« ថ្ងៃទី ១–៧ ខែ កក្កដា ៖ ‹ យើងនឹងយកអ្នកធ្វើជាគ្រឿងឧបករណ៍មួយ › ។ អាលម៉ា ១៧–២២ » ចូរមកតាមខ្ញុំ—សម្រាប់គេហដ្ឋាន និងសាសនាចក្រ ៖ ព្រះគម្ពីរមរមន ឆ្នាំ ២០២៤ ( ឆ្នាំ ២០២៣ )
« ថ្ងៃទី ១–៧ ខែ កក្កដា ។ អាលម៉ា ១៧–២២ » ចូរមកតាមខ្ញុំ—សម្រាប់គេហដ្ឋាន និងសាសនាចក្រ ៖ ឆ្នាំ ២០២៤ ( ឆ្នាំ ២០២៣ )
អាំម៉ូន និងស្តេចឡាម៉ូណៃ ដោយ ស្កត អិម ស្នូ
ថ្ងៃទី ១–៧ ខែ កក្កដា ៖ « យើងនឹងយកអ្នកធ្វើជាគ្រឿងឧបករណ៍មួយ »
អាលម៉ា ១៧–២២
សូមគិតអំពីមូលហេតុទាំងអស់ដែលមនុស្សអាចមានក្នុងការមិនចែកចាយដំណឹងល្អ ៖ « ខ្ញុំពុំដឹងច្រើនទេ » ឬ « ខ្ញុំមិនប្រាកដថាពួកគេនឹងចាប់អារម្មណ៍ទេ » ឬប្រហែលជា « ខ្ញុំខ្លាចថាគេបដិសេធខ្ញុំ » ។ ប្រហែលជាបងប្អូននឹងឃើញថា បងប្អូនកំពុងគិតរឿងស្រដៀងគ្នានេះពេលខ្លះផងដែរ ។ ពួកសាសន៍នីហ្វៃមានមូលហេតុបន្ថែមមួយក្នុងការមិនចែកចាយដំណឹងល្អជាមួយនឹងសាសន៍លេមិន ៖ ពួកគេថាពួកសាសន៍លេមិនគឺជា « ប្រជាជនមួយដែលព្រៃផ្សៃ រឹងរូស និងសាហាវ ជាប្រជាជនមួយដែលចូលចិត្តក្នុងការធ្វើឃាតកម្មដល់ពួកនីហ្វៃ » ( អាលម៉ា ១៧:១៤; សូមមើលផងដែរ អាលម៉ា ២៦:២៣–២៥ ) ។ ប៉ុន្តែពួកបុត្រារបស់ស្ដេចម៉ូសាយមានមូលហេតុមួយកាន់តែខ្លាំងជាងនេះទៅទៀត ដែលជាមូលហេតុដែលពួកទ្រង់មានអារម្មណ៍ថាពួកទ្រង់ ត្រូវតែ ចែកចាយដំណឹងល្អជាមួយនឹងពួកសាសន៍លេមិន ៖ « ពួកគេមានបំណងចង់ប្រកាសប្រាប់ពីសេចក្ដីសង្គ្រោះដល់សត្វលោកគ្រប់រូប ព្រោះពួកគេពុំអាចទ្រាំឲ្យព្រលឹងមនុស្សណាម្នាក់ត្រូវវិនាសឡើយ » ( ម៉ូសាយ ២៨:៣ ) ។ សេចក្ដីស្រឡាញ់នេះដែលបានបំផុសគំនិតដល់ អាំម៉ូន និងបងប្អូនប្រុសរបស់ទ្រង់ ក៏អាចបំផុសគំនិតដល់បងប្អូនឲ្យចែកចាយដំណឹងល្អជាមួយនឹងគ្រួសារ មិត្តភក្ដិរបស់បងប្អូន និងអ្នកស្គាល់គ្នាបានផងដែរ—សូម្បីតែអស់អ្នកដែលមើលទៅហាក់ដូចជាពុំចង់ទទួលយកដំណឹងល្អក្ដី ។
គំនិតសម្រាប់ការរៀនសូត្រនៅឯគេហដ្ឋាន និងសាសនាចក្រ
ទង្វើសាមញ្ញ និងខ្ជាប់ខ្ជួននៃការលះបង់ចំពោះព្រះគ្រីស្ទ ជួយខ្ញុំឲ្យទទួលបានព្រះចេស្តារបស់ទ្រង់ ។
តើបងប្អូនរៀនអ្វីខ្លះមកពី អាលម៉ា ១៧:១–៤ អំពីរបៀបរក្សាទីបន្ទាល់ និងការតាំងចិត្តរបស់បងប្អូនចំពោះព្រះយេស៊ូវគ្រីស្ទឲ្យបានរឹងមាំ ? តើពួកបុត្រារបស់សេ្តចម៉ូសាយបានធ្វើអ្វីខ្លះ ហើយតើព្រះអម្ចាស់បានប្រទានពរដល់ពួកទ្រង់យ៉ាងដូចម្ដេច ?
នៅពេលបងប្អូនអានអំពីបទពិសោធន៍របស់ពួកបុត្រារបស់ស្តេចម៉ូសាយនៅក្នុង អាលម៉ា ១៧–២២ សូមកត់សម្គាល់ថា តើការរៀបចំខ្លួនខាងវិញ្ញាណរបស់ពួកទ្រង់បានជះឥទ្ធិពលលើការបម្រើរបស់ពួកទ្រង់ក្នុងចំណោមពួកសាសន៍លេមិនយ៉ាងដូចម្តេច ( ឧទាហរណ៍ សូមមើល អាលម៉ា ១៨:១០–១៨, ៣៤–៣៦; ២០:២–៥; ២២:១២–១៦ ) ។ តើបងប្អូនមានអារម្មណ៍បំផុសគំនិតឲ្យធ្វើអ្វីខ្លះ ដើម្បីធ្វើតាមគំរូរបស់ពួកទ្រង់ ?
ខ្ញុំអាចធ្វើជាគ្រឿងឧបករណ៍នៅក្នុងព្រះហស្ដរបស់ព្រះបាន ។
ដំណើររឿងទាំងឡាយនៃការប្រែចិត្តជឿដែលយើងបានអាននៅក្នុងព្រះគម្ពីរ ជាញឹកញាប់មានព្រឹត្តិការណ៍អស្ចារ្យជាច្រើន ប៉ុន្តែចំណុចសំខាន់នៃដំណើររឿងទាំងនោះ ជាធម្មតាយើងឃើញថា បុគ្គលម្នាក់ៗមានភាពក្លាហាននៅក្នុងការនិយាយ និងចែកចាយសេចក្តីជំនឿរបស់ពួកគេទៅលើព្រះយេស៊ូវគ្រីស្ទ ។ សូមគិតអំពីរឿងនេះ នៅពេលដែលបងប្អូនអានអំពី អ័ប៊ីស និងពួកបុត្រារបស់ស្តេចម៉ូសាយនៅសប្តាហ៍នេះ ។
តើបងប្អូនគិតថា ការធ្វើជាគ្រឿងឧបករណ៍នៅក្នុងព្រះហស្ដរបស់ព្រះមានន័យយ៉ាងដូចម្តេច ? វាអាចជួយបានពេលគិតអំពីឧបករណ៍ ឬគ្រឿងដែលបងប្អូនអាចប្រើប្រាស់ក្នុងជីវិតប្រចាំថ្ងៃរបស់បងប្អូន ។ នៅក្នុង អាលម៉ា ១៧:៦–១២ សូមរកមើលនូវអ្វីដែលពួកបុត្រារបស់ស្តេចម៉ូសាយបានធ្វើ ដើម្បីពួកទ្រង់អាចធ្វើជាគ្រឿងឧបករណ៍នៅក្នុងព្រះហស្ដរបស់ព្រះបាន ។ តើបងប្អូនអាចក្លាយជាឧបករណ៍ដែលកាន់តែមានប្រសិទ្ធភាពក្នុងការជួយដល់អ្នកដទៃឲ្យមករកព្រះគ្រីស្ទបានយ៉ាងដូចម្ដេច ?
តើបងប្អូនចាប់អារម្មណ៍អ្វីខ្លះអំពី អ័ប៊ីស នៅក្នុង អាលម៉ា ១៩:១៦–៣៦ ? តើបងប្អូនរៀនអ្វីខ្លះមកពីនាង អំពីការជួយអ្នកដទៃឲ្យស្ថាបនាសេចក្តីជំនឿទៅលើព្រះគ្រីស្ទ ? ឧទាហរណ៍ តើមានអ្វីខ្លះដែលបងប្អូនមានអារម្មណ៍ថានឹងអាចជួយមនុស្សដែលបងប្អូនស្រឡាញ់ឲ្យ « ជឿដល់ព្រះចេស្ដានៃព្រះ » បាន ? ( អាលម៉ា ១៩:១៧ ) ។
បងប្អូនក៏អាចប្រៀបធៀបបទពិសោធន៍របស់ អ័ប៊ីស ជាមួយនឹងគោលការណ៍ដែលអែលឌើរ ឌៀថើរ អេហ្វ អុជដូហ្វ បានបង្រៀននៅក្នុង « Missionary Work: Sharing What Is in Your Heart » ( Liahona ខែ ឧសភា ឆ្នាំ ២០១៩ ទំព័រ ១៥–១៨ ) ផងដែរ ។ តើ អ័ប៊ីស បានធ្វើជាគំរូយ៉ាងដូចម្ដេចចំពោះ « យោបល់សាមញ្ញប្រាំយ៉ាង » របស់អែលឌើរ អុជដូហ្វ ? សូមព្យាយាមសរសេររឿងមួយចំនួន ដែលបងប្អូនអាចនិយាយអំពីព្រះយេស៊ូវគ្រីស្ទបាន ។ ឧទាហរណ៍ « សម្រាប់ខ្ញុំ ព្រះយេស៊ូវគ្រីស្ទ … » ឬ « ព្រះអង្គសង្គ្រោះជួយខ្ញុំ … »
សូមមើលផងដែរ Gospel Topics « Ministering as the Savior Does » នៅលើបណ្ណាល័យដំណឹងល្អ; « ព្រះមេត្តាបិតាយើងរុងរឿង » ទំនុកតម្កើង ទំព័រ ២០០; « Come and See » « Come and Help » « Come and Belong » ( វីដេអូ ) នៅលើបណ្ណាល័យដំណឹងល្អ ។
មក ហើយមើល
មនុស្សចូលចិត្តចូលរួម ពួកគេគ្រាន់តែត្រូវការការអញ្ជើញ
សូមបង្រៀនមេរៀនដោយប្រើវត្ថុ ។ នៅពេលណាដែលមនុស្សអាចមើលឃើញ ឬប៉ះអ្វីមួយដែលទាក់ទងទៅនឹងអ្វីដែលពួកគេកំពុងរៀន នោះពួកគេអាចនឹងចងចាំវាបានយូរជាង ។ ឧទាហរណ៍ ប្រសិនបើបងប្អូនកំពុងបង្រៀនអំពី អាលម៉ា ១៧:១១ សូមពិចារណាអំពីការបង្ហាញឧបករណ៍តន្ត្រី ឬឧបករណ៍សម្រាប់សរសេរផ្សេងៗ ដើម្បីជួយបំផុសគំនិតឲ្យមានការពិភាក្សាអំពីការធ្វើជាឧបករណ៍មួយនៅក្នុងព្រះហស្តរបស់ព្រះ ។
នៅពេលយើងបង្ហាញសេចក្ដីស្រឡាញ់ចំពោះអ្នកដទៃ យើងអាចជួយពួកគេឲ្យទទួលបានដំណឹងល្អរបស់ព្រះយេស៊ូវគ្រីស្ទ ។
សូមរកមើលខគម្ពីរនៅក្នុង អាលម៉ា ១៧–១៩ ដែលបង្ហាញពីរបៀបដែលសេចក្ដីស្រឡាញ់របស់អាំម៉ូនចំពោះពួកសាសន៍លេមិន បានបំផុសគំនិតដល់ការខិតខំរបស់ទ្រង់ក្នុងការចែកចាយដំណឹងល្អរបស់ព្រះយេស៊ូវគ្រីស្ទ ។ តើបងប្អូនរៀនបានសេចក្ដីពិតផ្សេងទៀតណាខ្លះ មកពីគំរូរបស់លោកទាក់ទងនឹងការចែកចាយដំណឹងល្អ ?
( សូមមើលផងដែរ « Ammon Serves and Teaches King Lamoni » ( វីដេអូ ) នៅលើបណ្ណាល័យដំណឹងល្អ ។
អាំម៉ូនបម្រើ និងបង្រៀនស្តេចឡាម៉ូណៃ អាលម៉ា ១៧-១៩
អាំម៉ូន និងពួកបុត្រារបស់ម៉ូសាយ បានចេញទៅបង្រៀនដល់សាសន៍លេមិននូវព្រះបន្ទូលនៃព្រះ ។ អាំម៉ូនក្លាយជាអ្នកបម្រើស្តេចឡាម៉ូណៃ ហើយបង្រៀនទ្រង់អំពីដំណឹងល្អនៃព្រះយេស៊ូវគ្រីស្ទ ។
មីនើរវ៉ា ថៃឆើត ( ឆ្នាំ ១៨៨៨–១៩៧៦ ) អាំម៉ូនកំពុងជួយហ្វូងចៀមរបស់ស្ដេច ឆ្នាំ ១៩៤៩–១៩៥១ ប្រេងលើបន្ទះក្តារ ទំហំ ៣៥ ១៥/១៦ x ៤៨ អ៊ីនឆ៍ ។ សារមន្ទីរសិល្បៈសាកលវិទ្យាល័យ ព្រិកហាំ យ៉ង់ ឆ្នាំ ១៩៦៩ ។
ព្រះអម្ចាស់នឹងជួយខ្ញុំឲ្យប្រែចិត្ត ។
បន្ទាប់ពីបានរៀបរាប់ពីការប្រែចិត្តជឿរបស់ស្តេចឡាម៉ូណៃ និងប្រជាជនរបស់ទ្រង់ហើយ នោះមរមនបានសង្ខេបដំណើររឿងនេះដោយការសង្កេតមើលអំពីព្រះយេស៊ូវគ្រីស្ទ ។ តើ អាលម៉ា ១៩:៣៦ បង្រៀនបងប្អូនអំពីបុគ្គលិកលក្ខណៈរបស់ព្រះអម្ចាស់អ្វីខ្លះ ? តើមានអ្វីខ្លះផ្សេងទៀតដែលដំណើររឿងនៅក្នុង អាលម៉ា ១៩:១៦–៣៦ បង្រៀនបងប្អូនអំពីទ្រង់ ? តើបងប្អូនមានអារម្មណ៍ថា ព្រះហស្ដរបស់ព្រះអម្ចាស់លាតសន្ធឹងមកកាន់បងប្អូននៅពេលណា ?
ការស្គាល់ព្រះគឺមានតម្លៃសមនឹងការលះបង់ទាំងអស់ ។
សូមប្រៀបធៀបអ្វីដែលបិតារបស់ស្តេចឡាម៉ូណៃសុខចិត្តលះបង់ដើម្បីសង្គ្រោះជីវិតរបស់ទ្រង់ ( សូមមើល អាលម៉ា ២០:២៣ ) ក្រោយមកទ្រង់សុខចិត្តលះបង់អ្វីដើម្បីទទួលបានអំណរនៃដំណឹងល្អ ហើយស្គាល់ព្រះ ( សូមមើល អាលម៉ា ២២:១៥, ១៨ ) ។ សូមពិចារណាអំពីរឿងដែលបងប្អូនសុខចិត្តលះបង់ដើម្បីស្គាល់ព្រះឲ្យបានពេញលេញ ។
សម្រាប់គំនិតបន្ថែម សូមមើលទស្សនាវដ្តី លីអាហូណា និង ដើម្បីកម្លាំងនៃយុវជន ប្រចាំខែនេះ ។
គំនិតសម្រាប់បង្រៀនកុមារ
ទីបន្ទាល់របស់ខ្ញុំអំពីព្រះយេស៊ូវគ្រីស្ទរីកចម្រើនឡើង នៅពេលខ្ញុំអានព្រះគម្ពីរ អធិស្ឋាន និងតមអាហារ ។
-
តើគំរូរបស់ពួកបុត្រារបស់សេ្តចម៉ូសាយអាចជួយកូនៗរបស់បងប្អូនឲ្យស្ថាបនាទីបន្ទាល់របស់ពួកគេទៅលើព្រះយេស៊ូវគ្រីស្ទបានដោយរបៀបណា ? បងប្អូនអាចជួយកូនៗរបស់បងប្អូនឲ្យរកឃើញនូវអ្វីដែលពួកបុត្រារបស់ស្តេចម៉ូសាយបានធ្វើ ដើម្បីស្ថាបនាកម្លាំងខាងវិញ្ញាណរបស់ពួកទ្រង់នៅក្នុង អាលម៉ា ១៧:២–៣ ។ បន្ទាប់មក ពួកគេអាចគូររូបភាព ឬស្វែងរកវត្ថុដែលតំណាងឲ្យរបស់ទាំងនេះបាន ។ សូមជួយពួកគេឲ្យរៀបចំផែនការអ្វីដែលពួកគេនឹងធ្វើ ដើម្បីពង្រឹងទីបន្ទាល់របស់ពួកគេអំពីព្រះអង្គសង្រ្គោះ ។
ខ្ញុំអាចចែកចាយដំណឹងល្អរបស់ព្រះយេស៊ូវគ្រីស្ទជាមួយអ្នកដទៃបាន ។
-
ដើម្បីរៀនពីការធ្វើជាឧបករណ៍នៅក្នុងព្រះហស្តរបស់ព្រះដូចជាពួកបុត្រារបស់ស្តេចម៉ូសាយ បងប្អូន និងកូនៗរបស់បងប្អូនអាចមើលឧបករណ៍មួយ ហើយនិយាយគ្នាថាតើគេប្រើវាដើម្បីអ្វី ។ បន្ទាប់មក បងប្អូនអាចអាន អាលម៉ា ១៧:១១ ហើយនិយាយអំពីអត្ថន័យនៃការធ្វើជាឧបករណ៍របស់ព្រះវរបិតាសួគ៌ ដើម្បីជួយមនុស្សឲ្យរៀនអំពីព្រះយេស៊ូវគ្រីស្ទ ។
-
ទំព័រសកម្មភាពសប្តាហ៍នេះមានរូបភាពតំណាងឲ្យសេចក្ដីពិតដែល អាំម៉ូនបានបង្រៀនដល់ស្តេចឡាម៉ូណៃ ។ បងប្អូនអាចជួយកូនៗរបស់បងប្អូនឲ្យរកឃើញសេចក្ដីពិតទាំងនេះបាននៅក្នុង អាលម៉ា ១៨:២៤–៤០ ។ កូនៗរបស់បងប្អូនអាចសម្តែងធ្វើជាអ្នកផ្សព្វផ្សាយសាសនា ហើយចែកចាយនូវអ្វីដែលពួកគេដឹងអំពីសេចក្ដីពិតទាំងនេះ ។
-
បន្ទាប់ពីបងប្អូនអានអំពី អ័ប៊ីស ជាមួយកូនៗរបស់បងប្អូនហើយ ( សូមមើល អាលម៉ា ១៩:១៦–២០, ២៨–២៩ ) ពួកគេអាចសម្តែងធ្វើជា អ័ប៊ីស ដោយរត់នៅមួយកន្លែង ធ្វើជាគោះទ្វារ និងប្រាប់ពីអ្វីដែលបានកើតឡើងនៅក្នុង អាលម៉ា ១៩:១–១៧ ។ តើយើងអាចក្លាយដូចជា អ័ប៊ីស ហើយចែកចាយអ្វីដែលយើងដឹងអំពីព្រះយេស៊ូវគ្រីស្ទ និងដំណឹងល្អរបស់ទ្រង់ដោយរបៀបណា ? កូនៗរបស់បងប្អូនអាចគូររូបភាពខ្លួនឯងចែកចាយដំណឹងល្អជាមួយនរណាម្នាក់ ឬច្រៀងជាមួយគ្នានូវបទចម្រៀងមួយអំពីការចែកចាយដំណឹងល្អ ដូចជាបទ « ហៅឲ្យបម្រើ » ( សៀវភៅចម្រៀងកុមារ ទំព័រ ៩៤–៩៥ ) ។
អាលម៉ា ១៧:២១–២៥; ២០:៨–២៧; ២២:១–៣
ខ្ញុំអាចជួយមនុស្សដទៃឲ្យមករកព្រះគ្រីស្ទបាន តាមរយៈការបង្ហាញសេចក្តីស្រឡាញ់របស់ខ្ញុំចំពោះពួកគេ ។
-
ដំបូង ទាំងស្តេចឡាម៉ូណៃ និងបិតារបស់ទ្រង់មានចិត្តរឹងរូសចំពោះដំណឹងល្អ ។ ក្រោយមក ដួងចិត្តរបស់ពួកទ្រង់បានទន់ ហើយពួកទ្រង់បានជឿលើព្រះយេស៊ូវគ្រីស្ទ ។ តើរឿងនេះបានកើតឡើងយ៉ាងដូចម្ដេច ? សូមជួយកូនៗរបស់បងប្អូនឲ្យរកឃើញចម្លើយចំពោះសំណួរនេះ នៅពេលដែលបងប្អូនរំឭកពីបទពិសោធន៍របស់អាំម៉ូនឡើងវិញជាមួយពួកគេ ។ កូនៗរបស់បងប្អូនអាចសម្តែង « ជំពូកទី ២៣ ៖ អាំម៉ូន ៖ អ្នកបម្រើដ៏អស្ចារ្យ » និង « ជំពូកទី ២៤ ៖ អាំម៉ូនជួបព្រះបិតារបស់ស្ដេចឡាម៉ូណៃ » ( ដំណើររឿងព្រះគម្ពីរមរមន ទំព័រ ៦៤–៦៨, ៦៩–៧០ ) ។ ឬកូនៗរបស់បងប្អូនអាចនឹងចង់គូររូបនៃផ្នែកផ្សេងៗនៅក្នុងដំណើររឿងនេះ ហើយប្រើរូបភាពទាំងនោះដើម្បីតំណាលដំណើររឿងទាំងនេះឡើងវិញ ។ តើអាំម៉ូនបានធ្វើអ្វីខ្លះដើម្បីជួយស្តេចឡាម៉ូណៃ និងបិតារបស់ទ្រង់ឲ្យបើកព្រះទ័យទ្រង់ទៅរកដំណឹងល្អរបស់ព្រះយេស៊ូវគ្រីស្ទ ? ( សូមមើល អាលម៉ា ១៧:២១–២៥; ២០:៨–២៧; ២២:១–៣ ) ។
-
ប្រហែលជាបងប្អូន និងកូនៗរបស់បងប្អូនអាចគិតអំពីនរណាម្នាក់ដែលត្រូវការស្គាល់អំពីព្រះយេស៊ូវគ្រីស្ទ ។ សូមជួយពួកគេឲ្យគិតពីរបៀបដែលពួកគេអាចធ្វើជាគំរូល្អ ហើយបង្ហាញសេចក្ដីស្រឡាញ់ចំពោះបុគ្គលនោះ ដូចជាអាំម៉ូនបានធ្វើដាក់សេ្តចឡាម៉ូណៃ និងបិតារបស់ទ្រង់ដែរ ។
សម្រាប់គំនិតបន្ថែម សូមមើលទស្សនាវដ្តី ប្រិយមិត្ត ប្រចាំខែនេះ ។
An illustration of Abish [ រូបគំនូរអ័ប៊ីស ] ដោយ ឌីលីន ម៉ាស្ស