« ថ្ងៃទី ២១–២៧ ខែ មីនា ។ និក្ខមនំ ១-៦ ៖ ‹ អញបានរំឮកដល់សេចក្តីសញ្ញារបស់អញ › » ចូរមកតាមខ្ញុំ—សម្រាប់ថ្នាក់អង្គការបឋមសិក្សា ៖ ព្រះគម្ពីរសញ្ញាចាស់ឆ្នាំ ២០២២ ( ឆ្នាំ ២០២១ )

« ថ្ងៃទី ២១–២៧ ខែ មីនា ។ និក្ខមនំ ១–៦ » ចូរមកតាមខ្ញុំ—សម្រាប់ថ្នាក់អង្គការបឋមសិក្សា ៖ ឆ្នាំ ២០២២

ម៉ូសេ និងគុម្ពបន្លាដែលមានភ្លើងឆេះ ដោយ ហារី អាន់ឌើរសិន

ថ្ងៃទី ២១–២៧ ខែ មីនា

និក្ខមនំ ១–៦

« អញបានរំឮកដល់សេចក្តីសញ្ញារបស់អញ »

សូមចាប់ផ្ដើមការបង្រៀនរបស់បងប្អូនដោយការអាន និក្ខមនំ ១–៦ ។ គម្រោងមេរៀនសប្ដាហ៍នេះ នៅក្នុង ចូរមកតាមខ្ញុំ—សម្រាប់បុគ្គល និងក្រុមគ្រួសារ អាចជួយបងប្អូនយល់អំពីជំពូកទាំងនេះ ហើយគម្រោងមេរៀននេះអាចផ្ដល់នូវគំនិតបង្រៀននានាដល់បងប្អូន ។

កត់ត្រាចំណាប់អារម្មណ៍របស់បងប្អូន

អញ្ជើញឲ្យចែកចាយ

បង្ហាញវត្ថុបីបួន ដែលទាក់ទងនឹងរឿងនៅក្នុងជំពូកនេះ—ឧទាហរណ៍ កញ្រ្ចែងធំ ឬតុក្តតាទារក ។ សូមអញ្ជើញកុមារឲ្យប្រើវត្ថុទាំងនោះដើម្បីចែកចាយនូវផ្នែកនានាដែលពួកគេចូលចិត្តនៅក្នុងរឿងរបស់ម៉ូសេ ។

បង្រៀនគោលលទ្ធិ ៖ កុមារតូចៗ

និក្ខមនំ ១–២

ទ្រង់អាចធ្វើការតាមរយៈខ្ញុំដើម្បីបំពេញគោលបំណងរបស់ទ្រង់ ។

ម៉ូសេមានតួរនាទីដ៏សំខាន់ក្នុងការដោះលែងសាសន៍អ៊ីស្រាអែលពីសេវកភាព ។ ប៉ុន្តែលោកមិនអាចសម្រេចកិច្ចការនេះបានទេ ប្រសិនបើមាតាលោក បងស្រីលោក ដែលជាបុត្រីរបស់ផារ៉ោន និងស្រ្តីស្មោះត្រង់ដទៃទៀតមិនបានការពារ និងថែទាំលោកនោះ ។

សកម្មភាពដែលអាចជ្រើសរើស

សូមប្រើទំព័រសកម្មភាពសប្ដាហ៍នេះនិង « ម៉ារាម » ( នៅក្នុង ដំណើររឿងព្រះគម្ពីរសញ្ញាចាស់ ) ដើម្បីប្រាប់កុមារអំពីរបៀបដែលយ៉ុកិបិត ( ម្តាយរបស់ម៉ូសេ ) ម៉ារាម ( ជាបងស្រីរបស់លោក ) ហើយនិងបុត្រីរបស់ផារ៉ោនដែលបានថែទាំម៉ូសេ ។ សូមបញ្ជាក់ថា ពីព្រោះតែស្ត្រីទាំងនេះនឹងស្ត្រីស្មោះត្រង់ដទៃទៀតបានថែទាំម៉ូសេឲ្យមានសុវត្ថិភាព នោះថ្ងៃមួយបានដឹកនាំពួកកូនចៅនៃសាសន៍អ៊ីស្រាអែលទៅកាន់ទីសុវត្ថិភាព ។ សូមអញ្ជើញកុមារឲ្យគូររូបមនុស្សដែលថែទាំពួកគេ ។

ម៉ូសេនៅក្នុងកូនទូក ( ម៉ូសេនៅកណ្តាលគុម្ពត្រែង ) © Providence Collection/licensed from goodsalt.com
សូមច្រៀងចម្រៀងរួមគ្នានូវបទមួយអំពីការបម្រើដូចជាបទ « អូរតូចនិយាយថា ‹ ឲ្យ › » ( សៀវភៅចម្រៀងកុមារទំព័រ ១១៦ ) ។ សូមជួយកុមារឲ្យគិតអំពីកិច្ចការសាមញ្ញដែលពួកគេអាចធ្វើដើម្បីជួយនរណាម្នាក់នៅឯគេហដ្ឋាន ឬនៅឯសាលា ។

និក្ខមនំ ៣

ព្រះយេស៊ូវនឹងជួយខ្ញុំឲ្យធ្វើកិច្ចការល្អ ។

ម៉ូសេបានមានការព្រួយ ថាបើសិនជាលោកអាចរំដោះពួកសាសន៍អ៊ីស្រាអែលពីស្រុកអេស៊ីព្ទបានឬអត់ ។ ប៉ុន្តែព្រះអម្ចាស់បានសន្យាថា ទ្រង់នឹងជួយដល់ម៉ូសេ ។ សូមជួយកុមារឲ្យបង្កើនសេចក្តីជំនឿថាព្រះអង្គសង្គ្រោះ នឹងជួយដល់ពួកគេដូចគ្នាដែរ ។

សកម្មភាពដែលអាចជ្រើសរើស

សូមប្រាប់ដល់កុមារអំពីរបៀបដែលព្រះអម្ចាស់បានផ្តល់ដល់ម៉ូសេនូវការងារដ៏សំខាន់ឲ្យធ្វើ ។ សូមអានខគម្ពីរដែលបានជ្រើសរើសមកពី និក្ខមនំ ៣ ឬ អាន « ព្យាការីម៉ូសេ » (នៅក្នុង ដំណើររឿងព្រះគម្ពីរសញ្ញាចាស់ ) ។ សូមចែកចាយពីអារម្មណ៍របស់ម៉ូសេ ( សូមមើល និក្ខមនំ ៣: ៦,១១ ) និងអ្វីដែលព្រះម្ចាស់មានបន្ទូលប្រាប់លោក ( សូមមើល ខ ១២ និង ១៤ ) ។ សូមអញ្ជើញកុមារ សូត្រឃ្លានេះជាមួយបងប្អូន « អញនឹងនៅជាមួយនឹងឯង »ហើយចែកចាយនូវពេលវេលាមួយដែលព្រះអម្ចាស់នៅជាមួយបងប្អូន នៅពេលដែលបងប្អូនមានកិច្ចការសំខាន់ដែលត្រូវធ្វើសម្រាប់ទ្រង់ ។
សូមជួយកុមារឲ្យគិតអំពីស្ថានភាពនៅពេលដែលពួកគេ អាចត្រូវបានស្មើឲ្យធ្វើអ្វីមួយដែលហាក់ដូចជាពិបាក ។ សូមពន្យល់ថាដូចដែលព្រះយេស៊ូវបានជួយដល់ម៉ូសេ នោះព្រះយេស៊ូវក៏អាចជួយដល់ពួកគេផងដែរ ។ សូមច្រៀងចម្រៀងមួយបទអំពីរបៀបដែលព្រះយេស៊ូវ គ្រីស្ទបានជួយយើង ដូចជាបទ « ខ្ញុំនឹងដើរតាមព្រះយេស៊ូ » នៅគេហទំព័រ ( ChurchofJesusChrist.org ) ។ សូមថ្លែងទីបន្ទាល់ថា ព្រះអង្គសង្គ្រោះនឹងជួយយើង នៅពេលយើង ព្រួយបារម្ភ ឬភ័យខ្លាច ។
សូមកាត់រូបបេះដូង ហើយសរសេរនៅលើនោះអំពីរបៀបដែលព្រះអម្ចាស់ ជួយដល់កុមារ ។ សូមដាក់រូបបេះដូងផ្កាប់នៅលើឥដ្ឋ ។ អញ្ជើញកុមារដាក់វេណគ្នាជ្រើសរើសបេះដូង ហើយជួយពួកគេអាននូវអ្វីដែលបានសរសេរនៅលើនោះ ។

និក្ខមនំ ៣:១–៥

ខ្ញុំអាចមានគារវភាពនៅក្នុងទីបរិសុទ្ធ ។

សូមប្រើដំណើររឿងរបស់ម៉ូសេ និងគុម្ពបន្លាដែលមានភ្លើងឆេះ ដើម្បីជួយកុមារឲ្យយល់ពីមូលហេតុដែលយើងត្រូវប្រព្រឹត្តចំពោះវត្ថុពិសិដ្ឋដោយគារវភាព ។

សកម្មភាពដែលអាចជ្រើសរើស

សូមអាន និក្ខមនំ ៣:១–៥ ហើយពន្យល់ថា ម៉ូសេបានបង្ហាញគារវភាពតាមរយៈការដោះស្បែកជើងរបស់លោក ។ តើយើងត្រូវធ្វើអ្វីដើម្បីបង្ហាញគារវភាពនៅក្នុងសាសនាចក្រ ? សូមច្រៀងចម្រៀងមួយបទជាមួយគ្នាអំពីគារវភាព ដូចជាបទ « គារវភាពជាក្តីស្នេហ៍ » ( សៀវភៅចម្រៀងកុមារ ទំព័រ ១២ ) ។ សូមជួយកុមារឲ្យស្គាល់ពាក្យនៅក្នុងបទចម្រៀងដែលបង្រៀនយើងពីរបៀបដែលយើងបង្ហាញគារវភាព ។ ហេតុអ្វីព្រះអម្ចាស់មានព្រះទ័យចង់ឲ្យយើងមានគារវភាព ?
សូមបង្ហាញរូបភាពមួយចំនួនអំពីស្ថានភាពនៃទីកន្លែងណាដែលយើងគួរតែមានគារវភាព និងទីកន្លែងណាខ្លះដែលយើងមិនចាំបាច់ត្រូវមានគារវភាព ដូចជានៅក្នុងការប្រជុំសាក្រាម៉ង់ ការអធិដ្ឋាន សួនច្បារ និងក្នុងពិធីខួបកំណើតជាដើម ។ សូមឲ្យកុមារបែងចែករូបភាពណាខ្លះដែលបង្ហាញពីទីកន្លែងដែលយើង គួរមានភារវភាព ។
សូមអញ្ជើញកុមារឲ្យគូររូបភាពខ្លួនឯង ហើយចង្អុលទៅរូបខ្លួនឯង នៅពេលដែលបងប្អូនពិភាក្សាអំពីរបៀបដែលពួកគេអាចមានគារវភាព ជាមួយផ្នែកផ្សេងៗនៃរូបកាយរបស់ពួកគេ ដូចជាភ្នែក ត្រចៀក មាត់ដៃនិងជើង ។

បង្រៀនគោលលទ្ធិ ៖ កុមារធំៗ

និក្ខមនំ ១–២

ព្រះបានធ្វើការតាមរយៈយើងម្នាក់ៗ ដើម្បីបំពេញតាមគោលបំណងរបស់ទ្រង់ ។

មនុស្សជាច្រើនបានជួយបំពេញគោលបំណងរបស់ព្រះ តាមរយៈ ការរក្សាទុកជីវិតឲ្យរបស់កុមារម៉ូសេ ។ តើបងប្អូនអាចជួយកុមារដែលបងប្អូនបង្រៀនឲ្យយល់ពីតួនាទីដ៏សំខាន់ដែលយើងទាំងអស់គ្នាធ្វើនៅក្នុងការបំពេញនូវបំណងបា្រថ្នារបស់ព្រះយ៉ាងដូចម្ដេច ?

សកម្មភាពដែលអាចជ្រើសរើស

សូមឲ្យកុមារចែកចាយនូវអ្វីដែលពួកគេដឹងអំពីម៉ូសេពេលលោកនៅជាទារក ។ សូមប្រើទំព័រសកម្មភាពសប្ដាហ៍នេះ និង និក្ខមនំ ១:២២; ២:១–១០ ដើម្បីសង្ខេបដំណើររឿងរបស់ម៉ូសេកាលពីកុមារភាព ។ សូមអានសេចក្តីយោងបទគម្ពីរនៅលើទំព័រសកម្មភាព ហើយសួរដល់កុមារ ថាតើស្រ្តីមួយណាដែលបានការពារជីវិតរបស់ម៉ូសេ ។
សូមប្រាប់កុមារអំពីមនុស្សដែលបងប្អូនកោតសរសើរ ពីព្រោះតែសេចក្តីស្មោះត្រង់របស់ពួកគេនៅក្នុងការបម្រើព្រះ និងមនុស្សនៅជុំវិញពួកគេ សូម្បីតែនៅក្នុងរបៀបតិចតួចក្តី ។ សូមអញ្ជើញកុមារឲ្យនិយាយអំពីមនុស្សដែលពួកគេស្គាល់ដែលមានសេចក្តីស្មោះត្រង់នៅក្នុងការបម្រើព្រះនិងអ្នកដទៃ ។ តើយើងមានចំណែកអ្វីខ្លះនៅក្នុងកិច្ចការរបស់ព្រះ ?

និក្ខមនំ ៣–៤

ព្រះអម្ចាស់នឹងជួយខ្ញុំបំពេញកិច្ចការរបស់ទ្រង់ ។

ម៉ូសេមានអារម្មណ៍ថា មិនល្អគ្រប់គ្រាន់នៅក្នុងការហៅរបស់លោក ប៉ុន្តែព្រះអម្ចាស់បានសន្យាថា ទ្រង់នឹងនៅជាមួយម៉ូសេ ហើយជួយដល់លោក ។ តើដំណើររឿងនេះអាចបំផុសគំនិតកុមារដែលបងប្អូនបង្រៀនយ៉ាងដូចម្ដេចខ្លះ ?

សកម្មភាពដែលអាចជ្រើសរើស

សូមឲ្យកុមារអាន និក្ខមនំ ៣:១១; ៤:១;១០ ហើយស្វែងរករបៀបដែលម៉ូសេមានអារម្មណ៍អំពីការសុំអនុញ្ញាតពីផារ៉ានដើម្បីដោះលែងឲ្យសាសន៍អ៊ីស្រាអែលចេញទៅ ។ តើពួកគេធ្លាប់មានអារម្មណ៍ស្រដៀងគ្នានេះនៅពេលណា ? តើដំបូន្មានបែបណាដែលកុមារនឹងចែកចាយជាមួយម៉ូសេដើម្បីជួយដល់លោក ? សូមជួយពួកគេរកមើលអំពីរបៀបដែលព្រះអម្ចាស់លើកទឹកចិត្តម៉ូសេ ( សូមមើល និក្ខមនំ ៣:១២; ៤:២–៩, ១១–១២ ) ។
សូមចែកចាយបទពិសោធន៍ នៅពេលដែលបងប្អូន មានអារម្មណ៍ថាព្រះបានជួយដល់បងប្អូនបំពេញការហៅ ឬ ការបម្រើទ្រង់នៅក្នុងរបៀបមួយចំនួន ។ សូមអញ្ជើញកុមារឲ្យចែកចាយអំពីគ្រាមួយនៅពេលដែលព្រះអម្ចាស់បានជួយដល់ពួកគេ ។

និក្ខមនំ ៣:១–៥

ខ្ញុំអាចមានគារវភាពនៅក្នុងទីបរិសុទ្ធ ។

ព្រះអម្ចាស់បានសុំឲ្យម៉ូសេដោះស្បែកជើងលោកចេញនៅគុម្ពបន្លាដែលមានភ្លើងឆេះដែលជាទីសម្គាល់នៃការគោរពនិងគារវភាព ។ តើបងប្អូនអាចប្រើដំណើររឿងនេះដើម្បី បង្រៀនកុមារអំពីគារវភាពយ៉ាងដូចម្ដេច ?

សកម្មភាពដែលអាចជ្រើសរើស

សូមអាន និក្ខមនំ ៣:១–៥ ហើយសូមឲ្យកុមារសង្ខេបខគម្ពីរជាសម្ដីរបស់ពួកគេផ្ទាល់ ។ តើយើងអាចធ្វើអ្វីដើម្បីបង្ហាញគារវភាពនៅទីបរិសុទ្ធដូចជានៅសាសនាចក្រឬនៅក្នុងព្រះវិហារបរិសុទ្ធ ? សូមជួយកុមារបង្កើត « ថង់គារវភាព » ដើម្បីយកទៅផ្ទះដែលមានចំរៀកក្រដាសជាមួយគំនិតអំពីរបៀបត្រូវមានគារវភាព ។ សូមអញ្ជើញពួកគេឲ្យចែកចាយនូវគំនិតទាំងនេះជាមួយក្រុមគ្រួសាររបស់ពួកគេ ។
សូមច្រៀងចម្រៀងមួយបទអំពីគារវភាពដូចជាបទ « គារវភាពជា ក្តី ស្នេហ៍ » ជាមួយគ្នា ( សៀវភៅចម្រៀងកុមារ ទំព័រ ១២០ ) ហើយសូមឲ្យកុមារម្នាក់ៗសរសេរ និងចែកចាយនិយមន័យនៃគារវភាពដោយផ្អែកទៅលើទំនុកចម្រៀង ។

សូមលើកទឹកចិត្តឲ្យមានការរៀនសូត្រនៅឯគេហដ្ឋាន

ដើម្បីជួយកុមារឲ្យចែកចាយនូវអ្វីដែលពួកគេបានរៀនមកពី និក្ខមនំ ១–៦ សូមលើកទឹកចិត្តពួកគេឲ្យគូររូបភាពមួយអំពីមនុស្សមា្នក់ដែលពួកគេបានរៀននៅក្នុងថ្នាក់ដើម្បីចែកចាយជាមួយក្រុមគ្រួសាររបស់ពួកគេ ។

ការកែលម្អការបង្រៀនរបស់យើង

កុមារទទួលបានប្រយោជន៍អំពីការរៀនសារឡើងវិញ ។ សូមកុំខ្លាចនឹងធ្វើសកម្មភាពនានាច្រើនដងច្រើនសារឡើយ ជាពិសេសជាមួយនឹងកុមារតូចៗ ។ ការធ្វើសារឡើងវិញនេះនឹងជួយកុមារឲ្យចងចាំអ្វីដែលបងប្អូនបានបង្រៀន ។

ទំព័រសកម្មភាព ៖ ព្រះបានធ្វើការតាមរយៈយើងម្នាក់ៗដើម្បីបំពេញតាមគោលបំណងរបស់ទ្រង់ ។