Pag-angkon Pag-usab sa Akong Pakigsaad
Akong nakat-unan nga mahalon ang akong mga pakigsaad human makasinati nga kini nawala human sa excommunication.
Mga paghulagway pinaagi ni Dileen Marsh
Ako nagtubo sa Simbahan ug nabunyagan ug nakumpirmahan sa otso anyos. Ang ebanghelyo mao ang paagi sa kinabuhi alang kanako ug alang sa kadaghanan sa mga tawo nga naglibut kanako. Ang Espiritu Santo pamilyar kaayo nako sa akong kinabuhi.
Sa dihang na-excommunicated ko, gibati nako nga mibiya nako ang pagbati. Gibati nako nga ang proseso sa akong panghunahuna nabalda ug mihinay, ug ang paghimo og desisyon makalibug ug lisud. Ako nabalaka ug naglisud nga mobati og kalinaw.
Wala gayud ako makaamgo nga ang pagkawala sa akong pagkamiyembro makapausab sa hingpit sa akong kinabuhi. Dili na ko makasul-ob sa garment sa templo o makatambong sa templo. Dili na ko makabayad sa akong ikapulo, makaalagad sa bisan unsa nga calling, makaambit sa sakrament, o makahatag sa akong pagpamatuod o makaampo diha sa simbahan. Wala na koy gasa sa Espiritu Santo. Labing importante wala na koy relasyon sa pakigsaad uban sa akong Manluluwas pinaagi sa mga ordinansa sa bunyag ug sa templo.
Naglibug ko ug nahadlok. Ang akong tulo ka mga anak nianang higayuna 16, 14, ug 12. Sila akong mga kabilin, ug gusto kaayo ko nga mobilin kanila og panulundon sa paglaum. Nakigsulti ko nila ug miingon kanila nga kon ako mamatay sa dili pa ko mabunyagan pag-usab, gusto ko nga ilang ipahigayon ang ordinansa pag-usab alang nako kon mahimo na. Nahadlok ko nga dili na nako maangkon ang mga panalangin sa pagtuman sa akong mga pakigsaad sa bunyag, ug nabalaka ko nga dili na malimpyohan pag-usab.
Ang Akong Pagbalik sa Pagkaaktibo
Wala gayud akoy bisan unsa nga mga pangutana nga ang Simbahan tinuod ug nga ang ebanghelyo mao ang gusto nakong sundon sa akong kinabuhi, mao nga nagpadayon ko sa pagsimba. Gusto ko nga ang Langitnong Amahan masayud nga ako nahigugma Kaniya ug nga ako naguol sa akong mga aksyon. Misimba ko matag semana bisan tuod kini lisud kaayo. Ang ward dili komportable sa akong pagsimba, ug hapit walay usa nga makigsulti nako. Hinoon, usa ka espesyal nga batan-ong babaye nga dunay Down’s syndrome nga ginganlan og Holly mahigugmaon kaayo. Matag Dominggo samtang mosulod ko sa chapel, modagan siya padulong nako, mogakos nako, ug moingon, “nindot kaayo nga nia ka! Gihigugma ko ikaw!” Gibati nako nga siya instrumento sa Manluluwas, nagpahibalo nako nga Siya nalipay nga didto ko.
Lisud kini ilabi na nga moagi ang sakrament nga dili makaambit tungod kay nasayud ko nga ako wala magdawat sa mga panalangin. Ang pag-ambit sa sakrament usa ka panalangin. Nindot kaayo nga makaangkon sa mga panalangin nga malimpyohan pinaagi sa gahum sa Manluluwas ug Iyang maulaon nga sakripisyo, nga mapasaylo sa atong mga sala ug kasaypanan matag semana, ug sa pagpasalig og usab uban sa gugma ug pagkamatinud-anon sa pakigsaad nga atong gihimo sa kanunay mohinumdom sa atong Manluluwas ug mosunod sa Iyang mga sugo.
Tungod kay ang pagbayad sa akong ikapulo importante kaayo alang kanako, nag-set up ko og account sa bangko ug gisulod ang akong ikapulo matag bulan. Kinahanglan nga masayud ang Ginoo nga bisan tuod dili Siya modawat sa akong ikapulo karon, gusto pa gihapon ko nga mobayad niini. Nag-inusara ko niana nga panahon ug nagpadako sa akong tulo ka tin-edyer nga mga anak nga babaye, ug akong gibati nga ako nagkinahanglan sa mga panalangin sa pagpakita sa Ginoo sa akong kaandam sa pagbayad sa ikapulo, bisan tuod dili ko makahimo. Wala koy pagduha-duha nga gipanalanginan kami pag-ayo tungod niini.
Mga Panalangin Gipahiuli
Ako gibunyagan pag-usab kapin sa usa ka tuig human sa akong excommunication. Pagkanindot nga mihaw-as gikan sa tubig nga nakahibalo nga si Jesus mao na karon ang akong manlalaban, akong kauban. Gibayran Niya ang akong mga sala, ug nahibalik na sa relasyon sa pakigsaad uban Kaniya. Napuno ako sa pasalamat!
Nadawat nako ang gasa sa Espiritu Santo pag-usab. Gibati nako pag-usab ang presensya: sa akong minahal nga higala nga mibalik! Gusto nakong paningkamutan og maayo nga dili makapasakit Kaniya aron dili na Siya mobiya kanako.
Gisira nako ang account sa akong tithing, misulat og tseke, ug madasigong mihatag niini ngadto sa akong bishop.
Paglabay sa lima ka tuig napahiuli na ang akong mga panalangin sa templo. Gibati nako nga nahuwasan ug mapasalamaton. Sa makausa gibati nako nga gihigugma ug napanalipdan sa gahum sa mga pakigsaad nga akong gihimo sa templo.
Karon nabugkos ko ngadto sa usa ka tawo nga nahigugma nako, ug ako kaniya, ug naghiusa kami nga aktibong magtrabaho sa pagtukod sa among pagkabugkos isip usa ka relasyon sa pakigsaad nga molungtad hangtud sa kahangturan.
Ang Pagkaulipon sa Sala
Sulod sa 20 ka tuig sukad, usahay mibati ko og pagbati sa lawom nga mga kasaypanan nga misanap nako ug maoy hinungdan sa tumang kasakit ug kabalaka. Naghunahuna ko kon nahimo ba nako ang tanan sa paghinulsol ug napasaylo ba gayud ako. Sa bag-ohay lang pipila ka tuig ang milabay, ang akong mga pagbati mitukma sa gibati ni Alma nga Batan-on nga gihulagway sa Alma 36:12–13:
“Apan ako gisakit uban sa walay katapusan nga kahasol, kay ang akong kalag gisamok ngadto sa katapusan nga sukod ug gisakit uban sa tanan kong mga sala.
“Oo, ako nahinumdom sa tanan kong mga sala ug mga kadautan, diin ako gihasol uban sa mga kasakit sa impyerno; oo, ako nakakita nga ako misukol batok sa akong Dios, ug nga ako wala maghupot sa iyang mga balaan nga mga sugo.
Usa ka adlaw ako miluhod sa pag-ampo ug nangutana, “Amahan, nabuhat ba nako ang tanan? Buhaton nako kon unsay kinahanglan nakong buhaton, aron kini makuha gikan kanako.” Dayon naghulat ug naminaw ko sa akong kasingkasing.
Ang tubag miabut nga klaro kaayo: “Nabuhat nimo ang tanan.” Napuno ako sa putli nga kalipay. Dili ako makahunong sa pagpahiyom, ug malipayong mga luha miagas. Tibuok adlaw akong nakaplagan ang akong kaugalingon nga napuno sa kalipay. Ang tanang kaulaw ug kahasol sa konsensya nawala alang sa kaayohan.
Namalandong ako pag-usab sa kasinatian ni Alma nga Batan-on:
“Ug karon, tan-awa, sa diha nga ako naghunahuna niini, ako wala na mahinumdom sa akong mga kasakit; oo, ako wala na samoka sa panumduman sa akong mga sala.
“Ug, unsa nga hingpit nga kalipay, ug unsa ka kahibulongan nga kahayag ang akong nakita; oo, ang akong kalag napuno sa hingpit nga kalipay labaw sa akong kasakit!” (Alma 36:19–20).
Ang akong pakigbisog nga maangkon pag-usab ang akong pagkamiyembro sa Simbahan dili sayon ug ang akong relasyon sa pakigsaad uban sa Manluluwas makapalumo sa kasingkasing. Nabuntog nako kini nga pagsulay nahibalo nga ang Pag-ula ni Jesukristo mao ang labing bililhon. Milungtad og hapit 20 ka tuig nga milabay ang kaulaw sa akong excommunication ug nga makakaplag sa kalig-on sa pagpakigbahin sa akong mga kasinatian ngadto sa uban. Nanghinaut ako nga ang akong mga kasinatian makadasig sa uban nga makakaplag og kaisug sa pag-usab ug pagtabang niadtong kinsa gusto nga mausab. Ako makabarug ug makapamatuod sa walay pagduha-duha nga ang Pag-ula ni Jesukristo tinuod. Ang Iyang gahum makausab sa inyong kinabuhi dili lamang alang sa mas maayo apan sa labing maayo.
Gimahal nako pag-ayo ang akong pagkamiyembro sa Simbahan. Kini usa ka bililhon nga gasa ug usa ka talagsaon nga panalangin sa akong kinabuhi. Dili na ko gusto nga mawala kini pag-usab.