« ថ្ងៃទី ១៨–២៤ ខែ ឧសភា ម៉ូសាយ ២៥–២៨ ៖ ‹ ពួកគេត្រូវបានហៅថា រាស្ត្រនៃព្រះ › » ចូរមកតាមខ្ញុំ—សម្រាប់ថ្នាក់អង្គការបឋមសិក្សា ៖ ព្រះគម្ពីរមរមន ឆ្នាំ ២០២០ ( ឆ្នាំ ២០២០ )

« ថ្ងៃទី ១៨–២៤ ខែ ឧសភា ម៉ូសាយ ២៥–២៨ » ចូរមកតាមខ្ញុំ—សម្រាប់ថ្នាក់អង្គការបឋមសិក្សា ៖ ឆ្នាំ ២០២០

ការប្រែចិត្តជឿរបស់អាលម៉ាជាកូន ដោយ ហ្គែរី អិល ខេប

ថ្ងៃទី ១៨–២៤ ខែ ឧសភា

ម៉ូសាយ ២៥–២៨

« ពួកគេត្រូវបានហៅថា រាស្ត្រនៃព្រះ »

ព្រះវរបិតាសួគ៌ជ្រាបដឹងនូវអ្វីដែលកុមារនៅក្នុងថ្នាក់របស់អ្នកត្រូវការដើម្បីរៀន និងរបៀបដើម្បីបង្រៀនពួកគេ ។ សូមស្វែងរកការណែនាំរបស់ទ្រង់នៅពេលអ្នកអាន ម៉ូសាយ ២៥–២៨ ហើយរំឭកអំពីមេរៀននេះ ។

កត់ត្រាចំណាប់អារម្មណ៍របស់អ្នក

អញ្ជើញឲ្យចែកចាយ

សូមបង្ហាញរូបភាពនៅក្នុង គម្រោងសប្ដាហ៍នេះ នៅក្នុង ចូរមកតាមខ្ញុំ—សម្រាប់បុគ្គលម្នាក់ៗ និងក្រុមគ្រួសារ ហើយសូមឲ្យកុមារចែកចាយអ្វីដែលកំពុងកើតឡើងនៅក្នុងរូបភាពនោះ ។ ប្រសិនបើកុមារដឹងរឿងអាលម៉ាជាកូន និងពួកបុត្រារបស់ម៉ូសាយ សូមឲ្យពួកគេចែកចាយអ្វីដែលពួកគេដឹង ។

បង្រៀនគោលលទ្ធិ ៖ កុមារតូចៗ

ម៉ូសាយ ២៦:៣០–៣១

ព្រះអម្ចាស់សព្វព្រះទ័យឲ្យខ្ញុំអត់ទោស ។

ព្រះអម្ចាស់បានបង្រៀនអាលម៉ាថា ទ្រង់អត់ទោសដោយសេរីដល់អ្នកដែលប្រែចិត្ត ។ យើងគួរធ្វើតាមគំរូរបស់ទ្រង់ តាមរយៈការអត់ទោសឲ្យអ្នកដែលមានអំពើបាបទាស់នឹងយើង ។

សកម្មភាពដែលអាចជ្រើសរើស

សូមអានឃ្លានេះឲ្យកុមារស្ដាប់ដកស្រង់ពី ម៉ូសាយ ២៦:៣១ ៖ « អ្នកក៏ត្រូវអត់ទោសឲ្យគ្នាទៅវិញទៅមក » ។ សូមឲ្យកុមារហាត់និយាយពាក្យ « ខ្ញុំអត់ទោសឲ្យអ្នក » ពីរបីដង ហើយស្វែងយល់ ប្រសិនបើពួកគេយល់ពីអត្ថន័យនៃការអត់ទោស ។ សូមចែកចាយបទពិសោធន៍មកពីជីវិតរបស់អ្នក ពេលអ្នកបានអត់ទោសឲ្យនរណាម្នាក់ ឬនរណាម្នាក់បានអត់ទោសឲ្យអ្នក ។
សូមជួយកុមារឲ្យដើរតួសម្ដែងការអត់ទោសឲ្យគ្នាទៅវិញទៅមក ។ សូមឲ្យកុមារម្នាក់ធ្វើពុតថា គាត់បានធ្វើអ្វីមួយដែលធ្វើឲ្យកុមារម្នាក់ទៀតឈឺចាប់ ឬអន់ចិត្ត ។ តើកុមារផ្សេងទៀតអាចនិយាយ ឬធ្វើអ្វីដើម្បីបង្ហាញការអត់ទោស ?
សូមអញ្ជើញកុមារឲ្យគូររូបមុខកើតទុក្ខនៅលើផ្នែកម្ខាងនៃក្រដាស ហើយមុខរីករាយនៅលើក្រដាសម្ខាងទៀត ។ សូមឲ្យពួកគេលើករូបមុខកើតទុក្ខឡើង អំឡុងពេលពួកគេប្រាប់អំពីបទពិសោធន៍មួយ ពេលបងប្អូនបង្កើត ឬមិត្តភក្តិរបស់ពួកគេធ្វើឲ្យពួកគេអន់ចិត្ត ។ សូមឲ្យពួកគេលើករូបមុខរីករាយឡើង អំឡុងពេលពួកគេប្រាប់អំពីរបៀបដែលពួកគេបានអត់ទោស ឬនឹងអត់ទោសដល់បុគ្គលនោះ ។

ម៉ូសាយ ២៧:៨–៣៧

ដំណឹងល្អជួយមនុស្សឲ្យផ្លាស់ប្តូរ និងក្លាយកាន់តែដូចជាព្រះយេស៊ូវ ។

ការប្រែចិត្តជឿរបស់អាលម៉ាជាកូន និងពួកបុត្រាស្តេចម៉ូសាយបង្ហាញអំពីចំណុចដែលថា ដោយសារព្រះយេស៊ូវគ្រីស្ទ និងដំណឹងល្អរបស់ទ្រង់ នោះមនុស្សគ្រប់រូបអាចផ្លាស់ប្តូរ ហើយក្លាយកាន់តែដូចជាទ្រង់ ។

សកម្មភាពដែលអាចជ្រើសរើស

សូមប្រាប់ដោយសង្ខេបអំពីការប្រែចិត្តជឿរបស់អាលម៉ាជាកូន និងពួកបុត្រាស្តេចម៉ូសាយ ដូចបានពិពណ៌នានៅក្នុង ម៉ូសាយ ២៧:៨–៣៧ ។ ដើម្បីជាជំនួយ សូមមើល « ជំពូកទី ១៨ ៖ អាលម៉ាជាកូនប្រែចិត្ត » ( ដំណើររឿងព្រះគម្ពីរមរមន ទំព័រ ៨០–៨៥ ឬមើលវីដេអូដូចគ្នានេះនៅគេហទំព័រ ChurchofJesusChrist.org ) ។ បន្ទាប់មកប្រាប់រឿងនោះម្តងទៀត ដោយអនុញ្ញាតឲ្យកុមារចែកចាយពីសេចក្ដីលម្អិតដែលពួកគេចងចាំ ។ សូមឲ្យពួកគេដើរតួសម្តែងរឿងនោះ ហើយជួយពួកគេឲ្យឃើញពីភាពខុសគ្នារវាងលក្ខណៈដែលអាលម៉ា និងពួកបុត្រាស្តេចម៉ូសាយមាន ពីមុនពួកគេបានប្រែចិត្ត និងក្រោយពីពួកគេបានប្រែចិត្ត ។
សូមជួយកុមារឲ្យប្រើប្រាស់ទំព័រសកម្មភាពនាសប្ដាហ៍នេះ ដើម្បីប្រាប់រឿងរបស់អាលម៉ា និងពួកបុត្រាស្តេចម៉ូសាយ ។ សូមអាន ម៉ូសាយ ២៧:២៤ ហើយជួយកុមារឲ្យយល់ថា អាលម៉ា និងពួកបុត្រាស្តេចម៉ូសាយផ្លាស់ប្តូរ ដោយសារពួកគេបានប្រែចិត្តពីអំពើបាបរបស់ពួកគេ ហើយបានទទួលយកដំណឹងល្អនៃព្រះយេស៊ូវគ្រីស្ទ ។

ឪពុកលោកបានរីករាយ ដោយ វ៉លធើរ រ៉េន

ម៉ូសាយ ២៨:១–៨

ខ្ញុំអាចចែកចាយដំណឹងល្អ ។

បន្ទាប់ពីការប្រែចិត្តជឿរបស់ពួកគេមក ពួកបុត្រាសេ្ដចម៉ូសាយមានចិត្តចង់ចែកចាយដំណឹងល្អជាមួយមនុស្សគ្រប់រូប រួមទាំងសត្រូវរបស់ពួកគេគឺពួកសាសន៍លេមិនផងដែរ ។

សកម្មភាពដែលអាចជ្រើសរើស

សូមប្រើ ម៉ូសាយ ២៨:១–៨ ដើម្បីប្រាប់កុមារអំពីពួកបុត្រាស្តេចម៉ូសាយ ដែលសម្រេចចិត្តប្រកាសដំណឹងល្អដល់ពួកសាសន៍លេមិន ។ ដើម្បីជាជំនួយ សូមមើល « ជំពូកទី ១៩ ៖ ពួកបុត្រានៃម៉ូសាយក្លាយជាអ្នកផ្សព្វផ្សាយសាសនា » ( ដំណើររឿងព្រះគម្ពីរមរមន ទំព័រ ៨៦ ឬមើលវីដេអូដូចគ្នានេះនៅគេហទំព័រ ChurchofJesusChrist.org ) ។ ហេតុអ្វីពួកគេចង់ចែកចាយដំណឹងល្អ ? ( សូមមើល ខទី ៣ ) ។
សូមជួយឲ្យកុមារគិតអំពីនរណាម្នាក់ដែលត្រូវការស្គាល់ដំណឹងល្អបន្ថែមទៀត ។ សូមជួយកុមារឲ្យដាក់ផែនការនូវអ្វីដែលពួកគេនឹងនិយាយទៅកាន់មនុស្សដែលពួកគេគិតដល់នោះ ។
សូមច្រៀងចម្រៀងមួយបទជាមួយគ្នាអំពីការចែកចាយដំណឹងល្អ ដូចជាបទ « ខ្ញុំចង់ក្លាយជាអ្នកផ្សាយសាសនាពេលនេះ » ( សៀវភៅចម្រៀងកុមារ ទំព័រ ៩០ ) ។ សូមចង្អុលបង្ហាញឃ្លានានានៅក្នុងចម្រៀង ដែលផ្តល់ជាយោបល់អំពីរបៀបដែលយើងអាចចែកចាយដំណឹងល្អជាមួយមនុស្សដទៃ ។

បង្រៀនគោលលទ្ធិ ៖ កុមារធំៗ

ម៉ូសាយ ២៦:២២–២៣, ២៩–៣០; ២៧:៨–៣៧

ព្រះអត់ទោសដល់អ្នកដែលប្រែចិត្តដោយសេរី ។

ប្រសិនបើនរណាម្នាក់នៅក្នុងថ្នាក់របស់អ្នកឆ្ងល់ថា តើគាត់ពិតជាអាចត្រូវបានអត់ទោសឲ្យឬអត់នោះ នោះព្រះបន្ទូលរបស់ព្រះទៅកាន់អាលម៉ាជាឪពុក និងបទពិសោធន៍នៃអាលម៉ាជាកូនអាចជួយបាន ។

សកម្មភាពដែលអាចជ្រើសរើស

សូមឲ្យកុមារធ្វើពុតជានិយាយជាមួយនរណាម្នាក់ ដែលគិតថា ព្រះនឹងពុំអត់ទោសឲ្យគាត់ឡើយ ។ សូមអញ្ជើញពួកគេឲ្យរំឭកព្រះបន្ទូលរបស់ព្រះទៅកាន់អាលម៉ាជាឪពុកនៅក្នុង ម៉ូសាយ ២៦:២២–២៣, ២៩–៣០ ។ តើពួកគេរកឃើញអ្វីខ្លះ ដែលនឹងជួយបុគ្គលនោះ ?
ពីមុនចាប់ផ្តើមថ្នាក់ សូមឲ្យកុមារម្នាក់អានអំពីការប្រែចិត្តជឿរបស់អាលម៉ាជាកូន ដែលមាននៅក្នុង ម៉ូសាយ ២៧:៨–៣៧ ហើយមកថ្នាក់រៀនដោយរៀបចំខ្លួន ដើម្បីប្រាប់រឿងនោះដល់សិស្សក្នុងថ្នាក់ ដូចរូបគាត់ជាអាលម៉ាកូនដែរ ។ ( ប្រសិនបើចាំបាច់ សូមផ្តល់យោបល់ថា គាត់អាចសូមជំនួយពីឪពុកម្តាយបាន ) ។ នៅពេលកុមារប្រាប់រឿងនោះ សូមសួរសំណួរដូចជា « តើប្អូនមានអារម្មណ៍បែបណា នៅពេល … ? » ឬ « តើមានអ្វីបានកើតឡើងបន្ទាប់ទៀត ? »
សូមអញ្ជើញកុមារឲ្យធ្វើបញ្ជីពាក្យមួយមកពី ម៉ូសាយ ២៧:៨–១០ ដែលពិពណ៌នានូវលក្ខណៈដែលអាលម៉ា និងពួកបុត្រានៃម៉ូសាយមានពីមុនការប្រែចិត្តជឿរបស់ពួកគេ ។ បន្ទាប់មក សូមឲ្យពួកគេធ្វើបញ្ជីមួយផ្សេងទៀតមកពី ម៉ូសាយ ២៧:៣២–៣៧ ដែលពិពណ៌នាអំពីលក្ខណៈដែលពួកគេមានបន្ទាប់ពីការប្រែចិត្តជឿរបស់ពួកគេ ។ យោងទៅតាម ខទី ២៤–២៩ តើមានអ្វីដែលបានបណ្តាលឲ្យមានការផ្លាស់ប្តូរដ៏ធំនេះនៅក្នុងអាលម៉ា ?

ម៉ូសាយ ២៦:២៩–៣១

ដើម្បីទទួលបានការអត់ទោស នោះខ្ញុំត្រូវតែអត់ទោសឲ្យគេ ។

សូមជួយកុមារឲ្យឃើញទំនាក់ទំនងរវាងការអត់ទោសដែលពួកគេផ្តល់ដល់អ្នកដទៃ និងការអត់ទោសដែលពួកគេសង្ឃឹមចង់បានសម្រាប់ខ្លួនពួកគេ ។

សកម្មភាពដែលអាចជ្រើសរើស

សូមអញ្ជើញកុមារឲ្យអាន ម៉ូសាយ ២៦:២៩–៣១ និងរាប់ថា តើមានពាក្យ « អត់ទោស » ប៉ុន្មានដែលមាននៅក្នុងនោះ ។ តើខគម្ពីរទាំងនេះបង្រៀនយើងអ្វីខ្លះអំពីការអត់ទោសដល់មនុស្សដទៃ ? តើការអត់ទោសជួយដល់បុគ្គលដែលធ្វើខុស និងបុគ្គលដែលអត់ទោសឲ្យគេយ៉ាងដូចម្តេច ?
សូមឲ្យកុមារគូររូបស្ពាននៅលើក្តារខៀន ហើយចែកចាយសេចក្តីថ្លែងការណ៍នេះដែលដកស្រង់ដោយប្រធាន ថូម៉ាស អេស ម៉នសុន ៖ « អ្នកដែលពុំអាចអត់ទោសឲ្យអ្នកដទៃបាន បំបាក់ស្ពានដែលគាត់ផ្ទាល់ត្រូវឆ្លង ប្រសិនបើគាត់ត្រូវទៅដល់ស្ថានសួគ៌ ដ្បិតបុគ្គលម្នាក់ៗត្រូវការការអត់ទោស » ( George Herbert បានដកស្រង់នៅក្នុង « Hidden Wedges » Ensign ខែ ឧសភា ឆ្នាំ ២០០២ ទំព័រ ១៩ ) ។ សូមលុបផ្នែកនៃស្ពាន ហើយសូមឲ្យកុមារជួយសាងសង់ស្ពាននោះឡើងវិញ មួយបំណែកម្តងៗ នៅពេលពួកគេចែកចាយវិធីដែលពួកគេអាចផ្តល់ការអត់ទោសដល់មនុស្សដទៃ ។ សូមឲ្យពួកគេគិតអំពីនរណាម្នាក់ ដែលពួកគេត្រូវអត់ទោសឲ្យ ។

ម៉ូសាយ ២៧:៨–២៤

ខ្ញុំអាចអធិស្ឋាន ហើយតមអាហារទៅកាន់ព្រះ ដើម្បីផ្តល់ពរដល់អ្នកដែលខ្ញុំស្រឡាញ់ ។

សូមពិចារណាអំពីរបៀបដែលអ្នកអាចជួយកុមារឲ្យយល់ថា ការតមអាហារអាចពង្រឹងសេចក្តីជំនឿរបស់យើង នៅពេលយើងអធិស្ឋានសម្រាប់មនុស្សដែលពួកគេស្រឡាញ់ ។

សកម្មភាពដែលអាចជ្រើសរើស

សូមអាន ម៉ូសាយ ២៧:៨–២៤ ជាមួយគ្នា ហើយសូមឲ្យកុមារស្វែងរកអ្វីដែលអាលម៉ា និងប្រជាជនរបស់លោកបានធ្វើ ដើម្បីជួយអាលម៉ាជាកូន ។ សូមចែកចាយបទពិសោធន៍មួយ ដែលអ្នកបានតមអាហារ ហើយអធិស្ឋានសម្រាប់នរណាម្នាក់ ហើយលើកទឹកចិត្តកុមារឲ្យចែកចាយបទពិសោធន៍ផ្ទាល់របស់ពួកគេ ។
សូមអញ្ជើញកុមារឲ្យគិតអំពីនរណាម្នាក់ដែលពួកគេស្គាល់ ដែលត្រូវការជំនួយពីព្រះនៅក្នុងជីវិតរបស់គាត់ ។ សូមថ្លែងទីបន្ទាល់របស់អ្នកថា កុមារអាចអធិស្ឋាន និងតមអាហារដោយសេចក្ដីជំនឿដើម្បីទូលសូមព្រះឲ្យផ្តល់ពរដល់បុគ្គលនេះ ។ សូមអញ្ជើញកុមារឲ្យអធិស្ឋានសម្រាប់បុគ្គលដែលពួកគេបានគិតដល់នោះ ហើយប្រសិនបើអាច សូមតមអាហារសម្រាប់ពួកគេផងដែរ ។

លើកទឹកចិត្តឲ្យមានការរៀនសូត្រនៅឯគេហដ្ឋាន

សូមឲ្យកុមាររើសយកអ្វីមួយ ដែលពួកគេបានរៀនមកពីបទពិសោធន៍របស់អាលម៉ាជាកូន និងពួកបុត្រានៃម៉ូសាយ ដែលពួកគេចង់ចែកចាយជាមួយគ្រួសារពួកគេ ។

ការកែលម្អការបង្រៀនរបស់យើង

គាំទ្រដល់ឪពុកម្តាយ ។ « ឪពុកម្ដាយគឺជាគ្រូបង្រៀនដំណឹងល្អដ៏សំខាន់បំផុតសម្រាប់កូនចៅរបស់ពួកគេ—ពួកគេមានទាំងការទទួលខុសត្រូវជាចម្បង និងអំណាចដ៏អស្ចារ្យក្នុងការមានឥទ្ធិពលទៅលើកូនចៅរបស់ពួកគេ ( សូមមើល ចោទិយកថា ៦:៦–៧ ) ។ ពេលអ្នកបង្រៀនកុមារនៅឯព្រះវិហារ សូមអធិស្ឋានស្វែងរករបៀបគាំទ្រដល់ឪពុកម្ដាយរបស់ពួកគេ » ( ការបង្រៀនតាមរបៀបរបស់ព្រះអង្គសង្គ្រោះ ទំព័រ ២៥ ) ។

ទំព័រសកម្មភាព ៖ ដំណឹងល្អជួយយើងឲ្យប្រែក្លាយដូចជាព្រះយេស៊ូវគ្រីស្ទ