I Will Remember the Covenant [E ha’amana’o vau i te fafaura’a], nā Enrique Manuel Garcia

30 nō Tiunu–6 nō Tiurai : « ’Aore hō’ē mauiha’a tama’i ’o tē tu’uhia mai nō te pāto’i ia ’ōrua e manuia »

Te Ha’api’ira’a Tumu ʼe te mau Fafaura’a 71–75

Mai tōna tamari’i-ri’i-ra’a, ’ua fa’aruru ’o Iosepha Semita i te mau fa’a’inora’a—tae noa atu i te mau ’enemi—’a rave ai ’oia i te ’ohipa a te Atua. Terā rā, e mea ’ino roa atu i te pae hope’a o te matahiti 1831, ’a ha’amata ai ’o Ezra Booth i te fa’ahapa i te ’Ēkālesia i mua i te ta’ata, nō te mea, i taua taime ra, nō roto mai te fa’a’inora’a i te hō’ē ta’ata fa’aro’o tahito. ’Ua ’ite ’o Ezra ’ia Iosepha i te fa’a’ohipara’a i te mana o te Atua nō te fa’aora i te hō’ē vahine. ’Ua anihia ’oia i te pe’era’a atu ia Iosepha i roto i te tere mātāmua nō te hi’o i te fenua o Ziona i Missouri. Terā rā, mai taua taime ra, ’ua mou tōna fa’aro’o, ’e nō te tāmata i te ha’afaufa’a ’ore i te Peropheta, ’ua nene’i ’oia e rave rahi rata i roto i te ve’a parau ’āpī nō Ohio. E au ra ē, tē manuia ra tāna mau tauto’ora’a nō « te mau mana’o au ’ore i tupu nō ni’a i te ’Ēkālesia » i taua vāhi ra (Te Ha’api’ira’a Tumu ʼe te mau Fafaura’a 71, upo’o tufa’a). E aha tā te feiā fa’aro’o e rave i roto i taua huru ra ? Noa atu ē, ’aita e pāhonora’a ti’a nō te huru ti’ara’a tāta’itahi, mai te huru ra ē, e mea pinepine—tae noa atu i roto i teie hi’ora’a i te matahiti 1831—e tuha’a o te pāhonora’a a te Fatu, ’o te fa’a’itera’a ïa i te parau mau ’e te fa’atītī’aifarora’a i te mau parau ha’avare nā roto i « te [poro-haere-ra’a] i te ’evanelia » (’īrava 1). ’Oia mau, e fa’a’ino-tāmau-hia te ’ohipa a te Fatu, terā rā, i te pae hope’a, « ’aore hō’ē mauiha’a tama’i ’o tē tu’uhia mai nō te pāto’i ia ’ōrua e manuia » (’īrava 9).

Hi’o « Ezra Booth and Isaac Morley », i roto i Revelations in Context, 134.

Mana’o nō te ’apo i te ha’api’ira’a i te ’utuāfare ’e i te fare purera’a

Te Ha’api’ira’a Tumu ’e te mau Fafaura’a 71

E arata’i te Vārua iā’u ’a poro ai au i te ’evanelia a te Fa’aora.

E mea pe’ape’a ’ia fa’ahapahia ’e ’aore rā ’ia tāhitohito-ana’e-hia te ta’ata i tō ’outou fa’aro’o i roto i te Fa’aora, i tāna ’evanelia, ’e ’aore rā i tāna ’Ēkālesia. ’Ia tupu ana’e te reira, e aha tā ’outou e rave ? ’Ua tupu a’ena te tahi ’ohipa mai te reira te huru i Ohio i te matahiti 1831 (’a hi’o i te upo’o tufa’a nō Te Ha’api’ira’a Tumu ’e te mau Fafaura’a 71). E aha tā te Fatu i parau ’ia Iosepha Semita ’e ia Sidney Rigdon ’ia rave i te reira i roto i Te Ha’api’ira’a Tumu ’e te mau Fafaura’a 71 ? Pēnei a’e e nehenehe ’outou e tāpura i te mau arata’ira’a tā te Fatu i hōro’a ia rātou ’e i te mau ha’amaita’ira’a tāna i fafau.

Ma te ’amui i te tuatāpapara’a a te tufa’a 71, e nehenehe ’outou e hi’o atu mea nāhea te Fa’aora i te pāhonora’a i tei fa’ahapa iāna i te taime tāvini ai ’oia i te tāhuti nei. Teie te tahi mau hi’ora’a : Mataio 22:15–22 ; 26:59–64 ; Ioane 10:37–38. E aha tā ’outou i ’apo mai roto mai iāna ra ? E aha te tahi atu ā mau ’ite e noa’a ’ia ’outou nō roto mai i te Mataio 18:15 ; Ephesia 4:31–32 ; 2 Timoteo 3:12 ; Iakobo 1:19 ?

Nāhea tāna a’ora’a e tano ai i te mau huru ’ohipa tā ’outou e fa’aruru nei i teie mahana ? E nehenehe ’outou e feruri i te mau rāve’a nō te fa’atītī’aifaro ma te hau i te mau parau tano ’ore ’ia au i tā ’outou iho mau parau. ’Ei hi’ora’a, e nehenehe īa ’outou e fa’atura atu i te hi’ora’a a vetahi ’ē, e i muri iho e nehenehe ’outou e fa’a’ite ma te ha’eha’a ’e te au māite i te mea tā ’outou e ti’aturi nei i ni’a ia Iesu Mesia ’e tāna mau ha’api’ira’a. Nō te fa’aineine i teie mau fa’anahora’a, pēnei a’e e nehenehe ’outou e fa’a’ohipa i teie arata’ira’a i tō ’outou mau hoa ’e ’aore rā i te mau melo o te utuāfare.

Hi’o ato’a Topics and Questions, « Helping Others with Questions [Tauturu ia vetahi ’ē ma te mau uira’a] », Vaira’a buka ’evanelia ; Dallin H. Oaks, « Te herera’a ia vetahi ’ē ’e te orara’a i roto i te ta’a-’ē-ra’a », Liahona, Novema 2014, 25–28 ; Jörg Klebingat, « Ti’ara’a pipi itoito i te mau mahana hope’a nei », Liahona, Mē 2022, 107–10.

Te Ha’api’ira’a Tumu ’e te mau Fafaura’a 72

Tē ha’amaita’i nei te Fatu iā’u nā roto i te tāvinira’a a te feiā fa’atere mai te mau ’episekōpo.

’A pi’ihia ai ’o Newel K. Whitney ’ei ’episekōpo nō te ’Ēkālesia, e mea ta’a ’ē ri’i tāna mau ’ohipa i tā te mau ’episekōpo nō teie tau. ’Ei hi’ora’a, nā te ’episekōpo Whitney i ’ite ’atea i te ha’amo’ara’a o te fenua ’e te parau fa’ati’a nō te fa’aea i te fenua nō Ziona i Missouri. Teie rā, ’ia tai’o ana’e ’outou i tōna pi’ira’a i roto i Te Ha’api’ira’a Tumu ʼe te mau Fafaura’a 72, e ’ite paha ’outou i te tahi mau tū’atira’a i te mau mea tā te mau ’episekōpo e rave i teienei mahana—i te pae vārua iho ā rā, ’aita ana’e i roto i te mau ha’apāpūra’a o tā rātou mau ’ohipa.

’Ei hi’ora’a, e mea nāhea ’outou i te « tu’u mai i te tuatāpapara’a » i tō ’outou ’episekōpo ? (’īrava 5). I teienei ’anotau, e nehenehe « te fare vaira’a faufa’a a te Fatu » e fa’aō mai i te mau ō, te tāvinira’a ’e te mau tārēni o te mau melo o te pāroita (hi’o te mau ’īrava10, 12). Nāhea ’outou e tauturu ai i te reira fare vaira’a faufa’a ?

’Ua nāhea tō te Fatu ha’amaita’ira’a ’ia ’outou ’e tō ’outou ’utuāfare nā roto i te tāvinira’a a te hō’ē ’episekōpo ?

Hi’o ato’a Quentin L. Cook, « Te mau ’episekōpo—Te mau tīa’i māmoe i ni’a i te nana a te Fatu », Liahona, Mē 2021, 56–60.

Te Ha’api’ira’a Tumu ’e te mau Fafaura’a 73

E nehenehe au e ’imi i te mau rāve’a ato’a nō te fa’a’ite i te ’evanelia a te Fa’aora.

I te ho’ira’a mai ’o Iosepha Semita ’e ’o Sidney Rigdon mai tā rāua tonora’a misiōnare (hi’o Te Ha’api’ira’a Tumu ’e te mau Fafaura’a 71), ’ua parau te Fatu ’ia rāua ’ia tāmau noa i tā rāua ’īritira’a i te Bibilia (hi’o Arata’i nō te mau pāpa’ira’a mo’a, « Joseph Smith Translation (JST) », Vaira’a buka ’evanelia). Terā rā, tōna aura’a, ’aita ’oia i hina’aro ia rātou ’ia fa’aea i te fa’a’ite i te ’evanelia. Inaha ho’i, e tuha’a te reira nō te orara’a o te hō’ē pipi.

’Ia tai’o ’outou i Te Ha’api’ira’a Tumu ʼe te mau Fafaura’a 73, ’a feruri nāhea ’outou e fa’ariro ai i te porora’a i te ’evanelia ’ei « mea e ti’a ’ia nā reira » (’īrava 4)—’e aore rā, ’ei ’ohipa mau—’ei tuha’a nō tō ’outou orara’a i roto i te tahi atu ā mau hōpoi’a nā ’outou.

E nehenehe te fa’a’itera’a i te ’evanelia a Iesu Mesia e riro ’ei ’ohipa mātarohia ’e te ’ōhie.

Te Ha’api’ira’a Tumu ’e te mau Fafaura’a 75:1–16

« ’A rave rā i te ’ohipa ma tō ’outou pūai […] i te porora’a atu i te parau mau. »

’Ua fa’ataehia te heheura’a i roto i te tufa’a 75 i te mau nuna’a tei « hōro’a i [tō rātou] mau i’oa nō te haere atu e poro i te ’evanelia o [te Fa’aora] » (’īrava 2). Hō’ē rāve’a nō te tuatāpapa i teie heheura’a, ’o te hāmanira’a ïa e piti tāpura : (1) nāhea ’ia fa’a’ite maita’i i te ’evanelia ’e (2) nāhea te Fatu i te ha’amaita’i ’e i te pāturu ia tātou ’ia nā reira ana’e tātou.

E aha tō ’outou mana’o i te aura’a « e ha’amarirau » ’e ’aore rā « e fa’aea noa » i roto i te fa’a’itera’a i te ’evanelia ? E aha te aura’a nō teie parau « rave […] i te ’ohipa ma tō ’outou pūai » ? (’īrava 3).

Hi’o ato’a « E pe’e au ia ’oe », Te mau hīmene, N°165.

Nō te tahi atu ā mana’o, ’a hi’o i te ve’a Liahona ’e Nō te pūai o te feiā ’āpī nō teie ’āva’e.

Mana’o nō te ha’api’i i te tamari’i

Te Ha’api’ira’a Tumu ’e te mau Fafaura’a 71

E nehenehe au e pāruru i te parau mau nā roto i te fa’a’itera’a i tō’u ’itera’a pāpū.

• ’A fa’a’ohipa i te upo’o parau tufa’a nō Te Ha’api’ira’a Tumu ’e te mau Fafaura’a 71 ’e ’aore rā, te « Pene 25 : Te haerera’a o Iosepha Semita ’e Sidene Rigidoni i te misioni » (i roto Te mau ’ā’amu nō roto mai i te Parau Ha’api’ira’a ’e te mau Parau Fafau, 96, ’e ’aore rā te video i roto i te Vaira’a buka ’evanelia) nō te ha’api’i i tā ’outou mau tamari’i i te mau mea tei fa’auruhia i te tufa’a 71. I muri iho e tauturu ia rātou ’ia ’ite i roto i te ’īrava 1 e aha tā te Fatu i hina’aro ’ia rave ’o Iosepha ’e ’o Sidney nō ni’a i te « mau mana’o au ’ore » nō ni’a i te ’Ēkālesia. ’Ua nāhea ’oia i te paraura’a ē, e tauturu ’oia ia rātou ? Nāhea tātou e fa’ariro ai ia tātou mai ia Iosepha ’e ’o Sidney ?

  Chapter 25: Joseph Smith and Sidney Rigdon Go on a Mission: December 1831–January 1832

• E nehenehe ato’a ’outou e hīmene i te tahi hīmene tei fa’auru i tā ’outou mau tamari’i ’ia riro ’ei parauti’a ha’apa’o i te Fa’aora, mai te « Défends le bien » (Chants pour les enfants, 81). Tauturu i tā ’outou mau tamari’i ’ia ha’api’ipi’i e nāhea rātou i te fa’a’itera’a ia Iesu Mesia.

Te Ha’api’ira’a Tumu ’e te mau Fafaura’a 72:2

’Ua pi’i te Fatu i te hō’ē ’episekōpo nō te tauturu iā’u.

• E nehenehe te tai’o-āmui-ra’a i Te Ha’api’ira’a Tumu ’e te mau Fafaura’a 72:2 e fa’atupu i te hō’ē taime nō te āparau nō te aha te Fatu i hōro’a mai ai ia tātou te mau ’episekōpo (hi’o ato’a « Pene 17 : Te mau ’episekōpo mātāmua o te ’Ēkālesia », i roto i Te mau ’ā’amu nō roto mai i te Parau Ha’api’ira’a ’e te mau Parau Fafau, 64–66, ’e ’aore rā te video tano i roto i te Vaira’a buka ’evanelia). E nehenehe ’outou ’e tā ’outou mau tamari’i e ’imi i te mau hōho’a ’e ’aore rā te mau tao’a e fa’ahōho’a nei i te mau hōpoi’a a te hō’ē ’episekōpo. E hōro’a te hōho’a ’e te ’api fa’a’ana’anataera’a i te pae hope’a o teie arata’ira’a ha’api’ira’a i te tahi mau mana’o. I muri iho e nehenehe ’outou e paraparau ’āmui nō ni’a i te mau ’episekōpo tā ’outou i mātau ’e e mea nāhea tō te Fatu ha’amaita’ira’a i tō ’outou ’utuāfare nā roto i tā rātou tāvinira’a.

  Chapter 17: The First Bishops of the Church: February and December 1831

’Ia ha’api’i tāmau noa ia Iesu Mesia. « Noa atu te mea tā ’oe e ha’api’i ra, ’a ha’amana’o ē tē ha’api’i mau nei ’oe ia Iesu Mesia ’e e nāhea tātou ’e riro ai mai iāna ra te huru » (Ha’api’ira’a mai tā te Fa’aora, 6). ’Ei hi’ora’a, ’ia ha’api’i ana’e ’outou i tā ’outou mau tamari’i nō ni’a i te mau ’episekōpo, ’a ha’apāpū ē, e mau ti’a rātou nō Iesu Mesia, tei pi’ihia e āna nō te rave i tāna ’ohipa (hi’o 1 Petero 2:25).

E ani te Fatu i te mau ’episekōpo ’ia aupuru i te mau ta’ata tei hina’aro i te tauturu.

Te Ha’api’ira’a Tumu ’e te mau Fafaura’a 75:3

E hōro’a atu vau i tā’u tauto’ora’a maita’i roa a’e nō te Fatu.

• Nō te paraparau nō ni’a i te ta’a-’ē-ra’a i rotopū i te « hupehupe » ’e « te rohi [ra’a] ma tō [tātou] pūai », pēnei a’e e nehenehe ’outou e mā’iti i te tahi mau ’ohipa tāvinira’a ’e ’aore rā te mau ’ohipa nō te ’utuāfare ’e e ani i tā ’outou mau tamari’i ’ia fa’a’ite mai i te ravera’a i te reira ma te itoito ore ’e i muri iho ma tō rātou pūai ato’a. ’A tai’o ai ’outou « ’eiaha ato’a e fa’aea noa » i roto i Te Ha’api’ira’a Tumu ’e te mau Fafaura’a 75:3, e nehenehe tā ’outou mau tamari’i e fa’a’ite nāhea rātou e rave i te mau ’ohipa ma te hupehupe. ’Ia tai’o ana’e ’outou « ’a rohi ma tō ’outou pūai ato’a », e nehenehe rātou e fa’a’ite i tō rātou huru itoito i te rohira’a. Nō te aha e mea faufa’a ’ia fa’aitoito tātou ’ia tāvini tātou i te Fatu ?

• I roto i tāna a’ora’a « Nā parau tumu e piti nō te terera’a faufa’a » (Liahona, Novema 2009, 55–58), ’ua fa’ati’a te peresideni Dieter F. Uchtdorf e piti ’ā’amu nō ni’a i te ’ohipa. Pēnei a’e e nehenehe tā ’outou e fa’a’ite i te reira i tā ’outou mau tamari’i ’e ’ia paraparau nō ni’a i tō tātou mau mana’o nō te ’ite ē, ’ua ’ohipa itoito mātou ’e ’ua rave maita’i roa.

Nō te tahi atu ā mana’o, ’a hi’o i te ve’a Hoa nō teie ’āva’e.

Recognizing the Tender Mercies in Your Life [Te ’itera’a i te aroha mau i roto i tō ’outou orara’a], nā Keith Larson