Mensahe sa Unang Kapangulohan
Gitawag sa Buhat
Ni Presidente Thomas S. Monson
Sweat of the Brow, ni Gary Smith
Sa dihang si Propeta Joseph Smith mitawag kang Elder Heber C. Kimball (1801–68) sa “pag-abli sa pultahan sa kaluwasan” isip usa ka misyonaryo sa England, si Elder Kimball gibuntog sa mga pagbati sa kakulang.
“O, Ginoo,” siya misulat, “Ako usa ka tawo nga putolputol ang sinultihan, ug hingpit nga dili angay alang niana nga buhat.”
Si Elder Kimball midawat sa tawag bisan pa niana, midugang: “Kini nga mga konsiderasyon wala magpugong kanako sa dalan sa katungdanan; sa higayon nga akong nasabtan ang kabubut-on sa akong Langitnong Amahan, ako mibati og usa ka determinasyon nga moadto dili igsapayan kon bisan unsa pa kapeligro, nagtuo nga Siya motabang kanako sa Iyang walay kinutuban nga gahum, ug pagtuga kanako sa matag kwalipikasyon nga akong gikinahanglan.”1
Akong batan-ong mga kaigsoonan kinsa gitawag ngadto sa full-time nga misyonaryo nga buhat, kamo gitawag sa buhat tungod kay kamo, sama ni Elder Kimball, “adunay tinguha sa pag-alagad sa Dios” (D&P 4:3) ug tungod kay kamo andam ug takus.
Ang senior nga mga magtiayon, kamo gitawag sa buhat alang sa mao gihapon nga mga rason. Kamo, hinoon, nagdala dili lamang og usa ka tinguha sa pagserbisyo apan usab kaalam nga naangkon gikan sa mga panahon sa sakripisyo, gugma, ug kasinatian nga ang inyong Amahan sa Langit makagamit sa pagtandog sa mga kasingkasing sa Iyang mga anak nga lalaki ug mga anak nga babaye kinsa nangita sa kamatuoran. Walay pagduha-duha kamo nakat-on nga dili gayud kita makahigugma og tinud-anay sa Ginoo hangtud nga kita makaserbisyo Kaniya pinaagi sa pagserbisyo sa uban.
Sa inyong mga tinguha sa pagserbisyo isip mga misyonaryo, kamo modugang og pagtuo ug kalig-on, kaisug ug pagsalig, tinguha ug kamanunuton, determinasyon ug pagpahinungod. Ang mapahinunguron nga mga misyonaryo makapahinabo og mga milagro sa natad sa misyon.
Si Presidente John Taylor (1808–87) misumada sa mahinungdanon nga mga kinaiya sa mga misyonaryo niini nga paagi: “Ang matang sa mga lalaki [ug mga babaye ug mga magtiayon] nga gusto natong modala niini nga mensahe sa ebanghelyo mao ang mga tawo kinsa adunay hugot nga pagtuo sa Dios; ang mga tawo kinsa adunay hugot nga pagtuo sa ilang relihiyon; ang mga tawo kinsa mopasidungog sa ilang priesthood; mga tawo kinsa … ang Dios adunay pagsalig. … Kita nagkinahanglang sa mga tawo nga puno sa Espiritu Santo ug sa gahum sa Dios [,] … mga tawo sa kadungganan, kaligdong, hiyas ug kaputli.”2
Namahayag ang Ginoo:
“Kay tan-awa ang umahan puti ug andam na sa pag-ani; ug tan-awa, siya nga mogalab sa iyang sanggot uban sa iyang kusog, sama ra nga nagtigum og panalangin nga siya dili mahanaw, apan magdala og kaluwasan ngadto sa iyang kalag;
“Ug hugot nga pagtuo, paglaum, gugma nga putli ug pagmahal, uban ang bug-os nga tinguha ngadto sa himaya sa Dios, nakahimo kanila nga takus alang sa buhat” (D&P 4:4–5).
Ang inyong tawag miabut pinaagi sa inspirasyon. Ako mopamatuod nga kon kinsa ang gitawag sa Dios, ang Dios mopasarang. Makadawat kamo og langitnong tabang samtang kamo mainampoong maghago sa ubasan sa Ginoo.
Ang nindot nga saad nga gihatag sa Ginoo ngadto sa mga misyonaryo sayo niini nga dispensasyon, nga anaa sa Doktrina ug mga Pakigsaad, ang ma-inyo: “Ako molakaw diha sa inyong atubangan. Ako anaa sa inyong tuo nga kamot ug sa inyong walà, ug ang akong Espiritu mahimo nga anaa sa inyong mga kasingkasing, ug ang akong mga anghel anaa libut kaninyo, aron sa pagtabang kaninyo” (D&P 84:88).
Samtang kamo magserbisyo, kamo magtukod og nindot nga mahangturon nga mga panumduman ug panaghigalaay. Wala ako makahibalo og laing nataran nga makahatag og mas abunda nga kalipay kay sa nataran sa misyon.
Karon, usa ka pulong alang niadtong mga elder, mga sister, ug mga magtiayon kinsa, sa bisan unsang rason, dili makahimo sa paghuman sa ilang gi-assign nga mga panahon sa natad sa misyon: Ang Ginoo nahigugma kaninyo. Siya nagdayeg sa inyong sakripisyo. Siya nahibalo sa inyong mga kapakyasan. Sayri nga Siya sa gihapon adunay buluhaton alang kaninyo nga buhaton. Ayaw tuguti si Satanas sa pagsulti kaninyo sa sukwahi. Ayaw kaguol; ayaw pagpakawala sa paglaum; ayaw kasubo.
Samtang ako nag-obserbar sa kinatibuk-ang komperensya sa wala madugay human ako gitawag sa pagpangulo sa Simbahan: “Ayaw kahadlok. Pagmaya. Ang umaabut sama kahayag sa inyong hugot nga pagtuo.”3 Kana nga saad tinuod gihapon alang kaninyo. Busa ayaw pagpakawala sa inyong hugot nga pagtuo, tungod kay ang Ginoo wala mawad-i sa hugot nga pagtuo diha kaninyo. Pagtuman sa inyong mga pakigsaad ug padayon sa unahan.
Ang kalibutan nagkinahanglan sa ebanghelyo ni Jesukristo. Hinaut ang Ginoo mopanalangin sa tanan sa Iyang mga Santos—dili igsapayan kon asa kita nagserbisyo—nga may usa ka misyonaryo nga kasingkasing.