Mga Tingog sa mga Santos sa Ulahing mga Adlaw
Pagpuasa alang sa Tabang sa Trabaho
Litrato gikan sa Getty Images
Human sa matinud-anong pagserbisyo sa misyon didto sa Mozambique, mipauli ko ug, sama sa daghang laing mga return missionary, gitutukan dayon nako ang pagtuon ug pagtrabaho.
Nagpuyo ako sa Brazil sa usa ka siyudad nga utlanan sa Paraguay ug nakakita og trabaho sa pag-import og mga produkto alang sa usa ka dako nga supermarket dapit sa Paraguay. Ang panalangin nga nakat-on sa Iningles didto sa akong misyon nakatabang nako nga makaangkon niini nga posisyon. Niining higayona, ako naminyo ug napanalanginan og usa ka anak nga babaye.
Sa dihang nagkrisis sa pinansyal ang Brazil nga miresulta sa pagkunhod sa kwarta sa Brazil, ang akong trabaho direktang nakaapektohan. Kini ang hinungdan sa pagkunhod sa halin sa mga produkto nga akong kanunayng gi-import. Sa katapusan sa Pebrero pagkasunod tuig, wala na gyud koy gibuhat. Ang pagkawala sa trabaho hapit nang maklaro, sama sa kahimtang sa uban. Nabalaka ko mahitungod sa isuporta sa akong asawa ug sa anak nga batang babaye. Gani misugod ko sa pagpangita og laing trabaho.
Nakigsulti ko sa akong asawa kabahin sa sitwasyon. Misugyot siya nga magpuasa kami. Samtang kami nagpuasa, ang kalinaw milukop sa among mga kasingkasing ug mibati mi nga ang tanan mamaayo ra, bisan tuod dili nako mahunahuna kon unsaon.
Sa pagkasunod nga adlaw sa trabaho, gipatawag ko sa akong manager. Naghunahuna ko nga miabut na ang makakahadlok nga panahon—hapit na ko mawad-an sa akong trabaho. Apan sa akong katingala, akong manager miingon kanako nga siya adunay ideya. Tungod kay ako adunay abilidad sa Iningles, mitanyag siya nga ako mohubad sa mga legal nga mga dokumento nga kasagaran ihatag ngadto sa abogado aron mahubad. Gisultihan ako niya nga kon molampos ko sa paghubad, mahatagan ko niana nga tahas ug moresulta kini nga makadaginut ang departamento. Gisugdan dayon nako ang paghubad sa mga dokumento. Sa dihang akong gipresentar sa akong manager ang malampuson nga paghubad, nalipay siya! Nalipay usab ako tungod kay nagpabilin ko sa trabaho.
Sa dihang mikuha nako sa akong tseke, nga mao na unta kadto ang akong katapusang sweldo, nasurprisa ko nga nakita nga ang akong sweldo miusbaw. Ang akong kasingkasing natandog, ug mapasalamaton ko sa atong Langitnong Amahan. Pinaagi niini nga kasinatian ako nasayud nga ang pagpuasa nagbukas sa mga bintana sa langit.