង់ ?
-
តើខ្ញុំរៀនអ្វីខ្លះមកពី ម៉ូសាយ ៣:១៨–១៩ អំពីអត្ថន័យនៃការក្លាយជាពួកបរិសុទ្ធ ?
-
តើព្រះយេស៊ូវគ្រីស្ទបានជួយខ្ញុំឲ្យផ្លាស់ប្ដូរនិស្ស័យ ហើយប្រែក្លាយជាពួកបរិសុទ្ធយ៉ាងដូចម្ដេច ?
« ព្រះអម្ចាស់ដ៏មានគ្រប់ព្រះចេស្ដា … នឹងយាងចុះមកពីស្ថានសួគ៌ » ។
តើថាមពលអគ្គិសនីផ្តល់ឲ្យបងប្អូននូវសមត្ថភាពក្នុងការធ្វើអ្វីខ្លះ ? តើជីវិតរបស់បងប្អូននឹងខុសគ្នាយ៉ាងណាបើគ្មានថាមពលនេះទេនោះ ? សំណួរទាំងនេះអាចជួយបងប្អូនឲ្យជញ្ជឹងគិតអំពីព្រះចេស្តាដ៏អស្ចារ្យ ដែលព្រះអង្គសង្គ្រោះអាចនាំមកនៅក្នុងជីវិតរបស់បងប្អូនបាន ។
ទេវតាដែលបានបង្ហាញកាយដល់ស្ដេចបេនយ៉ាមីនបានហៅព្រះយេស៊ូវគ្រីស្ទថាជា « ព្រះអម្ចាស់ដ៏មានគ្រប់ព្រះចេស្ដា » ជាព្រះបរមងារដែលមានន័យថា ទ្រង់មានគ្រប់ទាំងព្រះចេស្តាទាំងអស់ ។ តើបងប្អូនរៀនអ្វីខ្លះមកពី ម៉ូសាយ ៣:៥–២១ អំពីរបៀបដែលព្រះអង្គសង្រ្គោះប្រើព្រះចេស្តានោះ ? តើបងប្អូនបានឃើញព្រះចេស្តារបស់ព្រះអង្គសង្រ្គោះនៅក្នុងជីវិតរបស់បងប្អូន និងជីវិតនៃមនុស្សដែលនៅជុំវិញបងប្អូនដោយរបៀបណា ? តើព្រះចេស្តារបស់ទ្រង់អាចឲ្យបងប្អូនធ្វើ និងក្លាយជាអ្វី ? តើជីវិតរបស់បងប្អូននឹងខុសគ្នាយ៉ាងណាបើគ្មានថាមពលនេះទេនោះ ?
ដើម្បីទទួលបានគំនិតបន្ថែម សូមមើលទស្សនាវដ្តី លីអាហូណា និង ដើម្បីកម្លាំងនៃយុវជន ប្រចាំខែនេះ ។
គំនិតសម្រាប់បង្រៀនកុមារ
នៅពេលខ្ញុំបម្រើអ្នកដទៃគឺខ្ញុំកំពុងបម្រើដល់ព្រះ ។
-
ទំព័រសកម្មភាពសប្តាហ៍នេះមានមកុដដ៏សាមញ្ញមួយដែលកូនៗរបស់បងប្អូនអាចធ្វើបាន ។ ប្រហែលជាពួកគេចង់ប្ដូរវេនឈរលើកៅអី ឬជើងម៉ា ហើយសម្តែងជាស្ដេចបេនយ៉ាមីន ខណៈដែលបងប្អូនចែកចាយរឿងខ្លះៗដែលស្ដេចបេនយ៉ាមីនបានបង្រៀនប្រជាជនរបស់ទ្រង់ ដែលមាននៅក្នុង ម៉ូសាយ ២–៣ ។ បងប្អូនក៏អាចចែកចាយជាមួយពួកគេចេញពី « ជំពូកទី ១២ ៖ ស្តេចបេនយ៉ាមីន » ( ដំណើររឿងព្រះគម្ពីរមរមន ទំព័រ ៣២–៣៥ ) ដើម្បីផ្តល់ឲ្យពួកគេនូវទិដ្ឋភាពទូទៅអំពីការបង្រៀនរបស់ស្តេចបេនយ៉ាមីនផងដែរ ។
-
ម៉ូសាយ ២:១៧ អាចជាខគម្ពីរដ៏ល្អមួយសម្រាប់កូនៗរបស់បងប្អូនដើម្បីរៀន ។ បងប្អូនអាចជួយពួកគេឲ្យអានវាម្តងបន្តិចៗ ។ ឬបងប្អូនអាចសរសេរខគម្ពីរនេះ ដោយមានពាក្យគន្លឹះជាច្រើនដែលបាត់ ហើយសុំឲ្យកូនៗរបស់បងប្អូនស្វែងរកពាក្យដែលបាត់នោះ ។ បន្ទាប់មក បងប្អូនអាចនិយាយជាមួយកូនៗរបស់បងប្អូន អំពីមូលហេតុដែលព្រះចង់ឲ្យយើងបម្រើគ្នាទៅវិញទៅមក ។
-
បងប្អូនអាចជួយកូនៗរបស់បងប្អូនឲ្យស្រាវជ្រាវនៅក្នុង ម៉ូសាយ ២:១១–១៨ ដើម្បីស្វែងយល់អំពីអ្វីដែលស្តេចបេនយ៉ាមីនបានធ្វើដើម្បីបម្រើអ្នកដទៃ ។ បន្ទាប់មក កូនៗរបស់បងប្អូនអាចសរសេរនៅលើស្លាកក្រដាសនានា នូវវិធីមួយចំនួនដែលពួកគេអាចបម្រើសមាជិកគ្រួសារបាន ។ សូមដាក់ក្រដាសនៅក្នុងធុងមួយ ដូចជាថង់ ឬដប ដើម្បីឲ្យកូនៗរបស់បងប្អូនអាចរើសយកក្រដាសមួយជារៀងរាល់ថ្ងៃ ហើយធ្វើការបម្រើដល់នរណាម្នាក់ ។
កុមារទទួលបានប្រយោជន៍មកពីការធ្វើសកម្មភាពដដែលៗ ។ សូមកុំខ្លាចនឹងធ្វើសកម្មភាពនានាច្រើនដងច្រើនសាឡើយ ជាពិសេសជាមួយនឹងកុមារតូចៗ ។ ការធ្វើសាឡើងវិញនឹងជួយកុមារឲ្យចងចាំអ្វីដែលពួកគេបានរៀន ។
ស្តេចបេនយ៉ាមីនបានបង្រៀនថា យើងអាចបម្រើព្រះបានតាមរយៈការបម្រើអ្នកដទៃ ។
ពរជ័យទាំងអស់របស់ខ្ញុំបានមកពីព្រះវរបិតាសួគ៌ ។
-
ការបម្រើរបស់ស្តេចបេនយ៉ាមីនចំពោះប្រជាជនរបស់ទ្រង់ ត្រូវបានបំផុសគំនិតដោយការដឹងគុណយ៉ាងជ្រាលជ្រៅរបស់ទ្រង់ចំពោះព្រះ ។ តើបងប្អូននឹងបំផុសគំនិតស្រដៀងគ្នានេះក្នុងកូនៗរបស់បងប្អូនដោយរបៀបណា ? បងប្អូនអាចអានជាមួយគ្នាក្នុង ម៉ូសាយ ២:២១ ហើយចាប់ផ្តើមសរសេរបញ្ជីពរជ័យដែលព្រះវរបិតាសួគ៌បានប្រទានដល់យើង ។ បន្ទាប់មក ប្រហែលជាបងប្អូនអាចបន្ថែមទៅក្នុងបញ្ជីពរជ័យនោះនូវពរជ័យផ្សេងៗទៀតដែលកូនៗគិតដល់ ។
-
នេះជាល្បែងដែលបងប្អូនអាចលេងបាន ដើម្បីជួយកូនៗរបស់បងប្អូនឲ្យស្គាល់ពរជ័យរបស់ព្រះវរបិតាសួគ៌ ។ កុមារអាចហុចរូបភាពព្រះអង្គសង្គ្រោះទៅជុំវិញ នៅពេលពួកគេច្រៀង ឬស្តាប់បទចម្រៀងអំពីការដឹងគុណ ( សូមមើល « ការដឹងគុណ » នៅក្នុងលិបិក្រមប្រធានបទនៃ សៀវភៅចម្រៀងកុមារ ) ។ សូមឈប់ច្រៀង ឬឈប់ភ្លេងជាប្រចាំ ហើយអញ្ជើញអ្នកណាដែលកាន់រូបភាពឲ្យនិយាយអំពីពរជ័យដែលពួកគេមានអំណរគុណ ។ យោងទៅតាម ម៉ូសាយ ២:២២–២៤ តើយើងអាចបង្ហាញថា យើងដឹងគុណចំពោះពរជ័យរបស់យើងដោយរបៀបណា ?
ព្រះយេស៊ូវគ្រីស្ទនឹងជួយខ្ញុំឲ្យប្រែក្លាយកាន់តែដូចជាទ្រង់ ។
-
ទេវតាមួយអង្គបានមានបន្ទូលប្រាប់ស្តេចបេនយ៉ាមីនអំពីសារៈសំខាន់នៃសេចក្តីពិតស្តីអំពីព្រះជន្ម និងការងារបម្រើរបស់ព្រះយេស៊ូវគ្រីស្ទ ។ ប្រហែលជាបងប្អូន និងកូនៗរបស់បងប្អូនអាចរកមើលរូបភាពនៃព្រឹត្តិការណ៍មួយចំនួនដែលបានរៀបរាប់នៅក្នុង ម៉ូសាយ ៣:៥–១០ ( សូមមើល ឧទាហរណ៍ សៀវភៅរូបភាពដំណឹងល្អ ល.រ. ៣០, ៤១, ៤២, ៥៧, ៥៩ ) ។ នៅពេលបងប្អូនអាន ម៉ូសាយ ៣:៥–១០ កូនៗរបស់បងប្អូនអាចលើកដៃពួកគេបាន នៅពេលដែលពួកគេឮអ្វីមួយនៅក្នុងអត្ថបទដែលមានបង្ហាញនៅក្នុងរូបភាពណាមួយ ។
-
តើកូនៗរបស់បងប្អូនធ្លាប់ជួយរៀបចំអាហារដោយប្រើរូបមន្តធ្វើម្ហូបដែរឬទេ ? ប្រហែលជាបងប្អូនអាចនិយាយអំពីបទពិសោធន៍នោះ ហើយប្រើ ម៉ូសាយ ៣:១៩ ដើម្បីធ្វើជា « រូបមន្ត » មួយដែលយើងអាចប្រែក្លាយដូចជាព្រះយេស៊ូវគ្រីស្ទបាន ។ តើព្រះយេស៊ូវគ្រីស្ទជួយយើងឲ្យប្រែក្លាយដូចជាទ្រង់តាមរបៀបណា ?
ដើម្បីទទួលបានគំនិតបន្ថែម សូមមើលទស្សនាវដ្តី ប្រិយមិត្ត ប្រចាំខែនេះ ។
សុន្ទរកថារបស់ស្ដេចបេនយ៉ាមីន ដោយ ជេរីមី វិនប៊ឺហ្គ