Kōmeļeļe eo kōn waļo̧ktok eo an Irooj n̄an Moses im 70 em̧m̧aan in Israel ro, jān Jerry Harston

Eprōļ 25–Māe 1

Exodus 24; 31–34

“N̄a Inaaj Ilo̧k Ippam̧ Ļo̧k”

Ejjab aolep pedped in katak ko me eļap meļeļeier ilo jeje ko rekwojarjar remaron̄ lukkuun alikkar ilo elaajrak kein. Ron̄jake Jetōb n̄an jipan̄ eok mije m̧ool ko kwoj aikuji.

Je En̄jake ko Rej Im̧we Eok

Elōn̄ un ko n̄an kōjatdikdik kaki bwe ro nejin Israel renaaj kar m̧ool n̄an Anij ālkin An kar kwaļo̧k kien ko An n̄an er (lale Exodus 20–23). Men̄e rekar ellotaan im ebbwer m̧oktaļo̧k, ke Moses ekar riiti ļo̧k kien ko ilo ioon toļ Sinai, rekar kōm̧m̧ane bujen in: “Men otemjej Irooj ear kōnono kake, kōm naaj kōm̧m̧ani, im naaj pokake” (Exodus 24:7). Innem Anij ekar kūr Moses n̄an toļ eo, im ba n̄an e bwe en kalōk juon m̧ōn kōppād “bwe In jokwe ippāer” (Exodus 25:8; lale jebta ko 25–30).

Ak ilo an Moses kar pād ioon toļ eo im ekkatak wāween an ri Israel ro maron̄ lo Anij ilubwiljier, ri Israel ro rekar pād itulaļ in toļ im kōm̧m̧an ekjab kōm̧m̧an jān gold n̄an kabun̄jar n̄ane. Ej kab m̧ōj aer kallim̧ur n̄an “en ejjeļo̧k bar anij raņ ippam̧ ijjello̧kō,” ak rekar “jeorļo̧k m̧ōkaj” jān kien ko an Anij (Exodus 20:3; 32:8; bar lale Exodus 24:3). Ekar juon reilik eo me ekabulōn̄lōn̄, ak jejeļā bwe jān en̄jake bwe tōmak im wūjlepļo̧k remaron̄ jet iien mākunļo̧k kōn jaje kijenmej, mijak, im pere. Ilo ad kappukot Irooj ilo mour ko ad, ej juon menin kōketak ilo ad jeļā bwe Irooj ejjab ebbweer jān ri Israel ro etto im E ejamin ebbweer jān kōj—kōn E ej “tūriam̧okake, im E jouj, e rum̧wij An illu, im eļap An tūriam̧okake im m̧ool” (Exodus 34:6).

Ļōmņak ko n̄an Ekkatak Jeje Ko Rekwojarjar Ippam̧ Make

Exodus 24:1–11

Bujen eo Aō ej kwaļo̧k ikdeleel eo aō n̄an pokake kien ko an Anij.

Ilo am̧ riit ilo Exodus 24:3–8 kōn Riisrael ro n̄an pokake kien eo an Anij, ļōmņak ko am̧ emaron̄ oktakļo̧k n̄an bujen eo kwaar kōm̧m̧ane ippān Anij. Bujen eo an ri Israel ro ekoba wāween kabun̄jar ko aer me reoktak jān ta eo Anij ej kōņaan rainin, ak kwomaron̄ kile aer āinļo̧k wōt, eļaptata eļan̄n̄e kwoj kile bwe m̧ool ko an indeeo rej kōkaļļein wāween kabun̄jar kein.

N̄an waanjon̄ak, eoon ko 4, 5, and 8 ej kwaļo̧k juon lokatok, katok kōn menin mour, im bōtōktōk. Ta eo men kein remaron̄ jutak kaki, im ewi wāween aer iookļo̧k bujen ko am̧? Ewi wāween an bujen ko am̧ jipan̄ eok kōm̧m̧ane “men otemjej Irooj ej kōnono kaki”? (eoon 7).

Bar lale Moses 5:4–9; Becky Craven, “Tiljek ņae Jatiljek,” Liaona, Māe 2019, 9–11.

Exodus 32–34

Jerawiwi ej kajeorlikļo̧k kōj jān Anij, ak E ej kwaļo̧k ej kōm̧m̧an iaļ n̄an bar rooltok.

Ilo ad kejōkļo̧kjeņ kōn wāween an Riisrael ro m̧ōkaj aer “kattoon er” (Exodus 32:7) ilo aer rube bujen ko aer, im kōjekdo̧o̧n ejja bōd ko wōt. Ilo am̧ riiti Exodus 32:1–8, kajjieon̄ in likūt eok make āinwōt ri Israel ro—kwoj pād ilo āne jam̧den, Moses ekar jako ium̧win 40 raan ko, kwojjab maron̄ jeļa eļan̄n̄e kwonaaj bar rool tok, im juon kiejoļjoļ ippān ri Canaan ro ilo āneen kallim̧ur epād ilo ilju im jekļaj eo am̧ (bar lale Exodus 23:22–31). Etke kwoj ļōmņak ri Israel ro rekar kōņaan juon ekjab e gold? Etke Riisrael ro rekar lukkuun ļap aer jerawiwi? Eoon kein remaron̄ im̧we eok n̄an kejo̧kļo̧kjeņ kōn wāween ko kwomaron̄ po n̄an likūt am̧ lōke ippān juon ak juon men ijjeļo̧kin Rilo̧mo̧o̧r. Ewōr ke ta jabdewōt kwoj en̄jake im̧we n̄an kōm̧m̧ane bwe kwon maron̄ lukkuun m̧ool ilo am̧ likūt Anij m̧oktata ilo mour eo am̧? Ta eo ej im̧we eok kōn kajjitōk eo an Moses n̄an Irooj ilo Exodus 33:11–17?

Ke Riisrael ro rekar lukkuun jerawiwi, bwebwenato in ekar bar kobaik ennaan eo an kōn tūriam̧o im jeorļo̧k bōd an Anij. Ta eo Exodus 34:1–10 ej katakin eok kake kōn Rilo̧mo̧o̧r? Ewi wāween an kōm̧m̧an ko an Moses ilo etan Riisrael ro kakeememej eok kōn ta eo Jisōs Kraist ekar kōm̧m̧ane n̄an aolep armej? (lale Exodus 32:30–32; Mosaia 14:4–8; 15:9; Katak im Bujen Ko 45:3–5).

Ukok eo an Josep Smith, Jenesis 50:27–33 (ilo Bible appendix)

Ta kar oktak eo ikōtaan tebōļ dekā ko ruo Moses ekar kōm̧m̧ani?

Ke Moses ekar to laļ tak jān toļ eo, ekar bōki laļ tak pea in tebōļ dekā me em̧ōj jeik kien ko ioon. Ālkin an kar loe bwe ri Israel ro rekar kakkure bujen ko aer, Moses ekar rube tebōļ ko (lale Exodus 31:18; 32:19). Tokālik, Anij ekar kakien Moses n̄an kōm̧m̧ane bar juon pea in tebōļ dekā ko im bar bōki ļo̧k n̄an toļ eo (lale Exodus 34:1–4). Ukok eo an Josep Smith, Exodus 34:1–2 (ilo Bible appendix) ej kalikkar bwe pea ko ruo jinoin tata in tebōļ dekā ko me ekoba kain̄i ko an Anij “laajrak ekwōjarjar,” ak Priesthood eo an Melkesidek. Kein karuo pea ekoba “the law of a carnal commandment.” Menin ekar juon kien edik tōl jān “priesthood eo edik” (lale Katak im Bujen Ko 84:17–27), eo me ekar aikuj kōpooj Riisrael ro n̄an kien im priesthood eo eutiejļo̧k bwe ren maron̄ lukkuun deļo̧n̄e aelōn̄ eo an Anij.

Ļōmņak ko n̄an Ekkatak Jeje ko Rekwojarjar an Baam̧le im Nokon in Jota

Exodus 31:12–13, 16–17.Ālkin riiti eoon kein, bolen baam̧le eo am̧ emaron̄ kōmeļeļeik kajjitōk eo an Būreejtōn Russell M. Nelson kōn m̧wil ko m̧wilid ilo raan in Jabōt: “Ta kōkaļļe eo konaaaj leļo̧k n̄an Irooj n̄an kwaļo̧k am iakwe E?” (“Jabōt Ej Juon Menin Lan̄lōn̄,” Liaona, Māe 2015, 130). Baam̧le eo am̧ emaron̄ kōm̧m̧an jet kōkaļļe ko n̄an likūt ipeļaakin m̧weo m̧ōm̧ n̄an kakeememej eok wāween am̧ naaj kwaļo̧k iakwe n̄an Irooj ilo raan in Jabōt. (Barāinwōt lale kobain bitio ko “Sabbath Day—At Home” [ChurchofJesusChrist.org].)

N̄an kautiej raan in Jabōt, jej kwaļo̧k ad iakwe n̄an Irooj.

Exodus 32:1–8.N̄an jipan̄ baam̧le eo am̧ ekōnono kōn wāween an ri Israel ro kar oktak likļo̧k jān Anij, ļōmņak n̄an ejaake juon iaļ ilo laļ (ak kappukot juon iaļ eo epaake m̧weo m̧ōm̧). Ilo ad etetal ilo iaļ eo, ro uwaan baam̧le eo remaron̄ kōnono kōn kapo ko me jej jelm̧aeiki n̄an kajej ļo̧k “iaļ eo [Irooj ekar] jiron̄ er kake.” Ewi wāween ad maron̄ dāpdep wōt ilo iaļ eo? Eļan̄n̄e jekar jebwābwe, ewi wāween bwe jen maron̄ bar jepļaak? Ewi wāween an Rilo̧mo̧o̧r jipan̄ kōj?

Exodus 5:2Ālkin an ri Israel ro kar lo bwe kabun̄jar n̄an ekjab, Moses ekar ba, “Wōn eo ej pād ilo jait eo an Irooj?” Ewi wāween bwe jen kwaļo̧k ad pād ilo jait eo an Irooj?

Exodus 33:14–15.Ro uwaan baam̧le eo remaron̄ kwaļo̧k en̄jake ko aer me rekar en̄jake kōn kallim̧ur eo an Moses: “N̄a inaaj ilo̧k ippam̧ ļo̧k, im Inaaj lewōj kakkije.” Kwomaron̄ al juon al kōn ad pedped wōt ioon Anij, āinwōt “Abide with Me!” (Hymns, no. 166).

N̄an ļōmņak ko reļļapļo̧k kōn katakin ajri ro, lale unin tōl eo an wiik in ilo Itok, Ļoor Eō—N̄an Būraimere.

Al eo kar elmakote: “Who’s on the Lord’s Side?” Hymns, no. 260.

Kōkōm̧anm̧anļo̧k Ad Katakin

En̄jake jetōb eo. Ļōmņak kōn al eo ekwojarjar, jin̄n̄a ko, im paaktok in iakwe ko me ejelōt mejatoto in jetōb ilo m̧weo m̧ōm̧ ilo am̧ katakin baam̧le eo am̧ (lale Teaching in the Savior’s Way, 15).

Kabun̄jar n̄an Kau, jān W. C. Simmonds