Sa Labing Daling Panahon

Ni Richard L. Bairett Jr.

Ang tagsulat nagpuyo sa California, USA, sa panahon niini nga kasinatian.

Nagkinahanglan og usa ka butang nga talagsaon aron makapauli ko alang sa bunyag sa akong anak nga babaye.

Ang akong anak nga babaye bag-o pa lang nag-otso anyos ug naghinam-hinam nga mabunyagan nako siya. Ang iyang mga apohan moabut usab alang sa espesyal nga okasyon, nga nakadugang sa iyang kahinam ug pagpaabut. Hinoon, samtang nagkaduol ang importante nga adlaw, morag dili ko makatambong sa bunyag.

Ang akong trabaho isip usa ka piloto sa eroplano sa militar ug squadron assistant operations officer busy kaayo, apan mas nagkagrabe pa gyud kini sa dihang mibiya ang akong operations (ops) officer alang sa laing buluhaton. Nag-atiman ko og sagunson nga mga gisangun nga misyon. Aron makahimo sa gikinahanglan nga gidaghanon sa mga flight crew, napugos ko sa pagkanselar sa pagbansay, paghunong og pipila ka kalihokan sa squadron ug pagkanselar sa mga bakasyon nga giplano pipila na ka bulan ang milabay.

Ang mga aircrew mobiya alang sa gimando nga 21 ka adlaw nga biyahe nga dunay gamayng kahigayunan nga makapauli og sayo. Ug sa dihang ang akong ops officer ug laing assistant ops officer mibalik, lisud ang pagpangatarungan nganong magpabilin ko alang sa kalihokan sa pamilya. Unsaon nako sa pagpahayahay nga daghan man gani kaayo ko og gipasakripisyo sa uban?

Naglibug kaayo ko. Naningkamot ko kanunay nga unahon ang akong pamilya kay sa akong trabaho, apan talagsaon kini nga mga kahimtang, ug duna usab akoy katungdanan nga moserbisyo sa akong nasud. Ang akong ops officer, bisan dili miyembro sa Simbahan, nakasabut sa kaimportante niini nga kalihokan sa akong pamilya ug mitugot kanako sa paghimo og kaugalingon nakong desisyon. Human sa daghan nga pag-ampo ug panaghisgot sa pamilya, akong gibuhat kon unsay akong gibati nga husto ug gi-iskedyul ang akong pagkuyog sa sunod nga misyon.

Sa dihang ang akong crew gipahibalo alang sa misyon nga magsugod sa Lunes sa buntag, morag walay kahigayunan nga makabalik ko alang sa bunyag sa akong anak nga babaye inigka-Sabado. Mobiyahe mi ngadto sa dapit nga kuhaanan og kargamento, dayon sa usa ka pahulayanan nga base, diin gikinahanglan mi nga mopahulay sa dili pa mobiyahe pag-usab. Human niana mobiyahe mi ngadto sa laing dapit ug mopahulay, dayon mohatud og kargamento ngadto sa layo kaayo nga dapit, ug inigbalik og biyahe, mohunong na usab aron mopahulay ang crew, ug mopauli aron sa pagkolekta og dugang pa nga kargamento ug mobalik na usab. Kasagaran nagkinahanglan og dili mominos sa pito ka adlaw aron makompleto kini nga buluhaton sa usa ka higayon, apan nasayud ko nga ang akong pamilya nag-ampo nga makauban ko og balik. Ang ilang hugot nga pagtuo ug mga pag-ampo nakatabang nako nga makabaton og hugot nga pagtuo, ug diha-diha dayon naklaro nga dili kini usa ka kasagaran nga misyon.

Una, imbis nga mohunong og usa ka adlaw o duha, ang among misyon gisangunan nga mag-air-refuel ug magpadayon nga walay hunong paingon sa among unang internasyonal nga lokasyon. Dayon, human sa minimum nga panahon sa legal nga pagpahulay sa crew, gipahibalo mi nga paadtuon sa laing misyon ug mobalik ngadto sa layo nga lokasyon nga dad-an sa kargamento. Ang pagdiskarga sa ekipo ug ground-refueling sa among destinasyon maayo ra gayud, ug human sa laing minimum nga panahon sa pagpahulay sa crew, gipahibalo mi nga pabalikon diretso sa among home base. Mamauli na mi sulod lang sa usa ka adlaw!

Sobra ang akong kalipay nga sultihan ang akong pamilya nga hapit na ko makauli. Apan dayon ang akong asawa misulti nako nga ang tulumanon sa bunyag bag-o lang gibalhin gikan sa alas 5:00 sa hapon ngadto sa alas 2:00 sa hapon aron masulod ang kalihokan sa kabatan-onan sa stake. Akong gitawag ang among airlift stage manager ug mipasabut sa sitwasyon. Human sa usa ka mubo nga kahilum, mitubag siya nga dunay igong magamit nga mga crew aron mauswag ang sunod namong biyahe hangtud sa alas 5:00 sa hapon sa Sabado—ang oras nga ang tulumanon sa bunyag orihinal nga naiskedyul nga sugdan!

Sa biyahe pauli, samtang miagi mi sa kabukiran duol sa akong panimalay, akong nakita nga ako dunay usa pa ka pagsulay sa pagtuo nga nahabilin: ang mga suga sa siyudad natabunan sa gabon. Mao kini ang pinakagrabe nga visibility nga akong nasulayan sukad sa akong pagpatugpa og eroplano. Dali kaming mihimo og plano nga mobalhin ngadto sa lain nga tugpahanan kon gikinahanglan, mikompleto sa among mga checklist, ug mipaubos aron tan-awon kini.

Samtang kami nagdali padulong sa tugpahanan sa 200 ka pye (60 m) ibabaw sa level sa yuta, hingpit kaming nalibutan sa gabon. Sa kalit lang, sa paglapas sa 120 ka pye (37 m), dihay usa ka gisugaan nga tugpahanan sa among atubangan, ug pipila ka segundo ang milabay kami luwas na nga nakatugpa. Ang tanan nakaginhawa na gayud.

Ang wala damha nga sunod-sunod sa daw sulagma nga mga panghitabo nakapahimo sa akong crew sa pagpahigayon og daghang hugna nga pagbiyahe ngadto sa pikas nga bahin sa kalibutan ug pabalik sa labing daling panahon, ug nakahimo sa pagpauli alang sa usa ka mubo nga panahon nga mitukma sa bunyag sa akong anak nga babaye. Pinaagi sa tabang sa Ginoo nakahimo ko sa pagtuman sa akong katungdanan sa akong nasud, sa akong squadron, ug labaw sa tanan sa akong pamilya. Samtang ang kinabuhi magpadayon ra unta kon gikinahanglan namong i-iskedyul og usab ang bunyag sa among anak nga babaye, ang Langitnong Amahan mipahibalo namo nga Siya nahigugma namo ug nakadungog sa among mga pag-ampo. Gihatagan Niya ang akong anak nga babaye og handumanan niadtong milagroso nga mga panghitabo isip usa ka pagsaksi nga Siya nahigugma kaniya, ug ang akong asawa ug ako nakabaton og mas lig-on nga pagsaksi nga “bisan unsa nga kamo mangayo sa Amahan diha sa akong ngalan, nga matarung, magtuo nga kamo makadawat, tan-awa kini ihatag nganha kaninyo” (3 Nephi 18:20).