Ko e folofola ʻa Sīsū kia Pita ʻi he veʻe matātahí

Fafanga ʻEku Fanga Sipí, tā ʻe Kamille Corry

26 Sune–2 Siulai

Mātiu 28; Maʻake 16; Luke 24; Sione 20–21

“Kuó Ne Toe Tuʻu”

Lau ʻi he faʻa lotu ʻa e Mātiu 28; Maʻake 16; Luke 24; mo e Sione 20–21, ʻo fakakaukauloto ki he fiefia ʻokú ke maʻu tuʻunga ʻi he Toetuʻu ʻa Kalaisí. Ko hai nai ʻe ala faitāpuekina ʻi haʻane fanongo ki hoʻo fakamoʻoni ki he meʻa ko ʻeni naʻe hokó?

Lekooti e Ngaahi Ongo ʻOkú ke Maʻú

Ne hangē ʻa e pekia ʻa Sīsū ʻo Nasaletí ki ha tokolahi, ko hano heliaki ʻo e fakaʻosinga ʻo ha moʻui maʻongoʻongá. ʻIkai ko e tangata ʻeni naʻá ne fokotuʻu ʻa Lasalosi mei he maté? ʻIkai kuo tā tuʻo lahi ʻEne matuʻuaki ʻa e ngaahi fakamanamana fakapoongi ʻa e kau Fālesí? Kuó Ne fakahaaʻi ʻa e mālohi ke fakamoʻui ʻa e kuí, kiliá, mo e mahaki teté. Naʻe talangofua ʻa e ngaahi matangí mo e tahí kiate Ia. Ka ko ʻeni, kuó Ne tautau ʻi he kolosí ʻo fakahā, “Ko hono ngatá ia” (Sione 19:30). Mahalo ne fakaʻohovale moʻoni ki ha niʻihi ne tupunga ai ʻenau lea manuki ʻo pehē “Naʻá ne fakamoʻui ʻa e niʻihi; ka ʻoku ʻikai te ne faʻa fakamoʻui ia” (Mātiu 27:42). Ka ʻoku tau ʻiloʻi naʻe ʻikai ko e ngataʻanga ia ʻo e talanoá ʻa e pekia ʻa Sīsuú. ʻOku tau ʻiloʻi naʻe fakataimi pē ʻa e longonoa ʻa e fonualotó pea ko e kamata pē ia e ngāue faifakamoʻui ʻa Kalaisí. ʻI he ʻaho ní ʻoku ʻikai maʻu Ia “ʻi he potu ʻo e maté” ka ʻi he kakai moʻuí (Luke 24:5). He ʻikai taʻofi ai ʻEne ngaahi akonakí, he ʻe malangaʻi ia ʻe Heʻene kau ākonga mateakí ʻi he “puleʻanga kotoa pē,” ʻo falala ki Heʻene talaʻofa te Ne “ʻiate [kinautolu] maʻu ai pē, ʻo aʻu ki he ngataʻanga ʻo māmaní” (Mātiu 28:19–20).

fakaʻilonga ʻo e ako fakataautahá

Ngaahi Fakakaukau ki Hono Ako Fakataautaha ʻo e Folofolá

Mātiu 28; Maʻake 16; Luke 24; Sione 20

Naʻe toetuʻu ʻa Sīsū Kalaisi.

Te ke lau ʻi he ngaahi potufolofola ko ʻení kau ki he taha ʻo e ngaahi meʻa mahuʻinga taha ne hoko ʻi he hisitōlia ʻo e faʻahinga ʻo e tangatá: ʻa e Toetuʻu ʻa Sīsū Kalaisí. Lolotonga hoʻo laú, fakakaukauloto pē naʻá ke kau ʻi he kakai naʻa nau mātā tonu ʻi he ngaahi meʻa fekauʻaki mo e Toetuʻú. Ko e hā ʻokú ke ako mei he ngaahi meʻa naʻá nau aʻusiá?

Ko e hā hoʻo ongoʻi ʻi hoʻo lau fekauʻaki mo e Toetuʻu ʻa e Fakamoʻuí? Fakakaukau ki heʻene kaunga kiate koé—ki hoʻo vakai ki he moʻuí, ho vā fetuʻutaki mo e niʻihi kehé, hoʻo tui kia Kalaisí, mo hoʻo tui ki he ngaahi moʻoni kehe ʻo e ongoongoleleí.

Vakai foki e Fakahinohino ki he Ngaahi Folofolá, “Toetuʻú”; Ngaahi Tefito ʻo e Ongoongoleleí, “Toetuʻú,” topics.ChurchofJesusChrist.org.

Luke 24:13–35

Te u lava ʻo fakaafeʻi ʻa e Fakamoʻuí ke “[nofo mo au].”

ʻI hoʻo lau ʻa e aʻusia ʻo e ongo ākonga fononga naʻá na fetaulaki mo e Fakamoʻui kuo toetuʻú, kumi ha ngaahi meʻa ʻoku faitatau mo hoʻo ngaahi aʻusia ʻi hoʻo hoko ko e muimui ʻo Kalaisí. ʻE founga fēfē haʻo ʻaʻeva mo Ia he ʻahó ni mo fakaafeʻi Ia ke mo “nofo” ʻo kiʻi fuofuoloa ange? (Luke 24:29). ʻOkú ke fakatokangaʻi fēfē ʻEne kau ʻi hoʻo moʻuí? Ko e hā ha founga kuo fakamoʻoniʻi ai ʻe he Laumālie Māʻoniʻoní ʻa e faka-ʻOtua ʻo Sīsū Kalaisí kiate koé?

Vakai foki e “Afe Mai Kuo Poʻuli,” “Afe Mai Hē,” Ngaahi Himí, fika 86–87.

Luke 24:36–43; Sione 20

Ko e toetuʻú ko e fakatahaʻi taʻe ngata ia ʻo e laumālié mo e sinó.

ʻE lava ke tokoni ʻa e ngaahi fakamatala ʻo e Toetuʻu ʻa Sīsū Kalaisí ke mahino kiate koe ʻa e ʻuhinga ʻo e toetuʻú. Hangē ko ʻení, ko e hā ha ngaahi moʻoni ʻokú ke maʻu ʻi he Luke 24:36–43 mo e Sione 20 fekauʻaki mo e sino toetuʻú? Te ke lava foki ʻo vakaiʻi ha ngaahi potufolofola kehe fekauʻaki mo e toetuʻú, hangē ko e 1 Kolinitō 15:35–44; Filipai 3:20–21; 3 Nīfai 11:13–15; Tokāteline mo e Ngaahi Fuakava 88:27–31; 110:2–3; 130:1, 22.

Sione 20:19–29

“ʻOku monūʻia ʻa kinautolu ʻoku ʻikai mamata, kae tuí.”

Mahalo ʻe ongoʻi ʻe he kakai ʻe niʻihi ʻo hangē ko Tōmasí, ʻo pehē “Kapau ʻe ʻikai te u mamata … ʻe ʻikai te u tui” (Sione 20:25). ʻI hoʻo fakakaukaú, ko e hā ʻe lava ke hoko ai e tui taʻe mamatá ko ha tāpuakí? (vakai Sione 20:29). Fakalaulauloto ki he founga kuo tāpuekina ai koe ʻi hoʻo tui ki he ngaahi meʻa ʻoku ʻikai te ke lava ʻo mamata tonu ki aí. Ko e hā ʻokú ne tokoniʻi koe ke ke maʻu ʻa e tui ki he Fakamoʻuí, neongo ʻoku ʻikai te ke lava ʻo mamata kiate Ia? Te ke kei fakamālohia fēfē hoʻo tui ki he “ngaahi meʻa ʻoku ʻikai ke mamata ki ai, ʻa ia ʻoku moʻoní”? (vakai ʻAlamā 32:16–21; ʻEta 12:6). Fakakaukau ke hiki ʻi ha tohinoa ʻa e ngaahi aʻusia kuó ne tokoniʻi koe ke ke tui kia Sīsū Kalaisí, pe vahevahe ia mo ha taha ʻokú ke ʻiloʻi.

Sione 21:1–17

ʻOku fakaafeʻi au ʻe he Fakamoʻuí ke fafanga ʻEne fanga sipí.

Mahalo naʻa lelei ke fakafehoanaki ʻa e feohi ʻa e Fakamoʻuí mo ʻEne kau ʻAposetoló ʻi he Sione 21, ki he fuofua taimi naʻá Ne fekau ai ke nau tuku hifo ʻenau kupengá, ʻa ia ʻoku lekooti ʻi he Luke 5:1–11. Ko e hā ha ngaahi meʻa ʻoku nau faitatau mo faikehekehe aí? Ko e hā ha ngaahi ʻilo fekauʻaki mo e tuʻunga fakaākongá ʻokú ke maʻu hake?

Fakakaukau pe ko e hā ha founga ʻoku ʻaonga ai ʻa e folofola ʻa e Fakamoʻuí kia Pita ʻi he Sione 21:15–17 kiate koé. ʻOku ʻi ai nai ha meʻa ʻokú ne taʻofi koe mei hoʻo tauhi ki he fanga sipi ʻa e ʻEikí? Ko e hā nai haʻo tali kapau ʻe fehuʻi atu ʻe he ʻEikí, “ʻOkú ke ʻofa kiate au?” Fakalaulauloto ki he founga te ke fakahaaʻi ai hoʻo ʻofa ki he ʻEikí.

Vakai foki e 1 Pita 5:2–4, 8; Jeffrey R. Holland, “Ko e Fekau Lahi ʻUluakí,” Liahona, Nōvema 2012, 83–85.

fakaʻilonga ʻo e ako fakafāmilí

Ngaahi Fakakaukau ki Hono Ako Fakafāmili ʻo e Folofolá mo e Efiafi ʻi ʻApí

Luke 24:5–6.Naʻe pehē ʻe Palesiteni Tōmasi S. Monisoni fekauʻaki mo e Luke 24:5–6, “Kuo teʻeki ai ha fakalea he folofola faka-Kalisitiané ʻe ʻuhingamālie ange kiate au” (“Kuó Ne Toe Tuʻu!,” Liahona, Mē 2010, 89). Ko e hā e ʻuhinga ʻo e ngaahi leá ni kiate koe mo ho fāmilí?

Mātiu 28; Maʻake 16; Luke 24; Sione 20–21.ʻI hoʻo lau mo ho fāmilí ʻa e ngaahi vahe ko ʻení, fakatokangaʻi ange ʻa e kakai naʻe feohi mo Sīsū ʻi he fakamatala taki taha. Hangē ko ʻení, ko e hā ʻokú ke mahuʻingaʻia ai fekauʻaki mo e kakai naʻa nau ʻaʻahi ki he fonualoto ʻo e Fakamoʻuí? Ko e hā ʻokú ke ako mei he ngaahi lea pe ngāue ʻa e kau ʻAposetoló pe mei he kau ākongá ʻi he hala ki ʻEmeasí?

Fakakaukau ke hivaʻi fakataha e “Naʻe Toetuʻu Nai ʻa Sīsū?” (Tohi Hiva ʻa e Fānaú, 45). Talanoa fekauʻaki mo ha taha ʻoku ʻiloʻi ʻe homou fāmilí kuo pekia, pea aleaʻi ʻa e founga ʻoku ʻomi ai ʻe he ngaahi moʻoni ʻi he hiva ko ʻení ha fakafiemālié.

Ko e hāʻele ʻa Sīsū mo ha ongo tangata ʻi ha hala

Hala ki ʻEmeasí, tā ʻe Wendy Keller

Mātiu 28:16–20; Maʻake 16:14–20; Luke 24:44–53.Ko e hā naʻe kole ʻe Sīsū ʻi he ngaahi veesi ko ʻení, ke fakahoko ʻe Heʻene Kau ʻAposetoló? ʻE founga fēfē haʻatau lava ʻo tokoni ke ikunaʻi e ngāué ni? ʻE lava ke vahevahe ʻe he kau mēmipa ʻo e fāmilí ha ngaahi aʻusia ne nau ongoʻi ai “naʻe ngāue ʻa e ʻEikí mo kinautolu” ke fakahoko ʻEne ngaahi taumuʻá (Maʻake 16:20).

Sione 21:15–17.Fakakaukau ke mou lau ʻa e ngaahi veesi ko ʻení lolotonga hoʻomou maʻumeʻatokoni fakatahá. ʻE lava ke fakalahi atu ha ʻuhinga ki he folofola ʻa e Fakamoʻuí “fafanga ʻeku fanga sipí.” Fakatefito ʻi he meʻa naʻe akoʻi ʻe Sīsū kau ki he sipí ʻi he Fuakava Foʻoú (hangē ko ʻení, vakai e Mātiu 9:35–36; 10:5–6; 25:31–46; Luke 15:4–7; Sione 10:1–16), ko e hā ʻoku hoko ai e fafanga sipí ko ha founga lelei ke fakamatalaʻi ʻaki hono tokoniʻi e fānau ʻa e ʻOtuá? Ko e hā ʻoku akoʻi ʻe he talanoa fakatātā ko ʻení kau ki he ongo ʻa e Tamai Hēvaní mo Sīsū kiate kitautolú?

Ke maʻu ha ngaahi fakakaukau lahi ange ki hono akoʻi ʻo e fānaú, vakai ki he fokotuʻutuʻu ki he uike ní ʻi he Haʻu, ʻo Muimui ʻIate Au—Maʻá e Palaimelí.

Hiva ʻoku fokotuʻu atú: “Naʻe Toetuʻu Nai ʻa Sīsū?,” Tohi Hiva ʻa e Fānaú, 45.

Ko Hono Fakatupulaki e Ako Fakataautahá

Fakaʻaongaʻi e hivá ke fakaafeʻi e Laumālié mo akoʻi e tokāteliné. ʻE lava ʻe he fanongo pe hivaʻi ha ngaahi himi hangē ko e “Kuo Toe Tuʻu” (Ngaahi Himí, fika 108) ʻo fakaafeʻi mai e Laumālié mo tokoni ke ke ako fekauʻaki mo e Toetuʻu ʻa e Fakamoʻuí.

Ko e mamata ʻa ha fefine ki he Kalaisi toetuʻú ʻi he fonualotó

Ko e Kalaisi Kuo Toetuʻú, tā ʻe Walter Rane