Ang Gipili ni Martin
Ang mga tagsulat nagpuyo sa Utah, USA.
Nasayud si Martin nga dili siya kinahanglang moinom og tsa. Unsa ang kinahanglan niyang buhaton?
“Tabangi mi nga mosunod” (Songbook sa mga Bata, 81).
Mibangon si Martin og hinay-hinay. Giuyog sa iyang mama ang iyang abaga.
“Martin,” miingon siya, “pagmata na.”
Gilugod ni Martin ang kakatulgon sa iyang mga mata. Ngitngit pa ang kalangitan, apan siya nasayud unsa nang orasa. Mobangon ang iyang pamilya sa alas 5:30 matag buntag aron magbasa og dungan sa Basahon ni Mormon. Dili kanunayng sayon nga mobangon og sayo.
Miligid si Martin gikan sa higdaanan ug milakaw sa hinay-hinay ngadto sa atubangan nga lawak. Nanghiwatid ug nanghuy-ab siya og maayo. Ang iyang mga igsoon nagduka usab, apan silang tanan anaa.
Ang matag tawo mobasa sulod sa lima ka minuto. Sa pagsugod gusto ni Martin nga mobalik sa higdaanan. Apan nagpadayon siya sa pagpaminaw. Matag bersikulo daw mibati siya og mas nagkamaayo. Sa dihang nahuman na sila og basa, mibati na si Martin og espirituhanong kalig-on.
Ug ang espirituhanong kalig-on mao ang gikinahanglan ni Martin kada adlaw. Sa Kenya, dyutay lang ang miyembro sa Simbahan nga ka-edad ni Martin, ug silang tanan nagpuyo sa layo. Human sa klase moadto si Martin sa usa ka club sa mga batang lalaki nga gidumala sa Katoliko nga simbahan. Usa ka semana ang club nagdungan og adto og usa ka camping.
Nalingaw kaayo si Martin. Nagkanta siya og mga kanta sa camping. Nagbugha siya og mga kahoy. Gani mitabang usab siya sa paghimo og campfire.
Apan sa ikaduhang adlaw, usa sa mga lider mipagawas og teapot. “Mag-tsa ta karon,” miingon siya.
Ang ubang mga batang lalaki naghinam-hinam. Moinom sila og tsa sa panimalay sa espesyal nga mga okasyon. Silang tanan nagkuha sa ilang tasa ug naghulat sa lider sa pagpuno niini.
Mibati og gamayng kakulba si Martin. Nasayud siya nga dili siya kinahanglang moinom og tsa. Apan dili siya gusto nga masilo ang iyang mga higala.
Dayon nahinumdum siya unsa ang iyang gibati sa dihang siya naghupot sa mga sugo. Dihang ang iyang pamilya misunod sa propeta ug mibasa og dungan sa Basahon ni Mormon, siya mibati og kalipay. Kon dili nila kini buhaton, dili usab siya mobati og kalipay.
Nasayud si Martin unsa ang kinahanglan niyang buhaton.
“Dili, salamat,” misulti siya sa lider sa dihang ipisan na unta ang tasa ni Martin. “Dili ko gustong moinom og tsa.”
Nahingangha ang lider, apan iya na lang gipainom og tubig si Martin samtang ang ubang mga batang lalaki nag-inom og tsa. Pipila sa mga batang lalaki gustong masayud nganong wala moinom og tsa si Martin, apan walay usa kanila ang mibugal-bugal kaniya. Mibati og kalipay si Martin. Nasayud siya nga ang Pulong sa Kaalam makapahimo sa iyang lawas nga kusgan. Ug nalipay siya nga nahimo siyang lig-on sa pagbuhat sa eksakto nga butang.