Mga Tingog sa mga Santos sa Ulahing mga Adlaw
Usa ka Panalangin alang sa usa ka Estranghero
Paghulagway pinaagi ni Allen Garns
Mga tuig human ang akong pamilya ug ako nagpamiyembro sa Simbahan, ako nakadawat og tawag sa pagserbisyo sa Nigeria Port Harcourt Mission. Sa usa ka mainit nga adlaw pag-abut nako sa akong unang area, ang akong kompanyon ug ako mihimo sa among kasagaran nga proselyting ug pagpangontak.
Samtang among naagian ang dalan nga daghan kaayo og mga tawo, nakadungog mi og luya nga tingog nga nanawag namo gikan sa compound nga mubo ra og koral. Among gitan-aw sa koral ug nakakita og usa ka hamtong nga tawo nga nagkulob diha sa gate.
Mihangyo siya namo nga mosulod, apan walay paagi nga makasulod sa compound. Gitrangkahan ang gate ug naghunahuna mi nga ang paglayat sa koral dili maayo. Naaghat ko sa pagsusi sa kandado sa gate pag-usab. Pipila ka minuto naabli namo ang kandado gikan sa gawas ug naabli ang gate. Among nakita nga ang tawo masakiton ug wala maatiman. Mipasabut siya nga siya nasakit ug mibati og grabe nga kasakit nga nakapugong kaniya sa pagbarug.
Human makigsulti kaniya, misunod kami niya samtang siya mikamang balik ngadto sa iyang balay. Mihangyo siya nga mag-ampo alang kaniya, ug kami mitanyag sa paghatag kaniya og panalangin. Sa dihang among gipatong ang mga kamot sa iyang ulo, mibati ko nga dihay bugon sa akong tutunlan ug dili makalitok og pulong. Ang kahadlok miabut kanako, nagsugod ko sa pagkurog ug pagsingot, ug ang mga luha midagayday sa akong mga aping. Nanlimbasug ko sa pag-ampo og kusog, mao nga nagsugod ko sa pag-ampo diha sa akong kasingkasing nga ang Langitnong Amahan moluag sa akong dila sumala sa Iyang kabubut-on.
Sa kalit lang, ang akong dila makasulti na. Nasayud ko nga ako namulong, apan dili ako ang nagkontrolar sa mga pulong. Nakadungog ko sa akong kaugalingon nga tingog nga naghangyo sa Langitnong Amahan sa pag-ayo niining nag-antus nga tawo. Sa wala pa kami moingon og amen, ang tawo nakatulog. Mibiya kami kaniya ug miadto sa among mga appointment apan nagplano nga mobalik sa among pagpaingon ngadto sa among apartment aron pagsusi kaniya.
Mibalik mi ug sa akong dakong kahingangha, ang tawo nagdagan padulong namo, nagsinggit, “Misalir kini! Misalir kini!” Gisanapan kami sa kalipay ug dili nako mapugngan ang akong mga luha.
Sa sakrament miting sa misunod nga Dominggo, sa kalit ang bishop mihunong diha sa pulpito ug mitan-aw sa pultahan sa chapel. Milingi mi ug nakita ang tawo nga among gipanalanginan. Ang bishop nakaila kaniya ug nahibulong sa iyang pagsulod sa simbahan. Sugod niana, ang tawo kanunay na nga mitambong sa sakrament miting ug sa ubang mga klase. Sa katapusan nabalhin ko sa laing area.
Kini nakapatingala kanako kon sa unsang paagi gihatag sa Dios ang milagro nianang adlawa, ug mapainubsanon ko nga ang Langitnong Amahan nakakita nako nga takus. Nasayud ko nga kami nahimong mga instrumento sa kamot sa Dios. Ang mga panalangin sa pag-ayo anaa niana nga tawo, apan ang panalangin sa pagpamatuod ug hingpit nga kalipay ania kanako.