M̧aaj 27–Eprōļ 2

Matu 14; Mark 6; Jon 5–6

“Komin jab mijak”

Ilo am̧ riiti Matu 14; Mark 6; im Jon 5–6, kappukot m̧ool ko me eļap meļeļeier n̄an eok. Kwomaron̄ kajjitōkin eok make kajjitōk ko āinwōt “Ewi wāween an bwebwento ko ilo jebta ko me rej iooktok eō?” “Ta enaan eo kwoj loe n̄an mour eo am̧?” ak “Ta eo inaaj kōņaan kwaļo̧k ippān baam̧le eo aō ak ippān ro jet?”

Je En̄jake ko Rej Im̧we Eok

Ta eo ekar maron̄ im̧we Pita n̄an etal em̧m̧an im inem̧m̧an eo ilowaan ļoon eo ilo lometo in Galilee ilo juon iien an kajoor lan̄? Ta eo ekar kōm̧m̧an bwe en tōmak ke eļan̄n̄e Jisōs emaron̄ etetal ioon dān, ebarāinwōt emaron̄? Jejjab maron̄ lukkuun jeļā, ak bōlen Pita wōt ekar meļeļe bwe Nejin Anij ekar itok ejjab wōt n̄an kōm̧m̧ani menin bwilōn̄ ko n̄an armej ro ak n̄an kōkajoorļo̧k armej ro āinwōt Pita n̄an bar kōm̧m̧ani menin bwilōn̄ ko. Kūr eo an Jisōs, ilubwiljin aolep men, ekar ba “Itok, ļoor eō” (Luk 18:22). Pita ekar eo̧ron̄ kūr in bar juon alen, im ekar kōņaan kōm̧m̧ane, men̄e ekar aikuj jelm̧ae mijak im kōm̧m̧ane juon men eo me ilo an watōke elukkun pen. Bōlen Irooj eban kajjitōkin kōj n̄an to jān ļo̧o̧n eo ilo lometo ibuļōn lan̄ ko rekajoor ak ej letok n̄an bwijin pilawe n̄e jej aikuj n̄an naajdik taujin armej, ak E emaron̄ kajjitōkin kōj n̄an bōk tōl ak wāween ko men̄e jejjab lukkuun meļeļe. Jabdewōt kūr ko an ej letok n̄an kōj, rej maron̄ jet iien kabwilōn̄ kōj ak ak kainepataiki kōj. Ak menin bwilōn̄ ko remaron̄ waļo̧k eļan̄n̄e kōj, āinwōt Pita, naaj kōjekdo̧o̧n mijak ko ad, pere ko ad, im ad jab meļeļe im ļoor E ilo tōmak.

Ļōmņak ko n̄an Ekkatak Jeje Ko Rekwojarjar Ippam̧ Make

Jon 5:16–47

Jisōs Kraist ej nōbar im kautiej Jemān.

Jem̧jerā eo ikōtaan Jemedwōj Ilan̄ im kajjojo iaan ajri ro Nejin ej aikuj bwe en juon jem̧jerā ekwojarjar. Ilo eoon kein, Jisōs Kraist ekar letok n̄an kōj juon waanjon̄ak eim̧we n̄an ļoore ilo jem̧jerā in ad ippān Jemedwōj Ilan̄. Riiti Jon 5:16–47, im kōkaļļeiki im je kajjojo waanjon̄ak ok an naan eo Jema. Ewi wāween an Eo Nejin nōbar ak kautiej Jemān, im ewi wāween am̧ maron̄ ļoor waanjon̄ak eo An? Ta eo kwoj ekkatak kōn wāween an Jemān en̄jake kōn eo Nejin? Ta eo kar im̧we eok n̄an kōm̧m̧ane n̄an kōkajoorļo̧k jem̧jerā eo am̧ ippān Jemedwōj Ilan̄?

Bar lale Jon 17; Jeffrey R. Holland, “The Grandeur of God,” Liaona, Nob. 2003, 70–73.

Jisōs ekar kōm̧m̧an juon menin bwilōn̄ ilo an kar naajdik 5,000 jarlepju in armej ro kōn ļalem pilawe im ro ek jiddik.

Matu 14:15–21; Mark 6:33–44; Jon 6:5–14

Rilo̧mo̧o̧r emaron̄ kōļapļo̧k menin leļo̧k ko aō rettā n̄an kadedeļo̧k jibadbad eo An.

Em̧ōj ke am̧ kar en̄jake ke ejabwe n̄an kakke aolep aikuj ko kwoj loi ipeļaakim—ilo m̧weo im̧ōm̧, ilo jem̧jerā eo am̧, ak ilo jukjuk in pād eo? Rikaļoor ro an Jisōs rej aikuj en̄jake jabwe bwe E ekar kajjitōk ippāer n̄an naajdik ļalem armej ro rekwo̧le ke ekar wōr ļalem wōt pilawā im ruo ek repojak. Ilo am̧ riiti kōn menin bwilōn̄ ko me rekar bō jikier tokālik, kejokļo̧kjeņ kōn wāween an Anij emaron̄ kōjerbale menin leļo̧k kein rettā n̄an jipan̄ ro jet n̄an kōjeram̧m̧an ro ipeļaakūm̧. Ewi wāween An kōļapļo̧k kijejeto ko am̧ ilo am̧ kōjerbal E? Ļōmņake ennaan in jān Sister Michelle D. Craig: “Kwe im n̄a maron̄ leļo̧k ta eo ewōr ippād n̄an Kraist, im E enaaj kaorļo̧k kijejeto ko ad. ad. Ta eo ewōr ippam̧ n̄an leļo̧k ebwe jen ejjeļo̧k—men̄e jān nan̄inmej ak m̧ōjņo ko am̧—eļan̄n̄e kwoj pedped ioon jouj eo an Anij.” (“Jab Ju Būruwōn,” Liaona, Nob. 2018, 54).

Matu 14:22–33; Mark 6:45–52; Jon 6:15–21

Jisōs Kraist ej kūr eō n̄an kōjekdo̧o̧n mijak ko im pere ko aō im kōmourruuri tōmak eo ilo E.

Pijaiki ilo kōļmenļo̧kjeņ eo am̧ kōņ lukkun dipdikin pija in me kar kōmeļeļeiki ilo Matu 14:22–33; Mark 6:45–52; im Jon 6:15–21. Pijaik ļo̧k wāween an Pita im rikaļoor ro jet kar en̄jake. Ta eo kwoj ekkatak kōn mour in rikaļoor jān naan ko an Rilo̧mo̧o̧r im jerbal ko ilo eoon kein? Ta eo kwoj ekkatak jān naan ko im kōm̧m̧an ko an Pita? (Bar lale 1 Nipai 3:7.) Ta eo Irooj ej kūr eok n̄an kōm̧m̧ane bwe emaron̄ erom̧ jet bun̄tōn ko an loon e? Ta eo kwoj loe ilo eoon kein me ej letok n̄an eok peran n̄an kōmourur tōmak eo am̧ ilo Jisōs Kraist?

Jon 6:22–71

Āinwōt juon rikaļoor an Jisōs Kraist, ij aikuj lukkuun tōmak im bōk m̧ool eo, men̄e epen n̄an kōm̧m̧ane.

Ke Jisōs ekar iookļo̧k E make āinwōt “bread in mour” (Jon 6:48), elōn̄ ro rekar loe menin ke ekar juon men “hard saying” (Jon 6:60). Ewi wāween an naan ko an Pita ilo Jon 6:68–69 jipan̄ eok ilo iien ko ke katak ko an Rilo̧mo̧o̧r rekar āinwōt repen n̄an mour kake? Ta eaar im̧we eok kōn naan in kam̧ool eo an Pita? Ta jet iaan “naan an mour indeeo” (Jon 6:68) me ej jipan̄ eok pād wōt ilo ami wūjlepļo̧k n̄an ļoor Rilo̧mo̧o̧r?

Bar lale M. Russell Ballard, “To Whom Shall We Go?,” Liaona, Nob. 2016, 90–92.

Ļōmņak ko n̄an Ekkatak Jeje ko Rekwojarjar an Baam̧le im Nokon in Jota

Matu 14:15–21.Ļōmņak kōn wāween am̧ maron̄ jipan̄ baam̧le eo am̧ pijaiki jon̄an pilawā im ek enaaj kabwe n̄an naajdik ļalem taujin armej. Ta eo menin bwilōn̄ in ilo Matu 14:15–21 ej katakin kōj kōn Rilo̧mo̧o̧r? Ļōmņak in kwaļo̧k juon en̄jake n̄e kwe ak jabdewōt kwojeļā kajien me eaar en̄jake an Irooj kar kōļapļo̧k tōļan im maron̄ ko an.

Matu 14:22–33.Baam̧le eo am maron̄ m̧ōņōņōik in kōm̧m̧an arin bwebwenato in ilo eoon kein. Etke rikaļoor ro rekar lukkuun mijak? Etke Pita ekar maron̄ eļļā ioon mijak im to jān loon eo? Ewi wāween an kwaļo̧k tōmak men̄e ekar tin jino tūm̧laļļo̧k? Ewi wāween ad jet iien āinwōt Piter?

Jon 5:1–16.Kajjitōk ippān ro uwaan baam̧le eo am̧ n̄an je waanjon̄ak kōn naan in “made whole” ilo eoon kein. Ilo wāween rot Jisōs Kraist emaron̄ kōmour armej ro? N̄āāt im ewi wāween An kar kōmour kōj?

Jon 6:28–58.Leļo̧k n̄an kajjojo ro uwaan baam̧le eo juon m̧ōttan pilawe n̄an m̧ōn̄ā, im kōmeļeļeiki em̧m̧an ko jej būki jān pilawe eo im m̧ōn̄ā ko rej reōōne. Innem kappukot eoon kein ippān doon, kappukot etke Jisōs Kraist ekar likūt E make “bread in mour” (Jon 6:35). Ta meļeļein n̄an “m̧ōn̄ā” bread in mour? (lale D. Todd Christofferson, “Pilawā in Mour Eo Ekar Itok jān Lan̄,” Liaona, Nob. 2017, 36–39).

N̄an ļōmņak ko reļļapļo̧k ikkijeen katakin ajri ro, lale unin tōl eo an wiik in ilo Itok, Ļoor Eō—N̄an Būraimere.

Al eo kar elmakote: “Elap Maletlet im Yokwe,” Hymns, no. 195.

Kōkm̧anm̧anļo̧k Am̧ Make Ekkatak

Kappukot en̄jake ko am̧ make ilo jetōb. Ilo ekkatak ko am̧ make im an baam̧le eo am̧, jab kōm̧m̧an jon̄an eoon ko raorōk ilo laajrak in ekkata kein. Ewōr an Irooj ennaan n̄an eok ilo jebta kein me rekar jab pād ijin. Lukkuun jar n̄an kappukōti.

Jutak Ņae Kōto, jān Liz Lemon Swindle