Ang mga Dominggo Alang sa Mas Daghan Pa
Ang tagsulat nagpuyo sa L’viv, Ukraine.
Among nakita nga ang pagdapit ni Nikolai sa pagsunod sa mga baruganan sa ebanghelyo mas epektibo kay sa pagsulti lamang kaniya mahitungod niini.
Paghulagway pinaagi ni Simone Shin
Daghang katuigan na ang milabay, samtang nagtrabaho isip usa ka mamaligyaay sa dalan sa usa ka gamay nga lungsod sa Poland, akong nahimamat ang usa ka tawo nga ginganlan og Nikolai Shaveko. Among nadiskobrehan nga pareha mi nga gikan sa Chernigov, Ukraine, ug diha-diha dayon nagkahigalaay.
Sa katapusan akong nahibaloan nga si Nikolai walay lugar nga kapuy-an, mao nga ang akong asawa ug ako midapit kaniya nga mopuyo uban namo. Ang among apartment dili kaayo hayahay o komportable, apan kami adunay ekstra nga kwarto. Mapasalamaton siyang misugot ug mipuyo uban namo og taud-taud. Nagsugod siya sa pagkakita sa unsang paagi kami nagpuyo.
Walay Trabaho sa Dominggo?
Sama sa kadaghanan nga mga tigbaligya og mga gamit sa balay, kinahanglan kaming motrabaho og dugay ug maayo aron adunay igong kwarta aron mabuhi. Apan dili sama sa kadaghanan sa mga tawo, ang akong asawa ug ako dili motrabaho ma-Dominggo. Usa ka adlaw, nangutana si Nikolai kon ngano. Nganong molak-ang kami og trabaho ug mangwarta sa tibuok adlaw?
“Ang mga Dominggo wala himoa aron motrabaho o mangwarta,” giingnan nako siya. “Gihimo kini alang sa laing katuyoan.”
“Apan unsaon man ninyo nga makabayad sa pagkaon ug abangan kon dili kamo magtrabaho og pito ka adlaw matag semana?” nangutana siya.
Aron sa pagtubag sa iyang pangutana, gidapit namo siya sa pagsimba uban kanamo. Mao kadto ang iyang unang kasinatian nga makadungog kabahin sa Simbahan, ug wala dayon siya makasabut sa kaimportante niini. Nagtuo gihapon siya nga kami katingad-an tungod sa pagpili sa pag-adto sa mga miting imbis mangwarta. Apan sukad niadto, kanunay na kaming nakig-istorya kaniya bahin sa atong tinuohan, ug sa hinay-hinay, nagka-interesado na siya.
Sulayi Kini, Makita Nimo
Nakakita si Nikolai namo nga nagpuyo kami sa unsay among nahibaloan nga tinuod. Nakakita siya sa mga panalangin nga miabut sa among kinabuhi. Oo, lisud ang pagpangita og igong kwarta aron mabuhi, apan nasayud kami nga husto kini ang pagbalaan sa adlaw nga Igpapahulay. Ug ang Ginoo mipanalangin kanamo. Kanunay kaming adunay igong kwarta alang sa mga butang nga among gikinahanglan. Nakapalig-on kana sa among pagpamatuod sa baruganan ug nakatabang kanamo nga mahimong mas maayo nga mga saksi ngadto ni Nikolai. Aduna kami pagtuo sa pagdapit kaniya, “Sulayi kini, ug makita nimo!”
Usa ka semana, gibuhat niya.
Imbis moadto sa trabaho, miadto siya sa simbahan uban kanamo. Wala siya maghunahuna nga posible ang pagtrabaho lang og unom ka adlaw matag semana, apan tungod sa paglaum ug mga panalangin nga iyang nakita sa among kinabuhi, gisulayan niya kini.
Niana nga semana, sa iyang pag-ihap sa iyang kwarta, nasurprisa siya. Nakahimo siya og mas daghang kwarta niana nga semana kay sa kasagaran niyang gibuhat sa pagtrabaho og pito ka adlaw sa usa ka semana!
Sulayi Usab ang Ikapulo
Mao usab ang nahitabo sa dihang naghisgot kami mahitungod sa ikapulo. Sa sinugdanan, wala makasabut si Nikolai kon sa unsang paagi kami makahatag og 10 porsyento sa among kinitaan.
“Wala gayud akoy igo sa pagbuhat niana!” siya miinsister.
Igo ra kaming mikibo. “Kon sulayan nimo kini, makita nimo.”
Nagduda siya, apan sa hinay-hinay mipahiyom. “Daw sama kini sa dili pagtrabaho og ma-Dominggo,” miingon siya. “Kon mobayad ka sa imong ikapulo, may igo ka nga kwarta alang sa imong kaugalingon ug sa imong gikinahanglan.”
Usa kadto ka dakong pagpadayag alang ni Nikolai. Nakakat-on siya sa iyang kaugalingon nga kon mosunod kita sa mga sugo sa Dios, ang Dios mopanalangin kanato ug moresulta ra alang sa atong kaayohan.
Sa dihang si Nikolai miuli sa Chernigov, iyang gidapit ang mga misyonaryo sa pagtudlo kaniya ug sa iyang pamilya. Sa wala madugay siya ug ang iyang pamilya nagpamiyembro sa Simbahan. Unya, si Nikolai nagserbisyo isip presidente sa branch, ug ang iyang anak nga babaye miserbisyo og misyon sa Russia.
Ganahan kami nga makig-istorya ni Nikolai kabahin sa Simbahan, apan sa katapusan, ang pagdapit kaniya sa pagsunod sa mga baruganan sa ebanghelyo mao ang mas gamhanan kay sa yano nga pagsulti kaniya mahitungod niini. Siya ug ang iyang pamilya nakabaton og pagpamatuod ug miusab sa ilang kinabuhi tungod kay sila mipili sa pagsunod sa mga kamatuoran sa ebanghelyo.