« ថ្ងៃទី ៣–៩ ខែ មេសា ។ បុណ្យអ៊ីស្ទើរ ៖ ‹ សេចក្តីស្លាប់អើយ ជ័យជម្នះរបស់ឯងនៅឯណា ? › » ចូរមកតាមខ្ញុំ—សម្រាប់សាលាថ្ងៃអាទិត្យ ៖ ព្រះគម្ពីរសញ្ញាថ្មី ឆ្នាំ ២០២៣ ( ឆ្នាំ ២០២២ )

« ថ្ងៃទី ៣–៩ ខែ មេសា ។ បុណ្យអ៊ីស្ទើរ » ចូរមកតាមខ្ញុំ—សម្រាប់សាលាថ្ងៃអាទិត្យ ៖ ឆ្នាំ ២០២៣

ថ្ងៃទី ៣–៩ ខែ មេសា

បុណ្យអ៊ីស្ទើរ

« សេចក្តីស្លាប់អើយ ជ័យជម្នះរបស់ឯងនៅឯណា ? »

នៅពេលបងប្អូនរៀបចំខ្លួនបង្រៀននាសប្ដាហ៍នេះ សូមពិចារណាអំពីរបៀបដែលការពិភាក្សាអំពីថ្ងៃអាទិត្យបុណ្យអ៊ីស្ទើរនៅក្នុងថ្នាក់របស់បងប្អូន អាចស្ថាបនាសេចក្ដីជំនឿទៅលើព្រះយេស៊ូវគ្រីស្ទ និងដង្វាយធួនរបស់ទ្រង់ ។

អញ្ជើញឲ្យចែកចាយ

សូមសួរដល់សមាជិកក្នុងថ្នាក់អំពីរបៀបដែលពួកគេនឹងចែកចាយចម្លើយចំពោះសំណួរដូចជា « តើដង្វាយធួនរបស់ព្រះយេស៊ូវគ្រីស្ទគឺជាអ្វី ? » និង « តើខ្ញុំអាចទទួលបានពរជ័យទាំងឡាយនៃដង្វាយធួនរបស់ព្រះគ្រីស្ទយ៉ាងដូចម្ដេច ? » សូមអញ្ជើញពួកគេឲ្យចែកចាយបទគម្ពីរនានា ដែលពួកគេបានអាននៅសប្ដាហ៍នេះ ដែលជួយឆ្លើយសំណួរទាំងនេះ ។

បង្រៀនគោលលទ្ធិ

ព្រះយេស៊ូវគ្រីស្ទរំដោះយើងពីអំពើបាប និងសេចក្ដីស្លាប់ ពង្រឹងភាពទន់ខ្សោយរបស់យើង ហើយលួងលោមចិត្តយើងនៅក្នុងការសាកល្បងរបស់យើង ។

តើសមាជិកក្នុងថ្នាក់របស់បងប្អូនយល់ថា ព្រះយេស៊ូវលួងលោមយើងនៅក្នុងការសាកល្បងរបស់យើង និងពង្រឹងយើងនៅក្នុងភាពទន់ខ្សោយរបស់យើង ក៏ដូចជារំដោះយើងចេញពីអំពើបាប និងសេចក្ដីស្លាប់ដែរឬទេ ? របៀបមួយដើម្បីជួយពួកគេឲ្យរកឃើញគោលការណ៍ទាំងនេះ គឺអាចជាការសរសេរពាក្យទាំងនេះដាក់នៅលើក្ដារខៀន ៖ អំពើបាប សេចក្ដីស្លាប់ ការសាកល្បង ភាពទន់ខ្សោយ ។ សមាជិកម្នាក់ៗនៅក្នុងថ្នាក់អាចអានបទគម្ពីរមួយពីក្នុង « ធនធានបន្ថែមទាំងឡាយ » ហើយពិចារណាអំពីរបៀបដែលព្រះអង្គសង្គ្រោះជួយយើងឲ្យយកឈ្នះ ឬស៊ូទ្រាំនឹងរឿងទាំងនេះ ។ បន្ទាប់មក សមាជិកក្នុងថ្នាក់អាចសរសេរនូវអ្វី ដែលពួកគេបានរៀនចេញពីបទគម្ពីរទាំងនេះនៅក្រោមចំណងជើងនីមួយៗ ហើយចែកចាយទីបន្ទាល់របស់ពួកគេអំពីព្រះអង្គសង្គ្រោះ និងដង្វាយធួនរបស់ទ្រង់ ។

ការឆ្កាង ដោយ លូអីស ផាកកឺ
ប្រហែលជាមេរៀនប្រើវត្ថុសាមញ្ញមួយ អាចជួយបង្ហាញពីភាពខុសគ្នារវាងការត្រូវបានស្អាតពីអំពើបាប និងការធ្វើឲ្យបានល្អឥតខ្ចោះបាន ៖ បងប្អូនអាចសរសេរនៅលើក្ដារខៀនពីរបីបន្ទាត់ដំបូងចេញមកពី មរ៉ូណៃ ១០:៣២ ប៉ុន្តែសូមដាក់បញ្ចូលការប្រកប ឬកំហុសឆ្គងខាងវេយ្យករណ៍ ។ បន្ទាប់មក សូមអញ្ជើញសមាជិកម្នាក់ក្នុងថ្នាក់ឲ្យលុប ( ប៉ុន្ដែមិនកែតម្រូវទេ ) កំហុសឆ្គងនោះចោល ។ តើការណ៍នេះដោះស្រាយបញ្ហាបានដែរឬទេ ? តើមានមេរៀនអ្វីខ្លះ ដែលយើងបានរៀនមកពីខគម្ពីរនេះ និងមេរៀនប្រើវត្ថុនេះអំពីឥទ្ធិពលនៃដង្វាយធួនរបស់ព្រះអង្គសង្គ្រោះ ដែលអាចមានមកលើយើង ? សេចក្ដីថ្លែងការណ៍នេះមកពីប្រធាន ឌៀថើរ អេហ្វ អុជដូហ្វ ក៏អាចជួយបានផងដែរ ៖ « បើសេចក្ដីសង្គ្រោះមានន័យថាគ្រាន់តែជាការលុបចោលកំហុស និងអំពើបាបរបស់យើង នោះសេចក្ដីសង្គ្រោះ—ថ្វីបើវាអស្ចារ្យក្តី—គង់តែវាមិនបានបំពេញតាមព្រះរាជបំណងដ៏ខ្ពស់របស់ព្រះវរបិតាមានចំពោះយើងនោះទេ ។ គោលដៅរបស់ទ្រង់គឺខ្ពង់ខ្ពស់ណាស់ ៖ ទ្រង់មានព្រះរាជបំណងឲ្យបុត្រា និងបុត្រីរបស់ទ្រង់ប្រែក្លាយដូចជាទ្រង់ » ( « The Gift of Grace » Liahona ខែ ឧសភា ឆ្នាំ ២០១៥ ទំព័រ ១០៨ ) ។
ដំណើររឿង និងពាក្យប្រៀបប្រដូចនានា អាចជួយយើងឲ្យយល់ដឹងកាន់តែច្បាស់អំពីដង្វាយធួនរបស់ព្រះគ្រីស្ទ ។ បងប្អូនគួរតែចែកចាយដំណើររឿង ឬពាក្យប្រៀបប្រដូចមួយមកពីសារលិខិតសន្និសីទទូទៅមួយ ដែលមាននៅក្នុង « ធនធានបន្ថែមទាំងឡាយ » ។ ឬបងប្អូនអាចមើលជាមួយគ្នានូវរឿង « Handel’s Messiah: Debtor’s Prison » ( វីដអូ ) នៅលើគេហទំព័រ ChurchofJesusChrist.org ហើយសូមពិភាក្សាអំពីរបៀបដែលដង្វាយធួនរបស់ព្រះយេស៊ូវគ្រីស្ទរំដោះយើងចេញពីគុករបស់យើង ។ បន្ទាប់មក សមាជិកក្នុងថ្នាក់អាចចែកចាយពីគំនិត ឬអារម្មណ៍នានា ដែលពួកគេមានអំពីព្រះអង្គសង្គ្រោះ និងដង្វាយធួនរបស់ទ្រង់សម្រាប់ពួកយើង ។

ម៉ាថាយ ២៨:១–១០; លូកា ២៤:១៣–៣៥; យ៉ូហាន ២០:១–២៩; កូរិនថូស ទី១ ១៥:៣–៨, ៥៥–៥៨

សាក្សីទាំងឡាយនៅក្នុងព្រះគម្ពីរសញ្ញាថ្មីថ្លែងទីបន្ទាល់ថា ព្រះយេស៊ូវគ្រីស្ទបានយកឈ្នះលើសេចក្ដីស្លាប់ ។

សូមពិចារណាធ្វើការរំឭកឡើងវិញអំពីដំណើររឿងបទគម្ពីរអំពីបុណ្យអ៊ីស្ទើរដំបូង—ការរស់ឡើងវិញរបស់ព្រះយេស៊ូវគ្រីស្ទ ។ បងប្អូនអាចអញ្ជើញសមាជិកក្នុងថ្នាក់ម្នាក់ឲ្យប្រាប់ដំណើររឿងនោះឡើងវិញតាមពាក្យសម្ដីរបស់គាត់ផ្ទាល់ ( សូមមើល យ៉ូហាន ២០:១–១៧) ។ បងប្អូនក៏អាចបង្ហាញវីដេអូព្រះគម្ពីរប៊ីបផងដែរ ដូចជា « He Is Risen » ( នៅលើគេហទំព័រ ChurchofJesusChrist.org ) ។
ប្រហែលជាសមាជិកក្នុងថ្នាក់របស់បងប្អូននឹងទទួលបានការយល់ដឹងកាន់តែស៊ីជម្រៅ អំពីសារៈសំខាន់នៃការធ្វើជាសាក្សីនៃការរស់ឡើងវិញរបស់ព្រះយេស៊ូវគ្រីស្ទ ប្រសិនបើពួកគេស្រមៃថា ពួកគេគឺជាមេធាវី ឬអ្នកយកសារព័ត៌មានដែលកំពុងស៊ើបអង្កេតការអះអាងថា ព្រះគ្រីស្ទបានរស់ឡើងវិញ ។ សូមអញ្ជើញពួកគេឲ្យរកមនុស្សនៅក្នុងបទគម្ពីរ ដែលអាចបម្រើក្នុងនាមជាសាក្សីបាន ( សូមមើល ម៉ាថាយ ២៨:១–១០; លូកា ២៤:១៣–៣៥; យ៉ូហាន ២០:១៩–២៩; កូរិនថូស ទី១ ១៥:៣–៨, ៥៥–៥៨ ) ។ ពួកគេអាចសរសេរសេចក្ដីសង្ខេបមួយ អំពីអ្វីដែលបុគ្គលទាំងនេះអាចនឹងនិយាយ នៅពេលពួកគេធ្វើសាក្សីនៅក្នុងតុលាការ ឬនៅពេលពួកគេត្រូវបានសម្ភាសសម្រាប់របាយការណ៍សារព័ត៌មាន ។
របៀបមួយដើម្បីឲ្យយើងកាន់តែមានអំណរគុណខ្លាំងចំពោះការរស់ឡើងវិញរបស់ព្រះអង្គសង្គ្រោះ គឺត្រូវគិតអំពីរបៀបដែលយើងនឹងពន្យល់អំពីជំនឿរបស់យើងទៅកាន់អ្នកដទៃ ។ របៀបដែលសមាជិកក្នុងថ្នាក់នឹងចែកចាយទីបន្ទាល់របស់ពួកគេ អំពីព្រះយេស៊ូវគ្រីស្ទនៅក្នុងស្ថានភាពដូចតទៅនេះ ៖ សមាជិកគ្រួសារម្នាក់ទទួលរោគវិនិច្ឆ័យថាមានជំងឺធ្ងន់ធ្ងរមួយ មិត្តម្នាក់បានបាត់បង់មនុស្សជាទីស្រឡាញ់របស់គាត់ អ្នកជិតខាងសួរថាហេតុអ្វីក៏បងប្អូនប្រារព្ធពិធីបុណ្យអ៊ីស្ទើរ ។ សូមលើកទឹកចិត្តពួកគេឲ្យយោងទៅព្រះគម្ពីរ ( ដូចជាបទគម្ពីរនៅក្នុង « ធនធានបន្ថែមទាំងឡាយ » ) នៅពេលពួកគេរៀបចំចម្លើយរបស់ពួកគេ ។ សូមអញ្ជើញសមាជិកក្នុងថ្នាក់ពីរបីនាក់ឲ្យចែកចាយគំនិតរបស់ពួកគេ ។

ធនធានបន្ថែមទាំងឡាយ

បទគម្ពីរអំពីដង្វាយធួន និងការរស់ឡើងវិញរបស់ព្រះអង្គសង្គ្រោះ ។

សារលិខិតអំពីដង្វាយធួន និងការរស់ឡើងវិញរបស់ព្រះអង្គសង្គ្រោះ ។

ឌែល ជី រិនឡាន់ « Consider the Goodness and Greatness of God » Liahona ខែ ឧសភា ឆ្នាំ ២០២០ ទំព័រ ៤១–៤៤
ហ្គើរីត ដបុលយូ ហ្គង « Good Shepherd, Lamb of God » Liahona ខែ ឧសភា ឆ្នាំ ២០១៩ ទំព័រ ៩៧–១០០
ហ្សារ៉ុន អូប៊ែង « Christ: The Light That Shines in Darkness » Liahona ខែ ឧសភា ឆ្នាំ ២០១៩ ទំព័រ ៧៣–៧៦
គ្រីស្ទីណា ប៊ី ហ្វ្រានកូ « The Healing Power of Jesus Christ » Liahona ខែ វិច្ឆិកា ឆ្នាំ ២០២០ ទំព័រ ៦០–៦២

ការកែលម្អការបង្រៀនរបស់យើង

ធ្វើជាឧបករណ៍របស់ព្រះវិញ្ញាណ ។ « គោលបំណងរបស់បងប្អូននៅក្នុងនាមជាគ្រូបង្រៀន គឺមិនមែនដើម្បីធ្វើបទបង្ហាញដ៏គួរឲ្យចាប់អារម្មណ៍មួយនោះទេ ប៉ុន្តែគឺដើម្បីជួយអ្នកដទៃទៀតឲ្យទទួលឥទ្ធិពលនៃព្រះវិញ្ញាណបរិសុទ្ធ ដែលជាគ្រូបង្រៀនដ៏ពិត » ( ការបង្រៀនតាមរបៀបរបស់ព្រះអង្គសង្គ្រោះ ទំព័រ ១០ ) ។