Mga Calling sa Ward o Branch
Pagkaibog sa Sama og Sekso

“Pagkaibog sa Sama og Sekso,” Mga Kapanguhaan sa Pagpanambag (2020).

“Pagkaibog sa Sama og Sekso,” Mga Kapanguhaan sa Pagpanambag.

Pagkaibog sa Sama og Sekso

2:3

Ang pipila ka miyembro tingali mobati og kaibog sa sama og sekso o mopaila nga bayot, tomboy o maibog sa duha ka sekso [bisexual]. Samtang magtinguha ka sa giya sa Espiritu Santo ug mogahin og panahon sa pag-edukar sa imong kaugalingon mahitungod sa mga panginahanglan sa mga anak sa Dios kinsa nakasinati og pagkaibog sa sama og sekso o mopaila nga bayot, imong mapalambo ang gugmang putli ug ang imong kapasidad sa pagpangalagad molambo.

Ang pagbati og kaibog sa managsama og sekso o ang pagpili sa paggamit og ngalan nga nailhanan nga itawag (sama sa bayot, tomboy, o bisexual) dili sala ug wala masupak sa polisiya sa Simbahan. Ang mga pulong sama sa bayot ug tomboy managlahi ang ipasabot ngadto sa managlahing katawhan. Ang pagpaila nga bayot pwedeng nagpasabot sa mga kasinatian sa miyembro sa pagkaibog sa sama og sekso apan wala mopili nga buhaton kini nga mga pagbati. Kini nga tawag mahulagway usab kon giunsa nila sa pagpahayag ang ilang kaugalingon sa emosyonal, pisikal, romantiko, sekswal, o politikal nga paagi. Ayaw hunahunaa nga ang usa ka indibidwal nagsupak sa balaod sa kaputli tungod kay migamit sila og sekswal nga ilhanan nga tawag.

Si Elder M. Russell Ballard mipahayag, “Ang Simbahan ni Jesukristo sa mga Santos sa Ulahing mga Adlaw nagtuo nga ‘ang kasinatian sa pagkaibog sa sama og sekso usa ka komplikadong kamatuoran alang sa daghang mga tawo. Ang kaibog mismo dili sala, apan ang pagbuhat gayud mismo niana nga kaibog usa ka sala. Bisan tuod og ang mga indibidwal wala magpili sa pagbaton niana nga mga pagkaibog, makapili sila unsaon sa pagresponde niana nga kaibog. Uban sa gugma ug pagsabot, ang Simbahan nagtunol og tabang ngadto sa tanang anak sa Dios, lakip [kadtong may pagkaibog sa sama og sekso]’” (“Be Still, and Know That I Am God” [Church Educational System debosyonal alang sa mga young adult, Mayo 4, 2014], broadcasts.ChurchofJesusChrist.org.)

Ang mga tawo kinsa nagsinati og mga pagbati sa pagkaibog sa sama og sekso kinsa nagpasalig nga motuman sa mga sugo sa Dios mahimong makadawat og mga calling sa Simbahan, maghupot og mga rekomend sa templo, ug makadawat og mga ordinansa sa templo.

Ang pinakaimportanting butang nga imong mahimo human motug-an ang usa ka indibidwal sa mga pagbati sa pagkaibog sa sama og sekso mao ang pagpaminaw ug pagtabang kanila nga mobati nga gihangop.

Daghang baruganan mahitungod sa pagkaibog sa sama og sekso magamit usab sa mga nakasinati og kadili kontento sa ilang sekso [gender dysphoria] o nagpaila isip aksyon sa pag-usab sa sekso nga natawhan sa tawo ngadto sa katugbang nga sekso [transgender]. Hinoon, ang pagkaibog sa sama og sekso ug ang kadili kontento sa ilang sekso managlahi ra kaayo. Kadtong nagsinati og kadili kontento sa ilang sekso posibling dili mosinati og kaibog sa sama og sekso, ug ang kadaghanan niadtong makasinati og kaibog sa sama og sekso dili magtinguha sa pagpausab sa ilang sekso.

Alang sa mga pagtulun-an sa Simbahan mahitungod sa pagkaibog sa sama og sekso, sa mga kanunayng ipangutana, ug sa ubang impormasyon nga makatabang sa mga lider, mga matutudlo, mga ginikanan, ug mga indibidwal, tan-awa sa Tabang sa Kinabuhi nga seksyon ug sa Mga Hilisgutan sa Ebanghelyo diha sa ChurchofJesusChrist.org.

Magtinguha sa Pagsabot

Kadtong nakasinati sa pagkaibog sa sama og sekso tingali mobati og kaulaw o dili takus, bisan og sila wala gayud mobuhat niana nga mga pagbati. Tingali mahadlok sila nga basin og imo silang isalikway tungod niini nga mga pagbati, ug tingali wala sila mahibalo unsaon sa pagpahaom ang ilang kasinatian diha sa mga baruganan sa ebanghelyo.

Samtang motambag ka sa mga indibidwal nga nagsinati og kaibog sa sama og sekso, pasalamati ang ilang pagtuo ug kaisog sa paghisgot niini nga mga pagbati diha kanimo. Ipaniguro diha nila ang gugma sa Dios. Angkona nga posibling dili nimo hingpit nga masabtan unsay ilang gibati. Pahibaloa sila nga imo silang gihigugma ug nagtinguhang makasabot. Ipahayag ang imong kaandam sa paghatag og emosyonal ug espiritwal nga suporta.

Ikonsiderar sa mainampoong paagi ang mosunod nga mga pangutana aron mas masabtan ang sitwasyon. Tinguhaa nga masangkap ang pagpangga ug matngoni ang paglikay sa sobra ka detalyadong pagsukit-sukit:

  • Pwede bang sultihan ko nimo og daghan pa mahitungod sa imong kasinatian?

  • Sa unsang paagi kini nga mga pagbati nakaapekto sa imong kinabuhi? Sa unsang paagi kini nakaapekto sa kinabuhi sa imong mga higala ug pamilya?

  • Sa unsang paagi ako makatabang kanimo?

  • Gusto ka ba nga regular kita nga magkita aron mahisgutan kini?

  • Ang mga tawag managlahi og kahulugan para sa lahi-lahing mga tawo. Unsay ipasabot diha nimo sa pulong nga bayot (o tomboy, bisexual, pagkaibog sa sama og sekso, ug uban pa)?

Tabangi ang Indibidwal

Samtang motambag ka sa maong mga miyembro nga nagsinati og pagkaibog sa sama og sekso, wala kinahanglana nga ikaw adunay hingpit nga panabot bahin sa problema. Ang imong tinguha sa pagsabot ug pagtabang maghimo nimong kwalipikado sa pagdawat og giya gikan sa Espiritu samtang ikaw mohigugma ug maminaw.

Tabangi ang maong mga miyembro sa pag-ila nga ang mga pagbati og kaibog sa sama og sekso tingali usa ka aspeto sa ilang mortal nga kasinatian, apan kana nga mga pagbati dili mousab sa ilang mahangturon ug balaang pagkatawo isip mga anak sa Dios.

  • Tabangi ang mga indibidwal sa pag-ila sa ilang tinagsa-tagsa nga kalig-on, mga talento, ug mga abilidad. Awhaga sila sa pagtinguha aron mahibalo sa katuyoan sa Dios ug sa paglantaw, pinaagi sa Espiritu Santo, sa piho ug personal nga direksyon sa ilang pagpadayon.

  • Kon ang indibidwal naapil sa pakighilawas sa sama og sekso, itudlo ang paghinulsol ug pagpasaylo pinaagi sa Pag-ula sa Manluluwas nga si Jesukristo.

  • Ihatag ang regular nga pagtambag ug suporta aron ang maong indibidwal dili mobati nga nag-inusara niini nga panaw.

  • Likayi ang pagsaad nga mominus o mawagtang ang pagkaibog sa sama og sekso baylo sa pagkamatinud-anon.

  • Ang pagminyo dili gayud angay i-rekomendar isip paagi sa pagwagtang o pagpaminos sa pagkaibog sa sama og sekso.

Dapita ang indibidwal sa pagpunting diha sa pag-ugmad o pagbaton og maayong mga sundanan sa pagpakabuhi.

  • Ilha ang espirituhanong mga kalig-on nga mahimo nga, o napalambo na, pinaagi sa pagsanong uban sa pagtuo niana nga mga pagbati sa pagkaibog sa sama og sekso.

  • Tabangi ang maong indibidwal sa pagpangita og mga oportunidad alang sa paghimo og makahuluganong mga kontribusyon diha sa ilang pamilya ug ward pinaagi sa mga calling ug ubang mga oportunidad sa pagserbisyo.

Awhaga ang maong indibidwal sa pagpalambo og maayo, dili sekswal, nga pakigrelasyon sa sama og sekso ngadto sa kasaligan nga mga indibidwal. Tabangi ang indibidwal sa:

  • Pagpangita og kasaligan nga mentor o higala nga ikatagbo sa regular nga paagi aron mahisgotan ang mga tumong ug pag-uswag.

  • Pag-tug-an sa mga pagbati sa pagkaibog sa sama og sekso ngadto sa kasaligan nga mga indibidwal. Ang mahunahunaong pagtug-an niini nga mga pagbati dili lang makatabang apan may kalagmitang mopanalipod sa pipila ka mga indibidwal batok sa depresyon o pagpasakit sa kaugalingon.

  • Tinguhaa ang paglig-on sa mga pakigrelasyon uban sa kasaligan nga mga sakop sa pamilya, mga higala, mga silingan, ug sa kaubanan sa trabaho.

Ang ubang mga indibidwal kinsa nakasinati sa pagkaibog sa sama og sekso posibling mibuhat gayud niini nga mga pagbati ug nakasupak sa balaod sa kaputli:

  • Kon ang indibidwal nagsagubang sa pornograpiya, pag-masturbate, o ubang mga sekswal nga buhat nga supak sa balaod sa kaputli, suportahi ang ilang mga paningkamot sa pagbuntog niini nga mga hagit. Basaha ang “Addressing Pornography [Pagsulbad sa Pornograpiya]” nga seksyon sa ChurchofJesusChrist.org alang sa tabang kalabot sa mga problema sa pornograpiya.

  • Pangitaa ang pinaka-komon nga mga sitwasyon nga mosangpot sa masalaypon nga kinaiya.

  • Sabta ang mga pagbati nga nagpaluyo niini nga mga sitwasyon (sama sa pag-inusara o pagkasalikway).

  • Tabangi ang indibidwal sa pagpalambo og alternatibo nga espirituhanong mga pagsanong.

Ang ubang mga tawo nga nakasinati og pagkaibog sa sama og sekso pwedeng mangayo og giya sa usa ka propesyonal nga tigtambag. Ang terapiya [therapy] makapalig-on sa maayong mga sundanan sa pagpakabuhi. Ikonsiderar ang mosunod:

  • Usahay lisod alang sa mga tawo ang pagtan-aw sa ilang mga kaugalingon sa husto gayod. Ang pagtinguha og ideya gikan sa usa ka propesyonal nga tigtambag nga nahiuyon sa mga baruganan sa ebanghelyo makatabang sa daghang mga aspeto sa kinabuhi, lakip sa mga sundanan sa depresyon ug pagkabalaka, dili makontrolar nga mga kinaiya, sa mga epekto sa pag-abuso, ug uban pang emosyonal nga mga problema. Sigon sa nabantayan ni Elder Jeffrey R. Holland, ang propesyonal nga tabang usahay sama ra ka-importante sa espirituhanon nga tabang (tan-awa sa “Sama sa Usa ka Sudlanan nga Nabuak,” Liahona, Nob. 2013, 41).

  • Ang pagtinguha og ideya gikan sa usa ka propesyonal nga tigtambag usa ka timailhan sa kalig-on ug pagpaubos. Kon ang usa ka tawo mopili sa pagtinguha niana nga tabang, ang uban kinahanglan nga motahod sa iyang katungod sa pagtino sa gitinguha nga mga sangputanan. Ang Simbahan nagrekomendar og mga paagi nga nagtahod sa “kaugalingong determinasyon sa kliyente.”

  • Sa laing pagkasulti, ang maong indibidwal adunay katungod sa pagtino sa gitinguha nga mga sangputanan, ug ang mga terapista ug mga tigtambag kinahanglang motahod sa iyang mga gipangandoy. Alang sa tawo kinsa nagsinati og pagkaibog sa sama og sekso o nagpaila nga bayot, ang pagpatambag makatabang sa tawo sa pamaagi sa pagsulbad sa iyang sekswalidad pinaagi sa mas maayo, mas malampusong mga paagi. Bisan pa, ang pagpatambag ug ang terapiya wala kinahanglana sa tanan.

  • Samtang ang mga pagkausab-usab sa sekswalidad posible o mahitabo ngadto sa pipila ka mga tawo, dili kini maayong pamatasan ang pagtutok diha sa propesyonal nga pagpatambal uban sa paghunahuna nga ang kausaban sa sekswal nga kasinatian kinahanglan gayud nga mahitabo.

    Kon aduna, kontaka ang Family Services alang sa impormasyon o alang sa konsultasyon.

Suportahi ang Pamilya

Ang pagkaibog sa sama og sekso makaapekto sa mga sakop sa pamilya ingon man sa mga indibidwal. Tinoa ang epekto niini ngadto sa pamilya sa maong indibidwal ug tinguhaa ang pagsulbad niana nga mga problema.

  • Suportahi ang mga sakop sa pamilya, lakip ang kapikas, samtang magtambayayong sila sa paglatas sa posibling mga emosyon sama sa pagkalisang, kasakit, kasuko, pagluib, ug pagbati nga sad-an.

  • Tabangi ang mga ginikanan, mga kapikas, o ubang mga sakop sa pamilya sa dili pagbasol sa ilang mga kaugalingon o sa uban aron makatutok sila sa pag-alima sa mga relasyon sa pamilya.

  • Awhaga ang mga sakop sa pamilya sa paghigugma sa maong sakop sa pamilya ug pagdawat sa indibidwal.

  • Awhaga ang mga sakop sa pamilya sa pagtinguha og propesyonal nga suporta ug pagpatambag kon gikinahanglan.

  • Awhaga ang mga sakop sa pamilya sa pagtinguha og impormasyon gikan sa mga kapanguhaan sa Simbahan, sama sa Mga Hilisgutan sa Ebanghelyo o sa Tabang sa Kinabuhi nga seksyon diha sa ChurchofJesusChrist.org.

Gamita ang mga Kapanguhaan sa Ward ug Stake

Ikonsiderar ang paghangyo sa mga lider sa ward o uban nga kasaligan nga mga indibidwal sa paghatag og padayong suporta, giya, ug tabang. Pangayo og pagtugot sa maong indibidwal sa dili pa hisgutan ang sitwasyon ngadto sa uban.

Tinoa kon unsa ang pinakamaayong paagi nga maalagaran kadtong kinsa nagsinati og mga pagbati sa pagkaibog sa sama og sekso.

  • Pagmugna og palibot ug kultura alang sa tanang mga indibidwal aron mobati nga gihangop ug gihigugma.

  • Ikonsiderar ang paghisgot sa maong isyu atol sa konseho sa ward o sa leksyon sa ikalima nga Dominggo. Gamita ang mga materyal gikan sa Tabang sa Kinabuhi nga seksyon diha sa ChurchofJesusChrist.org ug sa “Pagkaibog sa Sama og Sekso” nga anaa sa mga Hilisgutan sa Ebanghelyo sa pag-andam og mga leksyon o mga diskusyon.

  • Pakigbatoki ang mga inuyunan ug ang mga gituohan nga sayop mahitungod sa pagkaibog sa sama og sekso. Kon ang mga tawo sa inyong ward o branch walay panabot pinasikad sa ebanghelyo bahin niini nga problema, padangopa sila ngadto sa Tabang sa Kinabuhi nga seksyon sa ChurchofJesusChrist.org ug “Pagkaibog sa Sama og Sekso” diha sa mga Hilisgutan sa Ebanghelyo.

  • Tabangi ang mga indibidwal sa pagsabot nga ang pagpakig-uban niadtong mga nakasinati og pagkaibog sa sama og sekso wala magpasabot nga sila usab makasinati sa pagkaibog sa sama og sekso ug nga ang kasinatian sa pagkaibog sa sama og sekso dili makadugang sa risgo sa pagka-pedopilya.

Pangita og lokal nga mga tigtambag o mga kapanguhaan sa online nga naghatag og mga serbisyo nga nahiuyon sa mga baruganan sa ebanghelyo.

Ikonsiderar ang pagkontak sa Family Services, kon aduna, aron matino ang mga kapanguhaan.