Laa’o rik’ineb’, ut eb’ a’an qik’in, xb’aan li xCaitlin Connolly

3–9 noviembre: “Jun xyaab’ xkux li sahil ch’oolejil choq’ reheb’ li yo’yo ut eb’ li kamenaq”

Tzolʼlebʼ ut Sumwank 125–128

Sa’ agosto re 1840, li xJane Neyman kirab’i li profeet aj Jose chi aatinak sa’ xmuqlajik li ramiiw, laj Seymor Brunson. Lix yum li xJane, laj Cyrus xk’ab’a’, toje’ xkam ajwi’. Naraho’ ajwi’ xch’ool xb’aan naq laj Cyrus maajun wa kikub’e xha’, ut li xJane ink’a’ kixnaw k’a’ru taak’ulmanq rik’in li raam. Laj Jose kixpatz’ ajwi’ a’an chirix laj Alvin, li ras, li kikam ajwi’ chi ink’a’ kub’sinb’il xha’. Jo’kan naq li profeet kixk’e xch’ool naq tixwotz rik’ineb’ chixjunil li wankeb’ sa’ li muquk, k’a’ru li kixk’utb’esi li Qaawa’ chiru chirixeb’ li ani kamenaqeb’ chi ink’a’ xe’xk’uleb’ li k’ojob’anb’il k’anjel re li evangelio—ut k’a’ru li naru taqab’aanu re xtenq’ankileb’.

Li tzol’leb’ a’in chirix li kub’iha’ choq’ reheb’ li kamenaq kixtoch’ xch’ooleb’ laj santil paab’anel; sa’ junpaat ke’ok chixk’oxlankileb’ lix komon ak kamenaqeb’. Anajwan wan chik xyo’onihomeb’! Laj Jose kixwotz xsahileb’ lix ch’ool, ut sa’ jun li hu kixtz’iib’a kiroksi utz’u’ujinb’il aatin re xyeeb’al li k’a’ru kixk’ut li Qaawa’ chiru chirix xkolb’aleb’ li kamenaq: “Che’xjap re li tzuul xb’aan xsahileb’ xch’ool, ut chejunilex ru taq’a, japomaq eere chi kaw xyaab’ eekux, ut chejunilex palaw ut chaqi ch’och’ yehomaq resil li sachb’a-ch’oolejil re lee Junelikil Rey!” (Tzol’leb’ ut Sumwank 128:23).

Chi’ilmanq Santos, 1:423–436; “Las cartas en cuanto al bautismo por los muertos,” sa’ Revelaciones en contexto, 291–295.

Li na’leb’ re tzolok sa’ li ochoch ut sa’ li iglees

Tzolʼlebʼ ut Sumwank 126

Li Qaawa’ naraj naq tinwil chi us lin junkab’al.

Chirix naq kisutq’i chaq sa’ jun mision aran Inglaterra—jun reheb’ li mision kik’anjelak wi’ chaq—laj Brigham Young kixk’ul rik’in li Qaawa’ jun chik xk’anjel aajel ru. Kipatz’man re naq “tixyal xq’e chirilb’aleb’ lix junkab’al” (raqal 3), li ke’xnumsi rahilal naq maak’a’ a’an. Naq taatzol li tasal a’in, k’oxla k’a’ut naq li Qaawa’ wan naq naraj naq taqak’e qamayej sa’ li qak’anjel. K’a’ru naru nakab’aanu re rilb’al laa junkab’al?

Chi’ilmanq ajwi’ “Vela especialmente por tu familia,” sa’ Revelaciones en contexto, 258–265.

Tzol’leb’ ut Sumwank 127:2–4

Naru ninkanab’ wib’ sa’ ruq’ li Qaawa’ sa’eb’ li ch’a’ajkil hoonal.

Xb’aan li b’alaq’il jitok ut li ani ke’raj xtz’apb’al sa’ tz’alam, laj Jose Smith kixmuq wi’chik rib’ sa’ li agosto re 1842. A’ut toj kiwan li yo’onink ut li sahilal sa’ li aatin kixtz’iib’a choq’ reheb’ laj santil paab’anel sa’eb’ li kutan a’an (wan anajwan sa’ Tzol’leb’ ut Sumwank 127). K’a’ru neke’xk’ut chawu li raqal 2–4 chirix li Dios? chirix xnumsinkil li xutaan ut li ka’pak’aliik? K’a’ chi ch’ol aatin wankeb’ sa’eb’ li raqal a’in li naru nakate’xtenq’a naq nakaweek’a naq rahob’tesinb’ilat? Maare naru taatz’iib’a chan ru naq li Qaawa’ nakatxtenq’a sa’ li “chamal ha’” re laa yu’am.

Tzol’leb’ ut Sumwank 127:5–8; 128:1–8

“Yalaq k’a’ru neketz’iib’a resil sa’ ruchich’och’, tz’iib’anb’ilaq resil sa’ choxa.”

Naq nakawil Tzol’leb’ ut Sumwank 127:5–8; 128:1–8, sik’ k’a’ut naq li Qaawa’ kixk’ut chiru laj Jose Smith tz’aqal chan ru taatz’iib’amanq resileb’ li kub’iha’ choq’ reheb’ li kamenaq. K’a’ru naxk’ut a’in chawu chirix li Qaawa’ ut lix k’anjel? Chan ru naru nak’anjelak li na’leb’ a’in sa’ li resilal laa junkab’al laa’at, jo’ li diario?

Xb’aanunkil lix k’anjeleb’ li qaxe’ qatoon sa’ li santil ochoch naxb’ak’ li qach’ool rik’ineb’ a’an.

Tzolʼlebʼ ut Sumwank 128:5–25

Lix kolb’aleb’ lin xe’ intoon aajel ru choq’ re lin kolb’al.

Sa’ li k’a’ru kixk’utb’esi li Dios re laj Jose Smith saqen nak’utun k’a’ut naq eb’ li qaxe’ qatoon li moko ke’kub’e ta xha’ neke’raj qu: nakub’siik qaha’ sa’ xk’ab’a’eb’ re naq te’xsik’ ru ma te’xk’ulub’a li k’ojob’anb’il k’anjel malaj ink’a’. A’b’an li profeet kixk’ut ajwi’ naq lix kolb’aleb’ li qaxe’ qatoon “na’ajman ut aajel ru choq’ re li qakolb’al laa’o.” Naq taawil Tzol’leb’ ut Sumwank 128:15–18, k’oxla k’a’ut naq jo’kan a’an.

Li raqal 5 naxk’ut naq li kub’iha’ choq’ reheb’ li kamenaq kikawresiman “chalen chaq rub’elaj lix k’ojlajik li ruchich’och’.” K’a’ru naxk’ut li na’leb’ a’in chawu chirix li Dios ut lix k’uub’anb’il na’leb’? K’a’ru xkomon aana’leb’ naxk’e li raatin li Elder Dale G. Renlund sa’ “Li k’anjel re li santil ochoch ut li resilal li junkab’al: Tz’ape’k sa’ junajil ut k’irtesink”? (Jolomil ch’utub’aj-ib’ re abril 2018).

Laj Jose Smith kiroksiheb’ li aatin jo’ “wankilal re b’ak’ok,” “junajinel b’ak’leb’,” ut “junajil li tz’aqal” naq kik’utuk chirixeb’ li k’ojob’anb’il k’anjel ut li kub’iha’ choq’ reheb’ li kamenaq. Sik’eb’ li aatin a’in ut xkomoneb’ chik naq nakawil Tzol’leb’ ut Sumwank 128:5–25. Ma naru nakak’oxla k’a’ru naru nakawoksi re xk’utb’esinkileb’ li ch’ol aatin a’in, jo’ jun kadeen malaj jun li k’aam? K’a’ut naq eb’ li ch’ol aatin a’in chaab’ileb’ re xch’olob’ankil li tzol’leb’ a’in?

Eb’ li patz’om a’in naru ajwi’ nakate’xtenq’a chixtzolb’aleb’ li raqal a’in:

• Sa’ laa waatin, k’a’ut naq li kub’iha’ choq’ reheb’ li kamenaq a’an li “q’axal nim xloq’al re chixjunil li na’leb’ li wan sa’ li evangelio li junelik nakana”? (raqal 17). K’a’ru li numsihom nakate’xtenq’a chireek’ankil a’an?

• Chan raj ru naru namajewaak li ruchich’och’ wi maak’a’ “junaq paay chi junajinel b’ak’leb’ li te’junajiiq wi’ li yuwa’b’ej ut li alal k’ajolb’ej”? (raqal 18).

• K’a’ru nawulak chawu chirix li raatin laj Jose Smith sa’eb’ li raqal 19–25? Chan ru naq eb’ li raqal a’in neke’xjal li k’a’ru nakaweek’a chirix li Jesukristo? chirix li k’anjelak sa’ li santil ochoch choq’ reheb’ laa xe’ aatoon?

Chirix xtzolb’aleb’ li raqal a’in, maare tatmusiq’aaq chi k’anjelak sa’ xk’ab’a’eb’ laa xe’ aatoon. Li na’leb’ wankeb’ sa’ FamilySearch.org naru neke’tenq’an.

Eb’ li “Videos de Inspiracion” sa’ “Templo e Historia Familiar” sa’ li Biblioteca del Evangelio naru nakate’xtenq’a rik’ineb’ li musiq’ejil seraq’ ut raatineb’ laj jolominel sa’ li resilal li junkab’al.

Oksiheb’ li k’anjeleb’aal naxk’e li Iglees. Eb’ li enlace sa’ li tusleb’ aatin sa’ Kim, Taaqehin naru nakate’xk’am sa’eb’ li k’anjeleb’aal li naru nakate’xtenq’a chixtawb’al ru ut chiroksinkileb’ li yaal sa’ li evangelio malaj chi k’anjelak jo’ chanru naxk’ut chawu li Musiq’ej. Qayehaq, li enlace re FamilySearch li wan rub’elaj nak’amok sa’eb’ kok’ k’anjel jo’ xtikib’ankil li resilal laa junkab’al, xtawb’aleb’ laa xe’ aatoon li neke’raj ru li k’ojob’anb’il k’anjel sa’ li santil ochoch, rilb’al b’ar ke’chal chaq laa xe’ aatoon, malaj xk’uulankil junaq seraq’ chirix laa junkab’al.

Chi’ilmanq ajwi’ Kevin R. Duncan, “Jun xyaab’ xkux li sahil ch’oolejil!,” Jolomil ch’utub’aj-ib’ re abril 2023.

“Jun xchaq’al ru ut loq’laj eechej.”

Li Awaʼbʼej Gordon B. Hinckley kixye:

“Lix tojb’al rix lix maakeb’ chixjunil xb’aan li Jesus a’an jun xnimal mayej jo’ uuchilej. A’an kixk’ojob’ chan ru naq a’anaq aj aatinanel chirix chixjunil li winqilal. Li na’leb’ a’in li naru wi’ jun li winq chi k’anjelak jo’ ruuchil junaq chik nab’aanuman sa’eb’ lix k’ojob’anb’il k’anjel li rochoch li Qaawa’. Arin nokok’anjelak jo’ ruuchileb’ li ani kamenaqeb’ chi ink’a’ ke’xnaw ru li evangelio. Lix k’anjeleb’ a’an, a’an xk’ulub’ankil malaj xtz’eqtaanankil li k’ojob’anb’il k’anjel nab’aanuman. Chi jo’kan, wankeb’ chi juntaq’eet rik’ineb’ li neke’b’eek sa’ xb’een li ruchich’och’. Eb’ li kamenaq wankeb’ ajwi’ rosob’tesinkil jo’eb’ li yo’yo. Jo’kan wi’chik, k’a’jo’ xnimal ru ut xchaq’al ru li naxb’aanu li Nimajwal Dios rik’in li k’utb’esinb’il na’leb’ naxk’e re lix profeet” (“Las cosas grandes que Dios ha revelado,” Liahona, mayo 2005, 82–83).

Li na’leb’ re xtzolb’aleb’ li kok’al

Tzol’leb’ ut Sumwank 126:3

Naru nintenq’an chirilb’al lin junkab’al.

• Re xtenq’ankileb’ laa kok’al chixtzolb’al k’anjelak chiruheb’ lix komon, naru nakawotz li seraq’ chirix laj Brigham Young sa’ “Ch’ol 50: Eb’ laj Santil Paab’anel sa’ Nauvoo” (sa’ Eb’ li Esilal sa’ li Tzol’leb’ ut Sumwank, 184, malaj li video sa’ li Biblioteca del Evangelio) malaj ch’olob’ Tzol’leb’ ut Sumwank 126 rik’in laa waatin. Naru nakaka’jultika li ch’ol aatin “yalb’ilaq aaq’e chirilb’aleb’ laa junkab’al” (raqal 3) ut aatinan rik’ineb’ laa kok’al chirix k’a’ru naraj naxye rilb’aleb’ li qajunkab’al.

  Chapter 50: The Saints in Nauvoo: January–July 1841

• Naare taawulaq raj cheru rilb’al xjalam-uucheb’ lee junkab’al (malaj xyiib’ankil jalam-uuch) naq teeye chan ru naru nokotenq’an “chirilb’aleb’” li qajunkab’al. Naru ajwi’ nekeb’icha jun li b’ich jo’ “Li ochoch chanchan choxa” (Eb’ li B’ich, 191).

Tzol’leb’ ut Sumwank 128:5, 12

Chixjunileb’ li ralal xk’ajol li Dios neke’raj ru naq te’kub’eeq xha’.

• Patz’ reheb’ laa kok’al naq te’xtaw sa’ Tzol’leb’ ut Sumwank 128:1 k’a’ru li na’leb’ wan sa’ xk’a’uxl laj Jose Smith. Naru ajwi’ neke’ril li raqal 17 re xtawb’al k’a’ru li na’leb’ naxye a’an naq a’an “li q’axal nim xloq’al.” Kanab’eb’ chixwotzb’al li te’xtaw ut te’aatinaq chirix k’a’ut naq li na’leb’ a’an aajel ru.

• Chirix xtenq’ankileb’ laa kok’al chixkawresinkileb’ rib’ (ut chixyu’aminkil) lix sumwank re li kub’iha’, naru ajwi’ nakatenq’aheb’ chixnawb’al chan ru naru te’xtenq’aheb’ li ras riitz’in li ink’a’ ke’ok chaq sa’ li sumwank a’an chiru lix yu’ameb’. Naru nakawotz rik’ineb’ laa kok’al resil junaq kristiaan nakanaw chaq ru li kikam chi ink’a’ kikub’e xha’. Chirix a’an naru nekeril Tzol’leb’ ut Sumwank 128:5 ut teeril xjalam-uuch li kub’sib’aal ha’ li wan sa’ li santil ochoch (jo’ li wan sa’ xraqik li tusleb’ aatin a’in). Ye reheb’ laa kok’al k’a’ru nakaweek’a naq nakub’siik aaha’ sa’eb’ li santil ochoch choq’ ruuchileb’ li kristiaan kamenaqeb’, re naq chixjunilaqeb’ te’ruuq chi ok sa’ sumwank rik’in li qaChoxahil Yuwa’.

Tzol’leb’ ut Sumwank 128:18

Lin Choxahil Yuwa’ naraj naq tintzoloq chirix li resilal lin junkab’al.

• Maare taawulaq raj cheru xyiib’ankil jun kadeen rik’in hu li teetz’iib’aheb’ wi’ xk’ab’a’eb’ lee na’ eeyuwa’, lee mama’ eerixa’an, lee xikinmama’ ut lee xikinrixa’an, (ilomaq li perel re kok’ k’anjel re li xamaan a’in). Chirix a’an naru nekewotz cherib’il eerib’ k’a’ru nekenaw chirixeb’ lee xe’ eetoon. Ilomaq Tzol’leb’ ut Sumwank 128:18 ut sik’omaq b’ar wan li “junajinel b’ak’leb’” li nab’aanun re naq li resilal li qajunkab’al “tz’aqal ut choyb’il.”

  Courage: I Think I Get It From Him

• Naru neke’tawman xkomoneb’ li kok’ k’anjel re xtenq’ankileb’ laa kok’al re naq te’tz’aqonq sa’ li k’anjel re resilal li junkab’al sa’ “Li santil ochoch ut li k’uub’anb’il na’leb’ re sahil ch’oolejil” sa’ li xtiqb’al li aatin B malaj sa’ FamilySearch.org.

Eb’ li k’ojob’anb’il k’anjel re li santil ochoch nokohe’xtenq’a chixch’utub’ankileb’ li junkab’al jo’ jun kadeen.

Re xtawb’al xkomon chik li na’leb’, chi’ilmanq li hu Amigos re li po a’in.

Li kub’sib’aal ha’ sa’ li santil ochoch re Ogden Utah.