Esta, na James Johnson

Julai 25–31

Esta

“Wewe Hukuujia … kwa ajili ya Wakati Kama Huo”

Je! Unawajua vizuri washiriki wa darasa lako? Jaribu kumjua vizuri mshiriki mmoja wa darasa kila wiki. Hii itakusaidia kuzingatia mahitaji yao unapojiandaa kufundisha (ona Kufundisha katika Njia ya Mwokozi, 7).

Andika Misukumo Yako

Alika Kushiriki

Washiriki wa darasa wangeweza kushiriki na mtu aliyekaa karibu naye kitu ambacho Roho aliwafundisha, kitu ambacho wamekuja kukielewa vizuri zaidi, au kitu walichokifananisha na maisha yao wakati waliposoma kitabu cha Esta. Kisha wachache wao wanaweza kuelezea kwa darasa zima.

Fundisha Mafundisho

Esta

Bwana hutuweka katika hali ambapo tunaweza kuwabariki watu wengine.

• Washiriki wa darasa lako wanaweza kuwa walitafuta njia ambazo Bwana alifanya iwezekane kwa Esta kuwaokoa Wayahudi, kama inavyopendekezwa katika muhtasari wa wiki hii katika Njoo, Unifuate—kwa Ajili ya Watu Binafsi na Familia. Waalike kuelezea walichokipata. Au mngeweza kuangalia mifano michache kwa pamoja (ona Esta 2:21–23; 3:10–14; 4:14–16). Tunaweza kufanya nini ili kutambua mkono wa Mungu katika maisha yetu? Maelezo ya Mzee Neil L. Anderson katika “Nyenzo za Ziada” ina jibu la swali hili.

• Ili kuwasaidia washiriki wa darasa lako kufikiria juu ya jinsi Bwana alivyowaandaa wao “kwa ajili ya wakati kama huu” (Esta 4:14), waalike wasome Esta 4:10–17. Je, maneno ya Mordekai kwa Esta yangemsaidiaje kufanya uamuzi wa kuwatetea watu wake? Kama vile Mungu alivyomweka Esta katika nafasi ambayo angeweza kuokoa Wayahudi, je, ni mazingira gani ambayo anatuweka sisi ili tuweze kuwabariki wengine? Je, tunawezaje kuwa vyombo bora zaidi mikononi mwake? Kusoma maelezo ya Dada Virginia U. Jenses katika “Nyenzo za Ziada” kunaweza kuwahamasisha washiriki wa darasa kufikiria nyakati ambazo walihisi kuwa wao ni vyombo kwa ajili ya Bwana. Waombe washiriki na wengine uzoefu wao, kama watakavyoongozwa na Roho.

Esta 4

Kufunga kunaonyesha utegemezi wetu kwa Bwana.

• Unaweza kutumia Esta 4 kujadili baraka zinazotokana na kufunga. Unaweza kuwa na mshiriki wa darasa akapitia matukio ambayo yalisababisha Esta na Wayahudi wengine kufunga. Kwa nini wao walichagua kufunga? Kwa nini sisi tunachagua kufunga? Mnaweza kupitia kwa pamoja maandiko ya ziada kuhusu kufunga, kama vile Isaya 58:6–12 na Mathayo 4:1–4; 17:14–21 (ona pia Mwongozo wa Maandiko, “Mfungo, Kufunga,” scriptures.ChurchofJesusChrist.org). Labda wewe au washiriki wachache wa darasa mnaweza kuelezea matukio ambayo yanaonyesha jinsi kufunga kunavyoleta nguvu ya Bwana maishani mwetu.

Esta 3:1–11; 4:10–17; 5:1–4

Kufanya jambo sahihi mara nyingi huhitaji ujasiri mkubwa.

• Hadithi za Mordekai na Esta kwa ujasiri wakisimama kwa ajili ya haki inaweza kuhamasisha washiriki wa darasa kuwa na ujasiri wa kufanya jambo sahihi. Unaweza kuwaomba nusu ya darasa kusoma kuhusu Mordekai (ona Esta 3:1-11) na nusu nyingine kusoma kuhusu Esta (ona Esta 4:10–17; 5:1–4). Kama wangekuwa hapa leo, Mordekai na Esta wangesema nini ili kututia moyo sisi wakati ambapo ni vigumu kufanya yaliyo sahihi? Washiriki wa darasa pia wanaweza kuelezea hali ambapo walilazimika kutenda kwa ujasiri. Ungeweza kuonyesha video “Courage”(ChurchofJesusChrist.org) au lialike darasa kuimba au kusoma maneno ya wimbo kuhusu kusimamia ukweli, kama vile “Do What Is Right” (Nyimbo za Kanisa, na. 237). Kisha jadili video au wimbo unafundisha nini kuhusu kuwa na ujasiri.

  

  Esta mbele ya Mfalme, na Minerva K. Teichert

Nyenzo za Ziada

Mkono wa Mungu.

Mzee Neil L. Andersen alifundisha:

“Wakati mwingine tunaweza kuona mkono wa Bwana katika maisha ya wengine lakini tukashangaa, “Ninawezaje kuuona kwa uwazi zaidi mkono Wake katika maisha yangu mwenyewe?’ …

Unaposhika amri na kuomba kwa imani ili uuone mkono wa Bwana katika maisha yako, nakuahidi kwamba Yeye atafumbua macho yako ya kiroho, na utaona kwa uwazi zaidi kwamba wewe hauko peke yako” (“Ufalme Wako Uje,” Liahona, Mei 2015, 121–22).

“Kwa ajili ya wakati kama huo.”

Dada Virginia U. Jensen alifundisha: “Siamini kwamba mimi na wewe tuko hapa wakati huu wa kipekee kwa bahati mbaya. Ninaamini kwamba, kama Esta wa zamani, sisi ‘tumeujia ufalme kwa wakati kama huo’ [Esta 4:14], wakati ushawishi wetu, mfano wetu, nguvu zetu, na imani yetu inaweza kusimama kama kinga dhidi ya wimbi la uovu linalotishia kumeza nyumba zetu, familia zetu, na wapendwa wetu” (“Creating Places of Security,” Ensign, Nov. 1997, 89).

Kuboresha Ufundishaji Wetu

Nenda kwenye Maandiko kwanza. Maandiko lazima yawe chanzo chako cha msingi cha maandalizi na kujifunza kwako. Usisahau kwamba maneno ya manabii wa sasa hukamilishana na maandiko nayo ni maandiko pia. (Ona Kufundisha katika Njia ya Mwokozi, 17–18.)