Ang Pagpahiuli sa mga Yawe sa Priesthood
Ni Presidente Henry B. Eyring
Unang Magtatambag sa Unang Kapangulohan
Gikan sa usa ka pakigpulong sa Oktubre 2004 nga kinatibuk-ang komperensya.
Ang Manluluwas mitukod sa Iyang Simbahan diha sa pundasyon sa mga apostoles ug mga propeta, kinsa naghupot sa tanang yawe sa priesthood dinhi sa yuta niining panahona.
Litrato sa Efeso ug background nga imahe gikan sa Getty images
Daghang katuigan ang milabay namulong ko sa usa ka karaang teyatro sa Efeso. Silaw sa adlaw milukop sa palibot diin si Apostol Pablo nagbarug aron magsangyaw. Ang akong gihisgutan mao si Pablo, ang Apostol nga gitawag sa Dios.
Gatusan ka mga Santos sa Ulahing mga Adlaw ang nanambong. Gipalingkod sila diha sa mga laray sa bangko nga bato nga gilingkuran sa mga taga-Efeso kaniadto sobra na sa liboan ka mga tuig [millenium] ang milabay. Uban kanila didto mao ang duha ka buhing mga Apostoles, si Elder Mark E. Petersen ug si Elder James E. Faust.
Kon inyong hunahunaon, nangandam ko pag-ayo. Mibasa ko sa Mga Buhat sa mga Apostoles ug mga epistola, ila kadto ni Pablo ug sa iyang isig ka Apostoles. Akong gibasa ug gipamalandongan ang Sulat ni Pablo ngadto sa Mga Taga-Efeso.
Naninguha ko pag-ayo sa pagtahud ni Pablo ug sa iyang calling. Human sa pagpakigpulong daghan ang misulti og maayong mga butang. Ang duha ka buhi nga mga Apostoles mabination nga mihimo sa ilang mga komentaryo. Apan wala madugay si Elder Faust midala nako sa daplin ug uban sa usa ka pahiyum ug uban sa kalumo sa iyang tingog, miingon, “Nindot kadto nga pakigpulong. Apan imong nalimtan ang pinakaimportante nga butang nga unta imong isulti.”
Nangutana ko unsa man kana. Human sa mga semana misulti ra gayud siya kanako. Iyang tubag sukad niadto nakahatag kanako og pagtulun-an.
Miingon siya nga unta misulti ko sa mga tawo nga kon ang mga Santos nga nakadungog ni Pablo nakaangkon pa og pagpamatuod sa kabililhon ug gahum sa mga yawe nga iyang gihuptan, tingali ang mga Apostoles dili gayud unta kuhaon gikan sa kalibutan.
Kadtong sugyot nag-aghat kanako sa pagbasa og usab sa sulat ni Pablo ngadto sa Mga Taga-Efeso. Nakita nako nga si Pablo buot nga ang tawo mobati sa kabililhon sa pagpasa sa mga yawe sa priesthood nga nagagikan sa Ginoo lahus sa Iyang mga Apostoles ngadto nila, nga mga miyembro sa Simbahan sa Ginoo. Si Pablo naninguha sa paglig-on og pagpamatuod niana nga mga yawe.
Si Pablo mipamatuod ngadto sa mga taga-Efeso nga si Kristo mao ang nangulo sa Iyang Simbahan. Ug mitudlo siya nga ang Manluluwas mitukod sa Iyang Simbahan sa usa ka pundasyon sa mga apostoles ug mga propeta, kinsa naghupot sa tanang yawe sa priesthood dinhi sa yuta niining panahona (tan-awa sa Mga Taga-Efeso 2:19–20).
Ang Priesthood Gipahiuli Na
Paghulagway pinaagi ni Brian Call
Bisan pa sa kaklaro ug sa gahum sa iyang pagtudlo ug sa iyang ehemplo, si Pablo nasayud nga adunay apostasiya nga moabut (tan-awa sa Mga Buhat 20:29–30; 2 Mga Taga-Tesalonica 2:2–3). Nasayud siya nga ang mga apostoles ug ang mga propeta kuhaon gikan sa kalibutan. Ug nasayud siya nga kini, sa umaabut nga adlaw, ipahiuli. Misulat siya nianang panahona ngadto sa mga taga-Efeso, nagsulti kon unsa ang buhaton: “Nga sa dispensasyon sa kahingpitan sa panahon siya malagmit mopundok nga maghiusa sa tanang mga butang diha ni Kristo, tanan diha sa langit, ug diha sa yuta; gani diha kaniya”(Mga Taga-Efeso 1:10).
Si Pablo naglantaw sa pagpangalagad ni Propeta Joseph Smith, nga ang mga langit moabli pag-usab. Nahitabo kini. Si Juan Bautista miabut ug mitugyan sa mga tawo sa Pagkapari ni Aaron ug ang mga yawe sa pagpangalagad sa mga anghel ug ang pagbunyag pinaagi sa pag-unlod sa tubig alang sa kapasayloan sa sala (tan-awa sa D&P 13).
Ang karaang mga apostoles ug mga propeta mibalik ug mitugyan diha kang Joseph sa mga yawe nga ilang gihuptan sa pagkamortal (tan-awa sa D&P 110). Mga mortal nga mga tawo gi-orden sa balaang pagka-apostol niadtong Pebrero 1835. Ang mga yawe sa priesthood gihatag ngadto sa Napulog Duha ka mga Apostoles niadtong hinapos sa Marso 1844.
Matag propeta nga misunod kang Joseph, gikan ni Brigham Young hangtud ni Presidente Monson, naghupot ug naggamit niadto nga mga yawe ug naghupot sa sagradong pagka-apostol.
Hugot nga Pagtuo ug mga Yawe sa Priesthood
Apan sama ra sa panahon ni Pablo, ang gahum niadtong mga yawe sa priesthood alang kanato nagkinahanglan sa atong hugot nga pagtuo. Kinahanglan masayud kita pinaagi sa inspirasyon nga ang mga yawe sa priesthood gihuptan niadtong kinsa nangulo ug nag-alagad kanato. Kana nagkinahanglan sa saksi sa Espiritu.
Ug kana nagdepende sa atong pagpamatuod nga si Jesus mao si Kristo ug nga Siya buhi ug nangulo sa Iyang Simbahan. Kinahanglan masayud usab kita sa atong kaugalingon nga ang Ginoo mipahiuli sa Iyang Simbahan ug sa mga yawe sa priesthood pinaagi kang Propeta Joseph Smith. Ug kinahanglan aduna kitay kasiguroan pinaagi sa Espiritu Santo, mapahinumduman kanunay, nga kadtong mga yawe nga gihatag ngadto sa buhing propeta nga walay pagsanta ug nga ang Ginoo manalangin ug modumala sa Iyang mga tawo pinaagi sa dugtong sa mga yawe sa priesthood diin moabut paubos lahus ngadto sa mga presidente sa stake ug district ug lahus ngadto sa mga bishop ug mga branch president ngari kanato, dili igsapayan kon hain kita ug bisan unsa pa kalayo gikan sa propeta ug sa mga apostoles.
Salig sa Pinili nga mga Sulugoon sa Ginoo
Pagpahiuli sa Melchizedek Priesthood, ni Walter Rane.
Aron magpabilin kitang lig-on diha sa Simbahan sa Ginoo, himoon nato ug kinahanglang bansayon ang atong mga mata sa pag-ila sa gahum sa Ginoo diha sa pag-alagad niadtong kinsa Iyang gitawag. Kinahanglan takus kita sa pakig-uban sa Espiritu Santo. Ug nagkinahanglan kitang mag-ampo alang sa Espiritu Santo aron tabangan kita nga makaila nga ang mga tawo nga nangulo kanato naghupot niini nga gahum. Alang kanako, ang maong mga pag-ampo kadaghanan matubag kon ako hingpit nga nabugkos diha sa pag-alagad sa Ginoo.
Makalihok kita aron mahimong angayan alang sa pagpadayag nga mitugot kanato aron masayud nga ang mga yawe gihatag sa Dios gikan sa usa ka tawo ngadto sa lain. Mangita kita niana nga kasinatian kanunay. Ug kinahanglan gayud nato, aron makadawat sa mga panalangin nga gitagana sa Dios alang kanato ug buot nga kita motanyag sa uban.
Ang tubag sa inyong pag-ampo dili ingon ka madramahon sama niadtong uban nga nakakita ni Brigham Young, samtang siya namulong, mikuha sa hulagway sa gimartir nga si Propeta Joseph.1 Apan kini mahimong masiguro. Ug uban niana nga espirituhanong kasiguroan moabut ang kalinaw ug gahum. Masayud kamo pag-usab nga kini mao ang tinuod ug buhing Simbahan sa Ginoo, nga Siya ang nangulo niini pinaagi sa Iyang gi-orden nga mga sulugoon, ug nga Siya nag-atiman kanato.
Kon daghan pa unta kanato ang naggamit niana nga hugot nga pagtuo ug modawat niadto nga mga pasalig, ang Dios mobayaw niadto kinsa mangulo kanato ug busa mopanalangin sa atong mga kinabuhi ug sa atong mga pamilya. Mahimo kitang sama kaayo sa gusto ni Pablo alang niadtong iyang gialagaran: “tinukod ibabaw sa patukoranan nga mao ang mga apostoles ug mga propeta, nga niini si Jesukristo mao ang ulohang bato sa pamag-ang” (Mga Taga-Efeso 2:20).