4. Fakafoki Mai ʻo e Ongoongoleleí

4.1. Kuo fakafoki mai ʻe he ʻOtuá ʻEne ongoongoleleí ʻi he ngaahi ʻaho kimui ní ʻaki ʻEne toe fokotuʻu ʻa ʻEne ngaahi moʻoní, mafai ʻo e lakanga fakataulaʻeikí, mo e Siasí ʻi he māmaní. Naʻe kikiteʻi ʻe he kau palōfita ʻo e kuongamuʻá ʻa hono Fakafoki Mai ʻo e ongoongoleleí ʻi he ngaahi ʻaho kimui ní (vakai, ʻĪsaia 29:13–14; Ngāue 3:19–21).

4.2. Naʻe kamata ʻa hono Fakafoki Mai ʻo e ongoongoleleí ʻi he 1820. Naʻe hā ʻa e ʻOtua ko e Tamaí mo Hono ʻAlo ko Sīsū Kalaisí kia Siosefa Sāmita ko e tali ki he lotu ʻa Siosefá, pea naʻá Na ui ia ke hoko ko e Palōfita ki hono Fakafoki Mai ʻo e Ongoongoleleí (vakai, Siosefa Sāmita—Histōlia 1:15–20).

4.3. Naʻe ui ʻe he ʻOtuá ʻa Siosefa Sāmita ke ne hoko ko e fakamoʻoni ʻo e Kalaisi moʻuí ʻi he ngaahi ʻaho kimui ní. ʻI he hoko ʻa Siosefa Sāmita ko e Palōfita ʻo hono Fakafoki Mai ʻo e ongoongoleleí, naʻá ne liliu ʻa e Tohi ʻa Molomoná ʻaki ʻa e meʻafoaki mo e mālohi ʻo e ʻOtuá (vakai, T&F 135:3). ʻOku fakamoʻoni ʻa e Tohi ʻa Molomoná fakataha mo e Tohi Tapú kia Sīsū Kalaisi pea ʻoku ʻi ai ʻa e kakato ʻo e ongoongoleleí (vakai, ʻIsikeli 37:15–17). Ko e Tohi ʻa Molomoná ko ha fakamoʻoni foki ia ʻo e uiuiʻi fakaepalōfita ʻo Siosefa Sāmitá pea mo e moʻoni ʻo hono Fakafoki Mai ʻo e Ongoongoleleí.

4.4. Naʻe fekauʻi mai ʻe he ʻOtuá ha kau ʻāngelo talafekau ke fakafoki mai ʻa e Lakanga Taulaʻeiki Faka-ʻĒloné mo e Faka-Melekisētekí, ko ha konga ia ʻo hono Fakafoki Mai ʻo e ongoongoleleí. Peá Ne toki fakahinohino ke fokotuʻutuʻu foʻou Hono Siasí ʻi he funga ʻo e māmaní ʻi he ʻaho 6 ʻo ʻEpeleli 1830. Koeʻuhí naʻe fokotuʻu ʻe he ʻOtuá Tonu ʻa e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, “ko e siasi moʻoni mo moʻui pē taha [ia] ʻi he funga ʻo e māmaní kotoa” (T&F 1:30).

Ngaahi potufolofola fekauʻakí: ʻĀmosi 3:7; ʻEfesō 2:19–20; ʻEfesō 4:11–14; T&F 13:1; T&F 76:22–24; T&F 107:8

Ngaahi tefito fekauʻakí: Toluʻi ʻOtuá; Kau Palōfitá mo e Fakahaá

Hē mei he Moʻoní

4.5. Naʻe tupunga ʻa e fie maʻu ke Fakafoki Mai ʻa e ngaahi moʻoni ʻa e ʻOtuá, mafai ʻo e lakanga fakataulaʻeikí, mo e Siasí ʻi he ngaahi ʻaho kimui ní koeʻuhí ko e hē mei he moʻoní. ʻOku hoko ʻa e hē mei he moʻoní ʻi he taimi ʻoku tafoki ai ha toko taha pe niʻihi fakafoʻituitui mei he ngaahi moʻoni ʻo e ongoongoleleí.

4.6. Hili hono tutuki e Fakamoʻuí pea mo e mate ʻa ʻEne Kau ʻAposetoló, naʻe tafoki e kakai tokolahi mei he ngaahi moʻoni kuo fokotuʻu ʻe he Fakamoʻuí (vakai, 2 Tesalonaika 2:1–3). Naʻe fakahalaʻi pe mole ʻa e ngaahi tefitoʻi moʻoni ʻo e ongoongoleleí mo e ngaahi konga ʻo e folofola māʻoniʻoní. Naʻe hoko ha ngaahi liliu taʻe fakamafaiʻi ʻi he Siasí mo e ngaahi ouau ʻo e lakanga fakataulaʻeikí. Naʻe toʻo ʻe he ʻEikí ʻa e mafai mo e ngaahi kī ʻo e lakanga fakataulaʻeikí mei he māmaní koeʻuhí ko e lahi ko ʻeni e mafola ʻo e faiangahalá. Neongo naʻe ʻi ai e kakai lelei mo faitotonu tokolahi naʻa nau hū ki he ʻOtuá ʻo fakatatau mo e maama naʻa nau maʻú pea maʻu e tali ki heʻenau ngaahi lotú, ka naʻe ʻikai ha fakahā fakalangi ʻi he māmaní ʻe fakafou mai ʻi he kau palōfita moʻuí. ʻOku ʻiloa ʻa e vahaʻataimi ko ʻení ko e Hē Fakaʻaufuli mei he Moʻoní.

4.7. Naʻe hoko ha ngaahi vahaʻataimi kehe ʻo e hē lahi mei he moʻoní ʻi he kotoa ʻo e hisitōlia ʻo e māmaní.

Ngaahi tefito fekauʻakí: Kau Palōfitá mo e Fakahaá; Lakanga Fakataulaʻeikí mo e Ngaahi Kī ʻo e Lakanga Fakataulaʻeikí; Ngaahi Ouaú mo e Ngaahi Fuakavá

Ngaahi Kuonga Fakakosipelí

4.8. ʻI he taimi kuo tō ai e fānau ʻa e ʻOtuá ki ha tuʻunga ʻo e hē mei he moʻoní, kuó Ne tokoniʻi kinautolu ʻi he ʻofa ʻaki hono ui ʻo ha kau palōfita pea toe ʻoatu foʻou ʻa e ngaahi tāpuaki ʻo e ongoongoleleí ʻi he kuonga fakakosipelí ʻo fakafou ʻi Heʻene kau palōfitá ki he kakaí. ʻOku ui e vahaʻataimi ʻoku fakahā ai ʻe he ʻEikí ʻEne moʻoní, Hono mafai ʻo e lakanga fakataulaʻeikí, mo e ngaahi ouaú ko ha kuonga fakakosipeli. Ko ha vahaʻataimi ia ʻoku hanga ai ʻe he ʻEikí ʻo fakamafaiʻi ha tamaioʻeiki ʻe taha ʻi he māmaní ʻokú ne maʻu ʻa e lakanga fakataulaʻeiki māʻoniʻoní pea ʻokú ne maʻu ha tuʻutuʻuni fakalangi ke vahevahe ʻa e ongoongoleleí pea fakahoko hono ngaahi ouaú.

4.9. ʻOku fakaʻilongaʻi ʻa e ngaahi kuonga fakakosipelí ʻaki ʻa ʻĀtama, ʻĪnoke, Noa, ʻĒpalahame, Mōsese, Sīsū Kalaisi pea mo ha niʻihi kehe. Ko hono Fakafoki Mai ʻo e ongoongoleleí ʻi he ngaahi ʻaho kimui ní, ʻa ia naʻe kamata ʻe he ʻEikí ʻi he Palōfita ko Siosefa Sāmitá, ko e konga ia ʻo e sīpinga ko ʻeni ʻo e kuonga fakakosipelí.

4.10. Kuo feinga ʻa e ʻEikí mo ʻEne kau palōfitá ke fokotuʻu ʻa Saione ʻi he kuonga fakakosipeli kotoa pē. ʻOku ʻuhinga ʻa Saione ki he kakai fuakava ʻa e ʻEikí ʻa ia ʻoku maʻa honau lotó, faaitaha ʻi he anga- māʻoniʻoní, mo fetokangaʻiʻaki (vakai, Mōsese 7:18). ʻOku toe ʻuhinga foki ʻa e Saioné ki ha feituʻu ʻoku nofo ai ʻa e loto maʻá.

4.11. ʻOku tau moʻui he ʻahó ni ʻi he kuonga fakakosipeli fakaʻosí—ko e kuonga fakakosipeli ʻo e kakato ʻo e ngaahi kuongá. Ko e kuonga fakakosipeli pē ʻeni ʻe taha he ʻikai fakaʻosi ʻaki e hē mei he moʻoní. ʻE faifai pea fakafonu ʻe he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ʻa e māmaní kotoa pea ʻe tuʻu maʻu ia ʻo taʻengata (vakai, Taniela 2:44).

Ngaahi tefito fekauʻakí: Kau Palōfitá mo e Fakahaá; Lakanga Fakataulaʻeikí mo e Ngaahi Kī ʻo e Lakanga Fakataulaʻeikí; Ngaahi Ouaú mo e Ngaahi Fuakavá