Malagipkonto ti Katulagan, ni Enrique Manuel Garcia

Hunio 30–Hulio 6: “Awan ti Armas a Maaramid a Maibusor Kenka a Rumang-ayto”

Doktrina ken Katulagan 133–134

Manipud pay idi ubing, naipasangon ni Joseph Smith kadagiti kritiko—uray pay dagiti kabusor—bayat ti panangpadasna nga aramiden ti trabaho ti Dios. Ngem nalabit a nakarigrigat iti udi ti 1831 idi rinugian ni Ezra Booth a dillawen ti Simbaan iti publiko, gapu ta iti daytoy a kasasaad sigud a mamatpati ti kritiko. Nakita ni Ezra nga inaramat ni Joseph ti bileg ti Dios a mangpaimbag iti maysa a babai. Naawis isuna a mangkuyog ken ni Joseph iti umuna a panang-survey iti daga ti Zion iti Missouri. Ngem manipud pay idi napukawna ti pammatina ken, iti gandatna a mangperdi iti Propeta, nangipablaak kadagiti serye dagiti surat iti maysa a pagiwarnak ti Ohio. Ket kasla nagbunga dagiti panagkagumaanna “madi a rikna … ti naparnuay a maisupiat iti Simbaan” iti lugar (Doktrina ken Katulagan 71, paulo ti benneg). Ania ti nasken nga aramiden dagiti mamatpati iti maysa a kasasaad a kas iti dayta? Idinto nga awan ti maysa nga umno a sungbat para iti tunggal kasasaad, kasla lang masansan no dadduma—agraman iti kastoy a kasasaad idi 1831—paset ti sungbat ti Apo ti mangipakdaar iti kinapudno ken mangatur kadagiti kinaulbod babaen iti “panangipakdaar [iti] ebanghelio” (bersikulo 1). Wen, kanayon nga addanto dagiti agdillaw iti aramid ti Apo, ngem iti udina, “awan ti armas a naaramid a maibusor iti [daytoy] a rumang-ayto” (bersikulo 9).

Kitaen iti “Ezra Booth and Isaac Morley,” iti Revelations in Context, 134.

Dagiti Kapanunotan iti Panagsursuro iti Pagtaengan ken iti Simbaan

Doktrina ken Katulagan 71

Tarabayennakto ti Espiritu bayat ti panangipakdaarko iti ebanghelio ti Mangisalakan.

Mabalin a makariribuk no babalawen wenno uyawen dagiti tao ti pammatiyo iti Mangisalakan, iti ebangheliona, wenno iti Simbaanna. No mapasamak dayta, ania ti aramidenyo? Kasta met laeng ti napasamak idiay Ohio idi 1831 (kitaen ti paulo ti benneg iti Doktrina ken Katulagan 71). Ania ti imbaga ti Apo kada Joseph Smith ken Sidney Rigdon nga aramidenda maipapan iti daytoy iti Doktrina ken Katulagan 71? Nalabit a mailistayo dagiti instruksion nga inted ti Apo kadakuada ken dagiti bendision nga inkarina.

Mainayon iti panagadal iti benneg 71, mabalinyo pay a sukisoken no kasano a simmungbat ti Mangisalakan kadagiti kritikona bayat ti mortal a panangministrona. Adtoy ti sumagmamano a pagarigan: Mateo 22:15–22; 26:59–64; Juan 10:37–38. Ania ti masursuroyo manipud Kenkuana? Ania dagiti nayon a nalawag a pannakaammo ken pannakaawat a magun-odyo manipud iti Mateo 18:15; Taga Efeso 4:31–32; 2 Timoteo 3:12; Santiago 1:19?

Kasano a mayaplikar kadakayo ti balakadna kadagiti situasion a pakaipasanguanyo iti agdama? Mabalinyo nga ibilang dagiti wagas a sitatalna a mangatur kadagiti kinaulbod iti bukodyo a balikas. Kas pagarigan, mabalinyo a rugian babaen ti panangyebkas iti panagraem kadagiti pannirigan dagiti dadduma a tao, ket kalpasanna mabalinyo nga ibinglay iti napakumbaba ken nasayaat a wagas no ania ti patienyo maipapan ken ni Jesucristo ken dagiti pannursurona. Tapno makapagsaganakayo kadagitoy a gundaway, nalabit a mabalinyo nga aramiden daytoy a pamay-an a kaduayo dagiti gagayyem wenno miembro ti pamilia.

Kitaen met iti Topics and Questions, “Helping Others with Questions,” Gospel Library; Dallin H. Oaks, “Loving Others and Living with Differences,” Liahona, Nob. 2014, 25–28; Jörg Klebingat, “Valiant Discipleship in the Latter Days,” Liahona, Mayo 2022, 107–10.

Doktrina ken Katulagan 72

Bendisionannak ti Apo babaen ti panagministro dagiti lider kas kadagiti bishop.

Idi naawagan nga agserbi ni Newel K. Whitney kas maysa a bishop, adda bassit paggiddiatan dagiti pagrebbenganna iti pagrebbengan dagiti agdama a bishop ita. Kas pagarigan, inmatonan ni Bishop Whitney ti pannakakonsagrar dagiti sanikua ken pammalubos nga agnaed iti daga ti Zion iti Missouri. Ngem bayat iti panangbasayo maipapan iti calling-na iti Doktrina ken Katulagan 72, mabalin a makitayo ti sumagmamano a koneksion iti no ania ti ar-aramiden dagiti bishop ita—uray iti kaipapanan, no saan a dagiti nalawag, kadagiti pagrebbenganda.

Kas pagarigan, iti ania a wagas a “mangidatag[ka] iti pakaammuan” iti bishopmo? (bersikulo 5). Iti aldawtayo, “ti pagidulinan ti Apo” ket mabalin a pakairamanan dagiti donasion, serbisio, ken talento dagiti miembro ti ward (kitaen kadagiti bersikulo 10, 12). Kasano a makatulongkayo iti dayta a pagidulinan?

Kasano a binendisionannakayo ti Apo ken ti pamiliayo babaen ti panagserbi ti maysa a bishop?

Kitaen met iti Quentin L. Cook, “Bishops—Shepherds over the Lord’s Flock,” Liahona, Mayo 2021, 56–60.

Doktrina ken Katulagan 73

Maaddaannak kadagiti gundaway a mangibinglay iti ebanghelio ti Mangisalakan.

Idi nagsubli da Joseph Smith ken Sidney Rigdon manipud iti naidutok nga aramidenda kas misionario (kitaen iti Doktrina ken Katulagan 71), imbaga ti Apo kadakuada nga ituloyda ti panangipatarusda iti Biblia (kitaen iti Pangiwanwan iti Nasantuan a Kasuratan, “Patarus ni Joseph Smith (PJS),” Gospel Library). Ngem saan a kayat a sawen dayta a kayatna nga isardengda ti mangibinglay iti ebanghelio. Ngamin, paset dayta ti biag ti maysa a disipulo.

Bayat ti panangbasayo iti Doktrina ken Katulagan 73, ibilangyo no kasano a makapagtultuloykayo kadagiti panangibinglayyo iti ebanghelio, “no la ketdi mabalin” (bersikulo 4—wenno napaypayso—a paset ti biagyo kadagiti dadduma pay a pagrebbenganyo.

Ti panangibinglay iti ebanghelio ni Jesucristo ket mabalin a gagangay ken natural.

Doktrina ken Katulagan 75:1–16

“Agtrabahokayo iti kabaelanyo … a mangipakdaar iti kinapudno.”

Ti paltiing iti benneg 75 ket naiturong kadagiti tao a “nangted iti nagnagan[da] a mapan mangipakdaar iti ebanghelio ti [Mangisalakan]” (bersikulo 2). Maysa a wagas a panangadal iti daytoy a paltiing ket ti panangaramid iti dua a listaan: (1) no kasano ti epektibo a panangibinglay iti ebanghelio ken (2) no kasano a bendisionan ken suportarannatayo ti Apo kas iti aramidentayo.

Ania ti panagkunayo ti kayat a sawen ti “agtalinaed” wenno “agbalin a sadut” iti panangibinglay iti ebanghelio? Ania ti kayarigan ti “agtrabahokayo iti kabaelanyo”? (bersikulo 3).

Kitaen iti “I’ll Go Where You Want Me to Go,” Hymns, no. 270.

Para iti ad-adu pay a kapanunotan, kitaen dagiti isyu ti magasin a Liahona ken Para iti Pigsa dagiti Agtutubo iti daytoy a bulan.

Dagiti Kapanunotan para iti Panangisuro kadagiti Ubbing

Doktrina ken Katulagan 71

Masalaknibak ti kinapudno babaen ti panangibinglayko ti pammaneknekko.

• Mabalinyo nga usaren ti Doktrina ken Katulagan 71 wenno “Kapitulo 25: Mapan iti Mision da Joseph Smith ken Sidney Rigdon” (iti Dagiti Estoria iti Doktrina ken Katulagan, 96, wenno ti katupagna a video iti Gospel Library) tapno maisuro dagiti annakyo maipapan kadagiti kasasaad a nangparegta ti benneg 71. Kalpasanna tulonganyo ida a mangtakuat iti bersikulo 1 no ania ti kayat ti Apo nga aramiden da Joseph ken Sidney maipapan kadagiti “madi a rikna” iti Simbaan. Kasano a kinunana a tulongannanto ida? Kasano a maipadatayo kada Joseph ken Sidney?

  Chapter 25: Joseph Smith and Sidney Rigdon Go on a Mission: December 1831–January 1832

• Mabalinyo pay ti agkansion iti kanta a mangparegta kadagiti annakyo nga agbalin a pudno iti Mangisalakan, kas iti “Stand for the Right” (Children’s Songbook, 159). Tulonganyo dagiti annakyo a mangsanay no kasano nga ibinglayda ti ammoda maipapan ken ni Jesucristo.

Doktrina ken Katulagan 72:2

Inawagan ti Apo ti maysa a bishop tapno matulongannak.

• Ti aggigiddan a panangbasa iti Doktrina ken Katulagan 72:2 ket mabalin a mangparnuay iti gundaway a mapaglilinnawagan no apay nga ited kadatayo ti Apo dagiti bishop (kitaen met iti “Chapter 17: The First Bishops of the Church,” iti Dagiti Estoria iti Doktrina ken Katulagan, 64–66, wenno iti katupagna a video iti Gospel Library). Mabalinyo ken dagiti annakyo ti makasarak kadagiti ladawan wenno banag a mangibagi kadagiti pagrebbengan ti maysa a bishop. Ti ladawan ken ti panid ti aktibidad iti udi daytoy a balabala ket mangipaay iti sumagmamano a kapanunotan. Kalpasanna mabalinyo a pagsasaritaan maipapan kadagiti bishop nga am-ammoyo ken no kasano a binendisionan ti Apo ti pamiliayo babaen ti panagserbida.

  Chapter 17: The First Bishops of the Church: February and December 1831

Kanayon nga isuroyo ti maipapan ken ni Jesucristo. “Ania man ti isursuroyo, laglagipenyo a pudno nga isursuroyo ti maipapan ken ni Jesucristo ken no kasano ti agbalin a kas Kenkuana” (Panangisuro iti Wagas ti Mangisalakan, 6). Kas pagarigan, no isuroyo dagiti annakyo maipapan kadagiti bishop, yunay-unayyo nga isuda ti pannakabagi ni Jesucristo, nga inawaganna nga agaramid iti trabahona (kitaen iti 1 Pedro 2:25).

Idawat ti Apo kadagiti bishop a mangaywan kadagiti agkasapulan.

Doktrina ken Katulagan 75:3

Maaramidko ti amin a kabaelak iti Apo.

• Tapno pagsasaritaan ti nagdumaan ti panagbalin a “nasadut” ken “[pan]agtrabaho iti kabaelan[tayo],” nalabit a mabalinyo ti agpili iti sumagmamano nga aramid ti panagserbi wenno trabaho iti pagtaengan ket awisenyo dagiti annakyo a mangipakita iti panangaramid kadagitoy a sisasadut ken kalpasanna iti amin a pigsada. Bayat ti panangbasayo iti “saan nga agbalin a nasadut” iti Doktrina ken Katulagan 75:3, mabalin nga ipakita dagiti annakyo no kasano nga aramidenda dagiti trabahoda a sisasadut. No basaenyo ti “ngem agtrabahokayo iti kabaelanyo,” mabalinda nga ipakita no kasano nga agtrabahoda a sipapasnek. Apay a napateg nga agtrabahotayo iti amin a kabaelantayo no agserserbitayo iti Apo?

• Iti mensahena a “Two Principles for Any Economy” (Liahona, Nob. 2009, 55–58), insarita ni President Dieter F. Uchtdorf ti dua nga estoria maipapan iti aramid. Nalabit a mabalinyo nga ibinglay dagitoy kadagiti annakyo ken pagsasaritaanyo no kasano ti rikna a mangammo a nagtrabahotayo a sipapasnek ken inaramidtayo ti amin a kabaelantayo.

Para iti ad-adu pay a kapanunotan, kitaen iti isyu ti magasin a Friend iti daytoy a bulan.

Panangbigbig kadagiti Nadunggo nga Asi iti Biagmo, ni Keith Larson