Mga Kapanguhaan sa Pagpanambag

Unsaon nako sa pagsuporta ang uban samtang sila mag-ugmad og mga plano?

Isip usa ka lider sa Simbahan, ikaw adunay lahi nga oportunidad sa paghatag og suporta sa mga indibidwal nga nagsagubang sa paggamit og pornograpiya ug ngadto sa ilang mga kapikas, mga ginikanan, ug sa uban nga nalambigit. Ang imong suporta mopaminos sa kaulaw nga kasagaran adunay kalabotan sa paggamit og pornograpiya (tan-awa sa Wendy Ulrich, “Dili Sala nga Mahimong Huyang,” Liahona, Abr. 2015, 30–35).

Daghang mga indibidwal makakaplag og kalamposan pinaagi sa pag-ugmad ug pagsunod sa usa ka personal nga plano sa pagbuntog sa pornograpiya. Ang indibidwal kinsa nagtan-aw og pornograpiya ug ang iyang kapikas o sakop sa pamilya tingali magkinahanglan og tinagsa-tagsa nga plano aron sa pagkaplag og kaayohan. Responsibilidad sa matag indibidwal ang pagtinguha og personal nga pagpadayag, pagpangita og tubag, ug pag-ugmad ug pagsunod sa iyang plano. Isip usa ka lider, mahimo kang moawhag ug mosuporta sa mga indibidwal samtang mag-ugmad sila og mga plano, apan ang responsibilidad sa paghimo og mga plano ug pagtimbangtimbang sa kaepektibo niini ilaha sa mga indibidwal.

Pinaagi sa dinasig nga pagpakigsulti sa mga indibidwal ug sa ilang mga kapikas o pamilya, ikaw mahimong moawhag nila sa pag-ugmad og mga plano sa pagbuntog niining lisod nga hagit. Samtang ang mga indibidwal mag-ugmad og mga plano sa pag-usab, ikaw makasuporta kanila sa mosunod nga mga paagi:

• Mopunting kang Kristo.

• Mopaapil sa uban.

• Mogamit og maayong mga kapanguhaan.

Mopunting kang Kristo

Bisan og adunay daghang mga pamaagi sa pagtabang sa mga indibidwal aron makapadayon, ang imong tahas isip lider mao ang pagtabang sa uban sa pagduol ngadto kang Kristo, pagkaplag og espirituhanong pagkaayo, ug pagtinguha nga makipakig-uli sa Dios ug niadtong ilang napasakitan tungod sa ilang kinaiya.

Samtang mag-awhag ikaw sa mga indibidwal sa pag-ugmad og mga plano, paningkamoti ang pagtabang kanila nga mapalambo ang ilang pagtuo sa Langitnong Amahan ug ni Jesukristo. Tabangi ang uban sa pag-ila sa mga panalangin nga moabot gumikan sa pagkamasulundon ngadto sa Langitnong Amahan. Awhaga sila sa paggamit sa mga panalangin sa Pag-ula ni Jesukristo ug sa pagtuman sa ilang mga pakigsaad. Dapita sila sa pagtinguha og direksyon sa Espiritu samtang sila mopatuman ug mohapsay sa ilang mga plano.

Paningkamoti ang pagtabang sa mga indibidwal sa pagdangop ngadto sa Manluluwas. Siya ang pinakatinubdan sa kalig-on ug nagbaton og pinakalantip nga kaalam. Nakaila siya ug nahigugma sa matag tawo sa tinagsa-tagsa. Samtang ang mga indibidwal modangop sa Ginoo, magiyahan sila kon unsaon sa pag-atubang kini nga problema, ug Siya mangalagad diha kanila. Tinguhaa ang inspirasyon kon unsaon sa pagsuporta ang mga indibidwal ug mga kapikas ug unsaon sa pagtabang kanila nga makatukod sa ilang relasyon uban sa Manluluwas.

Ilakip ang Uban

Ang pornograpiya molambo og maayo diha sa tago ug sa kasagaran mopasiugda og kaulaw. Ang pag-awhag sa mga indibidwal sa pakigkonektar ngadto sa uban makatabang aron mobati sila nga nalig-on. Importante nga ang mga indibidwal ug ang ilang mga kapikas mohimo og sistema nga makasuporta gamit ang mga tawo kinsa makadasig kanila ug sa ilang paglambo.

Ang gidak-on ug matang sa suporta nga gikinahanglan mag-agad sa mga elemento nga may pagkalahi sa indibidwal. Ang indibidwal nga mitan-aw og pornograpiya sa pipila lang ka higayon posibling gamay ra og panahon nga gikinahanglan sa pagwagtang sa problema. Kini susama gihapon alang sa iyang kapikas. Apan, ang usa ka indibidwal nga mitan-aw og pornograpiya sulod sa dugay nang panahon nga wala mahibaloi sa kapikas o midangat na sa pagtan-aw og hardcore nga pornograpiya malagmit magkinahanglan og dugang nga panahon ug dugang nga tabang. Siya o ang iyang kapikas tingali magkinahanglan og dugang nga panahon ug dugang nga tabang.

Pamilya

Ang gugma, suporta, ug giya maggikan sa mga sakop sa pamilya. Awhaga ang mga indibidwal sa pagkuha og kalig-on gikan sa ilang mga kapikas, mga ginikanan, o sa paryente nga pamilya sa pag-atubang sa problema sa pornograpiya. Hinoon, ang mga indibidwal kinahanglan nga mohunahuna sa kasakit nga posibling gibati sa mga sakop sa pamilya. Awhaga ang mga indibidwal sa pagpangita og suporta gikan sa mga sakop sa pamilya kinsa andam sa pagsuporta kanila. Ang paggamit og pornograpiya sa kasagaran magkagrabe sa tago; mao nga, ang mainampingon nga pagtug-an usa ka mapuslanong bahin sa pagkaayo. Kabahin sa minyo, minyoonon, o mapasaligon nga mga magtiayon, ang pagtug-an gikinahanglan.

Gamita ang Tukma nga mga Kapanguhaan

Sa kasagaran adunay daghang elemento nga mosangpot sa indibidwal sa paggamit og pornograpiya. Ang espiritwal nga mga kahupayan, bisan importante, tingali dili kay mao lang ang tabang nga gikinahanglan sa indibidwal. Tingali nagkinahanglan usab sila nga mosanong sa ubang mga elemento sa ilang kinabuhi, sama sa biyolohikal [biological], sikolohikal [psychological], ug sosyal nga mga impluwensya. Awhaga sa tukmang paagi ang mga indibidwal sa pagkonsiderar sa mga matang sa tabang nga tingali ilang gikinahanglan sa pag-atubang niining uban pa nga mga impluwensya sa ilang kinabuhi. Maglakip kini sa pagpangita og tabang gikan sa mga kapanguhaan sama sa kasaligan nga mga website ug sa mga propesyonal sa medikal ug sa kahimsog sa pangisip.

Mga Propesyonal

Ang mga propesyonal sa pisikal ug sa kahimsog sa pangisip tingali gikinahanglan, ilabi na kon ang mga indibidwal may gamay rang mga kalamposan bisan sa daghang paningkamot sa ilang mga pagsulay nga mowagtang sa pornograpiya sa ilang kinabuhi. Ang mga kapikas tingali magkinahanglan usab niini nga matang sa tabang samtang nag-atubang sila sa pagbudhi sa ilang pagsalig. Si kinsa man ang ilang pilion nga iapil sa ilang mga plano sa pagbuntog sa pornograpiya kinahanglan nga komportable sa mga sumbanan sa ebanghelyo.

Teknolohiya

Daghang managlahi nga mga online tools ang mahimong makatabang sa mga indibidwal sa pagbatok sa tintasyon sa pagtan-aw og pornograpiya. Ang pipila niini naghatag og mapuslanong mga impormasyon, sama sa “Addressing Pornography [Pagsulbad sa Pornograpiya]” nga seksyon diha sa ChurchofJesusChrist.org, ang Suporta nga Giya: Tabang alang sa mga Kapikas ug Pamilya sa mga Nagpaayo, sa mga media channel sa Simbahan, fightthenewdrug.org, ug dugang pa. Ang pipila sa digital nga mga kapanguhaan gigama sa pagpakgang sama sa mga filter nga magmonitor o mosagang sa pag-access, ug uban pang mga kapanguhaan, sama sa fortify.com, nagsangkap og nakadensinyo nga pagpakgang.

Mga Elemento sa Epektibo nga Plano

Samtang ang mga indibidwal mohimo og mga plano, awhaga sila sa pagkonsiderar:

• Sa pagsulat sa ilang mga plano, nga ibutang ang pihong mga kalihokan ug mga tumong sa klarong paagi, ug dayon sa pagpaambit, pagtimbangtimbang, ug pagpahiuyon sa mga plano kon gikinahanglan.

• Sa pag-ila kon unsaon sa pagpabiling mapasaligon, bisan og makasugat sila og mga kapakyasan.

• Sa paghimo og plano sa pagkamay-tulubagon, diin sila mo-report sa ilang pag-uswag ngadto sa kasaligan nga sakop sa pamilya, higala, o mga lider sa Simbahan. Ang mga report sa pagkamay-tulubagon dili kinahanglan nga buhaton kauban sa bishop.

• Sa pagdapit og usa ka kapikas, ginikanan, ubang sakop sa pamilya, o laing tawo sa pagtimbang-timbang ug pagfollow-up sa mga plano. Makatabang ang pag-report ngadto sa usa ka tawo sa regular nga paagi bahin sa kamaayo sa dagan sa mga plano. (Tan-awa sa “What do I need to focus on to overcome my pornography habit [Unsay angay nakong tutukan sa pagbuntog sa akong pagkaanad sa pornograpiya?”)