« ថ្ងៃទី ២៤–៣០ ខែ មិថុនា ។ ម៉ាថាយ ២៨, ម៉ាកុស ១៦, លូកា ២៤, យ៉ូហាន ២០–២១ ៖ ‹ ទ្រង់មានព្រះជន្មរស់ឡើងវិញហើយ › » ចូរមកតាមខ្ញុំ—សម្រាប់ថ្នាក់បឋមសិក្សា ៖ ព្រះគម្ពីរសញ្ញាថ្មី ឆ្នាំ ២០១៩ ( ២០១៩ )
« ថ្ងៃទី ២៤–៣០ ខែ មិថុនា ។ ម៉ាថាយ ២៨, ម៉ាកុស ១៦, លូកា ២៤, យ៉ូហាន ២០–២១ » ចូរមកតាមខ្ញុំ—សម្រាប់ថ្នាក់បឋមសិក្សា ៖ ឆ្នាំ ២០១៩
ចម្អែតចៀមរបស់ខ្ញុំ ដោយ ខាមីល ខូរី
ថ្ងៃទី ២៤–៣០ ខែ មិថុនា
ម៉ាថាយ ២៨; ម៉ាកុស ១៦; លូកា ២៤; យ៉ូហាន ២០–២១
« ទ្រង់មានព្រះជន្មរស់ឡើងវិញហើយ »
សូមចាប់ផ្ដើមការរៀបចំមេរៀនរបស់អ្នកដោយការអាន ម៉ាថាយ ២៨; ម៉ាកុស ១៦; លូកា ២៤ និង យ៉ូហាន ២០–២១ ។ ចូរមកតាមខ្ញុំ—សម្រាប់បុគ្គល និងក្រុមគ្រួសារ និងគម្រោងមេរៀននេះអាចជួយអ្នកឲ្យជ្រើសរើសគោលការណ៍ពីក្នុងជំពូកទាំងនេះ ដែលមានអត្ថន័យសម្រាប់កុមារនៅក្នុងថ្នាក់របស់អ្នក ។
កត់ត្រាចំណាប់អារម្មណ៍របស់អ្នក
អញ្ជើញឲ្យចែកចាយ
ការមើលរូបភាពមួយអាចជួយកុមារឲ្យចងចាំរឿងដែលពួកគេបានរៀននៅផ្ទះ ឬនៅក្នុងមជ្ឈដ្ឋានផ្សេងទៀត ។ ប្រហែលអ្នកអាចបង្ហាញរូបភាពនៅក្នុង គម្រោងសប្ដាហ៍នេះ នៅក្នុង ចូរមកតាមខ្ញុំ—សម្រាប់បុគ្គល និងក្រុមគ្រួសារ ហើយសូមឲ្យកុមារចែកចាយអ្វីដែលពួកគេដឹងអំពីរឿងដែលមាននៅក្នុងរូបភាពនេះ ។
បង្រៀនគោលលទ្ធិ
កុមារតូចៗ
ម៉ាថាយ ២៨; ម៉ាកុស ១៦; លូកា ២៤; យ៉ូហាន ២០:១–២៣
ខ្ញុំនឹងរស់នៅម្ដងទៀត បន្ទាប់ពីខ្ញុំស្លាប់ទៅ គឺដូចព្រះយេស៊ូវបានរស់ឡើងវិញដែរ ។
ដង្វាយធួនរបស់ព្រះយេស៊ូវគ្រីស្ទ រួមទាំងការរស់ឡើងវិញរបស់ទ្រង់ផង គឺជាព្រឹត្តិការណ៍ដ៏សំខាន់បំផុតនៅក្នុងប្រវត្តិសាស្ដ្រ ហើយវាគឺជាមូលដ្ឋានគ្រឹះនៃសេចក្ដីជំនឿរបស់ពួកគ្រីស្ទាន ។ ពេលអ្នកអានអំពីការរស់ឡើងវិញ សូមសញ្ជឹងគិតអំពីរបៀបដែលអ្នកនឹងជួយដល់កុមារឲ្យស្ថាបនាសេចក្ដីជំនឿរបស់ពួកគេលើព្រះយេស៊ូវ ។
សកម្មភាពដែលអាចជ្រើសរើស
-
សូមប្រាប់ពីដំណើររឿងនៃការរស់ឡើងវិញរបស់ព្រះយេស៊ូវជាសម្ដីរបស់អ្នក ។ សូមឲ្យកុមារប្ដូរវេនគ្នាតំណាលរឿងនេះសារឡើងវិញប្រាប់អ្នកវិញ ។ អ្នកអាចប្រើ « ជំពូកទី ៥៤ ៖ ព្រះយេស៊ូវរស់ឡើងវិញ » រឿងព្រះគម្ពីរសញ្ញាថ្មី ទំព័រ ១៣៩–៤៤ ឬវីដេអូដូចគ្នានេះ ( LDS.org ) ។ សូមពន្យល់ថា នៅពេលដែលព្រះយេស៊ូវបានសុគត នោះវិញ្ញាណរបស់ទ្រង់បានចាកចេញពីព្រះកាយរបស់ទ្រង់ ។ នៅពេលទ្រង់បានរស់ឡើងវិញ នោះវិញ្ញាណនិងរូបកាយរបស់ទ្រង់បានរួបរួមគ្នាឡើងវិញម្ដងទៀត ។
-
សូមឲ្យសមាជិកវួដបីបួននាក់មកសម្ដែងជាពួកទាហាន ពួកទេវតា ម៉ារាជាអ្នកស្រុកម៉ាក់ដាឡា ពេត្រុស យ៉ូហាន ពួកសិស្ស និងថូម៉ាស ហើយសូមប្រាប់អ្វីដែលពួកគេបានធ្វើជាសាក្សីបន្ទាប់ពីការរស់ឡើងវិញរបស់ព្រះយេស៊ូវ ។
-
សូមបង្ហាញវីដេអូ « What Happens after We Die ? » ( LDS.org ) ហើយសូមប្រាប់អំពីនរណាម្នាក់ដែលអ្នកស្គាល់ ដែលបានស្លាប់ទៅហើយ ។ សូមចែកចាយទីបន្ទាល់របស់អ្នកថា មនុស្សគ្រប់រូបនឹងត្រូវរស់ឡើងវិញនៅថ្ងៃណាមួយ ។ សូមអញ្ជើញកុមារឲ្យចែកចាយទីបន្ទាល់របស់ពួកគេ ។
-
សូមច្រៀងជាមួយនឹងកុមារបទ « តើព្រះយេស៊ូវរស់ឡើងវិញឬ ? » និង « ពេលទ្រង់យាងមកម្ដងទៀត » សៀវភៅចម្រៀងកុមារ ទំព័រ ៤៥, ៤៦ ។ សូមឲ្យកុមារស្រមៃពីអារម្មណ៍របស់គេដែលនឹងមានពេលឃើញព្រះយេស៊ូវបានរស់ឡើងវិញ ។ សូមឲ្យពួកគេចែកចាយគំនិតរបស់ពួកគេជាមួយនឹងសិស្សនៅក្នុងថ្នាក់ ។
ខ្ញុំអាចមានសេចក្ដីជំនឿទៅលើព្រះយេស៊ូវគ្រីស្ទ ទោះបីជាខ្ញុំមិនបានឃើញទ្រង់ក្ដី ។
សូមពិចារណាពីរបៀបដែលអ្នកអាចជួយកុមារឲ្យយល់ពីអត្ថន័យនៃសេចក្ដីជំនឿ និងពីរបៀបដែលពួកគេអាចអនុវត្តសេចក្ដីជំនឿទៅលើព្រះអង្គសង្គ្រោះ ។
សកម្មភាពដែលអាចជ្រើសរើស
-
សូមបង្ហាញរូបភាព ព្រះគ្រីស្ទមកឯថូម៉ាស ( LDS.org ) ខណៈអ្នកប្រាប់អំពីបទពិសោធន៍របស់ថូម៉ាសនៅក្នុង យ៉ូហាន ២០:២៤–២៩ ។ សូមតំណាលរឿងនេះម្ដងទៀតនៅពេលក្រោយក្នុងមេរៀននេះ ប៉ុន្ដែលើកនេះសូមឲ្យកុមារផ្ដល់នូវសេចក្ដីលម្អិតមួយចំនួន ។
-
សូមបង្ហាញប្រអប់មួយដែលមានរបស់របរនៅក្នុងនោះ ដែលកុមារមិនអាចមើលឃើញ ហើយសូមពិពណ៌នាពីរបស់របរនោះប្រាប់កុមារ ។ សូមសួរកុមារប្រសិនបើពួកគេជឿថាពិតជាមានរបស់របរនៅក្នុងប្រអប់នោះមែន និងឲ្យគេប្រាប់ពីមូលហេតុ ។ រួចមកសូមបង្ហាញរបស់នោះ ហើយពន្យល់ថា សេចក្ដីជំនឿគឺជាការជឿទៅលើអ្វីមួយដែលយើងមិនអាចមើលឃើញ ។ សេចក្តីជំនឿដ៏សំខាន់បំផុតដែលយើងអាចមានគឺការមានសេចក្ដីជំនឿទៅលើព្រះយេស៊ូវគ្រីស្ទ ។
ចូរមកមើលព្រះហស្តយើងចុះ ដោយ ចេហ្វ វួដ
ខ្ញុំអាចបង្ហាញសេចក្ដីស្រឡាញ់របស់ខ្ញុំចំពោះព្រះយេស៊ូវដោយការបម្រើដល់មនុស្សដទៃ ។
តើអ្នកអាចបំផុសគំនិតដល់កុមារឲ្យស្រឡាញ់ និងជួយដល់អស់អ្នកដែលនៅជុំវិញខ្លួនគេដោយរបៀបណា ?
សកម្មភាពដែលអាចជ្រើសរើស
-
សូមអាន យ៉ូហាន ២១:១៥–១៧ ឬសូមបង្ហាញវីដេអូ « ចម្អែតចៀមរបស់ខ្ញុំ » ( LDS.org ) ។ ព្រះយេស៊ូវមិនបានសព្វព្រះទ័យឲ្យពេត្រុសចំណាយពេលរបស់លោកទាំងអស់ចាប់ត្រីនោះទេ ។ ផ្ទុយទៅវិញ ទ្រង់បានសព្វព្រះទ័យឲ្យពេត្រុសទៅចែកចាយដំណឹងល្អ ហើយអញ្ជើញមនុស្សគ្រប់រូបឲ្យមករកទ្រង់ ។ សូមឲ្យក្រដាសរាងកូនចៀមមួយដល់កុមារម្នាក់ៗ ហើយសូមឲ្យពួកគេសរសេរនៅលើក្រដាសនោះនូវឧបសគ្គមួយដែលពួកគេអាចធ្វើដើម្បីជួយចម្អែតកូនចៀមរបស់ព្រះយេស៊ូវ ។
-
សូមស្នើជាមុនឲ្យកុមារបីបួននាក់ចែកចាយរឿងដែលពួកគេកំពុងធ្វើដើម្បីស្រឡាញ់ និងបម្រើដល់មនុស្សដទៃ ឬរបៀបដែលមនុស្សដទៃបានបម្រើដល់ពួកគេ ។
-
សូមសរសេរឈ្មោះកុមារគ្រប់រូបនៅក្នុងថ្នាក់របស់អ្នកនៅលើក្រដាសមួយសន្លឹក ដែលកាត់ជារាងកូនចៀម ហើយពង្រាយកូនចៀមទាំងនេះជុំវិញថ្នាក់ ។ ( រួមទាំងឈ្មោះរបស់កុមារមួយចំនួនដែលមិនបានចូលរួមទៀងទាត់ផង ) ។ សូមឲ្យកុមារប្រមូលកូនចៀមដោយការស្វែងរកកូនចៀមមួយដោយមានឈ្មោះរបស់ពួកគេនៅលើនោះ ។ តើយើងអាចធ្វើអ្វីខ្លះដើម្បីបម្រើដល់កូនចៀមដែលបាត់មួយចំនួនដែលយើងអាចស្គាល់ ?
បង្រៀនគោលលទ្ធិ
កុមារធំៗ
ម៉ាថាយ ២៨; ម៉ាកុស ១៦; លូកា ២៤; យ៉ូហាន ២០:១–២៣
ដោយសារតែព្រះយេស៊ូវបានមានព្រះជន្មរស់ឡើងវិញ នោះមនុស្សគ្រប់រូបនឹងរស់នៅម្ដងទៀត ។
វាជាការធម្មតាដែលកុមារឆ្ងល់ពីអ្វីដែលនឹងកើតឡើងបន្ទាប់ពីយើងស្លាប់ទៅ ។ សូមពិចារណាពីរបៀបដែលអ្នកអាចបង្រៀនអំពីការរស់ឡើងវិញតាមរបៀបមួយដែលនឹងស្ថាបនាសេចក្ដីជំនឿរបស់ពួកគេ ។
សកម្មភាពដែលអាចជ្រើសរើស
-
សូមឲ្យកុមារបិទភ្នែករបស់ពួកគេ ហើយស្រមៃថា ពួកគេកំពុងអង្គុយនៅក្បែរផ្នូរបស់ព្រះយេស៊ូវ កាលអ្នកអានក្នុង យ៉ូហាន ២០:១–១៧ ឬ សូមសង្ខេបសាច់រឿងការរស់ឡើងវិញរបស់ទ្រង់ ( សូមមើលផងដែរ « ជំពូកទី ៥៤ ៖ ព្រះយេស៊ូវរស់ឡើងវិញ » រឿងព្រះគម្ពីរសញ្ញាថ្មី ទំព័រ ១៣៩–៤៤ ឬវីដេអូដូចគ្នានេះនៅលើ LDS.org ) ។ តើវានឹងមានសភាពដូចម្ដេចដែលបានឃើញព្រះអង្គសង្គ្រោះមានព្រះជន្មរស់ឡើងវិញនោះ ?
-
សូមឲ្យកុមារម្នាក់ៗសិក្សាពីបទពិសោធន៍របស់នរណាម្នាក់ដែលបានឃើញព្រះអង្គសង្គ្រោះដែលមានព្រះជន្មរស់ឡើងវិញ ហើយចែកចាយដល់កុមារក្នុងថ្នាក់នូវអ្វីដែលគេបានរៀន ។
-
សូមមើលវីដេអូទាំងនេះមួយ ឬច្រើនជាមួយនឹងកុមារ ៖ « Jesus Is Laid in a Tomb » , « Jesus Is Resurrected » , « Christ Appears on the Road to Emmaus » និង« The Risen Lord Appears to the Apostles » ( LDS.org ) ។
ខ្ញុំអាចមានសេចក្ដីជំនឿទៅលើព្រះយេស៊ូវគ្រីស្ទ ទោះបីជាខ្ញុំមិនបានឃើញទ្រង់ក្ដី ។
តើកុមារដែលអ្នកបង្រៀនត្រូវធ្វើអ្វីដើម្បីពង្រឹងសេចក្ដីជំនឿរបស់ពួកគេទៅលើព្រះយេស៊ូវគ្រីស្ទ ? តើអ្នកអាចជួយពួកគេដោយរបៀបណា ?
សកម្មភាពដែលអាចជ្រើសរើស
-
សូមឲ្យសិស្សពីរបីនាក់ប្ដូរវេនគ្នាអានខគម្ពីរក្នុង យ៉ូហាន ២០:២៤–២៩ ។ ( សូមមើលវីដេអូ « មានពរហើយ អ្នកណាដែលជឿឥតឃើញសោះ » ផងដែរនៅលើគេហទំព័រ LDS.org ) ។
-
សូមសរសេរពាក្យនីមួយៗក្នុងឃ្លា « មានពរហើយ អ្នកណាដែលជឿឥតឃើញសោះ » នៅលើក្រដាសដាច់ដោយឡែកពីគ្នា ។ សូមអញ្ជើញកុមារឲ្យតម្រៀបពាក្យទាំងនេះតាមលំដាប់លំដោយ ។ សូមឲ្យពួកគេប្រាប់ពីបទពិសោធន៍នានាដែលពួកគេបានមានអារម្មណ៍ពីសេចក្ដីស្រឡាញ់របស់ព្រះអង្គសង្គ្រោះ ទោះបីជាពួកគេមិនបានឃើញទ្រង់ក្ដី ។
-
សូមឲ្យកុមារគូររូបភាពអ្វីៗដែលពួកគេអាចធ្វើដើម្បីពង្រឹងដល់សេចក្ដីជំនឿរបស់ពួកគេ ។ កាលពួកគេគូររូប សូមចែកចាយអ្វីដែលអ្នកបានធ្វើដើម្បីពង្រឹងសេចក្ដីជំនឿរបស់អ្នកទៅលើព្រះយេស៊ូវគ្រីស្ទ ។
ខ្ញុំអាចបង្ហាញសេចក្ដីស្រឡាញ់របស់ខ្ញុំចំពោះព្រះយេស៊ូវដោយការចម្អែតចៀមរបស់ទ្រង់ ។
កុមារអាចមានឥទ្ធិពលដ៏អស្ចារ្យទៅលើអស់អ្នកដែលនៅជុំវិញពួកគេ ។ តើអ្នកអាចលើកទឹកចិត្តពួកគេឲ្យពង្រឹងដល់មនុស្សដទៃនៅក្នុងដំណឹងល្អដោយរបៀបណា ?
សកម្មភាពដែលអាចជ្រើសរើស
-
ពីមុនអ្នកអាន យ៉ូហាន ២១:១–១៧ រួមគ្នា សូមសួរកុមារថា តើពួកគេធ្លាប់បានទៅស្ទូចត្រីពីមុនមកទេ ។ តើវាមានសភាពដូចម្ដេច ? សូមសួរ ប្រសិនបើនរណាម្នាក់ធ្លាប់ចាប់បាន « ត្រីសន្ធឹកណាស់ » ( យ៉ូហាន ២១:៦ ) ។
-
សូមអាន យ៉ូហាន ២១:១៥–១៧ ប៉ុន្ដែសូមជំនួសឈ្មោះរបស់ស៊ីម៉ូន ដោយឈ្មោះរបស់កុមារវិញ ។ តើនរណាគឺជាចៀមរបស់ព្រះយេស៊ូវ ? តើយើងអាចចម្អែតចៀមរបស់ទ្រង់ដោយរបៀបណា ?
-
សូមចែកនំមួយជាមួយនឹងកុមារ ។ កាលពួកគេកំពុងញ៉ាំនំនោះ សូមសួរពួកគេថា តើការចែកចាយដំណឹងល្អដល់នរណាម្នាក់គឺដូចជាការចម្អែតពួកគេដោយរបៀបណា ។
លើកទឹកចិត្តឲ្យរៀនសូត្រនៅផ្ទះ
សូមឲ្យកុមារប្រើទំព័រសកម្មភាពសប្ដាហ៍នេះដើម្បីបង្រៀនដល់គ្រួសាររបស់ពួកគេអំពីសប្ដាហ៍ចុងក្រោយនៃព្រះជន្មរបស់ព្រះអង្គសង្គ្រោះ ។
កែលម្អការបង្រៀនរបស់យើង
សូមតាមដានការអញ្ជើញដើម្បីធ្វើសកម្មភាព ។ នៅពេលអ្នកអញ្ជើញឲ្យកុមារធ្វើសកម្មភាពលើអ្វីដែលពួកគេកំពុងរៀន សូមតាមដានការអញ្ជើញរបស់អ្នកពេលបង្រៀនលើកក្រោយ ។ ការណ៍នេះបង្ហាញដល់កុមារថា អ្នកយកចិត្តទុកដាក់អំពីរបៀបដែលដំណឹងល្អប្រទានពរដល់ជីវិតរបស់ពួកគេ ។ កាលពួកគេចែកចាយបទពិសោធន៍របស់ពួកគេ នោះពួកគេនឹងត្រូវបានពង្រឹងឡើង ហើយនឹងជួយដល់គ្នាទៅវិញទៅមកឲ្យរស់នៅតាមដំណឹងល្អ ។