5. Kau Palōfitá mo e Fakahaá

5.1. Ko e palōfitá ko ha tokotaha kuo ui ʻe he ʻOtuá ke lea Maʻana (vakai, Selemaia 1:4–5; ʻĀmosi 3:7; Sione 15:16; T&F 1:37–38). ʻOku fakamoʻoni ʻa e kau palōfitá kia Sīsū Kalaisi mo akoʻi ʻEne ongoongoleleí. ʻOku nau fakaʻilo mai ʻa e finangalo mo e ʻulungaanga totonu ʻo e ʻOtuá. ʻOku nau fakahalaʻi ʻa e faiangahalá, fakatokanga ki hono ngaahi nunuʻá, mo tokoniʻi kitautolu ke tau fakeʻehiʻehi mei he kākaá (vakai, ʻIsikeli 3:16–17; ʻEfesō 4:11–14). ʻOku nau kikiteʻi he taimi ʻe niʻihi ha ngaahi meʻa ʻe hoko ʻi he kahaʻú. ʻOku malava ʻe he kau palōfitá ke fakahoko e ngaahi fatongia ko ʻení koeʻuhí ʻoku nau maʻu e mafai mo e fakahā mei he ʻOtuá.

5.2. Ko e fakahaá ko e fetuʻutaki ia mei he ʻOtuá ki Heʻene fānaú. ʻOku hoko mai e lahi taha ʻo e ngaahi fakahaá ʻi he ngaahi ueʻí, fakakaukaú, mo e ngaahi ongo mei he Laumālie Māʻoniʻoní. ʻE lava foki ke hoko mai ʻa e fakahaá ʻi he meʻa-hā-maí, misí mo e ʻaʻahi mai ʻa e kau ʻāngeló.

5.3. Lolotonga e ngāue ʻa e ʻEikí ʻi he matelié pea toe pehē pē ʻi hotau kuongá, naʻá Ne fokotuʻutuʻu Hono Siasí ʻi he makatuʻunga ʻo e kau palōfitá mo e kau ʻaposetoló (vakai, ʻEfesō 2:19–20). Ko e Palesiteni ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ko e palōfita ia ʻa e ʻOtuá ki he kakai kotoa pē ʻo e māmaní he ʻahó ni. ʻOku tau poupouʻi e Palesiteni ʻo e Siasí ko ha palōfita, tangata kikite mo e tangata maʻu fakahā pea ko ia pē ʻi he māmaní ʻokú ne maʻu e fakahā ke tataki ʻaki e Siasí kotoa. Kapau te tau faivelenga ʻi hono maʻu mo talangofua ki he ngaahi akonaki ʻa e Palesiteni ʻo e Siasí, ʻe tāpuekina kitautolu ʻe he ʻOtuá ke tau ikunaʻi ʻa e kākaá mo e koví (vakai, T&F 21:4–6). ʻOku tau poupouʻi foki e ongo tokoni ʻi he Kau Palesitenisī ʻUluakí mo e kau mēmipa ʻo e Kōlomu ʻo e Kau ʻAposetolo ʻe Toko Hongofulu Mā Uá ko ha kau palōfita, kau tangata kikite mo e kau tangata maʻu fakahā.

5.4. ʻOku ʻi he folofolá—ʻa e Tohi Tapú, Tohi ʻa Molomoná, Tokāteline mo e Ngaahi Fuakavá pea mo e Mataʻitofe Mahuʻingá—ha ngaahi fakahā ne fakafou mai ʻi he kau palōfita ʻo e kuongamuʻá mo e ʻaho kimui ní. ʻI heʻetau ako e lea ʻa e kau palōfitá, ʻe lava ke tau ako ai ʻa e moʻoní pea maʻu ha fakahinohino.

5.5. Neongo ʻoku ʻomi ʻe he ʻOtuá ha fakahā ʻo fakafou mai ʻi he kau palōfitá ke tataki ʻaki ʻEne fānaú, ka ʻe lava ke maʻu ʻe he niʻihi fakafoʻituituí ha fakahā ke tokoni kiate kinautolu ʻi heʻenau ngaahi fie maʻu paú, fatongiá, mo e ngaahi fehuʻí pea ke tokoni ke fakamālohia ʻenau fakamoʻoní. Ka, he ʻikai teitei fepaki e ueʻi fakalaumālie fakatāutaha mei he ʻEikí mo e fakahā ʻoku ʻomi ʻe he ʻOtuá ki Heʻene kau palōfitá.

Ngaahi potufolofola fekauʻakí: ʻĒpalahame 3:22–23; Mātiu 16:15–19; 2 Tīmote 3:15–17; 2 Nīfai 32:3; T&F 8:2–3; T&F 76:22–24

Ngaahi tefito fekauʻakí: Maʻu ʻo e ʻIlo Fakalaumālié; Lakanga Fakataulaʻeikí mo e Ngaahi Kī ʻo e Lakanga Fakataulaʻeikí