Mga Tingog sa mga Santos sa Ulahing mga Adlaw
Pagpanglimpyo sa Simbahan ug Pagtudlo sa Ebanghelyo
Paghulagway pinaagi ni Allen Garns
Usa ka Sabado sa hapon, nangandam ko nga moadto sa dagat uban sa akong pamilya. Mibiyahe sila gikan sa Amazonas hangtud sa La Guaira aron makauban ako og pipila ka adlaw. Hayag ang adlaw, husto kaayo ang huyohoy sa dagat, ug nalipay ko nga nakita ang kalipay sa akong mga igsoong babaye.
Sa dihang nagbiyahe na kami, nakahinumdom ko nga ako man diay ang gitahasan sa pagpanglimpyo sa simbahan nianang adlawa. Karon kinahanglan na kong magpili: Tumanon ba nako ang akong responsibilidad o mopadayon ngadto sa dagat uban sa akong pamilya? Nakahukom ko nga makigsulti sa akong mama ug mga igsoong babaye kabahin niini. Wala pa sila sukad nakasulod sa usa ka LDS nga simbahan ug madasigong mitanyag sa pagtabang nako nga manglimpyo, basta inig kahuman modayon kami sa dagat.
Sa dihang misulod kami sa simbahan, akong gipasabut unsay kinahanglan buhaton ug unsaon kini sa pagbuhat. Sa among pagtuo nga dali ra buhaton ang pagpanglimpyo among nahuman sa upat ka oras tungod kay interesado sila kaayo! Akong gipakita ang akong pamilya sa matag kwarto, sa mga painting ug sa bunyaganan. Hilabihan nga kalipay ang mipuno sa akong kasingkasing. Dili ko makatuo nga ang akong pamilya mitabang nako sa usa ka butang nga importante kaayo nako. Samtang naa pa kami didto, ang akong batan-ong mga igsoong babaye, si Thalia ug si Gineska, nakakat-on og pipila ka mga himno ug nangutana nako mahitungod sa Simbahan.
Pagka Dominggo ang akong pamilya mitambong sa simbahan sa unang higayon. Sila maayo kaayong gidawat sa ward. Ang mga young women daling mi-welcome sa akong mga igsoong babaye. Ang mga sister nga mga misyonaryo misugat nila ug nakigsabut nga makighimamat nila sa sunod nga adlaw. Nag-family home evening kami, ug ako mitudlo kanila sa pag-ampo. Magdungan kami nga mag-ampo sa kanunay. Maminaw usab kami sa mga himno ug manan-aw og mga video sa Simbahan.
Sa wala pa mamauli ang akong pamilya, akong gidala ang akong mga igsoong babaye ngadto sa Caracas aron makakita sa templo ug sa mga nataran niini. Mihatag ko sa akong pagpamatuod sa mga panalangin sa templo ug midasig kanila sa pagpangita sa Simbahan kon sila mamalik na sa Amazonas.
Sa dihang mibiya sila sa balay, akong gikontak ang mga misyonaryo sa ilang dapit. Ang mga misyonaryo ug mga miyembro sa ward council mibisita sa akong pamilya ug mitabang kanila sa ilang dalan ngadto sa pagkakabig. Ang akong mga igsoong babaye kanunayng nag-ampo nga ang among amahan mohatag kanila og pagtugot nga magpabunyag.
Inubanan sa dakong pasalamat ug kalipay, mibiyahe ko ngadto sa Amazonas aron sa pagbunyag nilang Thalia ug Gineska. Ang kasanag sa ilang mga mata nagpakita sa ilang paglaum ug sa ilang pasalamat sa Langitnong Amahan sa paggiya kanila sa ebanghelyo. Pinaagi sa pagtuman sa buluhaton sa paglimpyo sa simbahan, ang akong pamilya nagkasuod og napalig-on. Dili gyud nako makalimtan kini nga kasinatian ug ako nasayud nga ingon usab ang akong mga igsoong babaye.