« ថ្ងៃទី ១៨–២៤ ខែ ធ្នូ ។ បុណ្យគ្រីស្ទម៉ាស ៖ ‹ ដំណឹងល្អពីសេចក្ដីអំណរយ៉ាងអស្ចារ្យ › » ចូរមកតាមខ្ញុំ—សម្រាប់បុគ្គលម្នាក់ៗ និងក្រុមគ្រួសារ ៖ ព្រះគម្ពីរសញ្ញាថ្មី ឆ្នាំ ២០២៣ ( ឆ្នាំ ២០២២ )

« ថ្ងៃទី ១៨–២៤ ខែ ធ្នូ ។ បុណ្យគ្រីស្ទម៉ាស់ » ចូរមកតាមខ្ញុំ—សម្រាប់បុគ្គលម្នាក់ៗ និងក្រុមគ្រួសារ ៖ ឆ្នាំ ២០២៣

កូនចៀមតូច ដោយ ជេនីឌី ផេច

ថ្ងៃទី ១៨–២៤ ខែ ធ្នូ

បុណ្យគ្រីស្ទម៉ាស់

« ដំណឹងល្អពីសេចក្ដីអំណរយ៉ាងអស្ចារ្យ »

សូមពិចារណាថាតើការសញ្ជឹងគិតអំពីការប្រសូត និងបេសកកម្មរបស់ព្រះអង្គសង្គ្រោះអាចជួយនាំវិញ្ញាណនៃសេចក្ដីសុខសាន្ត និងភាពពិសិដ្ឋដល់រដូវបុណ្យគ្រីស្ទម៉ាស់យ៉ាងដូចម្ដេច ។

កត់ត្រាចំណាប់អារម្មណ៍របស់បងប្អូន

ហេតុអ្វីបានជាការប្រសូតរបស់ទារកតូចម្នាក់អាចនាំឲ្យមានអំណរយ៉ាងអស្ចារ្យដូច្នេះ ? ប្រហែលជាដោយសារតែទារកទើបកើតថ្មីជានិមិត្តសញ្ញានៃសេចក្ដីសង្ឃឹមហើយមើលទៅ ។ មានអ្វីមួយអំពីលទ្ធភាពពេញលេញដែលជីវិតថ្មីមាន ដែលអញ្ជើញពួកយើងឲ្យពិចារណាអំពីជីវិតនាពេលអនាគតរបស់កុមារនោះ និងអ្វីៗដែលអស្ចារ្យដែលគាត់នឹងសម្រេចបាន ។ ការណ៍នេះបង្ហាញកាន់តែពិតនៅក្នុងការប្រសូតរបស់ព្រះរាជបុត្រានៃព្រះ គឺព្រះយេស៊ូវគ្រីស្ទ ។ ពុំធ្លាប់មានការដាក់ទីសង្ឃឹមច្រើនទៅលើកុមារម្នាក់ ហើយក៏ពុំធ្លាប់មានមនុស្សណាម្នាក់ចាប់កំណើតមកដោយមាននូវការសន្យាដ៏ច្រើនដូច្នេះឡើយ ។

នៅពេលទេវតាបានអញ្ជើញពួកអ្នកគង្វាលឲ្យស្វែងរកទារកទើបនឹងកើតនៅក្នុងស្នូក ទ្រង់បានប្រទានសារលិខិតមួយដល់ពួកគេអំពីទារកតូចនោះ ។ វាគឺជាសារលិខិតមួយនៃសេចក្ដីសង្ឃឹម—ថាទារកនេះបានមកលើផែនដីដើម្បីបំពេញបេសកកម្មដ៏ពិសិដ្ឋមួយ ។ ពួកអ្នកគង្វាល « ក៏រ៉ាយរ៉ាប់រឿង … ហើយអស់អ្នកណាដែលឮក៏មានសេចក្តីអស្ចារ្យពីពាក្យដែលពួកអ្នកគង្វាលបានប្រាប់មក ។ តែម៉ារា នាងរក្សាទុករឿងទាំងនោះដោយរំពឹងគិតតែក្នុងចិត្ត » ( លូកា ២:១៧–១៩ ) ។ ប្រហែលវានឹងជាការល្អដើម្បីធ្វើតាមគំរូរបស់ម៉ារានាបុណ្យគ្រីស្ទម៉ាស់នេះ ៖ ដើម្បីពិចារណាក្នុងដួងចិត្តរបស់បងប្អូននូវរឿងដែលបងប្អូនបានរៀនអំពីព្រះអង្គសង្គ្រោះនៅឆ្នាំនេះ ។ តើទ្រង់បានបំពេញបេសកកម្មនៃការប្រោសលោះរបស់ទ្រង់នៅក្នុងដំណើររឿងដែលបងប្អូនបានអានយ៉ាងដូចម្ដេច ? ហើយដែលសំខាន់ជាងនេះ តើបេសកកម្មរបស់ទ្រង់បានផ្លាស់ប្ដូរជីវិតរបស់បងប្អូនយ៉ាងដូចម្ដេច ? បន្ទាប់មក បងប្អូនអាចមានអារម្មណ៍បំផុសឲ្យធ្វើតាមគំរូរបស់ពួកអ្នកគង្វាល ៖ តើបងប្អូននឹង « រ៉ាយរ៉ាប់ » ពីអ្វីដែលព្រះយេស៊ូវគ្រីស្ទបានធ្វើសម្រាប់បងប្អូនយ៉ាងដូចម្ដេច ?

គំនិតយោបល់សម្រាប់ការសិក្សាព្រះគម្ពីរផ្ទាល់ខ្លួន

ម៉ាថាយ ១:១៨–២៥; ២:១–១២; លូកា ១:២៦–៣៨; ២:១–២០

ព្រះយេស៊ូវគ្រីស្ទបានយាងចុះមកប្រសូតនៅលើផែនដីនៅក្នុងចំណោមពួកយើង ។

ទោះជាបងប្អូនបានអាន ឬបានស្ដាប់ឮដំណើររឿងនៃការប្រសូតរបស់ព្រះយេស៊ូវគ្រីស្ទជាច្រើនដងពីមុនមកក៏ដោយ ក៏សូមសិក្សាអំពីដំណើររឿងនេះក្នុងពេលនេះដោយមានគំនិតនេះក្នុងចិត្ត ៖ « បុណ្យគ្រីស្ទម៉ាស់ពុំគ្រាន់តែប្រារព្ធអំពី របៀប ដែលព្រះយេស៊ូវបានយាងមកកាន់ពិភពលោកប៉ុណ្ណោះទេ ប៉ុន្តែក៏ត្រូវបានដឹងដែរថា ទ្រង់ជា នរណា —ជាព្រះអម្ចាស់ និងជាព្រះអង្គសង្គ្រោះរបស់យើង គឺព្រះយេស៊ូវគ្រីស្ទ—និងអំពី មូលហេតុ ដែលទ្រង់យាងមកផងដែរ » ( ក្រេហ្គ ស៊ី គ្រីស្ទីនសិន « The Fulness of the Story of Christmas » [ ការប្រជុំធម្មនិដ្ឋានបុណ្យគ្រីស្ទម៉ាសរបស់គណៈប្រធានទីមួយ ថ្ងៃទី ៤ ខែ ធ្នូ ឆ្នាំ ២០១៦ ] នៅលើគេហទំព័រ broadcasts.ChurchofJesusChrist.org ) ។

តើបងប្អូនដឹងអ្វីខ្លះថាព្រះយេស៊ូវគ្រីស្ទជានរណា មុនទ្រង់បានប្រសូតមកដែរឬទេ ? ( ជាឧទាហរណ៍ សូមមើល យ៉ូហាន ១៧:៥; ម៉ូសាយ ៣:៥; គោលលទ្ធិ និង សេចក្តីសញ្ញា ៧៦:១៣–១៤, ២០–២៤; ម៉ូសេ ៤:២ ) ។ តើចំណេះដឹងនេះជះឥទ្ធិពលលើអារម្មណ៍របស់បងប្អូនយ៉ាងដូចម្ដេច នៅពេលបងប្អូនអានអំពីការប្រសូតរបស់ទ្រង់ ?

តើបងប្អូនដឹងអ្វីខ្លះ អំពីមូលហេតុដែលព្រះយេស៊ូវគ្រីស្ទបានយាងមកផែនដី ? ( ជាឧទាហរណ៍ សូមមើល លូកា ៤:១៦–២១; យ៉ូហាន ៣:១៦–១៧; នីហ្វៃទី៣ ២៧:១៣–១៦; គោលលទ្ធិ និង សេចក្ដីសញ្ញា ២០:២០–២៨ ) ។ តើចំណេះដឹងនេះជះឥទ្ធិពលលើអារម្មណ៍របស់បងប្អូនអំពីព្រះអង្គសង្គ្រោះយ៉ាងដូចម្ដេច ? តើវាជះឥទ្ធិពលលើរបៀបដែលបងប្អូនរស់នៅយ៉ាងដូចម្ដេច ?

សូមមើលផងដែរ កូរិនថូស ទី២ ៨:៩; ហេព្រើរ ២:៧–១៨; នីហ្វៃទី១ ១១:១៣–៣៣; អាលម៉ា ៧:១០–១៣; « The Nativity » ( វីដេអូ ) នៅលើគេហទំព័រ ChurchofJesusChrist.org ។

កូរិនថូស ទី១ ១៥:២១–២៦; កូល៉ុស ១:១២–២២; ពេត្រុស ទី១ ២:២១–២៥

ព្រះយេស៊ូវគ្រីស្ទបានបំពេញបេសកកម្មរបស់ទ្រង់ ហើយបានធ្វើឲ្យខ្ញុំអាចទទួលគ្រងជីវិតដ៏អស់កល្បជានិច្ចបាន ។

ទោះជាដំណើររឿងអំពីការប្រសូតរបស់ព្រះគ្រីស្ទត្រូវបានហ៊ុមព័ទ្ធទៅដោយព្រឹត្តិការណ៍ដែលពោរពេញទៅដោយអព្ភូតហេតុជាច្រើនក្ដី ក៏ការប្រសូតរបស់ទ្រង់នឹងប្រៀបដូចជាការចាប់កំណើតរបស់អ្នកដទៃទៀតដូច្នោះដែរ បើពុំមែនដោយសារកិច្ចការដ៏មហិមាដែលទ្រង់បានសម្រេចនៅក្នុងព្រះជន្មរបស់ទ្រង់នាពេលក្រោយមកទេនោះ ។ ដូចជាប្រធាន ហ្គរដុន ប៊ី ហ៊ិងគ្លី បានថ្លែងថា « ព្រះឱរសដែលមាននាមថាព្រះយេស៊ូវនៃភូមិបេថ្លេហិម ក៏នឹងដូចជាទារកផ្សេងៗទៀតដែរ បើពុំជាព្រះគ្រីស្ទដ៏ប្រោសលោះនៅឯសួនច្បារគែតសេម៉ានី និងកាលវ៉ារី ហើយនឹងភាពពិតដ៏ជោគជ័យនៃការរស់ឡើងវិញទេនោះ » ( « The Wondrous and True Story of Christmas » Ensign ខែ ធ្នូ ឆ្នាំ ២០០០ ទំព័រ ៥ ) ។

ព្រះយេស៊ូវគ្រីស្ទកំពុងលុតជង្គង់នៅក្នុងសូនច្បារគែតសេម៉ានី — សួនច្បារគែតសេម៉ានី ដោយ ជេ ឃើក រីឆាដ

ភស្ដុតាងនៃបេសកកម្មដ៏ទេវភាពរបស់ព្រះអង្គសង្គ្រោះ និងសេចក្ដីស្រឡាញ់ប្រកបដោយអានុភាពរបស់ទ្រង់ចំពោះអ្នកដទៃ គឺអាចរកបាននៅក្នុងព្រះគម្ពីរសញ្ញាថ្មីនេះ ។ តើវគ្គបទគម្ពីរ ឬដំណើររឿងណាខ្លះកើតមានក្នុងគំនិតរបស់បងប្អូន ? បងប្អូនអាចនឹងត្រឡប់ទៅមើលធនធាននេះ ឬកំណត់ហេតុការសិក្សារបស់បងប្អូន ហើយរំឭកអំពីចំណាប់អារម្មណ៍មួយចំនួនដែលបងប្អូនបានកត់ត្រា ។ បងប្អូនក៏អាចអាន កូរិនថូស ទី១ ១៥:២១–២៦; កូល៉ុស ១:១២–២២; ពេត្រុស ទី១ ២:២១–២៥ ហើយពិចារណាអំពីរបៀបដែលព្រះអង្គសង្គ្រោះ និងកិច្ចការរបស់ទ្រង់បានប្រទានពរដល់ជីវិតរបស់បងប្អូន ។ តើបងប្អូនទទួលអារម្មណ៍បំផុសគំនិតឲ្យផ្លាស់ប្ដូរអ្វីខ្លះនៅក្នុងជីវិតរបស់បងប្អូន ? តើបងប្អូននឹងប្រើប្រាស់ព្រះចេស្ដារបស់ព្រះអង្គសង្គ្រោះយ៉ាងដូចម្ដេច ?

គំនិតយោបល់សម្រាប់ការសិក្សាព្រះគម្ពីរជាគ្រួសារ និងរាត្រីជួបជុំក្នុងគ្រួសារ

ម៉ាថាយ ១:១៨–២៥; ២:១–១២; លូកា ១:២៦–៣៨; ២:១–២០ ។តើបងប្អូនអាចប្រារព្ធការប្រសូតរបស់ព្រះយេស៊ូវជាមួយនឹងគ្រួសាររបស់បងប្អូនយ៉ាងដូចម្ដេច ? នេះជាគំនិតយោបល់មួយចំនួន ឬបងប្អូនអាចបង្កើតដោយខ្លួនឯងផ្ទាល់ ៖

សូមអាន ហើយដើរតួរឿងប្រសូតកម្មជាមួយគ្នា ។
សូមមើលវីដេអូ « The Christ Child » ( នៅលើគេហទំព័រ ChurchofJesusChrist.org ) ។
ស្រាវជ្រាវធនធានមួយចំនួននៅក្នុងកម្រងអំពី « ព្រះយេស៊ូវគ្រីស្ទ » នៅបណ្ណាល័យដំណឹងល្អ ជាពិសេសនៅក្នុងវគ្គដែលមានចំណងជើងថា « កំណើតរបស់ទ្រង់ ( បុណ្យគ្រីស្ទម៉ាស់ ) » ។
សូមមើលការប្រជុំធម្មនិដ្ឋានបុណ្យគ្រីស្ទម៉ាស់របស់គណៈប្រធានទីមួយ ( នៅលើគេហទំព័រ broadcasts.ChurchofJesusChrist.org ) ។
សូមច្រៀងទំនុកតម្កើងបុណ្យគ្រីស្ទម៉ាស់ជាមួយគ្នា ឬជ្រើសរើសអ្នកជិតខាង ឬមិត្តភក្ដិដើម្បីទៅសួរសុខទុក្ខ ហើយច្រៀងឲ្យពួកគាត់ស្តាប់ ( សូមមើល ទំនុកតម្កើង ល.រ. ១២៣–១៣២ ) ។
សូមធ្វើការបម្រើមួយ ។
សូមឲ្យសមាជិកគ្រួសារស្វែងរកព័ត៌មានលម្អិតនៅក្នុងរឿងប្រសូតកម្មដែលផ្ដល់ជាគំនិតយោបល់ដល់ពួកគេក្នុងការតុបតែង ឬដាក់តាំង ដើម្បីពួកគេអាចធ្វើការរំឭកចាំអំពីព្រះយេស៊ូវគ្រីស្ទ ។

កូរិនថូស ទី១ ១៥:២១–២៦; កូល៉ុស ១:១២–២២; ពេត្រុស ទី១ ២:២១–២៥ ។ហេតុអ្វីយើងមានអំណរគុណដែលព្រះយេស៊ូវគ្រីស្ទបានប្រសូតមក ? តើទ្រង់បានប្រទានអំណោយអ្វីខ្លះដល់យើង ? តើយើងអាចបង្ហាញនូវការដឹងគុណរបស់យើងចំពោះទ្រង់យ៉ាងដូចម្ដេច ? គ្រួសាររបស់បងប្អូនអាចច្រៀងចម្រៀងមួយបទដែលបង្រៀនអំពីបេសកកម្មរបស់ទ្រង់ ដូចជាបទ « ទ្រង់បញ្ជូនបុត្រាទ្រង់មក » ( សៀវភៅចម្រៀងកុមារ ទំព័រ ២០–២១ ) ។

« ព្រះគ្រីស្ទដ៏មានព្រះជន្មរស់ ៖ ទីបន្ទាល់នៃពួកសាវក » ។បើសិនជាបងប្អូនចង់ជួយដល់គ្រួសាររបស់បងប្អូនឲ្យផ្ដោតទៅលើព្រះអង្គសង្គ្រោះនៅពេលបុណ្យគ្រីស្ទម៉ាស់ ប្រហែលជាបងប្អូនអាចចំណាយពេលខ្លះៗអាន និងសិក្សាជាមួយគ្នាក្នុង « The Living Christ: The Testimony of the Apostles » ( នៅលើគេហទំព័រ ChurchofJesusChrist.org ) ។ ប្រហែលជាបងប្អូនអាចទន្ទេញវគ្គមកពី « ព្រះគ្រីស្ទដ៏មានព្រះជន្មរស់ » ឬស្វែងរកការពិពណ៌នាអំពីព្រះជន្មរបស់ព្រះអង្គសង្គ្រោះនៅក្នុងព្រះគម្ពីរសញ្ញាថ្មីដែលគាំទ្រដល់សេចក្ដីថ្លែងការណ៍នានានៅក្នុងវគ្គនោះ ។ បងប្អូនក៏អាចអញ្ជើញសមាជិកគ្រួសារម្នាក់ៗឲ្យសរសេរទីបន្ទាល់ផ្ទាល់ខ្លួនរបស់គាត់អំពីព្រះយេស៊ូវគ្រីស្ទ ហើយបើមានការបំផុសគំនិតខ្លាំង សូមអានអំពីទីបន្ទាល់នោះទៅទៅកាន់គ្រួសារទាំងមូល ។

សម្រាប់គំនិតបន្ថែមសម្រាប់ការបង្រៀនដល់កុមារ សូមមើល គម្រោងមេរៀនសប្ដាហ៍នេះ នៅក្នុងសៀវភៅ ចូរមកតាមខ្ញុំ—សម្រាប់អង្គការបឋមសិក្សា ។

ចម្រៀងដែលលើកទឹកចិត្តឲ្យប្រើ ៖ « គ្រាមួយនៅក្នុងក្រោលដ៏រាបសា » សៀវភៅចម្រៀងកុមារ ទំព័រ ២៥ ។

ការកែលម្អដល់ការសិក្សាផ្ទាល់ខ្លួន

ស្វែងរកព្រះយេស៊ូវគ្រីស្ទ ។ បទគម្ពីរបង្រៀនយើងថា រឿងទាំងអស់ថ្លែងទីបន្ទាល់អំពីព្រះយេស៊ូវគ្រីស្ទ ( សូមមើល ម៉ូសេ ៦:៦២–៦៣ ) ដូច្នេះយើងគួរតែស្វែងរកទ្រង់នៅគ្រប់អ្វីៗទាំងអស់ ។ នៅពេលបងប្អូនអានបទគម្ពីរនេះ សូមពិចារណាធ្វើការកត់ចំណាំ ឬគូសចំណាំខគម្ពីរដែលបង្រៀនបងប្អូនអំពីទ្រង់ ។ សូមចំណាយពេលខ្លះៗនៅមួយថ្ងៃៗរហូតដល់ថ្ងៃបុណ្យគ្រីស្ទម៉ាស់ដើម្បីរកមើលអ្វីៗនៅជុំវិញបងប្អូន ដែលថ្លែងទីបន្ទាល់អំពីព្រះយេស៊ូវគ្រីស្ទ ។

ម៉ារា យ៉ូសែប និងពួកអ្នកគង្វាលនៅជុំវិញទារកយេស៊ូវ — ប្រសូតកម្ម ដោយ ប្រាយអិន ខល