“ວັນທີ 27 ເດືອນຕຸລາ–ວັນທີ 2 ເດືອນພະຈິກ: ‘ບ້ານແດ່ນາມຂອງເຮົາ’: ຄຳສອນ ແລະ ພັນທະສັນຍາ 124,” ຈົ່ງຕາມເຮົາມາ—ສຳລັບບ້ານ ແລະ ໂບດ: ຄຳສອນ ແລະ ພັນທະສັນຍາ 2025 (2025)

“ຄຳສອນ ແລະ ພັນທະສັນຍາ 124,” ຈົ່ງຕາມເຮົາມາ—ສຳລັບບ້ານ ແລະ ໂບດ: 2025

Nauvoo the Beautiful [ນາວູທີ່ສວຍງາມ], ໂດຍ ແລຣີ ຊີ ວິນບອກ. ລິຂະສິດ 2023

ວັນທີ 27 ເດືອນຕຸລາ–ວັນທີ 2 ເດືອນພະຈິກ: “ບ້ານແດ່ນາມຂອງເຮົາ”

ຄຳສອນ ແລະ ພັນທະສັນຍາ 124

ເຖິງແມ່ນໃນເວລາຫົກປີທີ່ຜ່ານມາຈະຍາກລຳບາກສຳລັບໄພ່ພົນ, ແຕ່ສະຖານະການໄດ້ເລີ່ມດີຂຶ້ນໃນລະດູໃບໄມ້ປົ່ງຂອງປີ 1839: ໄພ່ພົນທີ່ອົບພະຍົບໄດ້ພົບຄວາມເຫັນອົກເຫັນໃຈຈາກພົນລະເມືອງຢູ່ເມືອງຄວິນຊີ, ລັດອິລິນອຍ. ທະຫານຍາມໄດ້ປ່ອຍ ໂຈເຊັບ ສະມິດ ແລະ ຜູ້ນຳຂອງສາດສະໜາຈັກຄົນອື່ນໆໃຫ້ໜີຈາກການຄຸມຂັງຢູ່ໃນລັດມີເຊີຣີ. ແລະ ສາດສະໜາຈັກຫາກໍຊື້ທີ່ດິນຢູ່ລັດອິລິນອຍ ບ່ອນທີ່ໄພ່ພົນສາມາດເຕົ້າໂຮມກັນອີກຄັ້ງ. ແມ່ນແລ້ວ, ມັນເປັນດິນໜອງນໍ້າ, ເປັນດິນທີ່ເຕັມໄປດ້ວຍຍຸງ, ແຕ່ເມື່ອປຽບທຽບໃສ່ກັບການທ້າທາຍທີ່ໄພ່ພົນໄດ້ປະເຊີນແລ້ວ, ສະຖານທີ່ບ່ອນນີ້ອາດເບິ່ງຄືວ່າ ສາມາດຈັດການໄດ້. ສະນັ້ນ ເຂົາເຈົ້າຈຶ່ງໄດ້ເປັ່ງນ້ຳອອກຈາກໜອງ ແລະ ໄດ້ຮ່າງກົດຂຶ້ນສຳລັບເມືອງໃໝ່ແຫ່ງນີ້, ຊຶ່ງເຂົາເຈົ້າໄດ້ໃສ່ຊື່ວ່າ ນາວູ. ມັນແປວ່າ “ສວຍງາມ” ໃນພາສາເຮັບເຣີ, ແຕ່ມັນເປັນຄຳທີ່ສະແດງອອກເຖິງສັດທາຫລາຍກວ່າຄຳບັນຍາຍທີ່ຖືກຕ້ອງ, ຢ່າງໜ້ອຍໃນຕອນຕົ້ນ. ໃນຂະນະດຽວກັນ, ພຣະຜູ້ເປັນເຈົ້າໄດ້ເນັ້ນໃຫ້ສາດສະດາຮູ້ສຶກເຖິງຄວາມຮີບດ່ວນ. ພຣະອົງມີຄວາມຈິງ ແລະ ພິທີການຫລາຍຕື່ມອີກທີ່ຈະຕ້ອງຟື້ນຟູ, ແລະ ພຣະອົງຕ້ອງການໃຫ້ມີພຣະວິຫານສັກສິດ ບ່ອນທີ່ພຣະອົງຈະສາມາດ “ສວມມົງກຸດ [ໃຫ້ໄພ່ພົນຂອງພຣະອົງ] ດ້ວຍກຽດຕິຍົດ, ຄວາມເປັນອະມະຕະ, ແລະ ຊີວິດນິລັນດອນ” (ຄຳສອນ ແລະ ພັນທະສັນຍາ 124:55). ໃນຫລາຍວິທີທາງ, ຄວາມຮູ້ສຶກແຫ່ງສັດທາອັນດຽວກັນເຫລົ່ານີ້ ແລະ ຄວາມຮີບດ່ວນ ໄດ້ປະກົດຢ່າງຊັດເຈນໃນວຽກງານຂອງພຣະຜູ້ເປັນເຈົ້າໃນທຸກວັນນີ້.

ເບິ່ງ Saints, 1:399–427; “Organizing the Church in Nauvoo,” ໃນ Revelations in Context, 264–71.

ຮຽນຮູ້ເພີ່ມເຕີມ ກ່ຽວກັບສະຖານທີ່ປະຫວັດສາດຂອງສາດສະໜາຈັກໃນລັດອິລິນອຍ.

ແນວຄິດສຳລັບການຮຽນຮູ້ຢູ່ທີ່ບ້ານ ແລະ ຢູ່ທີ່ໂບດ

ຄຳສອນ ແລະ ພັນທະສັນຍາ 124:2–11

ເຮົາສາມາດເຊື້ອເຊີນຄົນອື່ນໃຫ້ເຂົ້າມາຫາພຣະຄຣິດໄດ້.

ພຣະຜູ້ເປັນເຈົ້າໄດ້ບອກສາດສະດາໂຈເຊັບ ສະມິດ ໃຫ້ “ຂຽນການປະກາດເຖິງພຣະກິດຕິຄຸນຂອງ [ພຣະອົງ]” ເຖິງ “ບັນດາກະສັດທັງປວງຂອງໂລກ” (ເບິ່ງ ຄຳສອນ ແລະ ພັນທະສັນຍາ 124:2–11). ຖ້າຫາກທ່ານຮັບວຽກງານມອບໝາຍນີ້, ການປະກາດຂອງທ່ານຈະກ່າວວ່າແນວໃດກ່ຽວກັບພຣະເຢຊູຄຣິດ ແລະ ພຣະກິດຕິຄຸນທີ່ຖືກຟື້ນຟູຂອງພຣະອົງ? ໄຕ່່ຕອງນຳອີກເຖິງວິທີທີ່ທ່ານຈະສາມາດແບ່ງປັນພະຍານຂອງທ່ານຢ່າງເປັນປົກກະຕິ ແລະ ທຳມະຊາດກັບຄົນທີ່ທ່ານພົວພັນນຳທຸກວັນ.

ເບິ່ງ “ການຟື້ນຟູຄວາມສົມບູນແຫ່ງພຣະກິດຕິຄຸນຂອງພຣະເຢຊູຄຣິດ: ການປະກາດຕໍ່ໂລກເນື່ອງໃນວາລະຄົບຮອບສອງຮ້ອຍປີ,” ຫ້ອງສະໝຸດພຣະກິດຕິຄຸນ ນຳອີກ.

ຄຳສອນ ແລະ ພັນທະສັນຍາ 124:12–21

ເຮົາສາມາດເປັນສານຸສິດຜູ້ທີ່ພຣະຜູ້ເປັນເຈົ້າໄວ້ວາງໃຈໄດ້.

ໃຫ້ພິຈາລະນາທີ່ຈະແບ່ງປັນກັບຄົນອື່ນ, ດັ່ງທີ່ພຣະຜູ້ຊ່ວຍໃຫ້ລອດໄດ້ກະທຳໃນ ຄຳສອນ ແລະ ພັນທະສັນຍາ 124:12–21, ຄຸນລັກສະນະທີ່ເປັນເໝືອນດັ່ງພຣະຄຣິດທີ່ທ່ານເຫັນໃນຂໍ້ພຣະຄຳພີ. ພຣະອົງໄດ້ສະແດງອອກເຖິງຄວາມຮັກ ແລະ ຄວາມໄວ້ວາງໃຈຕໍ່ທ່ານແນວໃດ?

ເບິ່ງ Richard J. Maynes, “Earning the Trust of the Lord and Your Family,” Liahona, Nov. 2017, 75–77 ນຳອີກ.

ຄຳສອນ ແລະ ພັນທະສັນຍາ 124:22–24, 60–61

ພຣະຜູ້ເປັນເຈົ້າປະສົງໃຫ້ເຮົາຕ້ອນຮັບ ແລະ ຮັບເອົາຄົນອື່ນ.

ຂະນະທີ່ທ່ານໄຕ່ຕອງຄຳແນະນຳຂອງພຣະຜູ້ເປັນເຈົ້າໃນ ຄຳສອນ ແລະ ພັນທະສັນຍາ 124:22–24, 60–61, ໃຫ້ຄິດກ່ຽວກັບວິທີທີ່ທ່ານຈະສາມາດເຮັດໃຫ້ບ້ານ ແລະ ຫວອດຂອງທ່ານ ເປັນສະຖານທີ່ທີ່ຄືກັນກັບສິ່ງທີ່ພຣະຜູ້ເປັນເຈົ້າໄດ້ນຶກພາບໄວ້ສຳລັບເມືອງນາວູ.

ເບິ່ງ “A Friend to All” (ວິດີໂອ), ChurchofJesusChrist.org ນຳອີກ.

A Friend to All
Elder Ulisses Soares talks of the need for kindness and acceptance.

ພຣະວິຫານນາວູໃນລະຫວ່າງການກໍ່ສ້າງ — ລາຍລະອຽດຈາກ Joseph Smith at the Nauvoo Temple [ໂຈເຊັບ ສະມິດ ຢູ່ທີ່ພຣະວິຫານນາວູ], ໂດຍ ແກຣີ ອີ ສະມິດ

ຄຳສອນ ແລະ ພັນທະສັນຍາ 124:25–45, 55

ເຮົາສ້າງພຣະວິຫານແດ່ພຣະຜູ້ເປັນເຈົ້າ ເພື່ອຮັບເອົາພິທີການສັກສິດ.

ເປັນຫຍັງທ່ານຈຶ່ງຮູ້ສຶກວ່າ ພຣະຜູ້ເປັນເຈົ້າຈຶ່ງ “ບັນຊາຢູ່ສະເໝີ” ໃຫ້ຜູ້ຄົນຂອງພຣະອົງ “ສ້າງ [ພຣະວິຫານ] ແດ່ນາມອັນສັກສິດ [ຂອງພຣະອົງ]”? ໃຫ້ພິຈາລະນາທີ່ຈະຂຽນລາຍການເຫດຜົນທີ່ທ່ານພົບໃນ ຄຳສອນ ແລະ ພັນທະສັນຍາ 124:25–45, 55. ທ່ານອາດພົບເຫດຜົນຢ່າງອື່ນອີກໃນເພງສວດເຊັ່ນ “We Love Thy House, O God” (Hymns, no. 247) ຫລື ວິດີໂອ “What Is a Temple?” (ຫ້ອງສະໝຸດພຣະກິດຕິຄຸນ). ວຽກງານການສ້າງພຣະວິຫານເປັນເຄື່ອງໝາຍຄວາມຮັກຂອງພຣະຜູ້ເປັນເຈົ້າສຳລັບທ່ານແນວໃດ?

What Is a Temple?
The difference between chapels, where Latter-day Saints meet for regular Sunday worship, and temples is also explained.

ນັບແຕ່ພຣະວິຫານນາວູໄດ້ຖືກສ້າງຂຶ້ນໃນຊ່ວງຊຸມປີ 1840, ພຣະວິຫານຫລາຍກວ່າ 300 ແຫ່ງກໍໄດ້ຖືກສ້າງຂຶ້ນ ຫລື ຖືກປະກາດ. ປະທານຣະໂຊ ເອັມ ແນວສັນ ໄດ້ສິດສອນວ່າ: “ເຮົາຮູ້ວ່າ ເວລາຂອງເຮົາຢູ່ໃນພຣະວິຫານແມ່ນຈຳເປັນຕໍ່ຄວາມລອດ ແລະ ຄວາມສູງສົ່ງຂອງເຮົາ ແລະ ຂອງຄອບຄົວຂອງເຮົາ. … ການໂຈມຕີຂອງຜູ້ປໍລະປັກ ແມ່ນເພີ່ມທະວີຫລາຍຂຶ້ນ, ໃນຄວາມຮຸນແຮງ ແລະ ໃນຫລາຍຮູບແບບ. ການໄປພຣະວິຫານເປັນປະຈຳຂອງເຮົາ ແມ່ນຈຳເປັນຫລາຍກວ່າທີ່ຜ່ານມາ” (“Becoming Exemplary Latter-day Saints,” Liahona, Nov. 2018, 114). ພຣະວິຫານໄດ້ຊ່ວຍໃຫ້ທ່ານຕ້ານທານ “ການໂຈມຕີຂອງຜູ້ປໍລະປັກ” ແນວໃດ? ທ່ານຮູ້ສຶກໄດ້ຮັບຄວາມປະທັບໃຈໃຫ້ເຮັດຕາມຄຳແນະນຳຂອງປະທານແນວສັນແນວໃດ?

ເບິ່ງ “Why Latter-day Saints Build Temples,” temples.ChurchofJesusChrist.org ນຳອີກ.

ຄຳສອນ ແລະ ພັນທະສັນຍາ 124:45–55

ພຣະຜູ້ເປັນເຈົ້າອວຍພອນຜູ້ທີ່ພະຍາຍາມຢ່າງໜັກທີ່ຈະເຊື່ອຟັງພຣະບັນຍັດຂອງພຣະອົງ.

ໄພ່ພົນໄດ້ຮັບບັນຊາໃຫ້ສ້າງພຣະວິຫານໃນເຂດແຈ໊ກສັນ, ລັດມີເຊີຣີ, ແຕ່ໄດ້ “ຖືກຂັດຂວາງໂດຍສັດຕູຂອງພວກເຂົາ” (ຄຳສອນ ແລະ ພັນທະສັນຍາ 124:51). ຂໍ້ທີ 49–55 ບັນຈຸຂ່າວສານທີ່ສ້າງຄວາມໝັ້ນໃຈໃຫ້ແກ່ຄົນທັງຫລາຍທີ່ຢາກເຊື່ອຟັງພຣະບັນຍັດຂອງພຣະເຈົ້າ ແຕ່ໄດ້ຖືກຂັດຂວາງບໍ່ໃຫ້ເຮັດເຊັ່ນນັ້ນ ຍ້ອນຄອບຄົວ ຫລື ສະພາບການອື່ນໆ. ທ່ານພົບເຫັນຄຳແນະນຳຢ່າງໃດແດ່ໃນຂໍ້ເຫລົ່ານີ້ທີ່ສາມາດຊ່ວຍໃຜບາງຄົນໃນສະຖານະການເຊັ່ນນັ້ນ?

ຄຳສອນ ແລະ ພັນທະສັນຍາ 124:91–92

ພຣະຜູ້ເປັນເຈົ້າສາມາດນຳພາເຮົາຜ່ານທາງປິຕຸພອນຂອງເຮົາ.

ບໍ່ດົນຫລັງຈາກທີ່ພໍ່ຂອງສາດສະດາ, ໂຈເຊັບ ສະມິດ ຜູ້ພໍ່, ໄດ້ເສຍຊີວິດໄປ, ພຣະຜູ້ເປັນເຈົ້າໄດ້ເອີ້ນ ໄຮຣຳ ສະມິດ ໃຫ້ຮັບການເອີ້ນທີ່ພໍ່ຂອງເພິ່ນໄດ້ຮັບ—ປິຕຸຂອງສາດສະໜາຈັກ. ທ່ານສາມາດອ່ານກ່ຽວກັບເລື່ອງນີ້ໄດ້ໃນ ຄຳສອນ ແລະ ພັນທະສັນຍາ 124:91–92.

ເພື່ອຮຽນຮູ້ເພີ່ມເຕີມກ່ຽວກັບປະຫວັດສາດຂອງປິຕຸ ແລະ ປິຕຸພອນ, ກົດບ່ອນນີ້.

ທ່ານຈະບັນຍາຍເຖິງປິຕຸພອນໃຫ້ແກ່ຜູ້ທີ່ບໍ່ເຄີຍໄດ້ຍິນກ່ຽວກັບມັນມາກ່ອນວ່າແນວໃດ? ທ່ານຈະເວົ້າຫຍັງເພື່ອຊຸກຍູ້ໃຫ້ໃຜບາງຄົນຮັບມັນ? ຊອກຫາຄຳຕອບຕໍ່ຄຳຖາມເຫລົ່ານີ້ໃນຂ່າວສານຂອງແອວເດີ ແຣນໂດ ເຄ ເບັນເນັດ “Your Patriarchal Blessing—Inspired Direction from Heavenly Father” (Liahona, May 2023, 42–43) ຫລື Topics and Questions, “Patriarchal Blessings” (ຫ້ອງສະໝຸດພຣະກິດຕິຄຸນ).

ອີງຕາມສິ່ງທີ່ທ່ານໄດ້ສຶກສາ ແລະ ໄດ້ປະສົບ, ໃຫ້ພິຈາລະນາວິທີທີ່ທ່ານຈະປະກອບປະໂຫຍກນີ້ໃຫ້ສົມບູນ: “ປິຕຸພອນເປັນເໝືອນດັ່ງ .” ເປັນຫຍັງພຣະບິດາເທິງສະຫວັນຈຶ່ງປະສົງໃຫ້ລູກໆຂອງພຣະອົງຮັບປິຕຸພອນ?

ຖ້າຫາກທ່ານບໍ່ທັນໄດ້ຮັບປິຕຸພອນເທື່ອ, ທ່ານສາມາດເຮັດຫຍັງໄດ້ແດ່ເພື່ອກຽມພ້ອມທີ່ຈະຮັບມັນ? ຖ້າຫາກທ່ານໄດ້ຮັບປິຕຸພອນແລ້ວ, ທ່ານຈະສາມາດສະແດງໃຫ້ພຣະເຈົ້າເຫັນວ່າ ທ່ານທະນຸຖະໜອມຂອງປະທານນີ້ໄດ້ແນວໃດ?

ເບິ່ງ Kazuhiko Yamashita, “When to Receive Your Patriarchal Blessing,” Liahona, May 2023, 88–90; ຄູ່ມືທົ່ວໄປ, 18.17, ຫ້ອງສະໝຸດພຣະກິດຕິຄຸນ ນຳອີກ.

ສິດສອນຈາກຫົວໃຈ. ການສິດສອນຈະມີຄວາມໝາຍຫລາຍທີ່ສຸດເມື່ອມັນລວມທັງປະສົບການສ່ວນຕົວ ແລະ ປະຈັກພະຍານ. ຍົກຕົວຢ່າງ, ຖ້າຫາກທ່ານໄດ້ຮັບປິຕຸພອນແລ້ວ, ໃຫ້ທົບທວນມັນຂະນະທີ່ທ່ານກຽມທີ່ຈະສິດສອນກ່ຽວກັບພອນທີ່ພິເສດເຫລົ່ານີ້. ເປັນຫຍັງທ່ານຈຶ່ງຂອບຄຸນສຳລັບພອນຂອງທ່ານ? ທ່ານຈະດົນໃຈໃຫ້ຄົນອື່ນກຽມພ້ອມທີ່ຈະຮັບປິຕຸພອນຂອງເຂົາ ຫລື ໝັ່ນສຶກສາປິຕຸພອນຫລາຍຂຶ້ນກວ່າເກົ່າແນວໃດ?

ແນວຄິດສຳລັບການສິດສອນເດັກນ້ອຍ

ຄຳສອນ ແລະ ພັນທະສັນຍາ 124:15, 20

ພຣະເຢຊູຄຣິດຮັກຄວາມຊື່ສັດ

ເພື່ອຊ່ວຍລູກໆຂອງທ່ານໃຫ້ຈື່ສິ່ງທີ່ພວກເຂົາຮຽນຮູ້ຈາກ ຄຳສອນ ແລະ ພັນທະສັນຍາ 124:15, 20, ທ່ານສາມາດຊ່ວຍພວກເຂົາແຕ້ມ ແລະ ຕັດເຈ້ຍຮູບຫົວໃຈອອກ. ຢູ່ເທິງຮູບຫົວໃຈ, ທ່ານສາມາດຊ່ວຍພວກເຂົາຂຽນວະລີສຳຄັນຈາກຂໍ້ເຫລົ່ານີ້. ເພງເຊັ່ນ “ກ້າເຮັດສິ່ງຖືກ” (ເພງສວດ ແລະ ເພງຂອງເດັກນ້ອຍ, 70) ສາມາດຊ່ວຍເສີມສ້າງພຣະຄຳຂອງພຣະຜູ້ເປັນເຈົ້າໄດ້.
ຫລັງຈາກທີ່ອ່ານ ຄຳສອນ ແລະ ພັນທະສັນຍາ 124:15, 20 ນຳກັນ, ບາງທີທ່ານກໍສາມາດຊ່ວຍລູກໆຂອງທ່ານໃຫ້ຊອກຫາວ່າ ການໃຊ້ຊີວິດດ້ວຍຄວາມຊື່ສັດນັ້ນ ໝາຍຄວາມວ່າແນວໃດ ຢູ່ ໜ້າທີ 31 ຂອງ ສຳລັບຄວາມເຂັ້ມແຂງຂອງຊາວໜຸ່ມ: ຄູ່ມືສຳລັບການເລືອກ. ພຣະຜູ້ເປັນເຈົ້າໄດ້ກ່າວວ່າແນວໃດກ່ຽວກັບ ຈອດ ມຽວເລີ ໃນ ຂໍ້ທີ 20 “ເພາະຄວາມຊື່ສັດຂອງໃຈ [ຈອດ]”? ທ່ານຍັງສາມາດແບ່ງປັນຕົວຢ່າງຂອງເດັກນ້ອຍທີ່ສະແດງຄວາມຊື່ສັດຈາກປະສົບການຂອງທ່ານເອງ ຫລື ຈາກວາລະສານ Friend. ເຊື້ອເຊີນລູກໆຂອງທ່ານໃຫ້ຕັ້ງເປົ້າໝາຍເພື່ອສະແດງຄວາມຊື່ສັດອາທິດນີ້ ແລະ ບອກທ່ານວ່າພວກເຂົາຮູ້ສຶກແນວໃດເມື່ອພວກເຂົາເຮັດສິ່ງນັ້ນ.

ຄຳສອນ ແລະ ພັນທະສັນຍາ 124:28–29, 39

ພຣະເຢຊູບັນຊາໃຫ້ຜູ້ຄົນຂອງພຣະອົງສ້າງພຣະວິຫານ

ລູກໆຂອງທ່ານອາດມ່ວນຊື່ນກັບການເບິ່ງຮູບພາບຂອງພຣະວິຫານ, ລວມທັງພຣະວິຫານບູຮານ ແລະ ພຣະວິຫານທີ່ໃກ້ກັບບ່ອນທີ່ພວກເຂົາຢູ່ (ເບິ່ງ ChurchofJesusChrist.org/temples/list). ທ່ານສາມາດໃຊ້ຮູບພາບເຫລົ່ານີ້ ແລະ ຄຳສອນ ແລະ ພັນທະສັນຍາ 124:39 ເພື່ອອະທິບາຍວ່າ ພຣະເຢຊູຄຣິດບັນຊາໃຫ້ຜູ້ຄົນຂອງພຣະອົງສ້າງພຣະວິຫານຢູ່ຕະຫລອດມາ—ໃນສະໄໝບູຮານ ແລະ ໃນສະໄໝຂອງເຮົາ (ເບິ່ງ ໜ້າກິດຈະກຳ ຂອງອາທິດນີ້).
ຖ້າຫາກທ່ານຢູ່ໃກ້ພຣະວິຫານພໍ, ໃຫ້ພິຈາລະນາທີ່ຈະພາລູກໆຂອງທ່ານໄປທີ່ນັ້ນ ແລະ ຍ່າງຢູ່ພື້ນທີ່ພຣະວິຫານດ້ວຍຄວາມຄາລະວະ. ເຊື້ອເຊີນໃຫ້ພວກເຂົາຊອກຫາຄຳວ່າ “ສັກສິດແດ່ພຣະຜູ້ເປັນເຈົ້າ—ບ້ານຂອງພຣະຜູ້ເປັນເຈົ້າ” ຢູ່ທາງນອກຂອງພຣະວິຫານ. ເວົ້າລົມກັບລູກໆຂອງທ່ານກ່ຽວກັບວ່າ ຄຳເຫລົ່ານີ້ໝາຍຄວາມວ່າແນວໃດ.
ໃຫ້ພິຈາລະນາທີ່ຈະໃຊ້ແນວຄິດໃນ “ການບັບຕິສະມາ ແລະ ການຢືນຢັນແທນຄົນຕາຍ” ໃນພາກຫ້ອຍທ້າຍ ກ ເພື່ອຊ່ວຍໃຫ້ລູກໆຂອງທ່ານຕັ້ງຕາຄອງຄອຍຖ້າມື້ທີ່ພວກເຂົາຈະສາມາດເຂົ້າພຣະວິຫານ (ເບິ່ງ “ພຣະວິຫານ ແລະ ແຜນແຫ່ງຄວາມສຸກ” ໃນ ພາກຫ້ອຍທ້າຍ ຂ ນຳອີກ).

Solomon’s Temple [ພຣະວິຫານຂອງໂຊໂລໂມນ], ໂດຍ ແຊມ ລໍເລີ

ຄຳສອນ ແລະ ພັນທະສັນຍາ 124:91–92

ພຣະຜູ້ເປັນເຈົ້າຈະອວຍພອນເຮົາຜ່ານທາງປິຕຸພອນ.

ຂະນະທີ່ພວກທ່ານອ່ານ ຄຳສອນ ແລະ ພັນທະສັນຍາ 124:91–92 ນຳກັນ, ໃຫ້ຊ່ວຍລູກໆຂອງທ່ານຊອກຫາສິ່ງທີ່ພຣະຜູ້ເປັນເຈົ້າໄດ້ເອີ້ນ ໄຮຣຳ ສະມິດ ໃຫ້ເຮັດ. ເວົ້າກ່ຽວກັບວ່າປິຕຸພອນແມ່ນຫຍັງ: ພອນພິເສດຊຶ່ງພຣະຜູ້ເປັນເຈົ້າສິດສອນເຮົາກ່ຽວກັບຕົວເຮົາເອງ ແລະ ສິ່ງທີ່ພຣະອົງປະສົງໃຫ້ເຮົາເຮັດ ແລະ ກາຍເປັນ. ໃຫ້ພິຈາລະນາທີ່ຈະໃຊ້ພາກ “ການຮັບປິຕຸພອນ” ໃນພາກຫ້ອຍທ້າຍ ກ ເພື່ອຊ່ວຍລູກໆຂອງທ່ານໃຫ້ກຽມທີ່ຈະຮັບປິຕຸພອນ.

ສຳລັບແນວຄິດເພີ່ມເຕີມ, ໃຫ້ເບິ່ງວາລະສານ Friend ສະບັບຂອງເດືອນນີ້.

ຮູບແຕ້ມຂອງພຣະວິຫານນາວູ — The Nauvoo Temple [ພຣະວິຫານນາວູ], ໂດຍ ຈອດ ດີ ເດີແຣ້ນ