9. Ngaahi Fekaú

9.1. Ko e Ngaahi Fekaú ko e ngaahi fono mo e ngaahi fie maʻu ʻoku ʻomi ʻe he ʻOtuá ke tokoniʻi kitautolu ke tau fakalakalaka mo hoko ʻo hangē ko Iá. Ko e ngaahi fekaú ko hano fakahaaʻi ia ʻo e ʻofa ʻa e ʻOtuá kiate kitautolú. ʻOku tau fakahaaʻi ʻetau ʻofa kiate Iá ʻi heʻetau tauhi ʻEne ngaahi fekaú (vakai, Sione 14:15). ʻE ʻomi maʻu pē ʻa e fiefiá mo e ngaahi tāpuakí mei he ʻEikí ʻi hono tauhi e ngaahi fekaú (vakai, Mōsaia 2:41; ʻAlamā 41: 10). ʻE ʻikai ke tuku mai ʻe he ʻOtuá ha fekau taʻe te Ne teuteu ha founga ke tau talangofua ki ai (vakai, 1 Nīfai 3:7).

9.2. Ko e ongo tefitoʻi fekau lalahi mo mahuʻinga ʻe uá ko e “ʻofa ki [he ʻEikí] ko ho ʻOtuá ʻaki ho laumālié kotoa, mo hoʻo moʻuí kotoa, mo ho lotó kotoa. … Pea … ʻofa ki ho kaungāʻapí ʻo hangē pē ko koé” (vakai, Mātiu 22:36–39). Te tau lava ʻo ʻofa mo tauhi ki he ʻOtuá ʻaki ʻetau ʻofa mo tokoniʻi e niʻihi kehé (vakai, Mōsaia 2:17; Molonai 7:45, 47 – 48).

9.3. Ko e taha ʻo e ʻuluaki fekau naʻe tuku ki he tangatá ko e tauhi ʻa e ʻaho Sāpaté ke māʻoniʻoní. ʻOku fekauʻi ʻe he ʻOtuá ki heʻene fānaú ke nau fakaʻapaʻapa kiate Ia ʻaki hono fai Hono finangaló kae ʻikai ko haʻatautolú ʻi he ʻaho Sāpaté, pea ʻokú Ne talaʻofa mai ʻa e ngaahi tāpuaki maʻongoʻonga kiate kinautolu ʻoku nau tauhi Hono ʻahó ke māʻoniʻoní (vakai, ʻĪsaia 58: 13–14).

9.4. ʻOku hoko ʻa e Fekau ʻe Hongofulú ko ha konga mahuʻinga ʻo e ongoongoleleí pea ko e ngaahi tefitoʻi moʻoni taʻengata ia ʻoku fie maʻu ki hotau hakeakiʻí (vakai, ʻEkesōtosi 20:3–17). Naʻe fakahā ia ʻe he ʻEikí kia Mōsese ʻi he kuongamuʻá, pea kuó Ne toe ʻomi ia ʻi ha ngaahi fakahā ʻi he ngaahi ʻaho kimui ní.

9.5. ʻOku kau ʻi he ngaahi fekau ʻa e ʻOtuá ʻa e lotu fakaʻahó, ako e folofola ʻa e ʻOtuá, fakatomalá, talangofua ki he fono ʻo e angamaʻá, totongi vahehongolulu kakató (vakai, Malakai 3:8–10), ʻaukaí (vakai, ʻĪsaia 58:6–7 e Potó (vakai, T&F 89:18–21), mo hono akoʻi ʻo e ongoongoleleí ki he niʻihi kehé (vakai, Mātiu 5:14–16; T&F 18:15–16).

Ngaahi potufolofola fekauʻakí: Sēnesi 39:9; 2 Tīmote 3:15–17; Sēmisi 1:5–6; 2 Nīfai 32:3; 2 Nīfai 32:8–9; Mōsaia 18:8–10; ʻAlamā 39:9; 3 Nīfai 18:15, 20–21; T&F 58:42–43; T&F 82:10

Ngaahi tefito fekauʻakí: Maʻu ha ʻIlo Fakalaumālie; Ko e Fakalelei ʻa Sīsū Kalaisí: Fakatomalá; Ngaahi Ouaú mo e Ngaahi Fuakavá