6. Lakanga Fakataulaʻeikí mo e Ngaahi Kī ‘o e Lakanga Fakataulaʻeikí

6.1. Ko e lakanga fakataulaʻeikí ko e mālohi mo e mafai taʻengata ia ʻo e ʻOtuá. Naʻe fakatupu mo puleʻi ʻe he ʻOtuá ʻa e langí mo māmani ʻo fakafou ʻi he lakanga fakataulaʻeikí. ʻOkú Ne huhuʻi mo hakeakiʻi ʻEne fānaú ʻi he mālohi ko ʻení. ʻOku foaki e lakanga fakataulaʻeikí ki he kau mēmipa tangata moʻui taau ʻo e Siasí. ʻOku ʻatā ʻa e ngaahi tāpuaki ʻo e lakanga fakataulaʻeikí ki he fānau kotoa pē ʻa e ʻOtuá ʻo fakafou ʻi he ngaahi ouau mo e ngaahi fuakava ʻo e ongoongoleleí.

6.2. Ko e kī ʻo e lakanga fakataulaʻeikí, ko e totonu ia ki he tuʻunga fakapalesitenisií pe mālohi ʻoku foaki ʻe he ʻOtuá ki he tangatá ke puleʻi mo tataki ʻa e puleʻanga ʻo e ʻOtuá ʻi he māmaní (vakai, Mātiu 16:15–19). ʻOku fie maʻu ʻa e ngaahi kī ʻo e lakanga fakataulaʻeikí ki hono tataki ʻo hono malangaʻi ʻo e ongoongoleleí mo hono fakahoko ʻo e ngaahi ouau ʻo e faifakamoʻuí.

6.3. ʻOku maʻu ʻe Sīsū Kalaisi ʻa e kī kotoa pē ʻo e lakanga fakataulaʻeikí fekauʻaki mo Hono Siasí. Naʻá Ne ʻosi foaki ki Heʻene Kau ʻAposetoló ʻa e ngaahi kī kotoa ʻoku fekauʻaki mo e puleʻanga ʻo e ʻOtuá he māmaní. Ko e Palesiteni ʻo e Siasí toko taha pē ia kuo ʻosi fakamafaiʻi ke ne ngāue ʻaki ʻa e kotoa e ngaahi kī ʻo e lakanga fakataulaʻeikí. ʻOku maʻu foki ʻe he kau palesiteni temipalé, misioná, siteikí, kau pīsopé, mo e kau palesiteni fakakōlomú ʻa e ngaahi kī ʻo e lakanga fakataulaʻeikí ʻa ia ʻoku fakaʻatā ai ke nau tokangaʻi mo tataki ʻa e ngāue kuo fekauʻi ke nau faí.

6.4. Ko kinautolu kotoa ʻoku ngāue ʻi he Siasí—ʻa e tangata mo fefine—ʻoku uiuiʻi kinautolu ʻi he malumalu ʻo e tataki ʻa e tokotaha ʻokú ne maʻu ʻa e ngaahi kī ʻo e lakanga fakataulaʻeikí (vakai, T&F 42:11). Naʻe akoʻi ʻe ʻEletā Tāleni H. ʻOakesi ʻo e Kōlomu ʻo e Kau ʻAposetolo ʻe Toko Hongofulu Mā Uá, “Ko hai pē ʻoku ngāue ʻi ha tuʻunga pe uiuiʻi ne maʻu mei ha taha ʻokú ne maʻu ʻa e ngaahi kií, ʻokú ne ngāue ʻaki ʻe ia e mafai ʻo e lakanga fakataulaʻeikí ʻi hono fakahoko hono ngaahi fatongia kuo vahe angé” (“Ko e Ngaahi Kī mo e Mafai ʻo e Lakanga Fakataulaʻeikí,” Ensign pe Liahona, Mē 2014, 51). ʻE toki lava pē ke ngāue ʻaki e mālohi ʻo e lakanga fakataulaʻeikí ʻi he māʻoniʻoni (vakai, T&F 121:36, 41–42).

6.5. ʻOku maʻu ʻe kinautolu kuo fakanofo ki he Lakanga Taulaʻeiki Faka-ʻĒloné mo e Faka-Melekisētekí ʻa e fakapapau mo e fuakava ʻo e lakanga fakataulaʻeikí. Kapau te nau fakahoko honau fatongiá pea faivelenga ʻo tali ʻa e ʻEikí mo ʻEne kau tamaioʻeikí, te nau maʻu ʻa e ngaahi tāpuaki ʻo e hakeakiʻí. ʻOku talaʻofa foki ki he houʻeiki fafiné ʻa e ngaahi tāpuaki ʻo e hakeakiʻí ʻi heʻenau tauhi faivelenga ki he ngaahi fuakava kuo nau fai mo e ʻEikí.

Ngaahi potufolofola fekauʻaki: Sione 15:16; ʻEfesō 2:19–20

Ngaahi tefito fekauʻakíFakafoki Mai ʻo e ongoongoleleí; Kau Palōfitá mo e Fakahaá; Ngaahi Ouaú mo e Ngaahi Fuakavá

Lakanga Taulaʻeiki Faka-ʻĒloné

6.6. ʻOku faʻa ui ʻa e Lakanga Taulaʻeiki Faka-ʻĒloné ko e lakanga fakataulaʻeiki teuteuʻanga. ʻOku maʻu ʻe he Lakanga Taulaʻeiki Faka-ʻĒloné “ ʻa e ngaahi kī ʻo e tauhi mai ʻa e kau ʻāngeló, pea mo e ongoongolelei ʻo e fakatomalá, pea mo e papitaisó” (T&F 13:1). ʻOku teuteuʻi, tāpuakiʻi, mo fakahoko ʻa e sākalamēnití ʻi he ngāue ʻa e lakanga fakataulaʻeiki ko ʻení. Ko e ngaahi lakanga ʻo e Lakanga Taulaʻeiki Faka-ʻĒloné ko e tīkoni, akonaki, taulaʻeiki mo e pīsope.

Lakanga Taulaʻeiki Faka-Melekisētekí

6.7. Ko e Lakanga Taulaʻeiki Faka-Melekisētekí ko e lakanga fakataulaʻeiki māʻolunga angé, pe, lahi ange ia pea ʻokú ne “maʻu ʻa e totonu ʻo e lakanga fakapalesitení, pea ʻokú ne maʻu ʻa e mālohi mo e mafai ki he ngaahi lakanga kotoa pē ʻi he siasí ʻi he ngaahi kuonga kotoa pē ʻo e māmaní, ke fakahoko ʻa e ngaahi meʻa fakalaumālié” (T&F 107:8). ʻOku fakahoko kotoa ʻa e ngaahi tāpuaki, ouau, fuakava, mo e ngaahi houalotu ʻo e Siasí ʻi he mafai ʻo e Palesiteni ʻo e Siasí, ʻa ia ko e Palesiteni ʻo e Lakanga Taulaʻeiki Faka-Melekisētekí. Naʻe foaki e lakanga fakataulaʻeiki ko ʻení kia ʻĀtama pea kuo ʻi he māmaní ia he taimi pē ne fakahaaʻi mai ai ʻe he ʻEikí ʻa ʻEne ongoongoleleí. ʻOku ʻi he Lakanga Taulaʻeiki Faka-Melekisētekí ʻa e ngaahi tuʻunga ʻo e kaumātuʻá, taulaʻeiki lahi, pēteliaké, Fitungofulú mo e ʻAposetoló.

Potufolofola fakafekauʻakí: ʻEfesō 4:11–14