Mensahe sa Visiting Teaching
Ang Gahum sa Priesthood pinaagi sa Pagtuman sa mga Pakigsaad
Tun-i sa mainampuong paagi kining materyal ug tinguhaa ang inspirasyon aron masayud unsay angay nga ipakigbahin. Sa unsang paagi nga ang pagsabut sa katuyoan sa Relief Society makaandam sa mga anak nga babaye sa Dios alang sa mga panalangin sa kinabuhing dayon?
“Ang akong mensahe ngadto sa … tanan mao nga kita mabuhi sa tanang oras nga ‘sa gahum sa priesthood gipanalanginan,’ bisan unsa ang atong sitwasyon,” miingon si Elder Neil L. Andersen sa Korum sa Napulog Duha ka mga Apostoles.
“… Samtang kamo takus nga moapil diha sa mga ordinansa sa priesthood, ang Ginoo mohatag kaninyo og mas dako nga kalig-on, kalinaw, ug mahangturong panan-aw. Bisan unsa ang inyong sitwasyon, ang inyong panimalay ‘mapanalanginan pinaagi sa kalig-on sa gahum sa priesthood.’”1
Sa unsang paagi kita nagdapit sa gahum sa priesthood sa atong kinabuhi? Si Elder M. Russell Ballard sa Korum sa Napulog Duha ka mga Apostoles nagpahinumdom kanato nga “kadtong nagpabunyag ug dayon nakadawat sa ilang endowment diha sa balay sa Ginoo mahimong makadawat sa mabungahon ug talagsaong mga panalangin. Ang endowment sa literal nga paagi gasa sa gahum … [ug] ang atong Amahan sa Langit manggihatagon sa Iyang gahum.” Siya nagpahinumdom kanato nga mga lalaki ug mga babaye “tugahan og samang gahum” diha sa templo, “nga nagpasabut nga gahum sa priesthood.”2
Si Linda K. Burton, Kinatibuk-ang Presidente sa Relief Society, miingon: “Tungod ang gahum sa priesthood mao ang atong gitinguha nga maanaa sa atong mga pamilya ug panimalay, unsay angay natong buhaton aron maangkon kana nga gahum sa atong kinabuhi? Ang personal nga pagkamatarung importante aron maangkon ang gahum sa priesthood.”3
“Kon mapainubsanon lamang kita nga mopresentar sa atong kaugalingon ngadto sa Ginoo ug mohangyo Kaniya nga tudloan kita, Iyang ipakita nato kon unsaon sa pagpalambo sa atong paggamit sa Iyang gahum,” miingon si Presidente Russell M. Nelson, Presidente sa Korum sa Napulog Duha ka mga Apostoles.4
Dugang nga mga Kasulatan ug Impormasyon
1 Nephi 14:14; Doktrina ug mga Pakigsaad 121:36; 132:20; reliefsociety.lds.org
Hugot nga Pagtuo Kahupayan Pamilya