Ang Priesthood Ania Karon

Ni Elder Robert D. Hales

Sa Korum sa Napulog Duha ka mga Apostoles

Gikan sa usa ka pakigpulong sa Oktubre 1995 nga kinatibuk-ang komperensya.

Pagkangitngit unta niini nga kalibutan kon wala pa ang mga panalangin sa priesthood alang kaninyo ug kanako.

Mahunahuna ba ninyo kon unsa ka kangitngit ug ka haw-ang ang pagka-mortal kon wala pay priesthood? Kon ang gahum sa priesthood wala dinhi sa yuta, ang kaaway adunay kagawasan sa paglakaw-lakaw ug paghari nga walay pagpugong. Walay gasa sa Espiritu Santo nga mogiya ug molamdag kanato; walay propeta nga mamulong sa ngalan sa Ginoo; walay mga templo diin kita mohimo og sagrado, mahangturong mga pakigsaad; walay awtoridad sa pagpanalangin o pagbunyag, sa pag-ayo o paghupay. Kon wala ang gahum sa priesthood, “ang tibuok yuta sa hingpit pagalaglagon” (tan-awa sa D&P 2:1–3). Walay kahayag, walay paglaum—kangitngit lang. …

… [Hinoon,] ang priesthood sa Dios naghatag og kahayag ngadto sa mga anak sa Langitnong Amahan niining mangitngit ug gubot nga kalibutan. Pinaagi sa gahum sa priesthood atong madawat ang gasa sa Espiritu Santo sa paggiya kanato sa kamatuoran, pagpamatuod, ug pagpadayag. Kini nga gasa anaa sa patas nga basihan ngadto sa mga lalaki, mga babaye, ug mga bata. …

… Ang mahimayaon nga priesthood sa Dios, uban sa usa ka kahingpitan sa mga panalangin niini, gipahiuli sa yuta sa atong panahon. Ang pagpahiuli sa priesthood ug sa mga panalangin nagsugod niadtong 1820, sa dihang si Joseph Smith, usa ka batan-ong lalaki nga propeta, nakakita ug nakigsulti sa Dios nga Amahan ug Iyang Anak, si Jesukristo, sa sagradong kakahoyan.

Wala madugay, dugang nga langitnong mga mensahero—Juan Bautista; Pedro, Santiago ug Juan; Moises, Elias ug Elijah; ug ang uban—mihatag ngadto ni Propeta Joseph Smith sa gahum, awtoridad, ug mga yawe nga gikinahanglan alang sa kaluwasan ug kahimayaan sa katawhan. … Ang Simbahan ni Jesukristo gipahiuli dinhi sa yuta, kompleto uban sa Aaronic ug Melchizedek nga Pagkapari sa karaan. Karon, samtang ang Dios mipakigsaad uban kang Abraham, tanan nga mga tawo ug pamilya sa yuta mapanalanginan.

Hunahunaa kini, mga kaigsoonan—ang priesthood napahiuli na. Ania kini sa yuta karon. Ubos sa direksyon sa … mga propeta, manalagna ug tigpadayag, nga naghupot sa mga yawe niini nga dispensasyon, mga tighupot sa priesthood sa Simbahan karon adunay balido nga katungod sa paglihok sa ngalan sa Dios. …

… Tanang panalangin nga talagsaon, mahangturong mga panalangin nga gihimo sa Dios anaa sa mga lalaki ug mga babaye ug mga pamilya dinhi sa yuta mahimo nga atong maangkon pinaagi sa gahum sa priesthood.