Ogyefuo 24–Ɔbɛnem 2: “Akra Som boɔ Kɛse”

Nkyerɛkyerɛ ne Apam 18

Akwan bebree wɔ hɔ a wɔfa so susu obi boɔ a ɔsom. Adom akyɛdeɛ, nwomasua, ahonyadeɛ, ne nipasu nyinaa bɛtumi anya nkɛntɛnsoɔ wɔ sɛdeɛ yɛbu afoforɔ—ne yɛn ho. Nanso wɔ Onyankopɔn anim no, yɛn boɔ a yɛsom no yɛ adeɛ ketewa bi, na wɔaka no pefee wɔ Nkyerɛkyerɛ ne Apam 18: “Kae sɛ ɔkra boɔ a ɔsom yɛ kɛseɛ wɔ Onyankopɔn anim” (nkyekyɛmu 10). Saa nokorɛ tiawa yi kyerɛkyerɛ deɛ Onyankopɔn yɛ ne deɛ nti a ɔyɛ no mu pii. Adɛn nti na Ɔhyɛɛ Joseph Smith ne Oliver Cowdery maa wɔhyehyɛɛ Yesu Kristo Asɔre no wɔ yɛn mmerɛ yi mu? (hwɛ nkyekyɛmu 1–5). Ɛfiri sɛ akra som boɔ kɛse. Adɛn nti na “Ɔhyɛ nnipa nyinaa a wɔwɔ babiara sɛ wɔnsakyera” na ɔsoma Asomafoɔ sɛ wɔnkɔka adwensakyera ho asɛm? (nkykyɛmu 9). Ɛfiri sɛ akra som boɔ kɛse. Na adɛn nti na Yesu Kristo hunuu “owuo wɔ honam mu” ne “nnipa nyinaa yea”? (nkyekyɛmu 11). Ɛfiri sɛ akra som boɔ kɛse. Sɛ saa akra yi mu baako mpo gye Agyenkwa no akyɛdeɛ tom a, Ɔdi ahurusie, na “n’anigyeɛ yɛ kɛseɛ wɔ ɔkra a wasakyera no ho” (nkyekyɛmu 13).

Nsusuiɛ ma Efie ne Asɔre Adesua

Nkyerɛkyerɛ ne Apam 18:1–5

“Si m’asɔre no.”

Wɔ ɔfa 18, Awurade maa Oliver Cowdery akwankyerɛ sɛ ɔmfa mmoa nto Yesu Kristo Asɔre no fapem. Deɛn na wohunu fa afotuo a Ɔde maaeɛ—titire wɔ nkyekyɛmu 1–5? Wobɛtumi adwene ho sɛdeɛ saa afotuo korɔ no ara fa wo ho berɛ a “wosi” wo gyedie wɔ Kristo mu. Nhwɛsoɔ:

• Deɛn na “woahwehwɛ sɛ wobɛhunu” fa Awurade ho? (nkyekyɛmu 1).

• Deɛn na ɛkyerɛ ma wo sɛ “fa wo ho to nneɛma a wɔatwerɛ so”? (nkyekyɛmu 3). Sɛn na Honhom no “ada no adi akyerɛ wo” sɛ saa nneɛma yi yɛ nokorɛ? (nkyekyɛmu 2; san hwɛ Nkyerɛkyerɛ ne Apam 6:36-37. 6:22–24).

• Sɛn na wosi w’abrabɔ wɔ “[Agyenkwa no] asɛmpa fapem ne [Ne] botan no so”? (nkyekyɛmu 5).

Bisa nsɛm. Nkyerɛkyerɛ ne Apam no yɛ adanseɛ sɛ nsɛmmisa kyerɛ kwan kɔ adiyisɛm mu. Berɛ a woresua twerɛnsɛm no, twerɛ nsɛmmisa a wonya no to hɔ. Afei dwene ho na bɔ mpaeɛ pɛ mmuaeɛ.

Nkyerɛkyerɛ ne Apam18:10–13

“Akra som boɔ kɛse wɔ Onyankopɔn ani so.”

Sɛn na yɛsi susu adeɛ bi boɔ a ɛsom? Nhwɛsoɔ, adɛn nti na adeɛ baako boɔ yɛ den wɔ dwa so sene ɔfoforɔ? Berɛ a wokenkan ɔfa 18 saa nnawɔtwe yi, titire nkyekyɛmu 10–13, wobɛtumi de sɛdeɛ nkorɔfoɔ hunu adeɛ bi boɔ a ɛsom ne adeɛ a ɛma ɔkra bi som boɔ wɔ Awurade ani so atoto ho. Dwene ho fa wo din hyɛ baabi a asɛmfua “ɔkra,” “akra,” ne “nnipa nyinaa” wɔ no ananmu. Sɛn na saa nkyekyɛmu yi bɛtumi aboa obi a ɔbu ne ho abonfiaa wɔ ne boɔ a ɔsom ho?

Nsɛm afoforɔ bi a ɛkyerɛ boɔ a ɔkra som: Luka 15:1–10; Yohane 3:16–17; 2 Nephi 26:24–28; Moses 1:39. Wɔ saa nsɛm yi ho, sɛn na wobɛbɔ no tɔfa wɔ ɔkwan a Onyankopɔn dwene fa wo ho? Wobɛtumi nso ahwehwɛ Titenani Dieter F. Uchtdorf “Wo ho Hia ma No” (Liahona, Obubuo 2011, 19–22) de ahwehwɛ nsɛmfua ne kasasini a wonim fa wo ara wo boɔ a wosom ma Onyankopɔn.

Sɛn na Onyankopɔn kyerɛ wo sɛ wosom boɔ ma No? Sɛn na yei nya nsunsuansoɔ wɔ sɛdeɛ wote nka fa wo ara ne afoforɔ ho?

San hwɛ Joy D. Jones, “Value beyond Measure,” Liahona, Obubuo 2017, 13–15; Tinsɛm ne Nsɛmmisa, “Children of God,” Asɛmpa Akoraeɛ.

Nkyerɛkyerɛ ne Apam 18:11–16

Awurade di ahurusie berɛ a mesakyera.

Hyɛ no nso mpɛn dodoɔ a nsɛmfua te sɛ sakyera ne adwensakyera pue mu wɔ Nkyerɛkyerɛ ne Apam 18. Dwene deɛ wosua firi saa nsɛmfua yi mu berɛ biara a wɔde yɛ adwuma. Dwene ho titire nkyekyɛmu 11–16. Sɛn na saa nkyekyɛmu yi nya nsunsuansoɔ wɔ wo so fa adwensakyera ho—w’ankasa adwensakyera ne asodie sɛ to nsa frɛ nkorɔfoɔ afoforɔ ma wɔnsakyera na wɔntu mpɔn? Ɔkwan baako a wobɛfa so atwerɛ deɛ wosua no ato hɔ nie: twerɛ akwan bebree a wode bɛwie ɔkasamu “Adwensakyera yɛ .”

San hwɛ Alma 36:18–21; Akwankyerɛ kɔ Twerɛnsɛm no mu, “Repentance,” Asɛmpa Akoraeɛ; Dale G. Renlund, “Repentance: A Joyful Choice,” Liahona, Obubuo 2016, 121–24.

Nkyerɛmu firi Ɔba Desɛefoɔ no, ɛfiri Clark Kelley Price hɔ

Nkyerɛkyerɛ ne Apam 18:14–16

Anigyeɛ firi mmoa a yɛde boa afoforɔ ma wɔba Kristo nkyɛn no mu ba.

Berɛ a wokenkan nkyekyɛmu 14–16no, dwene “ka adwensakyera ho asɛm ” asekyerɛ ho—ne sɛnti a ɛde anigyeɛ ba. Akwan bɛn na woahunu a ɛbɛboa afoforɔ ama wɔaba Agyenkwa no hɔ na wɔanya bɔnefakyɛ? Sɛn na nkorɔfoɔ afoforɔ ayɛ saa ama wo?

San hwɛ Craig C. Christensen, “There Can Be Nothing So Exquisite and Sweet as Was My Joy,” Liahona, Kɔtɔnima 2023, 45–47.

Nkyerɛkyerɛ ne Apam 18:34–36

Mɛtumi ate Awurade nne wɔ twerɛnsɛm mu.

Sɛ obi bisa wo sɛ Awurade nne no te sɛn a, deɛn na wobɛka? Dwene saa asɛmmisa yi ho berɛ a wokenkan Nkyerɛkyerɛ ne Apam 18:34–36. Deɛn na woasua afa Awurade nne ho afiri Nkyerɛkyerɛ ne Apam kenkan mu? Deɛn na wobɛtumi ayɛ de ate Ne nne yie?

San hwɛ “Berɛ a Mehwehwɛ Twerɛnsɛm Kronkron no mu,” Nnwom, no. 277.

Worepɛ nsusuiɛ bebree a, hwɛ bosome yi Liahona ne De ma Mmabunu Ahoɔden nsɛmma nwoma mu.

Nsusuiɛ ma Nkwadaa Adekyerɛ

Nkyerɛkyerɛ ne Apam 18:10–13

Yɛn mu biara som boɔ ma Onyankopɔn.

• Berɛ a wo ne wo nkwadaa kenkan Nkyerɛkyerɛ ne Apam 18:10–13no, dwene ho fa din afoforɔ hyehyɛ nsɛmfua “ɔkra,” “akra,” ne “nnipa nyinaa” ananmu. Afei mobɛtumi adi nkɔmmɔ afa sɛdeɛ saa nkyekyɛmu ahodoɔ yi boa yɛn ma yɛte sɛdeɛ Ɔsoro Agya te nka fa yɛn mu biara ho ase.

• Wobɛtumi nso abisa wo nkwadaa nneɛma a nkorɔfoɔ dwene sɛ ɛsom boɔ ho. Anaasɛ wobɛtumi de adeɛ a ɛsom boɔ ma wo akyerɛ wɔn. Sɛn na yɛsi yɛ nneɛma a ɛsom boɔ ma yɛn no? Afei ma wɔnhwɛ ahwehwɛ mu baako baako. Berɛ a wɔreyɛ saa no, ka kyerɛ akwadaa biara sɛ ɔyɛ Onyankopɔn ba na ɔsom boɔ kɛse. Sɛn na yɛbɛsi akyerɛ afoforɔ sɛ “ [wɔn] akra som boɔ kɛse” wɔ yɛn ani so?

• Sɛ yɛresi so dua sɛ nkorɔfoɔ nyinaa som boɔ ma Ɔsoro Agya no, wo nkwadaa bɛtumi ahwɛ mfonini a ɛwɔ saa nhyehyɛeɛ yi awieeɛ berɛ a wokenkan Nkyerɛkyerɛ ne Apam 18:10–13. Morebɔ mu ato dwom bi te sɛ “Every Star Is Different” (Nwadaa Nnwomnwoma, 142–43) bɛtumi asi saa gyinaeɛsie yi so dua.

Nkyerɛkyerɛmu firi Ɔkra Boɔ a ɔsom, ɛfiri Liz Lemon Swindle hɔ

Nkyerɛkyerɛ ne Apam 18:13–16

Asɛmpa no kyɛ de anigyeɛ kɛseɛ ba.

• Sɛdeɛ wobɛkanyan wo nkwadaa ama wɔakyɛ Yesu Kristo asɛmpa no, mo ne mo ho bɛtumi adi nkɔmmɔ afa suahunu ahodoɔ ho berɛ a wonyaa biribi a wopɛɛ sɛ wwo ne wo nnamfonom anaasɛ abusua kyɛ. Adɛn nti na wopɛɛ sɛ wokyɛ, na sɛn na ne kyɛ no ma wo atenka? Afei mobɛtumi akenkan Nkyerɛkyerɛ ne Apam 18:13, 16. Deɛn na ɛde anigyeɛ brɛ Awurade? Deɛn pɔtee na Waka sɛ ɛde anigyeɛ bɛbrɛ yɛn? Wo ne wo nkwadaa bɛtumi adi nkɔmmɔ afa suahunu a moanya wɔ Agyenkwa anigyeɛ asɛmpa no kyɛ mu.

• Dwom bi a ɛfa asɛmpa no kyɛ ho, te sɛ “I Want to Be a Missionary Now” (Nkwadaa Nnwomnwoma, 168), bɛtumi aboa nkwadaa ma wɔadwene akwan a wɔbɛtumi afa so akyɛ asɛmpa no.

Nkyerɛkyerɛ ne Apam 18:34–36

Mɛtumi ate Awurade nne wɔ twerɛnsɛm mu.

• Wo nkwadaa bɛtumi adi agorɔ bi a wɔbɔ mmɔden sɛ wɔbɛhunu nkorɔfoɔ ahodoɔ nne, te sɛ abusuafoɔ, nnamfoɔ, anaasɛ Asɔre akannifoɔ. Sɛn na yɛsi hunu yɛn ho nne? Sɛn na yɛsi hunu Awurade nne? Mobɛtumi abɔ mu akenkan Nkyerɛkyerɛ ne Apam 18:34–36 apɛnsɛmpɛnsɛm saa asɛmmisa yi mu. Mobɛtumi nso ne mo ho akyɛ sɛdeɛ moate Awurade nne wɔ twerɛnsɛm no mu.

Worepɛ ɛmu nsɛm bebree a, hwɛ bosome yi Adamfoɔ nsɛmma nwoma mu.

Ɔkra biara som boɔ ma Onyankopɔn.