Pagbalik sa Pagserbisyo

Ang mga misyonaryo nga nauli og sayo posibling magtinguha nga mobalik sa misyonaryo nga pagserbisyo o mangita og ubang mga oportunidad nga makaserbisyo. Niini nga mga sitwasyon, ikonsiderar ang mosunod nga mga pagpili:

1. Pagpabalik sa usa ka full-time nga proselyting nga misyon.

Importante kaayo nga ang misyonaryo sa mainampingon nga paagi mokonsiderar sa rason sa iyang sayo nga pag-uli ug sa kalagmitan nga mausab ang mga problema, kon ugaling mapabalik man. Sa kasagaran, kon ang mga misyonaryo nauli og sayo, ang kabalaka sa misyon naminosan ug ang ilang medikal o kahimsog sa pangisip nga mga kahimtang molambo. Hinumdomi nga ang mga panginahanglan ug ang mga makapabalaka sa usa ka misyon sa kasagaran mas molisud sa ingon niini nga mga kahimtang.

Sigon sa gitudlo ni Presidente Gordon B. Hinckley, “Ang maayong pisikal ug ang kahimsog sa pangisip importante kaayo. … Bisan unsa nga balatian o pisikal o problema sa pangisip nga bation sa misyonaryo kon moadto siya sa field mosamot lamang kini tungod sa makaluya nga trabaho. … Nagkinahanglan kita og mga misyonaryo, apan kinahanglan nga sila makahimo sa trabahoon. … Kinahanglan gayod nga adunay kahimsog ug kalig-on, sa pisikal man o sa pangisip, kay daghan kaayo ang trabahoon, ang oras taas, ug ang kakapoy posible nga hilabihan” (“Missionary Service,” First Worldwide LeadershipTraining Meeting, Ene. 11, 2003, 17–18). Ang maong tawo nagkinahanglan nga mosiguro nga siya makahimo sa pagdumala sa kondisyon inig balik niya sa natad sa misyon. Ang pagpabalik ngadto sa proselyting nga misyon nagkinahanglan sa presidente sa stake nga mopadala sa mga mosunod ngadto sa Missionary Department:

• Sulat gikan sa presidente sa stake nga naghangyo sa pagpabalik ug mopasabot nga ang misyonaryo takos nga moserbisyo, nga ang tanan nga problema nga may kalabotan sa pag-release hingpit na nga nasulbad, ug nga iya nang na-interbyu ang misyonaryo ug siya ug ang misyonaryo mibati nga siya makahimo sa pagtrabaho sa epektibong paagi sa field.

• Sulat gikan sa nauli nga misyonaryo nga magpahayag sa iyang mga pagbati mahitungod sa pagbalik ngadto sa misyonaryo nga pagserbisyo.

• Sulat gikan sa nagtambal nga propesyonal, alang niadtong mga miuli tungod sa medikal o sa kahimsog sa pangisip nga mga hinungdan, nga maghulagway sa kahimtang, pagtambal nga gidapat, sa reaksyon sa pagtambal, mga medikasyon o ubang pagtambal nga posibling kinahanglanon nila sa natad sa misyon, ug usa ka pagtimbangtimbang sa abilidad sa misyonaryo sa pagtrabaho ubos sa lisod nga mga trabahoon sa misyonaryo nga pagserbisyo ug sa pagkaadunay kompanyon.

• Ang updated nga mga porma sa medikal ug sa dental gikinahanglan kon ang misyonaryo nilapas na og usa ka tuig sa pagka-release.

2. Pangserbisyo nga Misyon [Service Mission].

Ang mga oportunidad sa pagserbisyo sa managlahing kapasidad ug sa managlahing gidugayon pwede nga mahimong usa ka konsiderasyon. Palihug og dangop ngadto sa website sa ChurchofJesusChrist.org/service-missionary alang sa dugang nga impormasyon.

3. Uban pang mga calling.

Sa mga dapit diin ang mga oportunidad sa pagkahimong service missionary wala niana, o kon kini nga assignment dili haom para sa misyonaryo, ikonsiderar ang paghatag og calling isip usa ka ward missionary o temple worker o pangita og lokal nga tukmang oportunidad nga makaboluntaryo.