Talateu ki he Fakataukei Fakatokāteliné

malanga ʻa e toʻu tupú

ʻI he Tohi ʻa Molomoná, naʻe akoʻi ʻe he palōfita ko Hilamaní ki hono ongo fohá, “ʻOku makatuʻunga ʻi he maka ʻo hotau Huhuʻí, ʻa ia ko Kalaisi ko e ʻAlo ʻo e ʻOtuá, kuo pau ke mo langa ai homo makatuʻungá” (Hilamani 5:12). ʻOku hanga ʻe hono langa ha makatuʻunga ʻia Sīsū Kalaisí—ʻo kau ai e mahino, tui, mo moʻui ʻo fakatatau mo ʻEne tokāteliné—ʻo fakaloloto ange ʻetau uluí mo e tukupaá ʻi heʻetau hoko ko ʻEne kau ākongá, maluʻi kitautolu mei he ngaahi ivi tākiekina ʻa e filí, pea tokoniʻi kitautolu ke faitāpuekina e niʻihi kehé.

Ko e taha ʻo e ngaahi founga te tau lavaʻi ai ʻení ko hono ako fakahokohoko e folofolá fakataha mo e kalasí. Ko e founga ʻe taha ʻoku tau langa ai hotau makatuʻungá ʻia Sīsū Kalaisi mo ʻEne tokāteliné ʻoku fakafou ia ʻi he ngāue ʻoku ui ko e Fakataukei Fakatokāteline.

ʻOku fakatefito e Fakataukei Fakatokāteliné ʻi ha ola ʻe ua:

1. Ako mo fakaʻaongaʻi e ngaahi tefitoʻi moʻoni fakalangí ki hono maʻu ʻo e ʻilo fakalaumālié.

   Kuo fakahā mai ʻe he Tamai Hēvaní ʻa e ngaahi tefitoʻi moʻoni ki hono maʻu ʻo e ʻilo fakalaumālié. ʻOku kau ʻi he ngaahi tefitoʻi moʻoni ko ʻení ʻa e ngāue ʻi he tuí, vakaiʻi e ngaahi fakakaukau mo e ngaahi fehuʻi ʻoku ʻi ai ha fakakaukau taʻengata, pea fekumi ki ha mahino lahi ange ʻo fakafou ʻi he ngaahi maʻuʻanga tokoni fakalangi kuo tuku atú. ʻOku tau fakatupulaki ʻa e fakataukei fakatokāteliné ʻi heʻetau moʻui ʻaki e ngaahi tefitoʻi moʻoni ko ʻení lolotonga e kalasí pea ʻi tuʻa ʻi he kalasí mo fekumi ki he tali ki ha ngaahi fehuʻi fakatokāteline mo fakahisitōlia ʻi ha founga ʻoku nau fakaafeʻi ai ʻa e Laumālie Māʻoniʻoní ke fakamālohia ʻetau tui kia Sīsū Kalaisi mo ʻEne tokāteliné.

2. Ko e taukei ʻi he tokāteline ʻo e ongoongolelei ʻo Sīsū Kalaisí pea mo e ngaahi potufolofola ʻa ia ʻoku akoʻi ai e tokāteline ko iá.

   ʻOku aʻusia ʻa e ola ʻo e Fakataukei Fakatokāteline ko ʻení ʻaki hono:

   1. Fakatupulaki ha mahino loloto ange ki he ngaahi tefito fakatokāteline ʻe hiva ko ʻení:

      • Ko e Toluʻi ʻOtuá

      • Ko e palani ʻo e fakamoʻuí

      • Ko e Fakalelei ʻa Sīsū Kalaisí

      • Ko e Fakafoki Mai ʻo e Ongoongoleleí

      • Kau palōfitá mo e fakahaá

      • Lakanga fakataulaʻeikí mo e ngaahi kī ‘o e lakanga fakataulaʻeikí

      • Ngaahi ouaú mo e ngaahi fuakavá

      • Nofomalí mo e fāmilí

      • Ngaahi Fekaú

   2. Maʻu e mahino ki he ngaahi fakamatala mahuʻinga ʻo e tokateliné ʻoku maʻu ʻi he konga “Ko e Maʻu ʻo e ʻIlo Fakalaumālié” ʻi he fakamatalá ni pea ʻi he ngaahi tefito fakatokāteline ʻe hivá.

   3. ʻIloʻi e founga ʻoku akoʻi ai ʻa e ngaahi fakamatala mahuʻinga ʻo e tokāteliné ʻi he ngaahi potufolofola fakataukei fakatokāteliné mo e malava ke manatuʻi mo ʻiloʻi ʻa e ngaahi potufolofola ko iá.

   4. Fakamatalaʻi ke mahino ʻa e tokāteline takitaha ʻo fakaʻaongaʻi e ngaahi potufolofola fakataukei fakatokāteline fekauʻaki mo iá.

   5. Fakaʻaongaʻi e tokāteline ʻo e ongoongolelei ʻo Sīsū Kalaisí ʻi heʻetau ngaahi fili fakaʻahó pea mo ʻetau tali ki he ngaahi palopalema mo e ngaahi fehuʻi fakatokāteline, fakasōsiale, mo fakahisitōliá.