Ang Inyong Kaugalingong Liahona
Dili ba nindot nga kamo dunay espirituhanong GPS nga mogiya kaninyo? Uban sa inyong patriyarkal nga panalangin, kamo aduna.
Mga paghulagway pinaagi ni Jeff Ward
Usahay lisud ang kinabuhi. Adunay daghang dagko nga mga butang nga moabut kaninyo sa mosunod nga pipila ka tuig: pagpangandam alang sa templo, pagpakigbahin sa ebanghelyo, pagpili og eskwelahan ug trabaho. Ug tin-edyer pa kamo! Dili ba nindot kon, sama ni Lehi, makakita mo og Liahona sa gawas sa inyong pultahan, usa ka instrumento nga garantisado nga giyahan kamo kon hatagan lang ninyo og pagtagad?
Sa tinuod, duna nay daghang mga tinubdan sa giya sa inyong kinabuhi: pag-ampo, mga kasulatan, tambag gikan sa mga ginikanan ug mga lider, pag-aghat gikan sa Espiritu Santo, kinatibuk-ang komperensya, ug ang lista magpadayon. Apan ania ang laing tinubdan nga idugang sa inyong lista—usa ka personal nga Liahona nga nailhan nga inyong patriyarkal nga panalangin. Kini mao ang personal nga pagpadayag alang kaninyo, mahitungod kaninyo, gikan sa inyong Langitnong Amahan, kinsa nakaila kaninyo, nan, hangtud sa kahangturan.
Hunahunaa ang inyong patriyarkal nga panalangin nga usa ka espirituhanong GPS, ug dayon ang uban. Dili lang kini makatugot ninyo nga makahibalo kinsa kamo ug diin kamo; makatabang usab kini kaninyo sa pagsabut ngano ania kamo dinhi ug asa kamo paingon. Apan hinumdumi, ang giya gikan sa inyong patriyarkal nga panalangin nagkinahanglan nga gamiton ang samang mga baruganan nga nakapalihok sa Liahona ni Lehi: pagtagad ug kakugi (tan-awa sa 1 Nephi 16:28; Mosiah 1:16).
Pagtagad ug Kakugi
Unsa ang pagtagad ug kakugi? Ang pagtagad nagpasabut dili lamang sa pagpaminaw unsay gisulti apan sa paghatag usab og atensyon. Ang usa ka may kalabutan nga pulong mao ang magpatalinghug, nga nagpasabot sa pagpaminaw ug pagsunod Mao nga sa inyong patriyarkal nga panalangin sa pagserbisyo isip usa ka Liahona sa inyong kinabuhi, dili lamang inyong basahon kini, apan kinahanglan usab sundon ninyo kini.
“Ang mga kasulatan nga narekord sa tanang mga dispensasyon nagtudlo nga mopakita kita sa atong paghigugma sa Dios kon kita mopatalinghug sa Iyang mga sugo ug mosunod niini,” miingon si Presidente Russell M. Nelson, Presidente sa Korum sa Napulog Duha ka mga Apostoles. “Kini nga mga aksyon may kalabutan. Sa pagkatinuod, sa pinulongan nga Hebreohanon sa Daang Tugon sa kadaghanang higayon migamit sa sama nga termino alang sa duha pagpatalinghug (ngadto sa Ginoo) ug pagkamasulundon (sa Iyang mga pulong).”1
Ang kakugi mao ang laing paagi sa pagkat-on gikan sa inyong patriyarkal nga panalangin. Ang kakugi nagpasabut og mainampingon, maminaw, ug makanunayon. Kini nagpasabut nga determinado, dili mapakyas nga paningkamot. “Kini mao ang pagkat-on sa unsay gilauman sa Ginoo kaninyo, paghimo og plano aron sa pagbuhat niini, [ug] pagbuhat sa inyong plano,” miingon si Presidente Henry B. Eyring, Unang Magtatambag sa Unang Kapangulohan.2
Kon gusto ninyo ang inyong patriyarkal nga panalangin nga makatabang kaninyo, magtuon niini sa kinasingkasing, makugihon nga paningkamot; paghimo og mga plano sa pagbuhat niini; ug buhaton kadto nga mga plano.
Usa ka Ehemplo nga Pagasundon
Si Alma nga Batan-on nagtambag sa iyang anak nga lalaki si Helaman, miingon nga ang Liahona mao ang “matang”, o ehemplo, alang kanato sa pagsunod sa atong kaugalingong kinabuhi. Sa Alma 37: 8– 5 siya miingon:
-
Kini giandam sa Ginoo aron sa pagpakita, sama sa usa ka kompas, asa moagi sa biyahe.
-
Kini naglihok sumala sa hugot nga pagtuo diha sa Dios, nga nakapahimo sa “milagro nga nahimo pinaagi sa gahum sa Dios, matag adlaw.”
-
Kini gamiton sa “gagmay nga mga kahimoan” sa pagtuman sa “kahibulongan nga mga buhat.”
-
Kon si Lehi ug ang iyang pamilya makalimot sa pagbansay sa hugot nga pagtuo ug kakugi, dayon ang “kahibulongan nga mga buhat mihunong” ug “sila wala mouswag diha sa ilang panaw.”
-
Kon sila nalinga, sila wala mopanaw sa usa ka linaktod nga agianan.
-
Sayon ra ang pagpatalinghug sa mga pulong ni Kristo, nga nagpunting sa usa ka tul-id nga agianan.
Kining sama nga baruganan tinuod usab alang sa inyong patriyarkal nga panalangin. “Ang agianan giandam na, ug kon kita motan-aw kita mahimo nga mabuhi sa kahangturan” (Alma 37:46).