Ang Akong Unang Higayon sa Templo
Ang tagsulat nagpuyo sa Córdoba, Argentina.
Gusto nakong personal nga makatambong sa templo, dili basta lang makadungog mahitungod sa mga kasinatian sa ubang mga tawo.
Sa dihang ako 16, ang stake presidency mipahibalo nga ang among stake mobisita sa templo sa Buenos Aires, ug ako gidapit nga moadto. Nagtigum ko og kwarta ug naningkamot og maayo nga mahimong takus nga makaangkon og rekomend sa templo.
Human nako madawat ang rekomend, ang mga tintasyon miatake kanako gikan sa tanang dapit, ang tanan naningkamot nga mawala kanako ang katakus. Apan ako adunay tinguha sa pagtambong sa templo. Dili ko gusto nga makadungog lang sa mga kasinatian ug pagpamatuod sa uban; gusto ko nga makabaton og akong kaugalingong kasinatian ug pagpamatuod.
Miabut ang gabii sa pagbiyahe. Bisan wala pa makasakay sa bus, aduna koy mga hunahuna nga dili moadto, apan wala ko magpadala. Atol sa 10-ka oras nga pagbiyahe, naglingkod ko tapad sa usa ka miyembro sa Simbahan kinsa mahigalaon kaayo ngari nako. Nagpangidaron siya sa mga 60. Iya kong gisultihan mahitungod sa iyang kinabuhi ug kon unsa siya kamalipayon nga nakalahutay siya sa mga pagsulay nga iyang naangkon.
Misugod ako sa pagsulti kaniya mahitungod sa akong kinabuhi ug unsa ang akong gibati nga pag-inusara tungod kay daghang mga tawo nga nagpalayo kanako tungod sa akong pagsunod sa Dios. Siya misulti kanako, “ang Dios mohatag kanimo og usa ka talagsaon nga higala, ug kana nga higala kanunay anaa alang kanimo. Ayaw kana kalimti.” Pagkahuman niya og sulti niining mga pulong, mibati ako og kakalma ug kamalinawon tungod kay nabati nako nga tinuod ang iyang gisulti.
Sa pagsulod sa templo, ang kabug-at nga akong gisagubang nahanaw. Ang pamati sama nga adunay usa ka espirituhanong paghangop nga nagsulti nako og, “Welcome, akong anak. Nagpaabut gyud ko nimo.”
Nabati nako nga ang templo mao gayud ang balay sa Dios, dili lamang usa ka maanindot nga estraktura. Human sa paghimo og mga bunyag ug mga pagkumpirma, miadto ako sa gawas. Nabati nako nga ang mga palas-anon namalik, apan karon akong gibati ang kusog sa pagbuntog niini.
Nasayud ko nga ang pagpangandam sa atong mga kaugalingon ug ang pagtugyan sa tanang butang diha sa mga kamot sa Dios ug ang paghatag sa atong labing maayo aron makasulod sa templo mao ang gilauman gikan kanato. Dayon ang Dios mopanalangin kanato sa buhong nga paagi.