“Eprōļ 18–24. Exodus 18–20: ‘Men Otemjej Jeova Ear Kōnono Kōmnaaj Kōm̧m̧ani”,’” Itok, Ļoor Eō—N̄an Kajjojo Armej im Baam̧le ko: Kallim̧ur Mokta 2022 (2021)
“Eprōļ 18–24. Exodus 18–20,” Itok, Ļoor Eō—N̄an Kajjojo Armej im Baam̧le ko: 2022
Juon to̧ļ ilo Ijipt tōmak ke emaron̄ To̧ļ Sinai.
Eprōļ 18–24
Exodus 18–20
“Men Otemjej Jeova Ear Kōnono Kōmnaaj Kōm̧m̧ani”
Sister Michelle Craig ekar katakin, “Āinwōt rikaļoor ro rōtōmak an [Jisōs Kraist], komaron̄ bōk im̧we im revelesōn, ko me rejejjet n̄an kien ko An, me kar lewaj n̄an eok” (“Jon̄an eo ilo Jetōb,” Liahona, Nob. 2019, 21). Je im mour kake im̧we eo kwoj būki ilo am riiti Exodus 18–20.
Je En̄jake ko Rej Im̧we Eok
Em̧akūt eo an riIsrael ro jān Ijipt laļļo̧k n̄an To̧l Sinai ekar obrak kōn kabwilōn̄lōn̄ ko—kam̧ool ko ban kaarmejeti kōn kajoor eo eļap an Irooj kōn, iakwe, im jouj. Ijoke, Irooj eaar kepooj kōjeraam̧m̧an ko n̄an er me ekar kanemkwoj er jān Ijipt im kake aer kwole im maro. Eaar kōņaan bwe ren erom̧ armej in bujen ro An, An “m̧weiuk e aorōk,” im “juon aelōn̄ ekwōjarjar” (Exodus 19:5–6). Rainin, kōjeraam̧m̧an eo an bujen in ej etal n̄an ejjab juon wōt laļ ak armej. Anij ekōņaan bwe aolep ro Nejin ren armej in bujen ro An, n̄an “bokake [Ainikien] ilo m̧ool, im kōjparok bujen ko [An] ”Exodus 19:5), bwe Ej kwaļo̧k An tiriam̧okake “n̄an taujin iaan ro rej iakwe [E], im kōjparok kien ko [An]” (Exodus 20:6).
Ļōm̧ņak ko n̄an Ekkatak Jeje Ko Rekwojarjar Ippam̧ Make
Imaron̄ jipan̄ “ineek eddo ko” n̄an kōm̧m̧ane jerbal in an Irooj.
Ilo am riiti kapilōk eo an Moses ekar bōke jān eo nej jemān, Jetro, kōļmenļo̧kjeņ elmen am maron̄ āinwōt “m̧aan ro re m̧ool” (jet iien ej ukook āinwōt em̧m̧an ro “rōreeo”) kar kōmeļeļeik ilo eoon 21. Elmen am maron̄ jipan̄ “ineek eddodo ko” an ritōl ro am? (eoon 22). N̄an waanjon̄ak, elmen an kapilōk in jerbal n̄an kijejeto in jerbal in karejar eo am?
Kwomaron̄ bar ļōmņake n̄e kwoj, ilo iien ko, āinwōt Moses, kajjieon̄ kōm̧m̧an elōn̄ men ko. Elmen an kapilōk eo an Jetro jerbal n̄an kwe?
Bar lale Mosaia 4:27; Henry B. Eyring, “The Caregiver,” Liaona, Nov. 2012, 121–24.
Jerbal in karejar n̄an ro jet ej juon wāween jemaron̄ bōk m̧ōttan ilo jerbal in an Irooj.
Armej in bujen ro an Irooj rej āinwōt juon men eaorōk n̄an E.
Ļōmņake ta meļeļein n̄an kwe n̄an erom “juon m̧weiuk e aorōk” an Irooj (Exodus 19:5). Būreejtōn Russell M. Nelson ekar kwaļo̧k juon kōmeļeļe kōn naan in: “Ilo Kallim̧ur M̧okta, tōōm̧ in Hibru eo me e aorōk ekar ukook segullah, meļeļein ‘jikin aorōk,’ ak ‘m̧weiuk eaorōk.’ … N̄an kōj n̄an kalikkar jen ro rikarejeran Irooj āinwōt armej ro an raorōk ej juon elaajrak eo eaorōktata” (“Ajri in Bujen,” Ensign, Māe 1995, 34). Elmen an jeļā bwe kōjparok bujen ko am ekōm̧m̧an bwe kwoj juon “m̧weiuk e aorōk” eim̧we wāween am mour?
Bar lale Gerrit W. Gong, “Ribujen Ippān,” Kweilo̧k eo Eļap, Okt. 2019.
En̄jake ko Rekwojarjar ekitbuuj keppopo.
Irooj eaar jiron̄ Moses bwe ro nejin Israel reaikuj in kar keppopo m̧okta jen aer maron̄ “ioon Anij” (Exodus 19:10–11, 17) im kōjparok juon bujen Ippān (lale Exodus 19:5). Ta eo kwoj kōm̧m̧ane n̄an keppopo n̄an kwaļo̧k en̄jake ko rekwojarjar ilo mour eo am, āinwōt etal n̄an tampeļ ak bōk m̧ōttan kwojkwoj eo? Ta eo komaron̄ kōm̧m̧ane eļapļo̧k n̄an lukkuun keppopo n̄an en̄jake kein? Ļōmņake jetōbin m̧akūtkūt ko jet me ekitbuuj keppopo, im kōļmenļo̧kjeņ elmen am keppopo maron̄ jelet kain en̄jake in ippam̧.
Anij ej tūriam̧o.
Ilo am riiti Exodus 20, jab ļōmņake jabdewōt iaan Kien ko Jon̄oul kwoj en̄jake kwoj pokake im ewi wōt eo kwoj lukkuun pokake eļapļo̧k. Komaron̄ kālet juon kien n̄an jerbale innām ekkatak kake eļapļo̧k meļeļein ilo riiti eoon ko reiokļo̧k wōt (lale Unin Tōl n̄an Jeje ko Rekwojarar ilo scripture.ChurchofJesusChrist.org) ak ennaan ko ilo kweilo̧k eo (lale topics section in conference.ChurchofJesusChrist.org). Ļōmņak in kobaiki ilo am ekkatak kōjeraam̧m̧an ko me rej itok n̄an ro rej pokake kien. Elmen an kōjeram̧m̧an kein kwaļo̧k tiriam̧o an Anij im iakwe n̄an eok?
Bar lale Carole M. Stephens, “If Ye Love Me, Keep My Commandments,” Liahona, Nov. 2015, 118–20.
Eaorōk n̄an likūt Anij m̧oktata ilo mour eo aō.
Riiti Exodus 20:1–7 emaron̄ im̧we eok n̄an ļōmņak kōn men ko raorōk ilo mour eo am—komaron̄ je ilo juon laajrak. Ta jet iaan “anij raņ” ak “jekjek in ekjab [ko]” (Exodus 20:3–4) me emaron̄ kapoik eok n̄an likūt im̧aan Anij? Elmen maron̄ likūt Irooj m̧oktata ejipan̄ eok ippān men ko jet raorōk ilo mour eo am? Ta eo kwaar im̧we n̄an kōm̧m̧ane n̄an kōļapļo̧k mije eo am ilo Jemādwōj Ilan̄ im Jisōs Kraist?
Bar lale Dallin H. Oaks, “No Other Gods,” Liaona, Nov. 2013, 72–75.
Ļōmņak ko n̄an Ekkatak Jeje ko Rekwojarjar an Baam̧le im Nokon in Jota
-
Exodus 18:8–12.Ta eo ekar jelet naan in kam̧ool eo an kōn lo̧mo̧o̧ren eo an Anij n̄an Jetro? Ta men ko reļļap Irooj eaar kōm̧m̧ane n̄an baam̧le eo am? Wōn jemaron̄ kwaļo̧k en̄jak ko ad ippāer? Elmen ad maron̄ kōjparok en̄jake ko n̄an epepen ko tokālik?
-
Exodus 18:13–26.Eoon kein remaron̄ im̧we baam̧le eo am n̄an ļōmņak kōn jerbal in jipan̄ eo an ritōl ro an Kabun̄ in ijo jokwe ie, āinwōt bisop eo, ritōl ro an jodikdik, ak rikaki ro an Būraimere. Ta eddo ko n̄an kōm̧m̧ani ewōr ippāer me remaron̄ in lukkuun “pen” (Exodus 18:18) an juon make kōm̧m̧ane? Ta eo jemaron̄ kōm̧m̧ane n̄an jipan̄ ineek eddodo ko aer?
-
Exodus 20:3–17.Ļōmņake juon wāween eo ewōr tokjen n̄an ekōnono kōn Kien ko Jon̄oul āinwōt juon baam̧le. N̄an waanjon̄ak, komaron̄ je kien ko ilo Exodus 20:3–17 ioon jon̄oul peba jiddik. Ro uwaan baam̧le eo remaron̄ ajije n̄an ruo m̧ōttan ko: (1) kautiej Anij im (2) iakwe ro jet (bar lale Matu 22:36–40). Lōmņak in kālet juon kien ak ruo kajjojo raan wiik in im ekōnono ippān doon kake ilo eļapļo̧k. N̄an waanjon̄ak, elmen pokake kien in kōkajoorļo̧k baam̧le in ad? Elmen an kar Rilo̧mo̧o̧r pokake?
-
Exodus 20:12.N̄an meļeļe eļapļo̧k Exodus 20:12, emaron̄ jipan̄ eļan̄n̄e baam̧le eo am repukot meļeļein naan eo “kautiej.” Innām ro uwaan baam̧le eo emaron̄ kōm̧m̧ane juon elaajrak in men ko jemaron̄ kōm̧m̧ani me emaron̄ kautiej ro jined im jemād. Kwomaron̄ al juon al kōn kautiej ro jined im jemād, āinwōt “Quickly I’ll Obey” (Children’s Songbook, 197), innām kōjerbal jet iaan ļōmņak ko ilo laajrak eo am n̄an je eoon ko rekāāl n̄an al eo.
N̄an ļōmņak ko reļļapļo̧k n̄an katakin ajri ro, lale laajrak in katak eo an wiik in ilo Itok, Ļoor Eō—N̄an Būraimere.
Al eo kar ļōmņake: “Keep the Commandments,” Children’s Songbook, 146–47.
Kōkm̧anm̧anļo̧k Ekkatak Ippem̧ Make
Pukōt juon iien me emeļak n̄an kwe. Ekkā an pidodo n̄an ekkatak n̄e komaron̄ ekkatak jān jeje ko rekwojarjar ilo an ejjeļo̧k kabōņōņō. Pukōt juon iien eo emeļak n̄an eok, im kōm̧m̧an jon̄an wōt am̧ maron̄ n̄an ekkatak emakijkij ilo iien ņe kajjojo raan.
Kōmeļeļe kōn Moses jibwe dōkā Kien ko Jon̄oul, jen Sam Lawlor