Susquehanna Asubɔntene a ɛbɛn Harmony, Pennsylvania

Ogyefuo 17– 23:“Wɔ Mo, Me Nuanom Asomfoɔ So”

Nkyerɛkyerɛ ne Apam 12–17; Joseph Smith—Abakɔsɛm 1:66–75

Ebia nkorɔfoɔ bebree a wɔatwa wiase ho ahyia ntee Harmony, Pennsylvania nka da. Awurade taa fa mmeaeɛ a ahobrɛaseɛ wɔ de ma dwumadie sononko wɔ N’ahennie mu. Wɔ nnua beaeɛ bi a ɛbɛn Harmony wɔ Kɔtɔnima 15, 1829, Yohane Osubɔni no yii ne ho adi kyerɛɛ Joseph Smith ne Oliver Cowdery. Ɔde ne nsa guu wɔn tiri so na ɔde Aaronic Asɔfodie no maa wɔn, frɛɛ wɔn “me nuanom asomfoɔ” (Nkyerɛkyerɛ ne Apam 13:1).

Yohane Osubɔni no na na ɔyɛ Onyankopɔn somfoɔ nokwafoɔ a ɔbɔɔ Agyenkwa no asu na ɔsiesiee kwan maa Ne mmaeɛ no (hwɛ Mateo 3:1–6, 13–17). Saa mmeranteɛ baanu yi a na wɔwɔ wɔn mfeɛ aduonu mu no, na ɛbɛyɛ ahobrɛaseɛ, mpo deɛ ɛboro so, sɛ wɔfrɛɛ wɔn Yohane nuanom asomfoɔ. Wɔ saa berɛ no, na wɔnnim Joseph ne Oliver pii sɛdeɛ na Harmony teɛ no. Nanso berɛ biara Onyankopɔn adwuma mu som fa sɛdeɛ yɛsom ho, na ɛmfa deɛ obi hwɛ ho. Nanso sɛ wo mmɔdemmɔ sua anaasɛ obi nhunu no, wo nso woyɛ onua somfoɔ wɔ Awurade “adwuma kɛseɛ ne nwanwasoɔ no mu” (Nkyerɛkyerɛ ne Apam 14:1).

Nsusuiɛ ma Efie ne Asɔre Adesua

Nkyerɛkyerɛ ne Apam 12; 14

Mɛtumi ayɛ bi wɔ Onyankopɔn “adwuma kɛseɛ ne nwanwasoɔ no mu.”

Joseph Knight ne David Whitmer nyinaa pɛɛ sɛ wɔhunu sɛdeɛ wɔbɛtumi aboa wɔ Awurade adwuma no mu. Berɛ a wokenkan Awurade mmuaeɛ a ɔde maa wɔn wɔ (Nkyerɛkyerɛ ne Apam 12; 14), mu no dwene deɛ ɛkyerɛ wo ho “sɛ wode Sion nkyekyere ne yiedie aba” (12:6; san hwɛ 14:6). Deɛn nnyinasosɛm ne Kristosu na wohunu wɔ saa afa yi mu a ɛbɛtumi aboa ama woayɛ yei?

San hwɛ “The Knight and Whitmer Families,” in Revelations in Context, 20–24.

Nkyerɛkyerɛ ne Apam 13

Yesu Kristo somaa Yohane Osubɔni no sɛ ɔnsane mfa Aaron Asɔfodie no mmra.

Yohane Osubɔni frɛɛ Joseph Smith ne Oliver Cowdery sɛ “ne nuanom asomafoɔ” Deɛn na ɛkyerɛ sɛ wo ne Yohane Osubɔni bɛyɛ anuanom asomfoɔ? (hwɛ Mateo 3:13–17; Luka 1:13–17; 3:2–20).

Berɛ a wokenkan deɛ Yohane Osubɔni ka faa Aaron Asɔfodie ho wɔ ɔfa 13no, dwene sɛdeɛ saa asɔfodie nsafoa yi boaa Yohane adwuma a ɔyɛeɛ de siesiee kwan maa Awurade no ho. Nhwɛsoɔ:

• Deɛn ne “soro abɔfoɔ a wɔresom”? (hwɛ 2 Nephi 32:2–3; Moroni 7:29–32; Guide to the Scriptures, “Soroabɔfoɔ,” Asɛmpa Akoraeɛ).

• Deɛn ne “asɛmpa adwensakyera”? (hwɛ Nkyerɛkyerɛ ne Apam 84:26–27; Dale G. Renlund, “Asɔfodie ne Agyenkwa no Ngosra Tumi,” Liahona, Obubuo 2017, 64–67).

Sɛn na Aaron Asɔfodie ayɛyɛdeɛ (te sɛ asubɔ ne adidi kronkron no boa siesie kwan ma wogye Agyenkwa no wɔ w’abrabɔ mu?

Deɛn ne asɔfodie nsafoa no?

Elder Dale G. Renlund ne ne yere, Ruth, maa saa nkyerɛkyerɛmu yi fa asɔfodie nsafoa ho:

“Asɛm asɔfodie nsafoa no wɔde yɛ adwuma wɔ akwan ahodoɔ mmienu so. Deɛ ɛdi kan no gyina hɔ ma tumi anaasɛ akwanya pɔtee a wɔde ma wɔn a wɔgye Aaron anaasɛ Melkisedek Asɔfodie no. Nhwɛsoɔ, Aaronic Asɔfodie kurafoɔ gye soro abɔfoɔ som nsafoa ne adwensakyera asɛmpa ahosiesie nsafoa ne nsuomhyɛ asubɔ ma bɔne fafiri (hwɛ Nkyerɛkyerɛ ne Apam 13:1; 84:26–27). Melchizedek Asɔfodie kurafoɔ gye ahennie no ahintasɛm ahodoɔ nsafoa, Onyankopɔn nimdeɛ nsafoa, ne Asɔre no honhom nhyira nyinaa nsafoa (hwɛ Nkyerɛkyerɛ ne Apam 84:19; 107:18).

“Ɛkwan a ɛtɔ so mmienu a wɔde asɔfodie nsafoa no yɛ adwuma no gyina hɔ ma akannie. Asɔfodie akannifoɔ gye asɔfodie nsafoa afoforɔ, tumi a wɔde hwɛ akuo nkyekyɛmu so wɔ Asɔre anaasɛ ekuo bi mu. Wɔ saa kwan yi so, asɔfodie nsafoa yɛ tumi ne akwanya a yɛde kyerɛ kwan, di anim, di Asɔre so ” (Melkisedek Asɔfodie no: Rete Nkyerɛkyerɛ Ase, Redi Nnyinasosɛm so [2018], 26).

Joseph Smith Bɔ Oliver Cowdery Asu, ɛfiri Del Parson hɔ

Joseph Smith—Abakɔsɛm 1:66–75

Ayɛyɛdeɛ ma me kwan de kɔ Onyankopɔn Tumi mu.

Woadwene ho pɛn deɛ anka ɛbɛyɛ sɛ woka Joseph Smith ne Oliver Cowdery ho wɔ Mmaeɛ bio no nnwuma akɛseɛ no mu? Berɛ a wokenkan Joseph Smith—Abakɔsɛm 1:66–75, ne atwerɛ a ɛwɔ nkyekyɛmu 71awieeɛ ase no, anyɛ bi no wobɛtumi ate deɛ wɔfaa mu no ase. Deɛn na ɛyɛ wo anigye fa wɔn nsɛm ho? Hyɛ no nso, titire nhyira a wɔnyaeɛ ɛnam sɛ wɔnyaa asɔfodie no na wɔbɔɔ asu. Deɛn nhyira na Agyenkwa no de ama wo ɛnam asɔfodie ayɛyɛdeɛ so?

Sɛdeɛ wobɛsua bebree no, dwene ho yɛ pono bi a ne ti asɛm yɛ Ayɛyɛdeɛ ne Nhyira. Afei wobɛtumi ahwehwɛ twerɛnsɛm te sɛ yeinom mu na woayɛ ayɛyɛdeɛ ne nhyira a ɛfiri mu ba mmoano: Yohane 14:26; Asomafoɔ 2:38; Nkyerɛkyerɛ ne Apam 84:19–22; 131:1–4; Joseph Smith—Abakɔsɛm 1:73–74. Nhyira afoforɔ bɛn na wobɛtumi de aka mmoano no ho? Sɛn na ayɛyɛdeɛ a woanya no de Agyenkwa no tumi aba w’abrabɔ mu?

San hwɛ David A. Bednar, “Onyankopɔn Tumi wɔ Animuonyam Kɛseɛ mu,” Liahona, Obubuo 2021, 28–30; Ahotefoɔ, 1:65–68; “Tumi Nyankopɔn, Nokorɛ Nyankopɔn,” Nnwom, no. 20; Tinsɛm ne Nsɛmmisa, “Apam ne Ayɛyɛdeɛ,” Asɛmpa Akoraeɛ.

Nkyerɛkyerɛ ne Apam 15–16

Wode akra rebrɛ Kristo som bo kɛseɛ.

Woadwene ho pɛn, sɛdeɛ John ne Peter Whitmer yɛeɛ no, sɛ deɛn na “ɛbɛyɛ deɛ ɛsom boɔ ma wo” wɔ w’abrabɔ mu? (Nkyerɛkyerɛ ne Apam 15:4; 16:4). Berɛ a wokenkan Nkyerɛkyerɛ ne Apam 15–16no, dwene ho sɛnti a akra a yɛde berɛ Kristo no som boɔ. Deɛn na woreyɛ de “akra” abrɛ Kristo?

San hwɛ Ahotefoɔ, 1:68–71.

Nkyerɛkyerɛ ne Apam 17

Awurade de adansefoɔ na ɛhyehyɛ N’asɛm.

Deɛn ne ɔdansefoɔ? Adɛn nti na Awurade de adansefoɔ yɛ N’adwuma? (hwɛ 2 Korintofoɔ 13:1). Dwene saa nsɛmmisa yi ho berɛ a wokenkan Onyankopɔn nsɛm a ɔde maa Adansefoɔ Mmiɛnsa no wɔ Nkyerɛkyerɛ ne Apam 17. (San hwɛ“Adansefoɔ Mmiɛnsa no Adansedie”wɔ Mormon Nwoma no mu.) Sɛn na adansefoɔ si boa Onyankopɔn “tenenee botaeɛ no”? (nkyekyɛmu 4).

Deɛn na wobɛtumi adi ho adanseɛ?

San hwɛ Ahotefoɔ, 1:73–75; “A Day for the Eternities” (sini), Asɛmpa Akoraeɛ.

A Day for the Eternities

This film features the experiences of David Whitmer as Joseph Smith and Oliver Cowdery stay with his family in Fayette, New York, to finish the translation of the Book of Mormon.

Worepɛ nsusuiɛ bebree a, hwɛ bosome yi Liahona ne De ma Mmabunu Ahoɔden nsɛmma nwoma mu.

Nsusuiɛ ma Nkwadaa Adekyerɛ

Nkyerɛkyerɛ ne Apam 13; Joseph Smith—Abakɔsɛm 1:68–74

Yohane Osubɔni no na ɔsane de Aaron Asɔfodie no baeɛ.

• Adwinnie a ɛwɔ saa nhyehyɛeɛ yi mu bɛtumi aboa wo nkwadaa ama wɔahunu Aaron Asɔfodie no mmaeɛ bio (san hwɛ “Tire 6: Joseph ne Oliver Regye Asɔfodie no,” wɔ Nkyerɛkyerɛ ne Apam Abasɛm, 26–27, anaasɛ sini a ɛne no kɔ wɔ Asɛmpa Akoraeɛ). Wɔn ani bɛgye ho sɛ wɔyɛ mfonini fa deɛ wo ne wɔn kenkan no ho wɔ Joseph Smith—Abakɔsɛm 1:68–74?

  Chapter 6: Joseph and Oliver Are Given the Priesthood: May 1829

• Wobɛtumi nso de Yohane Osubɔni mfonini akyerɛ berɛ a mobɔ mu kenkan Mateo 3:13–17; Joseph Smith—Abakɔsɛm 1:68–70. Adɛn nti na na ɛho hia sɛ Awurade soma Yohane Osubɔni ma ɔde asɔfodie tumi no ma Joseph Smith sɛ ɔmfa mmɔ asu?.

Woresiesie wo nkwadaa ama nkwa nna nyinaa wɔ Onyankopɔn apam kwan so. Sɛ wopɛ nsusuiɛ bebree de aboa wo nkwadaa asua biribi fa asɔfodie tumi, tumidie, ne nsafoa ho a, hwɛ appendix A anaasɛ appendix B.

Yesu a wɔrebɔ no asu ho mfonini nkyerɛmu, ɛfiri Dan Burr hɔ

Nkyerɛkyerɛ ne Apam 13

Ɔsoro Agya nam Aaron Asɔfodie no so hyira me.

• Sɛ worehyɛ mpɛnsɛmpɛnsɛmu ase fa nsafoa a wɔaka ho asɛm wɔ Nkyerɛkyerɛ ne Apam 13mu no ho a, wo ne wo nkwadaa bɛtumi ahwɛ nsafoa kuo bi na moadi nkɔmmɔ afa adeɛ a nsafoa tumi yɛ ma yɛn ho. Ebia wobɛtumi aboa wɔn ama wɔahwehwɛ asɛmfua nsafoa wɔ ɔfa 13. Deɛn nsɛmfua afoforɔ anaasɛ kasasini wɔ Nkyerɛkyerɛ ne Apam 13 mu na ɛkyerɛkyerɛ Aaron Asɔfodie nhyira no mu? Wo nkwadaa bɛtumi nso ahunu akwan a Ɔsoro Agya nam asɔfodie no so hyira yɛn wɔ sini “Asɔfodie Nhyira” mu (Asɛmpa Akoraeɛ).

Blessings of the Priesthood

The priesthood is the power of God, which is given to man to act in His name.

Nkyerɛkyerɛ ne Apam 15:4–6; 16:4–6

Yɛreboa afoforɔ ama wɔaba Yesu Kristo nkyɛn yɛ “deɛ ɛsom boɔ kɛse.”

• John ne Peter Whitmer pɛɛ sɛ wɔhunu deɛ ɛsom boɔ kɛse ma wɔn (hwɛ Nkyerɛkyerɛ ne Apam 15:4; 16:4). Ebia wo ne wo nkwadaa bɛtumi adi nkɔmmɔ afa nneɛma a ɛsom boɔ pii ma mo ho. Berɛ a wokenkan Nkyerɛkyerɛ ne Apam 15:6 anaasɛ 16:6, ma wo nkwadaa mma wɔn nsa so berɛ a wɔte deɛ Awurade kaa sɛ “ɛsom boɔ kɛse no.”

• Deɛn na ɛkyerɛ sɛ [wode akra brɛ Yesu Kristo]”? Boa wo nkwadaa ma wɔntwerɛ nsusuiɛ ahodoɔ, te sɛ woreyɛ afoforɔ adamfo, wo ne adamfoɔ bi rekyɛ twerɛnsɛm no, anaasɛ worebɔ mpaeɛ ama obi a ɔhia mmoa. Wo nkwadaa bɛtumi ahwehwɛ saa nneɛma yi wɔ Asɔre nsɛmma nwoma mu anaasɛ Asɛmpa Adwinnie Nwoma mu. Anaasɛ wɔbɛtumi ayɛ wɔn ankasa mfonini. Ma wɔnyi biribi a wɔbɛyɛ mfiri deɛ wɔatwerɛ no mu. Mobɛtumi nso ato “Mete Magyenkwa Dɔ no Nka” (Nkwadaa Nnwomnwoma, 74–75).

Nkyerɛkyerɛ ne Apam 17

Mɛtumi ayɛ Mormon Nwoma ho ɔdansefoɔ .

• “Ti 7: Adansefoɔ Hunu Sika Kɔkɔɔ Mprɛte no” (wɔ Nkyerɛkyerɛ ne Apam Abasɛm mu, 31–33, anaasɛ sini a ɛne no kɔ wɔ Asɛmpa Akoraeɛ) no bɛtumi aboa wo nkwadaa ma wɔasua adeɛ afa Adansefoɔ Mmiɛnsa no ho. Woakenkan Nkyerɛkyerɛ ne Apam 17:5–6awie no, ka kyerɛ wo nkwadaa sɛdeɛ wonim sɛ Mormon Nwoma no yɛ nokorɛ. Sɛn na yɛbɛtumi ayɛ Mormon Nwoma no adansefoɔ?

  Chapter 7: Witnesses See the Gold Plates: 1829–1830

Worepɛ ɛmu nsɛm bebree a, hwɛ bosome yi Adamfoɔ nsɛmma nwoma mu.

Wɔ Mo Me Nuanom Asomfoɔ So, ɛfiri Linda Curley Christensen hɔ.