“Māe 23–29. Joshua 1–8; 23–24: ‘Kwōn Kajoor im Kanooj Peran,’” Itok, Ļoor Eō—N̄an Kajjojo Armej im Baam̧le ko: Kallim̧ur M̧okta 2022 (2021)
“Māe 23–29. Joshua 1–8; 23–24,” Itok, Ļoor Eō—N̄an Kajjojo Armej im Baam̧le ko: 2022
Kōmeļeļe kōn an Moses kapit Joshua, jān Darrell Thomas
Māe 23–29
Joshua 1–8; 23–24
“Kwōn Kajoor im Kanooj Peran”
Ilo am̧ ekkatak kōn bok in Joshua, ļōmņak kōn wāween am̧ ekkatak kōn Riisrael ro emaron̄ kōļapļo̧k tōmak eo am̧ ilo Jisōs Kraist.
Je En̄jake ko Rej Im̧we Eok
Ekar bōk jejjo epepen ko, ak kallim̧ur eo an Irooj ekar epaak an kūrm̧ool: ro nejin Israel rekar epaake aer jolete āneen kallim̧ur. Ak ilo iaļ eo aer ekar pād im̧aer Jordan Reba, wall eo an Jericho, im juon nanan ak kajoor in armej ro rekar jum̧ae Irooj (lale 1 Nipai 17:35). Ilubwiljin men kein, ritōl eo ejitōn bōro Moses ekar jako. Jekjek eo emaron̄ kōm̧m̧an bwe jet Riisrael ren en̄jake m̧ōjno̧ im mijak, ak Irooj ekar ba, “Kwōn kajoor im kanooj peran.” Etke jej aikuj en̄jake wāween in? Ejjab kōn kajoor eo aer make—ak kajoor eo an Moses im Joshua—ak kōnke “Irooj am̧ Anij ej ippam̧, ijo ko jabdewōt kwōj ilo̧k ieļo̧k” (Joshua 1:9). N̄e ewōr jenej make kijoone reba ko im oror ko n̄an bōktok men ko rem̧m̧an emaorn̄ waļo̧k ilo mour ko ad, kōn ej “Irooj [eo] enaaj kōm̧m̧an men in bwilōn̄ ko [ippād]” (Joshua 3:5).
Kōn juon etale ekadue kōn bok in Joshua, lale “Joshua, bok eo” ilo Bible Dictionary.
Ļōmņak ko n̄an Ekkatak Jeje Ko Rekwojarjar Ippam̧ Make
Anij enaaj pād ippa eļan̄n̄e Inaaj tiljek n̄an E.
Pijaikļo̧k ta eo emaron̄ āinwōt n̄an Joshua ke kar kūr e bwe en bōk jikin Moses. Kile ta eo Irooj ekar ba ilo Joshua 1:1–9 n̄an kōketak e. Ļōmņak kōn apan̄ ko reppen kwoj jelm̧aeiki; ta eo ilo eoon kein me ej lewaj n̄an eok peran?
Emaron̄ juon men ekaitoklimo bwe et eo Joshua (Yehoshua ak Yeshua ilo kajin Hibru) ej meļeļein “Irooj ej lo̧mo̧o̧ren.” Im et eo Jisōs ej itok jān naan in Yeshua. Kōn menin ilo am̧ riiti kōn Joshua, ļōmņak kōn wāween mijen eo an n̄an tōl ro nejin Israel n̄an āneen kallim̧ur eo ej kakeememej eok kōn mijen eo an Rilo̧mo̧o̧r.
Bar lale Ann M. Dibb, “Be of a Good Courage,” Liaona, Māe 2010, 114–16.
Jim̧or tōmak im jerbal ko remeni aikuj n̄an bōk lo̧mo̧o̧r.
Rikūriijtin ro etto rekar lo bwe Rahab āinwōt juon waanjon̄ak kōn kajoor eo jim̧or an tōmak im jerbal ko (lale Hibru 11:31; Jemes 2:25). Ilo am̧ riiti Joshua 2, ļōmņak kōn jerbal eo an Rahab kōn tōmak im jerbal ko ilo an lo̧mo̧o̧ren e make, baam̧le eo an, im rijikaut ro an Israel. Ta eo menin ej katakin eok kōn wāween an tōmak eo ilo Kraist im jerbal ko am̧ maron̄ im̧we eok make im ro jet?
Emaron̄ itok limoium̧ n̄an jeļā bwe Rahab ekar juon jim̧aan Kiin̄ David im Jisōs Kraist (lale Matu 1:5). Ta katak ko rekkar jemaron̄ ekkatak jān menin?
Rahab ilo winto eo an. Kōttare Kallim̧ur eo, jān Elspeth Young.
Imaron̄ en̄jake “menin bwilōn̄” ko an Anij eļan̄n̄e ewōr aō tōmak ilo Jisōs Kraist.
Irooj ej kōņaan bwe “ro riaelōn̄ otemjej in laļ ren jeļā pein Irooj, bwe e kajoor bōtata” (Joshua 4:24). Ilo am̧ riiti Joshua 3–4, kejōkļo̧kjeņ kōn wāween am̧ jeļā pein Irooj eo ekajoor bōtata. Ewi wāween an Irooj kōm̧m̧an “menin bwilōn̄ ko” ilo mour eo am̧? (Joshua 3:5). Ewi wāween an emakijkij am̧ en̄jake—ak kile—menin bwilōn̄ kein? (n̄an waanjon̄ak, lale Joshua 3:17).
Ewi am̧ ļōmņak Riisrael ro rekar aikuji n̄an karreoik er make m̧okta jān aer kar kijoone Reba Jordan? Ta eo eaorōk kwoj lo ilo m̧ool in bwe reba eo ekar jepelļo̧k ālkin wōt “lo̧piden neen pris ro … [rekar] juur dān ko”? (Joshua 3:13, 15).
N̄an m̧akūtkūt ko jet raorōk me rekar waļo̧k ilo Reba Jordan, lale 2 Kiin̄ 2:6–15; 5:1–14; im Mark 1:9–11. Ilo am̧ kejōkļo̧kjeņ kōn eoon kein, ta kooneekjen ko kwoj loi ikōtaan m̧akūtkūt kein?
Bar lale Gérald Caussé, “Is It Still Wonderful to You?” Liaona, Māe 2015, 98–100; “Exercise Faith in Christ” (video), ChurchofJesusChrist.org.
Pokake ej bōktok kajoor eo an Anij ilo mour ko ad.
Jepta kein rej kōnono wōt kōn pata ko ilo āneen Jericho im Ai. Ilo am̧ riiti, ļōmņak kōn wāween ko kwoj tariņaeik kapo ilo mour eo am̧ make (n̄an waanjon̄ak, lale Joshua 7:10–13). Ta eo kwoj ekkatak kōn wāween an Anij jipan̄ eok im ta eo kwoj aikuj kōm̧m̧ane n̄an tōpar kajoor eo An? N̄an waanjon̄ak, ta eo ej im̧we eok kōn kōmeļeļe ko an Irooj n̄an bōk Jericho? (lale Joshua 6:1–5). Bolen akkaun eo ilo Joshua 7 enaaj im̧we eok n̄an kālet eļan̄n̄e “ewōr men in aje ippemi” ilo mour eo am̧ me kwoj aikuj joļo̧ke (Joshua 7:13).
“Kwōn Eddāp n̄an Irooj ami Anij.”
Ālkin kōjepelļo̧k āneen kallim̧ur ilubwiljin jon̄oulruo bwij ko an Israel (lale Joshua 13–21), Joshua ekar leļo̧k n̄an er katak ko an āliktata. Ilo am̧ riit katak kein ilo Joshua 23–24, kwomaron̄ dāpij juon laajrak kōn kakkōļ, kapilōk, im kōjeraaam̧m̧an ko em̧ōj kallim̧ur kaki me kwoj loi. Ļōmņak kōn aolep men ko ri Israel ro rekar jelm̧ae, etake kwoj ļōmņak Joshua ekar kāālet n̄an ba n̄an er men ko ilo jem̧ļo̧kin mour eo an? Ta eo kwoj lo ej im̧we eok n̄an “eddāp wōt n̄an Irooj”? (Joshua 23:8).
Ļōmņak ko n̄an Ekkatak Jeje ko Rekwojarjar an Baam̧le im Nokon in Jota
-
Joshua 1:8.Ta eo eoon in ej elmakot kōn wāween ad aikuj kōm̧m̧ani ekkatak ko ad jān jeje ko rekwojarjar, jim̧or kōj make im āinwōt juon baam̧le? Ewi wāween an eoon ko kar kōm̧m̧an bwe en “em̧m̧an iaļ eo am̧” im kōm̧m̧an bwe jen “jeraam̧m̧an”?
-
Joshua 4:3, 6–9.Ālkin riiti i ta eo Irooj ekar kōņaan bwe ri Israel ro ren kōm̧m̧ane kōn dekā ko jān Reba Jordan, baam̧le eo am̧ remaron̄ kōnono kōn jet iaan men ko reļļap Irooj ekar kōm̧m̧ani n̄an kwe. Remaron̄ leļo̧k n̄an kajjojo uwaan baam̧le eo juon dekā im kūr er n̄an je ak jin̄n̄aik juon men Irooj ekar kōm̧m̧ane n̄an er.
-
Joshua 6:2–5.Baam̧le eo am̧ emaron̄ itok limoin ilo kōm̧m̧an kōmeļeļe ko me Irooj ekar leļo̧k n̄an ri Israel ro bwe ren maron̄ anjo̧ ioon Jericho. Ta eo Irooj emaron̄ kōņaan bwe jen ekkatak jān bwebwenato in?
-
Joshua 24:15.Āllkin riit eoon in, ro uwaan baam̧le eo remaron̄ kwaļo̧k en̄jake ko aer eo me rekar kālet n̄an jerbal n̄an Irooj men̄e epen. Etke eaorōk bwe jen kōm̧m̧an jokālet ko n̄an jerbal n̄an E “rainin” ijjeļo̧kin ad kōttar m̧ae juon jekjek ej waļo̧k? Ewi wāween ad maron̄ rie ro uwaan “m̧weo” m̧ōd ilo ad kajjieon̄ n̄an “jerbal n̄an Irooj”?
N̄an ļōmņak ko reļļapļo̧k n̄an katakin ajri ro, lale unin tōl eo an wiik in ilo Itok, Ļoor Eō—N̄an Būraimere.
Al eo kar elmakote: “Choose the Right,” Hymns, no. 239.
Kōkm̧anm̧anļo̧k Ad Katakin
Kōmakijkij am̧ kwaļo̧k am̧ naan in kam̧ool. Kam̧ool eo am̧ em̧ool kōn m̧ool eo emaron̄ lukkuun kajoor ilo an im̧we baam̧le eo am̧. Ejjab aikuj lukkun wājepdik im aitok. Juon naan in kam̧ool eļaptata an kajoor n̄e ej kajju im ej jān bōro. (Lale Teaching in the Savior’s Way, 11.)
Irooj ekar kōm̧m̧an bwe oror ko an Jericho ren okjak. © Providence Collection/licensed from goodsalt.com