Unsa ang Atong Gituohan
Ang Pagsunod sa Ebanghelyo Nagpalambo sa Sagrado nga mga Relasyon sa Pamilya
Mga paghulagway pinaagi ni J. Beth Jepson
Kitang tanan mga anak sa mahigugmaon nga Langitnong mga Ginikanan kinsa mipadala kanato dinhi sa yuta aron makat-on unsaon sa pagbalik ngadto Kanila. Ang pamilya usa ka mahinungdanon nga bahin sa plano sa kaluwasan. Ang Dios naghatag kanato sa mga pamilya aron kita makaangkon og mga lawas, makat-on sa eksaktong mga baruganan, ug mangandam alang sa kinabuhing dayon.
Ang Langitnong Amahan gusto sa matag anak Niya nga magdako sa mahigugmaon nga palibut. Ang labing maayong paagi sa pagkab-ot niining maamumahon nga mga palibut mao ang pagsunod ug paggamit sa mga baruganan sa ebanghelyo. “Ang kalipay diha sa kinabuhi sa pamilya labaw nga makab-ot kon gipasikad diha sa mga pagtulun-an ni Ginoong Jesukristo.”1 Mga panimalay nga gitukod sa mga baruganan sa ebanghelyo mahimong mga dapit sa kalinaw, diin ang Espiritu sa Ginoo makagiya, makaimpluwensya, ug makabayaw sa tanang mga sakop sa pamilya.
Ang pamilya gi-orden sa Dios ug mao “ang han-ay sa langit … , ang kopya sa celestial nga sumbanan ug sa pagsundog sa mahangturong pamilya sa Dios.”2 Kini nga mga relasyon sa pamilya ug sa ilang kauban nga mga responsibilidad sagrado. Atong makat-unan sa mga kasulatan nga ang mga ginikanan adunay katungdanan sa pagpadako sa ilang mga anak diha sa kamatuoran, kahayag, ug gugma (tan-awa sa Mga Taga-Efeso 6:4; D&P 68:25). Mga bana ug mga asawa kinahanglan nga mohigugma ug motahud sa usag usa (tan-awa sa Mga Taga-Efeso 5:25), ug ang mga anak kinahanglan nga motahud sa ilang mga ginikanan (tan-awa sa Exodo 20:12).
“Malampuson nga mga kaminyoon ug mga pamilya natukod ug napadayon diha sa mga baruganan sa hugot nga pagtuo, pag-ampo, paghinulsol, pagpasaylo, pagtahud, gugma, kalooy, buhat ug maayong makalingaw nga mga kalihokan.”3 Ang pagsunod sa mga baruganan sa ebanghelyo mopalig-on sa mga relasyon sa pamilya ug mopalambo sa mga sakop sa pamilya sa indibidwal ug tiningub nga espirituhanong kalig-on. Kini nga mga baruganan makatabang usab kanato nga maduol kang Kristo.
Ang matag pamilya adunay mga hagit. Sa espirituhanong kagubot niining mga panahona, dili matag pamilya adunay maayo nga mga kahimtang. Ingon sa giingon ni Elder Neil L. Andersen sa Korum sa Napulog Duha ka mga Apostoles, “Adunay minilyon nga mga miyembro ug ang panaglahi sa atong mga bata sa Simbahan, kinahanglan pa kitang mas manggihunahunaon ug sensitibo.”4 Pipila ka mga indibidwal walay suporta sa pamilya sa pagsunod sa ebanghelyo. Ang ubang mga hagit mas lisud kaayo, lakip ang (apan dili limitado sa) diborsyo, pag-abuso ug pagkaadik.
Ang Dios nasayud sa kahimtang sa matag pamilya ug sa mga tinguha sa tagsa-tagsa nga makaangkon og paghigugma diha sa panimalay. Bisan og kita adunay dili hingpit nga mga relasyon uban sa atong mga pamilya, ang pagsunod sa ebanghelyo sa gihapon makapanalangin sa atong kinabuhi ug sa atong mga panimalay. Kini makapalig-on sa atong mga relasyon uban sa atong kapikas, mga ginikanan, mga anak, mga igsoon, ug sa atong Langitnong Amahan. Ang uban niini nga mga panalangin moabut karon, ug ang uban dili, hangtud sa sunod kahangturan, apan ang Dios dili mopugong sa bisan unsa nga panalangin niadtong naningkamot alang sa pagkamatarung.