“Unsa nga doktrina ang makatabang sa mga indibidwal sa pagbuntog sa mga problema sa pornograpiya?” Mga Kapanguhaan sa Pagpanambag (2020).
“Unsa nga doktrina ang makatabang sa mga indibidwal sa pagbuntog sa mga problema sa pornograpiya?” Mga Kapanguhaan sa Pagpanambag.
Mga Kapanguhaan sa Pagpanambag
Unsa nga doktrina ang makatabang sa mga indibidwal sa pagbuntog sa mga problema sa pornograpiya?
Usa sa imong mga responsibilidad isip miyembro sa Simbahan mao ang pagtudlo ug pagpamatuod sa tiunay nga doktrina sa ebanghelyo ni Jesukristo. Mahimo kini pinaagi sa pagtudlo sa doktrina ni Kristo, nga ang tanan kinahanglan gayud nga adunay hugot nga pagtuo kang Jesukristo, maghinulsol sa ilang mga sala, magpabunyag, modawat sa Espiritu Santo, ug molahutay hangtud sa katapusan. Tan-awa kini nga mga pakigpulong, nga anaa usab sa “Addressing Pornography [Pagsulbad sa Pornograpiya]” nga seksyon sa ChurchofJesusChrist.org:
“The Power of Teaching Doctrine”
Ang mga indibidwal maoy responsable sa pagsulbad sa ilang kaugalingong mga hagit sa pornograpiya. Kinahanglan nga sila ang moako sa responsibilidad sa ilang kaugalingon nga kinabuhi ug sa mga kausaban nga angay nilang buhaton. Samtang ikaw moapil sa dinasig nga mga diskusyon kauban sa mga indibidwal, giyahe sila sa pagtinguha og personal nga pagpadayag kabahin sa mga solusyon. Awhaga sila sa pagtinguha og espirituhanong pagbarug sa kaugalingong paningkamot aron sa pagsabut ug paggamit sa doktrina ni Kristo. Ang pagtuon ug pag-ampo mahinungdanon niini nga proseso.
Ang mga indibidwal mao usab ang responsable alang sa pagsabot ug paghupay sa kasakit sa uban nga namugna tungod sa ilang paggamit og pornograpiya. Samtang ikaw makigtambayayong kanila, giyahi sila sa pagdawat niini nga responsibilidad ug paghimo kutob sa ilang mahimo sa pagpasig-uli.
Ang pagbuntog sa pornograpiya tingali lisod. Ang mga indibidwal kinahanglan nga molihok sa pag-ila ug pagsulbad sa dili kasarangan nga mga aspeto nga nakaimpluwensya sa ilang paggamit og pornograpiya. Importanting mahibaloan nga ang espirituhanong mga solusyon, bisan og importante ug mapuslanon sa pagbuntog sa pornograpiya, sa kasagaran usa lamang ka bahin sa kompleto nga solusyon. Ang mga indibidwal kinahanglang mokonsiderar sa pagsuhid sa biyolohikal, sikolohikal, ug sosyal nga mga isyu, nga sa kasagaran maoy hinungdan sa paggamit og pornograpiya.
Itudlo ang Doktrina
Samtang ikaw magtudlo niadtong mga nakigbisog sa pornograpiya, pagtinabangay kamo sa pagtino kon unsa nga doktrina ang tingali makatabang kanila sa pag-atubang sa mga impluwensya nga nakaapekto sa ilang kinaiya. Si Presidente Boyd K. Packer miingon nga ang: “Tinuod nga doktrina, nga nasabtan, makapausab sa mga kinaiya ug pamatasan. Ang pagtuon sa mga doktrina sa ebanghelyo mas dali nga makapalambo sa pamatasan kay sa pagtuon bahin sa pamatasan aron mapalambo kini. Ang pagtutok sa usa ka butang inubanan sa dili takus nga kinaiya moresulta sa dili takus nga kinaiya. Mao nga gihatagan gayud nato og gibug-aton ang pagtuon sa mga doktrina sa ebanghelyo” (“Little Children,” Ensign, Nob. 1986, 17).
Ang nag-unang doktrina nga gitudlo diha sa seminary ug institute usa ka mapuslanong giya sa pag-ila kon asa nga doktrina ang tutokan (tan-awa sa “Importante nga mga Doktrina”). Itudlo ang doktrina pinaagi sa paggamit sa mga kapanguhaan sa ebanghelyo sama sa mga kasulatan ug sa mga pakigpulong sa kinatibuk-ang komperensya.
Mangalagad uban sa gugmang putli samtang magtudlo ka, ug magtutok sa pagtabang sa mga indibidwal sa pag-ila sa Espiritu Santo diha sa ilang kinabuhi. Awhaga sila sa pagdiskobre kon unsaon sa paglambo pinaagi sa ilang mga hagit sa pornograpiya. Ikonsiderar ang pagpangutana og dinasig nga mga pangutana mahitungod sa ilang pag-uswag; sa ilang nagtubo nga panabut bahin sa ilang kaugalingon sa biyolohikal, sa sikolohikal, sa sosyal, ug sa espirituhanong paagi; ug sa kalamboan sa ilang Kristohanong mga hiyas. Giyahi ang mga indibidwal sa pagsabot kon sa unsang paagi ang gahum ni Kristo makausab kanila ug mohulma kon kinsa sila sa umaabot.
Itutok ang imong mga pagpanudlo diha sa pagtabang sa mga indibidwal sa pagsabot sa paghinulsol ug sa gahum ni Jesukristo ug sa Iyang Pag-ula. Makatabang usab ang pag-awhag kanila sa pagtinguha og impormasyon mahitungod sa maayo nga sekswalidad, angay nga sekswal nga mga pagpadayag, ug sa tahas sa sekswal nga panginahanglan [sex drive] sulod sa mga utlanan nga giestablisar sa Dios.
Mga Ehemplo sa Doktrinal nga Pagtulun-an
Ang mosunod nga mga ehemplo nagpakita sa komon nga mga hagit nga kasagarang giatubang sa mga indibidwal nga nakigbisog sa pornograpiya ug makahatag og doktrina nga makatabang niini nga mga hagit. Mag-ampo kauban ang matag indibidwal aron matabangan siya sa pag-ila sa pihong doktrina nga gikinahanglan kaayo karon.
Pag-inusara ug Pagkahilayo
Ang mga indibidwal nga nakigbisog sa pornograpiya sa kasagaran makasinati og mga pagbati sa pag-inusara ug pagkahilayo. Tingali kulang sila sa sosyal nga koneksyon ngadto sa uban. Ang pagsabut sa doktrina mahitungod sa Dios nga Kapangulohan makatabang sa mga indibidwal nga mobati nga gihigugma ug konektado sa Langitnong Amahan, ni Jesukristo, ug sa Espiritu Santo. Pagtinguha nga matudlo ang diosnong kinaiya ug mga tahas sa matag sakop sa Dios nga Kapangulohan.
Kaulaw ug Pagtago
Ang pagbati og kaulaw sa kasagaran mosangpot nga itago sa mga indibidwal ang ilang kinaiya. Ang kaulaw mohimo sa mga indibidwal sa pagbati nga sila ngil-ad nga mga tawo ug dili angayan nga mapasaylo. Sa laing bahin, ang pagbati nga sad-an mosangpot sa mga indibidwal sa pag-ila sa ilang mga sayop ug magtinguha sa paghinulsol ug mag-usab. Ang pagsabut sa plano sa kaluwasan makatabang kanato sa paggamit sa gahum sa kabubut-on ug pagkamay-tulubagon. Si Jesukristo ug ang Iyang Pag-ula mowagtang sa kaulaw ug makatabang kanato nga makahinulsol, motubo, ug mag-usab.
Ang kalibog mahitungod sa Tahas sa Sekswalidad
Ang dili maayo o sayop nga mga pagtuo mahitungod sa tahas sa sekswal nga pagpahayag posibling motumaw tungod sa paggamit og pornograpiya. Ang plano sa kaluwasan nagklaro sa importanting tahas sa sekswal nga pagpahayag ug sa katuyoan niini sa paglalang og mga pamilya ug mahigugmaong mga relasyon sa kaminyoon. Itudlo nga ang plano sa kaluwasan ug ubang doktrina makatabang sa pagbutang og gibug-aton sa bili sa usa ka kalag kay sa peligrong mga pagtuis ug pagsaway nga makita diha sa pornograpiya.
Samtang maminaw ka sa mga indibidwal nga maghisgot sa mga hagit nga ilang gisagubang, magiyahan ka sa pagtino sa doktrina nga pinakatukma nga tubag sa ilang mga panginahanglan. Kini nga mga ehemplo pipila lamang nga mga paagi sa pagtudlo sa doktrina.
Awhaga ang mga Indibidwal sa Paggamit sa Doktrina sa Ebanghelyo
Tabangi ang mga indibidwal sa pagpaningkamot nga makasabot sa doktrina nga may kalabotan sa ilang lahi nga panginahanglan. Ang Espiritu Santo makahimo sa pag-aghat sa mga indibidwal sa pag-ila og mga pihong paagi sa paggamit sa kamatuoran diha sa ilang kinabuhi. Awhaga sila sa pagpasalig nga magpakabuhi subay sa mga pag-aghat nga ilang nadawat, sa mga sugo sa Ginoo, ug sa mga pagtulun-an sa ebanghelyo ni Jesukristo. Usa kini ka tibuok kinabuhi nga proseso sa tanan kinsa nagtinguha nga mamahimong mga disipulo ni Jesukristo.
Ang mosunod nga mga konsepto mao ang dugang nga doktrina nga mahimong makatabang sa mga indibidwal nga nakigbisog sa paggamit og pornograpiya.
Pagkamay-tulubagon
Matag usa kanato anak sa Dios. Tungod nianang balaan nga ilhanan, kita adunay mga gasa, sama sa kabubut-on, ug mga responsibilidad, sama sa pagkamay-tulubagon.
Ang pagkamay-tulubagon diha sa kaugalingon, sa uban, ug sa Ginoo mao ang yawe sa pag-uswag. Itudlo sa mga indibidwal ang mga peligro sa pornograpiya ug kon sa unsang paagi kini nahisupak sa mga sumbanan sa Dios. Tabangi sila sa pagsabot nga sila dili makapadayon nga walay pagpanubag sa makadaot ug sa dili maayong mga kinaiya.
Alang sa mga bishop ug sa mga presidente sa branch: Naglakip kini sa pagkumpisal. Usahay mokabat pa kini og pipila ka miting sa dili pa kadtong tiggamitan og pornograpiya motug-an sa dili maayong mga buhat. Sa imong pakigtagbo kanila, tabangi sila sa pagsabot sa relasyon tali sa kaangayan ug sa kalooy ug kon sa unsang paagi kini nga mga kamatuoran may kalabutan sa pagkumpisal ug sa pagkamay-tulubagon. Gamita ang pagkasensitibo, gugma, ug kainit sa pagdasig ug pag-awhag. Matnguni nga malikayan ang pagpakaulaw o pagpugos. Ang konseho sa pagkamiyembro [membership council] dili gayud ipahigayon alang sa pagdisiplina o paghulga sa mga miyembro kinsa nalulong sa pornograpiya (tan-awa sa Kinatibuk-ang Tamdanan nga Basahon: Pagserbisyo diha sa Ang Simbahan ni Jesukristo sa mga Santos sa Ulahing mga Adlaw [2020], 32.8.2).
Kanunay nga Pag-ampo ug Pagtuon sa Kasulatan
Ang kanunay nga pag-ampo ug pagtuon sa kasulatan mga mahinungdanon alang sa dako nga kausaban sa kasingkasing. Tudloi ang mga indibidwal sa pag-ampo sa piho nga paagi, nga mangayo og kapasayloan ug sa paggamit sa pagtuo diha sa Langitnong Amahan ug ni Jesukristo. Ang mga indibidwal makadawat usab og kalig-on pinaagi sa pagtuon sa Basahon ni Mormon matag adlaw (tan-awa sa Russell M. Nelson, “Ang Basahon ni Mormon: Unsa kaha ang Imong Kinabuhi Kon wala Kini?” Liahona, Nob. 2017, 60–63). Dapita sila kanunay sa pagsiksik sa mga pakigpulong sa kinatibuk-ang komperensya ug sa mga magasin sa Simbahan mahitungod sa pornograpiya ug sa espirituhanong mga tumong.
Pagtuo diha sa Langitnong Amahan ug ni Jesukristo
Ang mga indibidwal kinahanglan gayud nga motuo nga sila mahimong mausab. Tinguhaa ang pagkapositibo ug pagkatinuoray diha kanila samtang imong iribyu ang mga baruganan sa pagtuo nganha sa Langitnong Amahan ug ni Jesukristo. Tudloi sila nga ang kinagamyang tinguha sa pagsugod sa proseso sa kausaban mosangpot sa pag-uswag (tan-awa sa Alma 32:27–28). Samtang ang mga indibidwal moalima sa ilang pagtuo ug mogamit sa unsay ilang nakat-unan, makapatubo sila sa ilang pagtuo alang sa pagsuporta sa dako nga kausaban.
Usa ka Proseso, Dili usa ka Hitabo
Ang paghinulsol usa ka puno sa kalipay nga proseso nga nagkinahanglan og panahon (tan-awa sa Dale G. Renlund, “Paghinulsol: Usa ka Mahimayaon nga Pagpili,” Liahona, Nob. 2016, 121–24; Stephen W. Owen, “Kanunay nga Maayo ang Paghinulsol,” Liahona, Nob. 2017, 48–50). Sama nga ang pagmugna og dili maayong kinaiya nagkinahanglan og panahon, mao usab ang pagpalambo og maayong mga kinaiya nga sama kang Kristo. Ang kanunay nga pag-ampo, pagtuon sa kasulatan, ug pagpalambo og pagtuo diha sa atong Langitnong Amahan ug ni Jesukristo makatabang niini nga proseso.
Wala kini kinahanglana, ug dili usab kaayo kini tinuod nga ang usa ka indibidwal kinahanglang perpekto alang sa pagpadayon o nga siya sa diha-diha dayon makasinati og dako nga kausaban sa kasingkasing. Apan hinoon, siya kinahanglang magpadayon uban sa tinuorayng pagtinguha og kapasayloan, pagwagtang sa masalaypong binuhatan, ug paghimo og dili dinali-dali nga paglambo. Dugang pa, ang tawo kinsa motan-aw og pornograpiya usab kinahanglan gayud nga makahibalo ug modawat sa responsibilidad tungod sa namugna nga kasakit niana nga kinaiya ug sa pag-us-os sa pagsalig nga namugna diha sa iyang mga pakigrelasyon. Kini posibling maglakip sa paghimo og pasig-uli ug kinahanglan nga maglakip sa pagkamatinuoron diha sa kapikas, kon minyo ang indibidwal.
Ipamatuod kanunay ang gahum sa Pag-ula ni Jesukristo ug sa Iyang kapasidad sa pagtabang sa mga tawo nga mausab. Ang Pag-ula ni Jesukristo magdala og hingpit nga kalipay (tan-awa sa Mosiah 4:2–3).