Սեպտեմբերի 12-18-ը Եսայիա 13-14, 24-30, 35․ «Զարմանալիք և զարմանք», Եկ, հետևիր ինձ. Անհատների և ընտանիքների համար. Հին Կտակարան 2022 (2021)

Սեպտեմբերի 12-18-ը Եսայիա 13-14, 24-30, 35, Եկ, հետևիր ինձ․ Անհատների և ընտանիքների համար․ 2022

Նկար

Ջոզեֆ Սմիթը Սրբազան պուրակում տեսնում է Երկնային Հորը և Հիսուս Քրիստոսին

Սրբազան պուրակը, Բրենթ Բորապ

Սեպտեմբերի 12-18-ը

Եսայիա 13-14, 24-30, 35

«Զարմանալիք և զարմանք»

Նախագահ Բոննի Հ․ Քորդոնն ուսուցանել է, որ «սուրբ գրությունները լուսավորում են մեր միտքը, սնուցում մեր հոգիները, պատասխանում մեր հարցերին, մեծացնում մեր վստահությունն առ Տերը և օգնում մեզ կենտրոնացնել մեր կյանքը Նրա վրա» («Տիրոջն ապավինիր և քո հասկացողությանը մի վստահիր», Լիահոնա, մայիս 2017, 7)։

Գրի առեք ձեր տպավորությունները

Տերը խնդրում է մարգարեներին նախազգուշացնել մեղքի հետևանքների մասին։ Հին Կտակարանի մարգարեների դեպքում դա հաճախ նշանակում էր՝ ասել հզոր թագավորությունների զորավոր ղեկավարներին, որ նրանք պետք է ապաշխարեն, այլապես կոչնչացվեն: Դա վտանգավոր առաջադրանք էր, բայց Եսայիան անվախ էր, և նրա նախազգուշացումներն իր ժամանակի թագավորություններին՝ Իսրայելին, Հուդային և մերձավոր ազգերին, բավական համարձակ էին (տես Եսայիա 13-23)։

Այնուամենայնիվ, Եսայիան նաև հույսի ուղերձ ուներ: Թեև մարգարեացված ավերածություններն ի վերջո կատարվեցին այդ թագավորություններում, Եսայիան վերականգնման և նորոգման հնարավորություն էր կանխատեսել: Տերը կհրավիրի Իր ժողովրդին վերադառնալ Իր մոտ: Նա այնպես կանի, որ «խորշակահար երկիրը լճի պիտի փոխուի, եւ ծարաւուտը՝ ջրերի աղբիւրների» (Եսայիա 35․7)։ Նա կանի «զարմանալիք և զարմանք» (Եսայիա 29․14)՝ վերականգնելով Իսրայելին Իր խոստացած օրհնությունները: Ոչ Եսայիան, ոչ էլ այն ժամանակ ապրող մարդկանցից որևէ մեկն այդքան չապրեց, որ տեսներ այս հրաշալի աշխատանքը: Բայց մենք այսօր տեսնում ենք դրա բացառիկ իրականացումը: Փաստորեն, մենք մասնակից ենք այդ գործին։

Նկար

անհատական ուսումնասիրության պատկերակ

Գաղափարներ սուրբ գրությունների անհատական ուսումնասիրության համար

Եսայիա 13․1-11, 19-22, 14․1-20

Աշխարհի ամբարիշտ թագավորությունները և դրանց ղեկավարները կընկնեն:

Եսայիա 13-14 գլուխները կոչվում են Բաբելոնի «բեռ» (մարգարեական պատգամ) (Եսայիա 13․1)։ Ժամանակին լինելով հզոր թագավորություն և ունենալով հզոր ղեկավար՝ Բաբելոնն այժմ հիշատակվում է հին աշխարհի պատմության մեջ։ Ուրեմն, այսօր ինչու՞ է մեզ համար կարևոր Բաբելոնին ուղղված ուղերձը: Սուրբ գրություններում Բաբելոնը խորհրդանշում է հպարտությունը, աշխարհիկությունը և մեղքը, իսկ այսօր մենք շրջապատված ենք այդ բոլոր բաներով: Մտածեք այդ խորհրդանիշների մասին, երբ կարդաք Եսայիա 13․1-11, 19-22, 14․1-20 հատվածները։ Կարող եք նաև մտածել նմանատիպ հարցերի շուրջ․

Եսայիայի նախազգուշացումները Բաբելոնին ինչո՞վ են նման Փրկիչի երկրորդ գալուստին ընդառաջ՝ աշխարհին ուղղված մարգարեություններին (տես Եսայիա 13․1-11, Վարդապետություն և Ուխտեր 45․26-42)։
Ի՞նչ նմանություններ եք տեսնում Բաբելոնի թագավորի հպարտության և սատանայի հպարտության միջև (տես Եսայիա 14․4-20, Մովսես 4․1-4)։ Ձեզ համար ի՞նչ նախազգուշացումներ եք գտնում այս հատվածներում:
Ինչպե՞ս է Փրկիչը «քեզ [հանգստացնում] քո աշխատութիւնիցը, քո տանջանքիցը»: (Եսայիա 14․3)։

He Comes Again to Rule and Reign [Նա գալիս է կրկին՝ ղեկավարելու և թագավորելու], Մերի Ռ․ Սաուեր

Եսայիա 24․21-23, 25․6-8, 26․19, 28․16

Եսայիայի գրվածքները ուղղորդում են մեզ դեպի Հիսուս Քրիստոսը

Եսայիայի ուսմունքները հիմնականում Փրկիչի առաքելության մասին են, այդ թվում՝ Նրա քավիչ զոհաբերության, հարության և երկրորդ գալուստի: Նրա առաքելության ո՞ր ոլորտներն եք հիշում, երբ կարդում եք հետևյալ հատվածները. Եսայիա 24․21-23, 25․6-8, 26․19, 28․16։ Ուրիշ ի՞նչ հատվածներ եք դուք գտնում, որոնք հիշեցնում են ձեզ Փրկիչի մասին:

Տես նաև Եսայիա 22.22-25:

Եսայիա 24․1-12, 28․7-8, 29․7-10, 30․8-14

Ուրացություն նշանակում է հեռանալ Տիրոջից և Նրա մարգարեներից

Որպեսզի զգուշացնի Տիրոջից հեռանալու և Նրա մարգարեներին մերժելու հետևանքների մասին, Եսայիան օգտագործել է տարբեր փոխաբերություններ։ Դրանցից են՝ դատարկ երկիրը (Եսայիա 24․1-12), գինեմոլությունը (Եսայիա 28․7-8), սովն ու ծարավը (Եսայիա 29․7-10), և պարսպի փլվածքը կամ փշրված խեցին (Եսայիա 30․8-14)։ Հիմնվելով այս հատվածներում ձեր կարդացածի վրա՝ ասեք, թե ինչո՞ւ է կարևոր պահել մեր ուխտերը։ Մտածեք, թե դուք ինչ եք անում, որպեսզի հավատարիմ մնաք Տիրոջը և Նրա ծառաներին։

Տես նաև Մ․ Ռասսել Բալլարդ, «Մնացեք նավակի մեջ և ամուր բռնած պահեք»։ Լիահոնա, նոյ. 2014, 89-92, Gospel Topics, “Apostasy,” topics.ChurchofJesusChrist.org։

Եսայիա 29, 30․18-26, 35

Տերը կարող է վերականգնել կորցրած կամ կոտրված բաները

Երբ մարդիկ կամ համայնքները հեռանում են Տիրոջից, սատանան ուզում է, որ մենք մտածենք, որ հետևանքներն անդառնալի են: Այնուամենայնիվ, Եսայիան նկարագրել է այն սքանչելի բաները, որոնք Տերը կանի, երբ մարդիկ ապաշխարեն և դիմեն Նրան: Ի՞նչ եք դուք սովորում Եսայիա 29․13-24, 30․18-26, 35 հատվածներից Տիրոջ մասին, Նրա սիրո և զորության մասին։

Մեր օրերում Տիրոջ զորության դրսևորման ձևերից մեկը ավետարանի վերականգնումն է: Եսայիա 29 գլխում կան մի քանի հատվածներ, որոնք զուգահեռներ են պարունակում վերականգնման իրադարձությունների հետ։ Օրինակ.

Համեմատեք Եսայիա 29․11-12-ը հետևյալ հատվածների հետ՝ 2 Նեփի 27․6-26 և Ջոզեֆ Սմիթ - Պատմություն 1․63-65։
Համեմատեք Եսայիա 29․13-14-ը հետևյալ հատվածների հետ՝ Վարդապետություն և Ուխտեր 4 և Ջոզեֆ Սմիթ - Պատմություն 1․17-19։
Համեմատեք Եսայիա 29․18-24-ը Մորմոնի Գրքի տիտղոսաթերթի հետ։

Այս հատվածները կարդալիս ի՞նչ մտքեր կամ տպավորություններ եք ունենում ավետարանի վերականգնման վերաբերյալ։

Տես նաև “The Restoration of the Fulness of the Gospel of Jesus Christ: A Bicentennial Proclamation to the World” (ChurchofJesusChrist.org)։

Նկար

ընտանեկան ուսումնասիրության պատկերակ

Գաղափարներ սուրբ գրությունների ընտանեկան ուսումնասիրության և ընտանեկան երեկոյի համար

Եսայիա 25․4-9։Ձեր ընտանիքը երբևէ ունեցե՞լ է փոթորիկի ժամանակ ապահով ապաստանի օրհնություն, կամ հովանի՝ ամռան շոգ օրը (տես հատված 4)։ Խոսեք այդ մասին, երբ կարդաք այս հատվածները և Տիրոջ մյուս նկարագրությունները, տրված Եսայիա 25․4-9-ում։ Ինչո՞վ է Տերը նման այս ամենին։

Եսայիա 25․8-9, 26․19։Ցույց տալով Փրկիչի նկարները Գեթսեմանիում, խաչի վրա և Հարությունից հետո, կօգնեք ձեր ընտանիքի անդամներին տեսնել այս հատվածների և Հիսուս Քրիստոսի միջև կապը (տես Ավետարանի պատկերագիրք, համարներ 56, 57, 58,59)։ Հրավիրեք ձեր ընտանիքի անդամներին կիսվել, թե ինչո՞ւ են նրանք «ցնծալու նորա փրկութիւնովը» (Եսայիա 25․9)։

Եսայիա 29․11-18։Այս հատվածները կօգնեն ձեր ընտանիքի անդամներին քննարկել «զարմանալի բաներ … և զարմանք» արտահայտությունը (հատված 14)՝ կապված ավետարանի վերականգնման և Մորմոնի Գրքի ի հայտ գալու հետ։ Այդ ամենն ինչո՞ւ է զարմանալի և զարմանք մեզ համար։ Հրավիրեք ձեր ընտանիքի անդամներին տանը գտնել այնպիսի առարկաներ, որոնք ներկայացնում են վերականգնման զարմանալի օրհնությունները։

Եսայիա 35։Ձեր ընտանիքին կարող է դուր գալ նկարել այս գլխի պատկերները, որոնք օգնում են մեզ հասկանալ, թե ինչպես է Հիսուս Քրիստոսը կառուցում Սիոնը մեր օրերում: Ի՞նչ ենք սովորում այս նկարներից։ Ի՞նչ կարող ենք անել, որպեսզի օգնենք կառուցել Սիոնը։

Երեխաներին ուսուցանելու լրացուցիչ գաղափարների համար տես այս շաբաթվա համառոտ շարադրանքը Եկ, հետևիր ինձ. Երեխաների միության համար ձեռնարկում:

Առաջարկվող երգ․ «Ոսկեփայլ գարնանը», Երեխաների երգարան, 57։

Բարելավել մեր ուսուցումը

Թույլ տվեք երեխաներին գործի դնել իրենց ստեղծագործելու ունակությունը։ Երբ երեխաները ավետարանի սկզբունքի հետ կապված ինչ-որ բան են ստեղծում, դա օգնում է նրանց ավելի լավ հասկանալ այդ սկզբունքը։ Թույլ տվեք նրանց կառուցել, նկարել, ներկել, գրել և ստեղծագործել։ (Տես Ուսուցանել Փրկիչի ձևով,25)։