“Mabdos nga Dili Minyo nga mga Ginikanan,” Mga Kapanguhaan sa Pagpanambag (2020).

“Mabdos nga Dili Minyo nga mga Ginikanan,” Mga Kapanguhaan sa Pagpanambag.

Mabdos nga Dili Minyo nga mga Ginikanan

Ang mabdos nga dili minyo nga mga ginikanan mahimong makasinati og talagsaong mga hagit. Tingali makabantay ka niini nga sitwasyon sa bisan unsa nga ang-ang sa pagmabdos, ug ang mabdos nga dili minyo nga mga ginikanan tingali adunay lain-laing mga kabalaka ug lebel sa panabot bahin sa mga sangputanan nga ilang giatubang. Nag-atubang sila sa buluhaton sa paghukom sa kaugmaon alang sa ilang anak, ingon man usab sa ilang kaugalingong kaugmaon. Ang uban magminyo, ug ang uban mopasagop sa ilang anak, ug ang uban mohukom nga magpabiling nag-inusara nga ginikanan. Tabangi pinaagi sa gugma aron sa paghupay, awhaga, ug atimana ang mabdos nga dili minyo nga inahan o amahan. Ipadayag ang imong tinguha sa pagtabang, ug pasalamati ang indibidwal sa iyang kaandam sa pagpaapil kanimo.

Ang Family Services mohatag og libre nga konsultasyon alang sa mabdos nga dili minyo nga mga ginikanan ug makahatag usab og impormasyon mahitungod sa kaminyoon, pagpasagop, o pagka-single nga ginikanan. Awhaga ang mabdos nga dili minyo nga ginikanan sa pagpakigkita sa iyang bishop, kinsa makakonektar kaniya ngadto sa Family Services. Kon walay Family Services, ang imong bishop tingali adunay access ngadto sa dugang nga mga kapanguhaan sa pagpanambag.

Magtinguha sa Pagsabot

Samtang makig-istorya ka sa mabdos nga dili minyo nga mga ginikanan, siguroa ang pagpakita og gugma ug empatiya sama sa buhaton sa Manluluwas. Tungod kay ang matag sitwasyon managlahi ug ang kahimtang sa matag tawo magkalahi, pagmainampoon nga ikonsiderar ang pagpangutana og mga ingon niini pinaagi sa mabination ug mapinanggaon nga paagi aron matabangan ka nga mas makasabot sa mga kabalaka ug panginahanglan sa mabdos nga dili minyo nga ginikanan.

Unsa ang imong labing dakong mga kabalaka karon?
Unsa man ang imong mga plano alang sa imong kaugmaon?
Unsa ang imong mga plano alang sa kaugmaon sa imong anak?
Unsa ang imong kasamtangang relasyon karon ngadto sa laing ginikanan sa bata?
Unsa ang imong relasyon ngadto sa mga apohan ug sa ubang mga sakop sa pamilya sa imong anak?

Kon ikaw nakahibalo nga kini nga sitwasyon usa ka resulta sa pag-abuso, paglugos, kontaka ang sibil nga mga awtoridad. Usa ka help line [numero nga tawagan alang sa tabang] ang anaa usab sa imong bishop nga katawgan kon mag-atubang niini nga problema.

Tabangi ang Indibidwal

Samtang imong tabangan ang mabdos nga dili minyo nga ginikanan samtang maghimo siya og mga desisyon mahitungod sa kaugmaon, ikonsiderar ang paggamit sa pipila sa mosunod nga mga ideya.

Tabangi ang mabdos nga dili minyo nga ginikanan sa pagpangita og paglaom ug pagkaayo pinaagi sa Manluluwas ug sa Iyang Pag-ula.

Tabangi siya nga makasabot nga ang pagtubos ug ang kalig-on moabut gikan sa Manluluwas nga si Jesukristo.
Tabangi ang mabdos nga dili minyo nga ginikanan sa pagkakita sa iyang pagkatawo isip usa ka anak sa Langitnong mga Ginikanan ug mailhan ang iyang kaugalingon nga mga kalig-on, mga talento, ug mga abilidad.
Tabangi ang mabdos nga dili minyo nga ginikanan sa pagbati sa gugma sa Dios alang kaniya ug sa paghibalo nga ang Dios usa ka kauban diin siya makapangayo og tambag alang sa yutan-on nga panaw niini nga bata.

Awhaga ang mabdos nga dili minyo nga ginikanan sa pakigkita sa bishop.

Kon angay, dapita ang manganakay nga ginikanan sa pagribyu sa iyang patriyarkal nga mga panalangin alang sa direksyon ug kahupayan.

Tabangi siya sa pag-ila ug sa pagkonsiderar og mga kapilian sama sa single nga pagka ginikanan, pagpasagop, o pagminyo, kon angay.

Ang mga lider sa Simbahan ug mga higala dili gayud moawhag o mopugos sa manganakay nga ginikanan sa pagpili nga diha kaniya ang bata o itanyag ang bata alang sa pagpasagop.
Awhaga ang mabdos nga dili minyo nga ginikanan sa pagsulat sa mga positibo ug sa mga negatibo nga may kalabotan sa matag kapilian ug sa pagtimbangtimbang ug paghunahuna sa mga sangputanan sa matag kapilian, ilabi na alang sa bata.
Tambagi ang mabdos nga dili minyo nga ginikanan sa pagpangayo og tambag gikan niadtong mga makatabang kaniya sa mainampingon nga pagkonsiderar niini nga mga kapilian.
Awhaga ang mabdos nga dili minyo nga ginikanan sa pagtinguha og usa ka panalangin sa pagkapari.
Tabangi ang miyembro sa pagsabot nga siya pweding makadawat og personal nga inspirasyon, mga hunahuna, ug giya gikan sa Dios.

Suportahi ang Pamilya

Ang kasinatian sa usa ka mabdos nga dili minyo nga ginikanan makaapekto usab sa kinabuhi sa mga sakop sa iyang pamilya. Tinoa ang epekto diha sa pamilya ug awhaga ang pamilya sa paghisgot niana nga mga problema.

Awhaga ang tanan nga mga lider sa konseho sa ward nga aktibong moserbisyo sa manganakay nga mga ginikanan ug sa ilang mga pamilya.

Awhaga ang pamilya sa pagtinambagay mahitungod sa desisyon ug sa kataposan motahod sa desisyon sa mabdos nga dili minyo nga ginikanan.

Ang ubang mga sakop sa pamilya tingali dili mouyon sa desisyon nga himoon sa mabdos nga dili minyo nga ginikanan. Awhaga ang pamilya sa paghisgot sa epekto sa desisyon diha sa mga sakop sa pamilya, kon gikinahanglan tabangi sila sa pagsolbad niana nga mga problema.

Gamita ang mga Kapanguhaan sa Ward ug Stake

Ikonsiderar ang paghangyo sa mga lider sa ward o uban nga kasaligan nga mga indibidwal sa paghatag og padayong suporta, giya, ug tabang. Pangayo og pagtugot sa maong indibidwal sa dili pa hisgutan ang sitwasyon ngadto sa uban.

Pangita og kasaligan nga tawo nga mahimong mentor alang sa mabdos nga dili minyo nga ginikanan, ug awhaga ang duha nga regular nga magkita.

Ang mentor kinahanglan nga usa ka tawo nga komportabling ikauban sa maong tawo ug pwede nga usa ka tigpangalagad nga sister o brother.

Pangita og lokal nga mga kapanguhaan nga naghatag og mga serbisyo nga uyon sa mga baruganan sa ebanghelyo.

Ang mga kapanguhaan tingali maglakip og propesyonal nga mga magtatambag, mga programa o mga sentro, ug ubang mga ahensya.

Kon ang mabdos nga dili minyo nga mga ginikanan maghunahuna nga sila ang magpadako, awhaga sila sa pagbasa o pag-apil sa mga klase nga Strengthening the Family [Pagpalig-on sa Pamilya], Marriage and Family Relations [Kaminyoon ug mga Relasyon sa Banay] nga mga klase o sa pagbasa sa may kalabotan nga mga materyal kon wala ang mga klase.