Mga Misyonaryo Nga Nauli og Sayo

4:29

Ang mga misyonaryo kinsa nauli gikan sa o nakakompleto sa ilang mga misyon og sayo kay sa gilauman tingali makasinati og lahi nga mga hagit. Samtang nangandam sila sa ilang mga misyon ug mibiya aron moserbisyo, lagmit napuno sila sa dako nga paglaum ug tinguha nga moserbisyo sa Ginoo. Kon nauli sila og sayo sa bisan unsang rason (sama pananglit, mga problema sa pisikal o kahimsog sa pangisip o kalapasan), mahimong bation nila ang kadismaya, kaulaw, o pagkawala sa paglaom. Posibling magduda sila sa inspirasyon nganong nakaserbisyo pa sila sa misyon. Kining nauli nga mga misyonaryo posibling mabalaka kon unsa unyay tan-aw sa ubang tawo kanila o gani unsay tan-aw sa Ginoo kanila. Bation nila nga daw pakyas sila o dili takus ug tingali hukman nila ang ilang kaugalingon sa negatibong paagi. Posibling bation usab nila ang kapildihan ug gani mahimo nga moagi og managlahing mga yugto sa kasubo.

Ang mga misyonaryo nga nauli og sayo nagkinahanglan sa hiniusang mga paningkamot sa pamilya, mga higala, mga lider, ug mga miyembro sa ward aron matabangan nga malahutay nila ang lisud nga panahon. Motabang uban ang gugma sa paghupay, pagdasig, ug pag-atiman sa matag nauli nga misyonaryo ug sa iyang pamilya. Awhaga ang misyonaryo, iyang pamilya, ug ang mga miyembro sa ward sa pag-isip kaniya nga usa siya ka “returned missionary” ug dili “nauli og sayo nga misyonaryo” o “na-release og sayo nga misyonaryo.” Kini nga pagpili sa pulong makatabang aron maminusan ang negatibong pagtan-aw gumikan sa sayo nga pagka-release.

Magtinguha sa Pagsabot

Samtang istoryahan nimo ang mga indibidwal, siguroa ang pagpakita og gugma ug empatiya sama sa buhaton sa Manluluwas. Tungod kay ang matag sitwasyon managlahi ug ang matag kahimtang sa matag tawo lain-lain, ikonsiderar sa mainampoong paagi ang pagpangutana og sama niini aron mas makasabut ka sa mga problema sa misyonaryo ug mahibal-an ang iyang panginahanglan.

Unsay imong gibati mahitungod sa imong misyon?
Unsa nga mga panalangin ang imong nadawat gikan sa imong pagserbisyo?
Unsa ang imong labing dakong mga kabalaka karon?
Unsay gibati nimo sa imong pagka-release?
Unsay gibati sa imong pamilya bahin sa imong pagka-release?
Unsay imong mga plano sa pagsulbad sa mga hagit nga hinungdan sa imong pag-uli?
Unsa nga mga kapanguhaan sa suporta ang anaa kanimo?
Sa unsang paagi ang mga leksyon nga nakat-unan nimo sa imong misyon makalig-on kanimo atol niini nga panahon sa transisyon?
Kumusta ang imong relasyon uban sa Ginoo karon?

Tabangi ang Indibidwal

Samtang magtabang ka sa nauli na nga misyonaryo sa iyang sitwasyon, hunahunaa ang pipila niini nga mga sugyot:

Kon kini makatabang, pakigkita sa nauli na nga misyonaryo sa regular nga paagi aron matabangan siya nga makakita og paglaum ug pagkaayo.

Tabangi ang misyonaryo sa pagsabot sa gahum sa Manluluwas aron matabangan siya latas sa bisan unsa nga hagit (tan-awa sa Alma 7:11–12; Doktrina ug mga Pakigsaad 88:6; Mosiah 24:13–15).
Tabangi nga makita sa misyonaryo ang iyang pagka-siya ug bili isip usa ka anak sa Dios ug sa pag-ila sa iyang tinagsa-tagsa nga mga kalig-on, mga talento, mga abilidad, ug espiritwal nga mga gasa (tan-awa sa Doktrina ug mga Pakigsaad 18:10–11; Mga Buhat 17:28–29).
Awhaga ang misyonaryo sa pagtinguha og usa ka panalangin sa pagkapari.
Kon ang usa ka misyonaryo nauli tungod sa kondisyon sa pisikal o kahimsog sa pangisip, tabangi siya nga madawat niya ang diha-diha dayon ug tukma nga pagtambal.

Tabangi ang misyonaryo sa pagsabot nga ang Ginoo naghatag og bili ug nagdawat sa serbisyo nga iyang gihimo isip misyonaryo, lakip sa iyang pagdawat sa tawag nga moserbisyo (tan-awa sa Doktrina ug mga Pakigsaad 124:49).

Ipahayag ang pasalamat sa serbisyo nga gihatag sa maong tawo isip usa ka misyonaryo.
Kon ang hinungdan sa pagka-release sa misyonaryo mao ang mga rason sa pisikal o kahimsog sa pangisip, ang bishop pwede nga mopa-report kaniya sa high council sa stake.
Pangita og mga paagi sa pagtabang kaniya nga mobati nga gihangop og balik sa ward o sa pagpaambit sa mga kasinatian mahitungod sa misyon. Kon angay, pangutan-a ang misyonaryo kon gusto ba siyang mohalad og pag-ampo, mopaambit sa iyang pagpamatuod, o mamulong sa simbahan.
Tabangi ang misyonaryo sa pagsabot nga siya adunay daghang oportunidad nga makaalagad sa buhat sa Ginoo, bisan og siya dili na magsul-ob og misyonaryo nga name tag.

Ipasabot og maayo nga ang nag-unang prayoridad sa nauli nga misyonaryo mao ang pagpaayo ug nga ang mga desisyon bahin sa pagbalik sa misyonaryo nga pag-alagad moabot sa dili madugay.

Ayaw pugsa ang misyonaryo sa pagbalik sa natad sa misyon. Kini nga desisyon moabut lang human mahingpit ang pagkaayo gikan sa mga hagit nga maoy hinungdan nga siya nauli.
Alang niadtong nagtinguha nga mobalik sa misyonaryo nga pagserbisyo o nagtinguha og laing mga oportunidad sa pagserbisyo, tan-awa ang artikulo nga “Returning to Service.”

Awhaga ang misyonaryo sa padayon nga pakigkontak sa presidente sa misyon ug sa iyang asawa samtang padayon pa siya niini nga panahon sa transisyon.

Kon ang misyonaryo dili mobalik sa full-time nga pagserbisyo, tinguhaa ang pagpangita og suporta ug pag-atiman. Kon magsugod na sa paghimo og mga tumong ang nauli nga misyonaryo para sa iyang kaugmaon, itambag ang ingon niining mga butang:

Edukasyon
Panarbaho
Mga pakigrelasyon (pakig-date)
Mga oportunidad sa pagserbisyo
Pagtambong og institute
Pagtambong sa templo ug katakus

Alang sa bishop: Kon ang misyonaryo mobalhin o mag-usab og ward human sa pag-uli, pakigsultihi ang bag-ong bishop ug siguroa nga mahibalo siya sa sitwasyon sa nauli nga misyonaryo.

Kon ang misyonaryo nauli tungod sa mga isyu sa katakus, tabangi siya alang sa proseso sa paghinulsol (tan-awa sa Kinatibuk-ang Tamdanan nga Basahon: Pagserbisyo diha sa Ang Simbahan ni Jesukristo sa mga Santos sa Ulahing mga Adlaw [2020], kapitulo 32).
Kon ang mga rason sa pagka-release sa nauli nga misyonaryo mao ang pisikal o kahimsog sa pangisip, ang bishop mahimong mokonsiderar sa pagreport kaniya ngadto sa high council sa stake.

Suportahi ang Pamilya

Ang kasinatian sa nauli og sayo nga misyonaryo makaapekto usab sa kinabuhi sa iyang mga sakop sa pamilya. Tinoa ang epekto niini ngadto sa pamilya sa miyembro, ug tinguhaa ang pagtabang bahin niana nga mga problema.

Pakigtambag ug tabangi ang mga sakop sa pamilya sa kaugalingon nilang mga panglimbasog, mga kabalaka, o mga pangutana nga moabut isip resulta sa sayo nga pag-uli sa misyonaryo.

Tabangi ang mga sakop sa pamilya sa pagsabot kon sa unsang paagi ang Manluluwas moayo, mohatag og kalinaw, ug mohupay kanila ug sa nauli nga misyonaryo.

Awhaga ang pamilya nga magtinambagay sila mahitungod sa mga panginahanglan sa nauli nga misyonaryo ug sa anaa nga mga kapanguhaan sa pagtabang kaniya.

Tabangi ang mga sakop sa pamilya sa pagtutok sa ilang mga kabalaka diha sa misyonaryo ug sa iyang pagkaayo imbis sa paghunahuna kon unsa kahay ikasulti sa uban bahin sa sitwasyon.
Tabangi ang mga ginikanan sa misyonaryo sa pagsabut nga ang pag-uli og sayo sa ilang anak wala magpasabot nga may nabuhat silang sayop isip mga ginikanan.
Tabangi ang mga ginikanan sa pagsabot nga dili sila angayang mosilot o mobasol sa ilang kaugalingon o sa uban sa sayo nga pag-uli sa misyonaryo.

Ayaw awhaga ang mga sakop sa pamilya sa pagpugos sa misyonaryo nga mobalik sa misyonaryo nga pagserbisyo kon dili pa siya andam o kon ang misyonaryo dili na magtinguha sa pagbalik.

Gamita ang mga Kapanguhaan sa Ward ug Stake

Ikonsiderar ang pagpakigtambayong sa mga lider sa ward o sa ubang kasaligan nga mga indibidwal sa paghatag og padayong suporta, giya, ug tabang. Pangayo og pagtugot sa maong indibidwal sa dili pa hisgutan ang sitwasyon ngadto sa uban.

Ang mga lider tingali mokonsiderar sa paghisgot sa sitwasyon sa nauli nga misyonaryo diha sa ward council aron sa pagpangita og mga kapanguhaan ug mga oportunidad sa pagtabang kaniya.

Pangita og mga paagi nga ang mga lider sa Simbahan aktibong makaserbisyo ug makasuporta sa nauli nga misyonaryo ug sa iyang pamilya atol niining lisud nga panahon.

Awhaga ang misyonaryo sa pagpangita og tawo nga kasaligan nga mahimong giya [mentor], ug awhagon sila sa regular nga pagtagbo.

Ang giya mahimo nga mao ang tigpangalagad nga brother o sister sa misyonaryo.
Ikonsiderar ang pagpili og lain pang nauli nga misyonaryo nga adunay susamang kasinatian kinsa nakakita og paglaum ug kalig-on pinaagi sa Manluluwas nga si Jesukristo ug sa Iyang ebanghelyo.

Ilakip ang misyonaryo sa mga calling ug mga oportunidad sa pagserbisyo ug pagpamulong sa tukma nga mga paagi kon siya andam na sa paghimo niini.

Kon angay, ikonsiderar ang dugang nga tabang gikan sa mga kapanguhaan sa Simbahan ug mga kapanguhaan sa komunidad nga nahiuyon sa mga baruganan sa ebanghelyo.

Sa ubang mga dapit, ang Family Services mohatag og mga serbisyong konsultasyon alang sa mga lider sa Simbahan ug mga sesyon sa pagpanambag alang sa mga misyonaryo nga nauli og sayo.
Kon walay Family Services, ikonsiderar ang dugang nga mga kapanguhaan sa komunidad.