« ថ្ងៃទី ១៥–២១ ខែ កក្កដា ៖ ‹ គុណធម៌នៃព្រះបន្ទូលនៃព្រះ › ។ អាលម៉ា ៣០–៣១ » ចូរមកតាមខ្ញុំ—សម្រាប់គេហដ្ឋាន និងសាសនាចក្រ ៖ ព្រះគម្ពីរមរមន ឆ្នាំ ២០២៤ ( ឆ្នាំ ២០២៣ )
« ថ្ងៃទី ១៥–២១ ខែ កក្កដា ។ អាលម៉ា ៣០–៣១ » ចូរមកតាមខ្ញុំ—សម្រាប់គេហដ្ឋាន និងសាសនាចក្រ ៖ ឆ្នាំ ២០២៤ ( ឆ្នាំ ២០២៣ )
All Things Denote There Is a God (Alma and Korihor) [ គ្រប់ការណ៍ទាំងអស់បង្ហាញឲ្យឃើញថា មានព្រះមួយអង្គ ( អាលម៉ា និងកូរីហូរ ) ] ដោយ វ៉លធើរ រ៉េន
ថ្ងៃទី ១៥–២១ ខែ កក្កដា ៖ « គុណធម៌នៃព្រះបន្ទូលនៃព្រះ »
អាលម៉ា ៣០–៣១
ដំណើររឿងនៅក្នុង អាលម៉ា ៣០–៣១ បង្ហាញយ៉ាងច្បាស់អំពីព្រះចេស្ដានៃព្រះបន្ទូល—ចំពោះសេចក្តីអាក្រក់ និងសេចក្តីល្អ ។ « ពាក្យបញ្ចើចបញ្ចើ » និង « ពាក្យក្រអោងដាក់ » របស់គ្រូបង្រៀនក្លែងក្លាយឈ្មោះ កូរីហូរ បានគម្រាមគំហែងដើម្បីនាំ « ព្រលឹងជាច្រើនទៅក្នុងការបំផ្លិចបំផ្លាញ » ( អាលម៉ា ៣០:៣១, ៤៧ ) ។ ស្រដៀងគ្នានេះដែរ ការបង្រៀនរបស់សាសន៍នីហ្វៃបំបែកខ្លួនម្នាក់ឈ្មោះ សូរាំ បាននាំមនុស្សមួយក្រុមឲ្យធ្លាក់ទៅក្នុង « កំហុសយ៉ាងធំ » ហើយ « បានបង្ខូចផ្លូវទាំងឡាយនៃព្រះអម្ចាស់ » ( អាលម៉ា ៣១:៩, ១១ ) ។
ផ្ទុយទៅវិញ អាលម៉ាមានសេចក្ដីជំនឿដ៏មុតមាំថា ព្រះបន្ទូលរបស់ព្រះនឹងមាន « ប្រសិទ្ធភាពទៅលើគំនិតមនុស្សច្រើនជាងផ្លែដាវ ឬអ្វីផ្សេងៗទៀត » ( អាលម៉ា ៣១:៥ ) ។ ពាក្យសម្ដីរបស់អាលម៉ាបានបង្ហាញអំពីសេចក្ដីពិតដ៏អស់កល្បជានិច្ច ហើយទាញយកព្រះចេស្ដានៃស្ថានសួគ៌មកធ្វើឲ្យ កូរីហូរ ស្ងាត់មាត់ ( សូមមើល អាលម៉ា ៣០:៣៩–៥០ ) ហើយពួកលោកបានទូលសូមពរជ័យរបស់ទ្រង់មកលើអ្នកទាំងឡាយដែលបានចេញទៅជាមួយលោក ដើម្បីនាំពួកសាសន៍សូរាំឲ្យត្រឡប់មករកសេចក្ដីពិតវិញ ( សូមមើល អាលម៉ា ៣១:៣១–៣៨ ) ។ ទាំងនេះគឺជាគំរូដ៏មានតម្លៃសម្រាប់អ្នកដើរតាមព្រះគ្រីស្ទនាសព្វថ្ងៃនេះ នៅពេលសារក្លែងក្លាយគឺជារឿងធម្មតា ។ យើងអាចស្វែងរកសេចក្ដីពិតបានតាមរយៈការទុកចិត្តលើ « គុណធម៌នៃព្រះបន្ទូលនៃព្រះ » ដូចជាអាលម៉ាបានធ្វើដែរ ( អាលម៉ា ៣១:៥ ) ។
គំនិតសម្រាប់ការរៀនសូត្រនៅឯគេហដ្ឋាន និងសាសនាចក្រ
មារសត្រូវព្យាយាមបោកបញ្ឆោតខ្ញុំដោយការបង្រៀនក្លែងក្លាយ ។
នៅក្នុង អាលម៉ា ៣០ កូរីហូរត្រូវបានហៅថាជា « អ្នកទទឹងនឹងព្រះគ្រីស្ទ » ( ខទី ៦ ) ។ អ្នកប្រឆាំងនឹងព្រះគ្រីស្ទគឺជានរណាម្នាក់ ឬអ្វីក៏ដោយដែលប្រឆាំងនឹងព្រះយេស៊ូវគ្រីស្ទ និងដំណឹងល្អរបស់ទ្រង់ដោយបើកចំហ ឬដោយសម្ងាត់ ។ តើខគម្ពីរណាខ្លះនៅក្នុង អាលម៉ា ៣០:៦–៣១ បង្ហាញថា កូរីហូរ ត្រូវទៅនឹងការពិពណ៌នានេះ ? ការសិក្សាអំពីការបង្រៀនក្លែងក្លាយរបស់ កូរីហូរអាចជួយបងប្អូនឲ្យស្គាល់ និងបដិសេធការបង្រៀនស្រដៀងគ្នានេះបាន ។ សកម្មភាពខាងក្រោមនេះអាចជួយនៅក្នុងការសិក្សារបស់បងប្អូនបាន ៖
-
តើមានមេរៀនដែលប្រើវត្ថុអ្វីខ្លះ ដែលបងប្អូនអាចគិតដល់ ដើម្បីយល់កាន់តែច្បាស់ពីភាពខុសគ្នារវាងការបង្រៀនរបស់ព្រះអង្គសង្រ្គោះ និងការត្រាប់តាមក្លែងបន្លំរបស់សាតាំង ? ឧទាហរណ៍ខ្លះមានដូចជា នុយដែលប្រើសម្រាប់ស្ទូចត្រី លុយក្លែងក្លាយ និងការផ្សព្វផ្សាយមិនពិត ។ តើបងប្អូនអាចដឹងដោយរបៀបណាថា មួយណាក្លែងក្លាយដែលឬទេ ? តើបងប្អូនអាចស្គាល់សេចក្ដីពិតដោយរបៀបណា ?
-
សូមពិចារណាធ្វើបញ្ជីមួយអំពីគោលលទ្ធិខុសឆ្គងដែល កូរីហូរបានបង្រៀននៅក្នុង អាលម៉ា ៣០:៦–៣១ ។ តើការបង្រៀនរបស់គាត់មួយណា ដែលអាចមានភាពទាក់ទាញនៅពេលសព្វថ្ងៃនេះ ? ( សូមមើល អាលម៉ា ៣០:១២–១៨, ២៣–២៨ ) ។ តើអាចមានគ្រោះថ្នាក់អ្វីខ្លះ ដែលជាលទ្ធផលមកពីការទទួលយកគំនិតបែបនោះ ? តើសារក្លែងក្លាយអ្វីខ្លះដែលមារសត្រូវប្រើ ដើម្បីព្យាយាមបោកបញ្ឆោតបងប្អូននៅពេលសព្វថ្ងៃនេះ ?
-
តើអាលម៉ាបានធ្វើអ្វីខ្លះ ដើម្បីប្រឆាំងទៅនឹងការបង្រៀនរបស់កូរីហូរជាមួយនឹងសេចក្ដីពិត ? ( សូមមើល អាលម៉ា ៣០:៣១–៥៤ ) ។ តើបងប្អូនអាចប្រើគោលការណ៍ដូចគ្នាទាំងនេះក្នុងជីវិតរបស់បងប្អូនបានយ៉ាងដូចម្ដេច ?
ដូចជាអាលម៉ាដែរ ព្យាការី និងពួកសាវកសម័យទំនើបជួយយើងឲ្យដឹងពីភាពខុសគ្នារវាងសេចក្ដីពិត និងការកុហករបស់សាតាំង ។ តើបងប្អូនរកឃើញដំបូន្មានអ្វីខ្លះនៅក្នុងសារទាំងនេះ ៖ ហ្គែរី អ៊ី ស្ទីវ៉ែនសុន « Deceive Me Not » ( Liahona ខែ វិច្ឆិកា ឆ្នាំ ២០១៩ ទំព័រ ០០–០០ ); ដាល្លិន អេក អូក « Be Not Deceived » ( Liahona ខែ វិច្ឆិកា ឆ្នាំ ២០០៤ ទំព័រ ០០ ) ។
សូមមើលផងដែរ Gospel Topics « Seek Truth and Avoid Deception » នៅលើបណ្ណាល័យដំណឹងល្អ; « ការពិតនោះជាអ្វី ? » ទំនុកតម្កើង ល.រ. ១៧០ ។
Korihor Confronts Alma [ កូរីហូរប្រឈមមុខនឹងអាលម៉ា ] ដោយ រ៉ូប៊ើត ធី បារែត
គ្រប់ការណ៍ទាំងអស់ថ្លែងទីបន្ទាល់អំពីព្រះ ។
មនុស្សជាច្រើនសព្វថ្ងៃនេះជឿថាគ្មានព្រះទេ ។ តើបងប្អូនរកឃើញអ្វីខ្លះនៅក្នុង អាលម៉ា ៣០:៣៩–៤៦ ដែលជួយបងប្អូនឲ្យដឹងថាមានព្រះពិតមែន ? តើអ្វីទៅដែលរារាំងយើងមិនឲ្យស្គាល់ទ្រង់ ? តើមានទីបន្ទាល់អ្វីផ្សេងទៀតដែលព្រះបានប្រទានដល់បងប្អូន ដែលថាទ្រង់មានព្រះជន្មនៅរស់ ?
មារសត្រូវមិនគាំទ្រអ្នកដើរតាមរបស់វាទេ ។
តើយើងរៀនអ្វីខ្លះមកពី អាលម៉ា ៣០:៥៦–៦០ អំពីរបៀបដែលអារក្សធ្វើដាក់អ្នកដើរតាមរបស់វា ? តើយើងអាចធ្វើអ្វីបានខ្លះ ដើម្បីការពារគ្រួសាររបស់យើងប្រឆាំងនឹងឥទ្ធិពលរបស់វា ?
សូមមើល អាលម៉ា ៣៦:៣ ។
ព្រះបន្ទូលរបស់ព្រះមានព្រះចេស្ដាដើម្បីដឹកនាំមនុស្សទៅរកសេចក្ដីសុចរិត ។
បញ្ហារបស់ប្រជាជនសូរាំដែលបំបែកខ្លួនចេញពីសាសន៍នីហ្វៃ អាចនឹងមើលទៅហាក់ដូចជាត្រូវការដំណោះស្រាយចាំបាច់ខាងនយោបាយ ឬខាងកងទ័ព ( សូមមើលអាលម៉ា ៣១:១–៤ ) ។ ប៉ុន្តែអាលម៉ាបានរៀនទុកចិត្តទៅលើ « គុណធម៌នៃព្រះបន្ទូលនៃព្រះ » ( អាលម៉ា ៣១:៥ ) ។ តើបងប្អូនរៀនអ្វីខ្លះមកពី អាលម៉ា ៣១:៥ អំពីព្រះចេស្តានៃព្រះបន្ទូលរបស់ព្រះ ? ( សូមមើលផងដែរ ហេព្រើរ ៤:១២; នីហ្វៃទី១ ១៥:២៣–២៤; នីហ្វៃទី២ ៣១:២០; យ៉ាកុប ២:៨; ហេលេមិន ៣:២៩–៣០ ) ។
នៅពេលបងប្អូនសិក្សា អាលម៉ា ៣១ តើសេចក្ដីពិតដំណឹងល្អផ្សេងទៀតណាខ្លះ ដែលបងប្អូនអាចរកឃើញ ដែលអនុវត្តចំពោះបទពិសោធន៍នៅក្នុងជីវិតរបស់បងប្អូន ? ឧទាហរណ៍ ៖
-
តើបងប្អូនធ្លាប់ឃើញព្រះបន្ទូលនៃព្រះដឹកនាំមនុស្សឲ្យធ្វើកិច្ចការល្អដោយរបៀបណា ? ( សូមមើល ខទី ៥ ) ។
-
សូមប្រៀបធៀបអាកប្បកិរិយា អារម្មណ៍ និងសកម្មភាពរបស់អាលម៉ាអំពីអ្នកដទៃ ( សូមមើល ខទី ៣៤–៣៥ ) ជាមួយនឹងអាកប្បកិរិយា អារម្មណ៍ និងសកម្មភាពរបស់ពួកសាសន៍សូរាំ ( សូមមើល ខទី ១៧–២៨ ) ។ តើបងប្អូនអាចកាន់តែប្រែក្លាយដូចជាអាលម៉ាដោយរបៀបណា ?
-
តើបងប្អូនរកឃើញអ្វីខ្លះនៅក្នុង អាលម៉ា ៣១:៣០–៣៨ ដែលអាចជួយដល់មនុស្សដែលសោកសៅដោយសារអំពើបាបរបស់អ្នកដទៃ ?
ដោយសារតែព្រះយេស៊ូវគ្រីស្ទ នោះមនុស្សគ្រប់គ្នាអាចផ្លាស់ប្តូរបាន ។
សូមកត់ចំណាំក្រុមមនុស្សដែលអាលម៉ាបានយកទៅជាមួយលោក ដើម្បីបង្រៀនដំណឹងល្អដល់ពួកសាសន៍សូរាំ ( សូមមើល អាលម៉ា ៣១:៦ ) ។ តើបងប្អូនរៀនអ្វីខ្លះអំពីជីវិតរបស់មនុស្សទាំងនេះនៅក្នុង ម៉ូសាយ ២៧:៨–៣៧; ២៨:៤; អាលម៉ា ១០:១–៦; ១១:២១–២៥; ១៥:៣–១២ ។ តើអាចមានសារលិខិតអ្វីខ្លះសម្រាប់បងប្អូននៅក្នុងបទពិសោធន៍របស់ពួកគេ ?
សម្រាប់គំនិតបន្ថែម សូមមើលទស្សនាវដ្តី លីអាហូណា និង ដើម្បីកម្លាំងនៃយុវជន ប្រចាំខែនេះ ។
គំនិតសម្រាប់បង្រៀនកុមារ
ព្រះគម្ពីរមរមនព្រមានខ្ញុំទាស់នឹងការបង្រៀនក្លែងក្លាយ ។
-
សូមពិចារណាបង្ហាញវត្ថុមួយចំនួន ( ដូចជា ប្រាក់ ឬម្ហូបអាហារ ) និងប្រដាប់ប្រដាក្មេងលេងនៃវត្ថុទាំងនេះ ។ ការធ្វើដូចនេះអាចនាំឲ្យមានការពិភាក្សាអំពីរបៀបដើម្បីដឹងពីភាពខុសគ្នារវាងរបស់ដែលពិត និងរបស់ដែលមិនពិតបាន ។ បន្ទាប់មក បងប្អូនអាចជួយកូនៗរបស់បងប្អូនឲ្យរកមើលការកុហក ឬការបង្រៀនក្លែងក្លាយដែលកូរីហូរបានបង្រៀនអំពីព្រះ ចេញមកពី អាលម៉ា ៣០:១២–១៨ បាន ។ នៅក្នុង អាលម៉ា ៣០:៣២–៣៥ តើអាលម៉ាបានឆ្លើយតបដោយរបៀបណាចំពោះការកុហកទាំងនោះ ? តើយើងរៀនអ្វីខ្លះមកពីគំរូរបស់លោក ?
គ្រប់ការណ៍ទាំងអស់ថ្លែងទីបន្ទាល់អំពីព្រះ ។
-
អាលម៉ាបានថ្លែងអំពីរបៀបដែលអ្វីៗដែលមាននៅលើមេឃ និងនៅលើផែនដីនេះថ្លែងទីបន្ទាល់ថា ព្រះមានព្រះជន្មនៅរស់ ។ ប្រសិនបើអាច សូមដើរចេញទៅក្រៅថ្នាក់ជាមួយកុមារ ឬសូមឲ្យពួកគេឈរក្បែរបង្អួច នៅពេលបងប្អូនអាន អាលម៉ា ៣០:៤៤ ។ សូមឲ្យពួកគេចង្អុលបង្ហាញអ្វីៗដែលពួកគេឃើញ ដែលជួយពួកគេឲ្យដឹងថា ព្រះមានពិតមែន ហើយថាទ្រង់ស្រឡាញ់ពួកគេ ។ ពួកគេក៏អាចគូររូបភាពនៃអ្វីដែលពួកគេបានរកឃើញផងដែរ ( សូមមើល ទំព័រសកម្មភាពសប្តាហ៍នេះ ) ។
-
ខណៈពេលដែលបងប្អូន និងកូនៗរបស់បងប្អូនច្រៀងបទ « ព្រះវរបិតាស្រឡាញ់ខ្ញុំ » ( សៀវភៅចម្រៀងកុមារ ទំព័រ ១៦ ) សូមហុចបាល់ ឬវត្ថុផ្សេងទៀតតៗគ្នា ។ នៅពេលតន្ត្រីឈប់ម្តងៗ សូមឲ្យកុមារដែលកាន់បាល់ ឬវត្ថុនោះចែកចាយអ្វីមួយដែលព្រះវរបិតាសួគ៌បានបង្កើតដែលគាត់មានអំណរគុណចំពោះវត្ថុនោះ ។
កុមាររៀនតាមរយៈជំនួយចក្ខុវិញ្ញាណ ។ ជំនួយចក្ខុវិញ្ញាណនឹងជួយឲ្យកូនៗរបស់បងប្អូនយល់បានកាន់តែច្បាស់ និងចងចាំបានយូរជាងមុននូវអ្វីដែលពួកគេបានរៀន ។ សកម្មភាពភាគច្រើនសម្រាប់កុមារនៅក្នុងគម្រោងមេរៀននេះណែនាំឲ្យប្រើជំនួយចក្ខុវិញ្ញាណ ។ សូមពិចារណាបង្ហាញជំនួយចក្ខុវិញ្ញាណដដែលនេះនៅពេលអនាគត ដើម្បីជួយកូនៗរបស់បងប្អូនឲ្យចងចាំនូវអ្វីដែលពួកគេបានរៀន ។
ព្រះបន្ទូលនៃព្រះពោរពេញដោយព្រះចេស្តា ។
-
តើបងប្អូនអាចជួយកូនៗរបស់បងប្អូនឲ្យយល់ថា ព្រះបន្ទូលនៃព្រះមានឥទ្ធិពលជាង « អ្វីផ្សេងៗទៀត » យ៉ាងដូចម្ដេច ? ( អាលម៉ា ៣១:៥ ) ។ សូមពិចារណាសុំឲ្យកុមារគិតអំពីអ្វីមួយ ឬនរណាម្នាក់ដែលមានអំណាច ឬបង្ហាញរូបភាពពីរបីអំពីអ្វីដែលមានឥទ្ធិពលខ្លាំង ។ តើអ្វីដែលធ្វើឲ្យវាមានឥទ្ធិពលខ្លាំង ? សូមអាន អាលម៉ា ៣១:៥ ជាមួយគ្នា ហើយសួរកុមារថាតើពួកគេគិតថា ខគម្ពីរនេះមានន័យយ៉ាងដូចម្តេច ? សូមចែកចាយបទពិសោធន៍មួយ នៅពេលដែលព្រះបន្ទូលនៃព្រះមានឥទ្ធិពលខ្លាំងមកលើបងប្អូន ។
ព្រះវរបិតាសួគ៌ព្រះសណ្ដាប់ការអធិស្ឋានរបស់ខ្ញុំ ។
-
សូមសង្ខេបដំណើររឿងរបស់អាលម៉ា និងពួកសាសន៍សូរាំដោយប្រើខគម្ពីរមកពី អាលម៉ា ៣១:៨–៣៥ ( សូមមើលផងដែរ « ជំពូកទី ២៨ ៖ ពួកសាសន៍សូរាំ និងរ៉ាមីអុមតុម » ដំណើររឿងព្រះគម្ពីរមរមន ទំព័រ ៧៨–៨០ ) ។ សូមជួយកុមារឲ្យស្គាល់អ្វីដែលពួកសាសន៍សូរាំបាននិយាយនៅក្នុងការអធិស្ឋានរបស់ពួកគេ ( សូមមើល អាលម៉ា ៣១:១៥–១៨ ) នៅពេលពួកគេជួយបងប្អូនសង់ប៉មរ៉ាមីអុមតុមដោយប្រើដុំឈើ ឬដុំថ្ម ។ សូមពន្យល់ថា ការណ៍នេះពុំមែនជារបៀបដែលយើងគួរអធិស្ឋាននោះទេ ។ នៅពេលបងប្អូន និងកូនៗរបស់បងប្អូននិយាយអំពីរបៀបដែលយើងគួរអធិស្ឋាន សូមឲ្យពួកគេដកយកដុំឈើ ឬដុំថ្មនោះចេញម្តងមួយៗ ។ ប្រហែលជាពួកគេអាចទុកថ្មមួយនៅក្បែរគ្រែរបស់ពួកគេ ទុកជាការរំឭកមួយដើម្បីអធិស្ឋានជារៀងរាល់ព្រឹក និងរាល់យប់ ។ ពួកគេអាចនឹងចូលចិត្តតុបតែងលើថ្មរបស់ពួកគេនោះផងដែរ ។
សម្រាប់គំនិតបន្ថែម សូមមើលទស្សនាវដ្តី ប្រិយមិត្ត ប្រចាំខែនេះ ។
ដួងចិត្តរបស់ពួកសាសន៍សូរាំ « ត្រូវបានលើកឡើងដល់ការអួតអាងយ៉ាងធំនៅក្នុងសេចក្ដីឆ្មើងឆ្មៃរបស់គេ » ( អាលម៉ា ៣១:២៥ ) ។