8. Nofomalí mo e Fāmilí

8.1. Ko e mali ʻi ha vā ʻo ha tangata mo ha fefine naʻe tuʻutuʻuni ia ʻe he ʻOtuá, pea ko e fāmilí ko e uho ia ʻo ʻEne palani ʻo e fakamoʻuí mo ʻetau fiefiá (vakai, Sēnesi 2:24; T&F 49:15–17). ʻE toki lava pē ha tangata mo ha fefine ʻo fakahoko hona tuʻunga fakalangí mo e meʻa taʻengata te na malavá ʻi heʻena fakahoko [ʻi he temipalé] mo tauhi faivelenga e fuakava ʻo e mali fakasilesitialé (vakai, 1 Kolinitō 11:11; T&F 131:1–4).

8.2. Kuo fekau ʻe he ʻOtuá ʻa ʻEne fānaú ke nau fakatokolahi mo fakakakai ʻa e māmaní (vakai, Sēnesi 1:28). ʻOku toki fakaʻaongaʻi pē ʻa e ngaahi mālohi toputapu ʻo e fakatupú ʻi he vahaʻa ʻo ha tangata mo ha fefine kuó na ʻosi mali fakalao ko ha husepāniti mo e uaifi (vakai, Sēnesi 39: 9; ʻAlamā 39:9). ʻOku ʻi ai ha fatongia toputapu ʻo e husepānití mo e uaifí ke na feʻofaʻaki mo fetauhiʻaki pea ki heʻena fānaú foki. ʻOku totonu ke ʻohake ʻe he mātuʻá ʻenau fānaú ʻi he ʻofa mo e māʻoniʻoni pea tokonaki maʻa ʻenau ngaahi fie maʻu fakatuʻasinó mo fakalaumālié.

8.3. Ko e fiefia ko ia ʻi he moʻui fakafāmilí ʻoku meimei ke toki aʻusia pē ia ʻi he taimi kuo langa ai ʻa e fāmilí ʻi he ngaahi akonaki ʻa e ʻEiki ko Sīsū Kalaisí. Tuʻunga ʻi ha palani fakalangi, ʻoku ʻa e ngaahi tamaí, ke nau puleʻi honau fāmilí ʻi he ʻofa mo e māʻoniʻoni pea tokonaki maʻá e ngaahi fie maʻu ʻo e moʻuí. Ko e tefitoʻi fatongia ʻo e ngaahi faʻeé ke lehilehiʻi hake ʻa ʻenau fānaú. ʻI he ngaahi fatongia toputapú ni, ʻoku haʻisia ai ʻa e ngaahi tamaí mo e ngaahi faʻeé ke nau fetokoniʻaki ko ha kaungā-ngāue tuʻunga tatau.

8.4. ʻOku malava ʻe he palani fakalangi ʻo e fiefiá ke hoko atu ʻa e ngaahi vā fetuʻutaki fakafāmilí ke ʻoua naʻa ngata pē ʻi faʻitoka. Naʻe fakatupu ʻa e māmaní pea fakahā mai e ongoongoleleí koeʻuhí ke lava ʻo faʻu, silaʻi, pea hakeakiʻi e fāmilí ki he taʻengatá. ʻE lava ke tau fakahoko e ngaahi ouau mo e ngaahi fuakava ʻo e ongoongoleleí maʻa ʻetau ngaahi kuí ʻo fakafou ʻi he hisitōlia fakafāmilí mo e ngāue fakatemipalé (vakai, Malakai 4:5– 6).

(Toʻo mei he Ko e Fāmilí: Ko ha Fanongonongo ki Māmani,” Ensign pe Liahona, Nōvema 2010, 129.)

Ngaahi potufolofola fekauʻakí: Mōsese 1:39; Sēnesi 1:26–27; ʻEkesōtosi 20:3–17; Mātiu 16:15–19; Sione 17:3; 1 Kolinitō 6:19–20; 2 Nīfai 2:22–25; Mōsaia 2:41; ʻAlamā 41:10; T&F 84:20–22

Ngaahi tefito fekauʻakí: Ko e Palani ʻo e Fakamoʻuí; Ngaahi Fekaú