Kabatan-onan
Usa ka Misyonaryo nga walay Tag
Ang tagsulat nagpuyo sa Utah, USA.
Sa eskwelahan ako adunay usa ka magtutudlo kinsa adunay matang sa personalidad nga makahadlok sa tawo nga mopakigbahin og sukwahi nga panlataw sa usa ka hilisgutan. Usa ka adlaw miabut kami sa hilisgutan sa LDS nga mga misyonaryo. Nasayud ko nga ako makatubag sa iyang mga pangutana, apan mibati ko nga dili lang. Busa misulti lang ko og igo nga makatagbaw kaniya nianang higayuna.
Sa sunod nga pipila ka semana nagsige ko og hunahuna bahin sa among panag-istoryahanay. Sa katapusan, dunay misantop sa akong hunahuna nga kinahanglan nako siyang hatagan sa Basahon ni Mormon uban sa pipila ka gimarkahan nga mga pulong mahitungod sa misyonaryo nga buhat. Sa paghunahuna pa lang nahadlok nako, apan kini nagpadayon. Nasayud ko nga kini usa ka pag-aghat nga kinahanglan nakong sundon.
Mga duha ka bulan ang milabay, giandam nako ang Basahon ni Mormon. Sa tibuok adlaw akong gibati nga daw masunog ang akong bag. Ang tulo ka mga segundo nga pagtunol niini ngadto kaniya sa akong pagbiya alang sa winter break maoy labing hadlok sa gutlo sa akong kinabuhi.
Sa unang adlaw sa pagbalik sa klase, miagi ko sa iyang classroom apan nahadlok nga mosulod. Dayon nakadungog ko niyang mitawag kanako, ug siya mihatag kanako og usa ka kard. Ako kining gibasa sa agianan. Siya misulat nga iyang gitun-an og “taas nga panahon” ang mga tudling nga akong gimarkahan, ug nagsugod siya sa pagsabut sa pipila ka mga rason nga nagpaluyo sa akong hugot nga pagtuo.
Nadasig ko sa pagpakigbahin sa ebanghelyo karon, ug gani mas nadasig pa ko sa pagserbisyo sa akong Langitnong Amahan sa usa ka misyon sa dili madugay.